1. Vim li cas peb ho tsa tes teb thaum mus kev sib txoos?

 VIM li cas peb ho mus sib txoos ua ke? Twb yog peb mus pe hawm kom tau qhuas Yehauvas. (Phau Ntawv Nkauj 26:12; 111:1) Tsis tas li ntawd, peb sib txoos ua ke xwv ib leeg thiaj txhawb tau ib leeg nyob rau lub caij nyuaj siab ntxhov plawv no. (1 Thexalaunikes 5:11) Yog li ntawd, thaum peb tsa tes teb rau hauv tej kev sib txoos ces twb yog peb ua li ob yam tau hais tas los no.

2. Thaum twg zoo rau peb tsa tes teb?

² Ib lub lim tiam twg, peb yeej muaj lub cij fim los tsa tes teb rau hauv tej kev sib txoos. Xws li txoj Kev Sib Txoos 1, peb tsa tes teb rau ntu Tshawb Nrhiav Tej Lus Nyiaj Lus Kub, Lub Koom Txoos Kev Kawm Vajlugkub, thiab lwm zaj uas muaj lus nug thiab lus teb. Hos txoj Kev Sib Txoos 2, peb tsa tes teb tau rau thaum kawm Phau Tsom Faj.

3. Muaj li cas thiaj ua rau peb tsis kam tsa tes teb, thiab Henplais 10:24, 25 ho pab tau peb li cas?

³ Peb yeej xav qhuas Yehauvas thiab txhawb cov kwv tij nkauj muam lub dag zog. Tiam sis muaj ob yam ua rau peb tsis kam tsa tes teb. Tej zaum peb kuj txaj muag teb los sis peb xav teb los ho hu tsis txog. Yam uas yuav pab tau peb yog tus tub txib Povlauj tsab ntawv sau mus rau cov ntseeg uas yog neeg Henplais. Thaum Povlauj hais txog qhov sawv daws tuaj sib txoos ua ke, nws xav kom peb nco ntsoov txog  qhov uas ib tug “txhawb ib tug lub zog.” (Nyeem Henplais 10:24, 25.) Peb yuav tsis txaj muag teb yog peb nco ntsoov tias peb tej lus teb yuav txhawb tau lwm tus lub zog. Yog lwm tus hauv lub koom txoos teb es peb tsis tau teb ua luaj twg los, cia li nrog lawv zoo siab.​—1 Petus 3:8.

4. Nyob rau hauv zaj kawm no yuav piav txog peb lub ntsiab twg?

⁴ Nyob rau hauv zaj kawm no yuav piav seb peb ib leeg yuav txhawb ib leeg lub zog li cas thaum lub koom txoos me me es tsis muaj neeg tsa tes teb pes tsawg. Ces tom qab ntawd peb ho mus piav txog tej lub koom txoos loj loj uas muaj neeg tsa tes coob heev. Txuas ntxiv ntawd yuav piav txog seb yuav teb li cas thiaj txhawb tau lwm tus lub zog.

5. Peb ib leeg txhawb tau ib leeg li cas thaum tib neeg tseem tuaj tsawg tsawg?

⁵ Thaum lub koom txoos tseem me me los sis tseem yog ib pawg xwb, tsis tshua muaj neeg tsa tes teb. Muaj qee lub sij hawm, tus coj yuav tau ua siab ntev tos ces mam pom ib tug tsa tes teb. Tej zaum yuav zoo yam li txoj kev sib txoos laug ntev ntev tsis txawj tag thiab ua rau sawv daws tsis tuaj zog. Ua li koj ua tau li cas los mus pab? Qhov koj ua tau yog nco ntsoov tsa tes teb xwv thiaj pab tau lwm tus kom tsa tes los teb tib yam nkaus.

6-7. Yuav ua li cas peb thiaj tsis ntshai tsa tes teb?

⁶ Tej zaum thaum koj xav txog tsa tes yuav teb xwb, koj twb tshee tos lawm. Muaj coob leej ntau tus los kuj tshee tib yam nkaus. Yuav kom txhawb tau cov kwv tij nkauj muam lub dag zog, koj yuav tau ua lub siab tawv qhawv tsa tes teb. Muaj tej yam twg yuav pab tau koj?

⁷ Mus nyeem cov yam ntxwv uas muab sau tseg nyob rau hauv Phau Tsom Faj. b Xws li, npaj ua ntej. (Pajlug 21:5) Yog peb npaj zoo zoo kom paub tias hnub ntawd hais li cas rau li cas ces yuav yooj yim rau peb tsa tes teb dua. Tsis tas li ntawd, nco ntsoov teb tsawg tsuag ob peb los xwb. (Pajlug 15:23; 17:27) Yog peb teb ob peb los xwb ces peb yuav tsis tshee thiab cov kwv tij nkauj muam thiaj yuav nkag siab peb tus nru lus. Yog tias peb twb npaj ua ntej thiab paub zaj uas tham ntawd zoo zoo lawm ces peb yuav hais tawm plaws hauv nruab siab tuaj.

8. Yehauvas saib tej uas koj ua zoo li cas?

⁸ Yog tias koj twb ua raws li tau hais tas los no tiam sis koj lub siab tsuas kheev koj teb ib los sis ob zaug xwb, nco ntsoov tias Yehauvas yeej ris txiaj ntsig rau qhov uas koj ua npaum li koj ua tau. (Lukas 21:1-4) Yehauvas yeej tsis kom peb ua ntau tshaj li qhov peb ua tau. (Filipis 4:5) Npaj siab tias koj yuav ua li cas rau li cas, npaj tias koj yuav ua kom tiav rau thaum twg, thiab thov Yehauvas kom koj muaj lub siab tus. Tej zaum qhov ntawd yuav yog tsa tes teb tsawg tsuag ob peb los.

9. Vim li cas ho nyuaj tsa tes teb thaum lub koom txoos loj loj?

⁹ Yog tias koj lub koom txoos muaj cov ntseeg coob coob ces tej zaum tus coj yuav  hu tsis txog koj. Xws li muaj ib tug muam hu ua Dawb kheev kheev tsa tes teb. c Nws saib qhov uas tsa tes teb ntawd yog ib feem ntawm nws txoj kev pe hawm Yehauvas, txhawb lwm tus lub zog, thiab tsav nws txoj kev ntseeg rau tej lus uas nyob hauv phau Vajlugkub. Tiam sis thaum nws mus nyob rau lub koom txoos loj loj, tus coj tsis tshua hu nws pes tsawg lawm thiab tej thaum nws twb tsis tau teb hlo li. Dawb hais tias: “Kuv chim chim vim hais tias zoo yam li kuv twb tsis muaj ib feem xyuam dab tsi. Thaum kuv tsa tes teb npaum li cas los tsis hu mas ua rau kuv xav tias tus coj ntawd txhob txwm tsis xav hu kuv xwb.”

10. Yuav ua li cas thiaj hu txog peb?

¹⁰ Koj puas xav tib yam li Dawb thiab? Yog tias koj xav li ntawd ces tej zaum yuav ua rau koj tsis kam tsa tes teb lawm, tsuas tuaj zaum mloog xwb. Tsis txhob tag kev cia siab. Tseem tshuav qho yam uas koj ua tau thiab. Tej zaum zoo rau koj npaj lus teb kom ntau li ntau tau ua ntej txhua txoj kev sib txoos. Yog tus coj hu tsis txog koj thaum thawj los tom qab tej zaum nws kuj yuav hu txog koj. Thaum koj npaj rau Phau Tsom Faj, ua tib zoo xav seb txhua nqe hais dhos rau lub ntsiab loj li cas rau li cas. Yog koj ua yam li no ces koj yuav paub teb rau zaj kawm ntawd. Txuas ntxiv ntawd, npaj kom zoo zoo xwv koj thiaj paub teb rau cov nqe uas muaj ntsis cov, vim sawv daws tsis tshua kam teb rau cov nqe ntawd. (1 Kauleethaus 2:10) Yog tias koj ua raws li hais no lawm los haj tseem hu tsis txog koj ces mus cuag tus coj ua ntej kev sib txoos thiab qhia rau nws paub tias koj xav teb nqe twg rau nqe twg.

11. Cov lus nyob rau hauv Filipis 2:4 txhawb kom peb ua dab tsi?

¹¹ Nyeem Filipis 2:4. Vajtswv tshoov tus tub txib Povlauj siab kom txhawb cov ntseeg ua haum lwm tus siab thiab. Nqe Vajlugkub no txhawb tau peb kom nco ntsoov  tias txhua tus yeej xav teb ib yam li peb thiab.

12. Ib yam uas yuav txhawb tau lwm tus thaum tuaj sib txoos yog dab tsi? (Saib daim duab.)

¹² Muab xav li no tias thaum koj tseem sam sim nrog koj cov phooj ywg sib txuas lus, koj puas hais tsheej zag ua rau lwm tus tsis tau hais? Koj yeej tsis ua li ntawd ib zaug li vim koj xav mloog lawv hais lus thiab. Ib yam uas yuav pab txhawb tau cov kwv tij nkauj muam yog cia lawv teb thiab. (1 Kauleethaus 10:24) Cia peb mus tham txuas ntxiv seb peb ua li ntawd tau li cas.

13. Yuav ua li cas peb thiaj cia lwm tus tsa tes teb?

¹³ Ib qho uas peb cia tau lwm tus tsa tes teb yog peb tsis txhob teb ntev ntev. Cov txwj laus thiab cov ntseeg uas paub tab yuav tau tso yam ntxwv rau lwm tus xyaum txog qhov no. Txawm hais tsawg tsuag xwb los tsis txhob hais ntau ntau lub ntsiab. Yog koj muab cov ntsiab lus hais tag lawm ces yuav tsis muaj dab tsi rau lwm tus hais ntxiv. Nyob rau hauv nqe no hais txog ob lub ntsiab lus xws li tsis txhob teb ntev ntev thiab tsis txhob hais ntau ntau lub ntsiab. Yog koj yog thawj tug uas teb, nco ntsoov tham txog ib lub ntsiab lus xwb.

14. Peb yuav tau nco ntsoov li cas xwv peb thiaj tsa tes li tsim nyog xwb? (Saib daim duab.)

¹⁴ Yog peb nyiam tsa tes teb ntau ntau no los yuav tau ua zoo xav txog lwm tus thiab. Yog peb pheej ib sij tsa tes ib lwm, yuav ua rau tus coj xav tias nws yuav tsum tau hu peb ces kuj ua rau lwm tus teb tsis tau. Tsis tas li ntawd, yuav ua rau lwm tus tsis xav tsa tes teb lawm thiab.​—Tej Lus Qhia 3:7.

15. (1) Yog tias hu tsis txog peb, peb yuav ua li cas? (2) Tus coj yuav tau xam pom sawv daws li cas? (Saib lub ntsiab “ Yog Koj Ua Tus Coj.”)

¹⁵ Peb yuav tsis tau teb ua luaj twg thaum pom coob leej ntau tus tsa tes.  Muaj tej zaum tus coj yuav hu tsis txog peb ib zaug li. Txawm li ntawd los tsis txhob chim yog tus coj hu tsis txog.​—Tej Lus Qhia 7:9.

16. Peb yuav txhawb cov tsa tes teb li cas?

¹⁶ Yog tias koj tsis tau teb raws li siab xav los ua tib zoo mloog tej lus lwm tus teb thiab tom qab kev sib txoos tag lawm, mus qhia rau lawv paub tias koj nyiam lawv cov lus teb. Yog koj ua li no, yuav cuab tau cov kwv tij nkauj muam lub zog thiab zoo ib yam li koj tsa tes teb. (Pajlug 10:21) Ib leeg qhuas ib leeg kuj yog ib txoj hau kev los mus txhawb ib tug dhau ib tug.

17. (1) Cov niam txiv yuav pab lawv cov me nyuam li cas xwv lawv thiaj txawj teb? (2) Raws li zaj yeeb yaj kiab, muaj plaub yam twg peb yuav tau npaj ua ntej kom thiaj txawj teb? (Saib cov lus hauv qab taw qhia.)

¹⁷ Peb ib leeg txhawb tau ib leeg li cas ntxiv thaum mus tej kev sib txoos? Cov niam txiv yuav tau pab lawv cov me nyuam npaj ua ntej xwv lawv thiaj txawj teb. Cov niam txiv yuav tau saib seb lawv cov me nyuam hlob los yau ces qhia kom lawv txawj teb raws li lawv lub hnub nyoog. (Mathais 21:16) Muaj tej zaum yuav muaj tej zaj tham txog tej teeb meem uas cov txij  nkawm muaj los sis kev ua txhaum loj tiam sis tej zaum muaj ib los sis ob nqes zoo rau cov me nyuam teb. Ua tib zoo qhia rau koj cov me nyuam kom paub tias muaj tej zaj zoo li hais tas no ces tus coj yuav tsis hu lawv ua luaj twg. Yog qhia li no rau lawv ua ntej ces lawv yuav tsis xav li cas yog lwm tus teb lawm es lawv tsis tau teb.​—1 Timautes 6:18. d

18. Yuav ua li cas peb thiaj tsis teb rau luag qhuas? (Pajlug 27:2)

¹⁸ Peb txhua tus yeej npaj tau peb cov lus teb kom qhuas Yehauvas thiab txhawb tau cov kwv tij nkauj muam. (Pajlug 25:11) Muaj tej zaum peb yuav nyiam piav txog peb lub neej tiam sis nco ntsoov tsis txhob hais ntau ntau txog peb tus kheej. (Nyeem Pajlug 27:2; 2 Kauleethaus 10:18) Cia peb nco ntsoov teb txog Yehauvas, nws Txoj Lus, thiab nws cov tib neeg. (Tshwmsim 4:11) Muaj tej zaum lo lus nug rau ib nqes twg kuj yuav hais kom peb teb txog peb tus kheej ces peb mam li teb raws li lo lus nug ntawd. Nqe txuas ntxiv no mam li qhia seb yog li cas rau li cas.

19. (1) Yuav zoo li cas xwb yog tias peb xam pom tag nrho cov uas tuaj tuaj sib txoos rau hnub ntawd? (Loos 1:11, 12) (2) Koj ris txiaj ntsig li cas txog qhov uas sawv daws tsa tes teb?

¹⁹ Txawm hais tias tsis muaj ib txog cai twg los tswj seb yuav tsa tes teb li cas rau li cas los cia peb nco ntsoov txhawb lwm tus lub zog. Tej zaum peb yuav tau teb ntau zog los sis txaus siab tias peb muaj cij fim teb thiab nco ntsoov tias lwm tus kuj zoo siab ib yam nkaus thaum lawv tau teb. Yog peb xav txog lwm tus hauv lub koom txoos ces twb yog “peb ib leeg txhawb tau ib leeg.”​—Nyeem Loos 1:11, 12.