1. Peb tso siab tau li cas?

 PEB uas yog Yehauvas cov tib neeg paub hais tias nws hlub thiab xav kom peb tau lub neej zoo tshaj plaws. (Loos 8:35-39) Yog peb coj raws li phau Vajlugkub tej hauv paus ntsiab lus ces peb yeej tso siab plhuav tias yuav pab tau peb lub neej xwb xwb li. (Yaxayas 48:17, 18) Ua li thaum ib yam kev ntxhov siab twg los raug peb nthawv nthav, peb ho yuav ua li cas?

2. Tej kev nyuaj siab ntxhov plawv twg los raug peb, thiab ho ua rau peb xav li cas rau li cas?

² Yehauvas cov tib neeg yeej puav leej raug kev nyuaj siab ntxhov plawv. Xws li tej zaum muaj ib tug hauv peb tsev neeg ua rau peb tu siab, peb ho muaj mob muaj nkeeg es ua tsis tau Yehauvas tes hauj lwm li yav tas los lawm, raug cua daj cua dub los sis raug tsim txom vim peb ntseeg Yehauvas. Thaum peb raug tej kev sim siab no, tej zaum peb yuav xav li no tias: ‘Vim li cas tej no ho los raug kuv? Puas yog kuv ua tau tej yam tsis zoo? Puas yog Yehauvas tsis foom koob hmoov rau kuv lawm?’ Koj puas tau xav dua li no ib zaug li? Yog koj tau xav li no dua los lawm, tsis txhob rawm maj tag kev cia siab. Yehauvas cov tib neeg muaj coob leej ntau tus yeej tau xav tib yam li tau hais tas no.​—Phau Ntawv Nkauj 22:1, 2; Hanpakus 1:2, 3.

3. Peb khaws tau li cas los ntawm Phau Ntawv Nkauj 34:19?

³ Nyeem Phau Ntawv Nkauj 34:19. Muaj ob lub ntsiab hais nyob rau nqe no: (1) Cov neeg ncaj ncees yeej raug ntau yam kev nyuaj siab. (2) Yehauvas yuav cawm peb ntawm tej kev ntxhov siab. Ua li Yehauvas yuav cawm peb li cas rau li cas? Ib yam yog Yehauvas pab kom peb nco ntsoov tias peb nyob rau lub qab ntuj zoo li cas rau li cas. Txawm Yehauvas cog lus tias nws yuav  pab kom peb muaj kev kaj siab teev tiam nws los nws tsis tau cog lus tias peb yuav tsis raug kev nyuaj siab nyob rau hauv lub qab ntuj no. (Yaxayas 66:14) Nws txhawb kom peb nco ntsoov lub neej yav pem suab raws li nws tau npaj tseg. (2 Kauleethaus 4:16-18) Tam sim no Yehauvas tsuas pab kom peb thev ib hnub dhau ib hnub xwb.​—Nkauj Quaj Ntsuag 3:22-24.

4. Nyob rau hauv zaj kawm no yuav piav txog dab tsi?

⁴ Nyob rau hauv zaj kawm no peb yuav piav seb peb khaws tau li cas los ntawm cov ntseeg nyob puag thaum ub thiab cov nim no. Peb yuav pom tias kev nyuaj siab yeej yuav los raug peb nthawv nthav tiam sis yog peb tso siab rau Yehauvas, nws yeej yuav pab peb nyiaj dhau. (Phau Ntawv Nkauj 55:22) Thaum peb kawm txog cov yam ntxwv no, cia peb ua tib zoo rov tshuaj peb lub siab tias: ‘Yog tias los raug kuv, kuv ho yuav ua li cas? Tag nrho cov yam ntxwv ho pab tau kom kuv tso siab rau Yehauvas li cas? Kuv yuav khaws zaj twg los pab kuv lub neej?’

5. Yakhauj tau raug li cas los ntawm tej Lanpas ua? (Saib daim duab ntawm lub khaum.)

⁵ Yehauvas cov tib neeg txheej thaum ub yeej raug ntau yam uas lawv twb tsis faj txog. Xws li Yakhauj. Nws txiv hais kom nws mus yuav Lanpas tus ntxhais los ua poj niam xwv Yehauvas thiaj li foom koob hmoov rau nws. Lanpas kuj ntseeg Yehauvas thiab kuj yog lawv ib tug nruab ze. (Chivkeeb 28:1-4) Yakhauj thiaj li mus ua raws li nws txiv cov lus. Nws thiaj li tawm ntawm lub teb chaws Kana-as mus rau ntawm Lanpas tsev. Lanpas muaj ob tug ntxhais hu ua Le-as thiab Laxees. Yakhauj nyiam Laxees uas yog tus ntxhais ntxawm thiab yeem ua hauj lwm xya xyoo rau Lanpas kom nws tau yuav Laxees los ua poj niam. (Chivkeeb 29:18) Tiam sis txhua yam tsis mus raws li Yakhauj lub siab xav. Lanpas ntxias Yakhauj yuav tau tus ntxhais hlob. Lanpas kuj cia Yakhauj yuav Laxees ib lub lim tiam tom qab thiab, tiam sis Yakhauj yuav tau ua hauj lwm xya xyoo ntxiv. (Chivkeeb 29:25-27) Tsis tas li ntawd, Lanpas kuj ua luam tsis ncaj rau Yakhauj. Suav tag nrho mas Lanpas ua saib tsis taus Yakhauj tau 20 lub xyoos!​—Chivkeeb 31:41, 42.

6. Yakhauj tau thev dab tsi ntxiv thiab?

⁶ Muaj lwm yam kev nyuaj siab uas Yakhauj yuav tau thev thiab. Nws lub cuab lub yig loj heev tiam sis nws cov tub tsis sib haum. Lawv muab lawv tus kwv uas yog Yauxej muag mus ua cev qhev. Yakhauj ob tug tub npe hu ua Xime-oos thiab Levis ua rau lawv tsev neeg thiab Yehauvas puas koob puas npe tas. Tsis tas li ntawd xwb, tom qab Laxees yug nkawd tus tub ntxawg tag, nws txawm tuag lawm. Tom qab no thaum Yakhauj laus lawm, txawm muaj kev tshaib nqhis. Lawv tsev neeg thiaj tau tsiv mus nyob teb chaws Iyiv.​—Chivkeeb 34:30; 35:16-19; 37:28; 45:9-11, 28.

7. Yehauvas qhia li cas tias nws txaus siab rau tej Yakhauj ua?

⁷ Txawm muaj kev nyuaj siab los raug Yakhauj lub neej los nws yeej tsis tso Yehauvas tseg thiab nws haj tseem ntseeg tej uas Yehauvas cog tseg. Xws li txawm Lanpas dag npaum li cas los Yehauvas huab yam foom koob hmoov kom Yakhauj muaj yam ub yam no nplua mias. Tsis tas li ntawd, Yakhauj ris Yehauvas txiaj ntsig kawg li uas tau rov qab pom nws tus tub Yauxej dua. Yakhauj thiab Yehauvas sib raug zoo heev thiaj li pab tau Yakhauj thev taus tej kev sim siab uas nws raug. (Chivkeeb 30:43; 32:9, 10; 46:28-30) Tej no qhia rau peb tias yog peb nrog Yehauvas sib raug zoo ces peb yeej yuav kov yeej txhua yam kev sim siab uas los raug peb.

8. Vaj Ntxwv Daviv npaj siab ua dab tsi?

 ⁸ Vaj Ntxwv Daviv ua tsis tau txhua yam uas nws xav ua rau Yehauvas. Xws li Daviv xav tsa ib lub tuam tsev ua Yehauvas tug. Nws thiaj li qhia tej uas nws xav ua rau Nathas paub. Nathas thiaj rov teb nws hais tias: “Koj cia li ua txhua yam raws li koj lub siab xav, vim Vajtswv yeej nrog nraim koj.” (1 Xwmtxheej Vajntxwv 17:1, 2) Thaum Daviv hnov li ntawd mas txhawb tau nws zog kawg li. Tej zaum nws yeej npaj siab tias yuav ua lub tuam tsev li cas rau li cas.

9. Daviv xav li cas xwb thaum txhua yam tsis mus raws li nws siab xav?

⁹ Tsis ntev tom qab ntawd, Nathas txawm rov qab tuaj cuag Daviv dua. “Hmo ntawd,” Yehauvas hais rau Nathas tias Daviv yuav tsis tau ua lub tuam tsev tiam sis Daviv ib tug tub mam li ua. (1 Xwmtxheej Vajntxwv 17:3, 4, 11, 12) Daviv xav li cas xwb thaum nws hnov Nathas hais li ntawd? Nws thiaj li hloov nws txoj kev xav. Nws thiaj li npaj nyiaj npaj txiaj thiab tej khoom faj tseg rau nws tus tub Xalaumoos ua lub tuam tsev.​—1 Xwmtxheej Vajntxwv 29:1-5.

10. Yehauvas foom koob hmoov rau Daviv li cas?

¹⁰ Thaum Daviv paub hais tias nws yuav tsis yog tus ua lub tuam tsev rau Yehauvas ces Yehauvas txawm nrog Daviv sib cog lus tias Daviv ib tug xeeb ntxwv yuav kav mus ib txhis. (2 Xamuyees 7:16) Nyob rau hauv lub qab ntuj tshiab thaum Daviv paub tias nws tus xeeb ntxwv uas yog Yexus yog tus Vaj Ntxwv uas kav rau thaum 1,000 xyoo, ntshe nws yuav zoo siab heev! Zaj no pab tau peb tias txawm peb ua tsis tau raws li peb lub siab xav rau Yehauvas los Yehauvas twb npaj tseg dua lwm yam rau peb lawm uas tseem zoo tshaj li peb xav.

11. Txawm lub Nceeg Vaj twb tsis tau pib kav los muaj dab tsi zoo tshwm sim rau cov ntseeg nyob thawj 100 xyoo? (Tes Haujlwm 6:7)

¹¹ Muaj tej yam uas cov ntseeg nyob thawj 100 xyoo tseem tsis tau paub txog. Xws li lawv tos kom Vajtswv lub Nceeg Vaj los kav tiam sis lawv tsis paub tias yuav tshwm sim rau thaum twg. (Tes Haujlwm 1:6, 7) Ua li lawv ua li cas xwb? Lawv tau hau ntsoov qhia txoj xov zoo tsis tseg tsis tu. Thaum lawv mus qhia txoj xov zoo ib qho dhau ib qho, lawv yeej pom tias Yehauvas yeej pab lawv kawg nkaus li.​—Nyeem Tes Haujlwm 6:7.

12. Thaum muaj kev tshaib nqhis, cov ntseeg nyob thawj 100 xyoo ua li cas xwb?

¹² Muaj ib zaug kev tshaib nqhis txawm los raug “thoob plaws lub ntiajteb,” thiaj li ua rau cov ntseeg nyob thawj 100 xyoo tshaib nqhis heev. (Tes Haujlwm 11:28) Ntshe thaum ntawd lawv ua neej txom nyem ntsuav. Cov txiv tsev yeej txhawj tsam lawv khwv tsis tau los koob lub cuab lub yig. Tej zaum cov hluas uas twb npaj siab yuav ua ntau yam rau Yehauvas los lawv yuav tau muab tej ntawd ncua tseg cia. Txawm cov ntseeg raug ntau tsav ntau yam los lawv yeej txaus siab hlo yoog. Lawv tau hau ntsoov qhia txoj xov zoo npaum li lawv ua tau thiab muab tej uas lawv muaj sib faib rau cov ntseeg uas nyob hauv lub xeev Yudias tau siv.​—Tes Haujlwm 11:29, 30.

13. Thaum muaj kev tshaib nqhis, Yehauvas tau foom koob hmoov li cas rau cov ntseeg?

¹³ Thaum muaj kev tshaib nqhis, cov ntseeg uas tau txais kev pab yeej pom tias Yehauvas yog tus pab lawv tiag tiag. (Mathais 6:31-33) Thaum ntawd ntshe cov ntseeg sawv daws sib raug zoo heev kawg li. Cov ntseeg uas muab dej siab los sis muab lwm yam mus pab yeej muaj kev zoo siab tias lawv muaj ib feem xyuam nyob rau hauv. (Tes Haujlwm 20:35) Yehauvas foom koob hmoov rau txhua tus  vim lawv puav leej yoog thaum muaj tej yam los raug nthawv nthav.

14. Muaj li cas rau Npananpas thiab tus tub txib Povlauj, thiab tom qab no ho muaj li cas? (Tes Haujlwm 14:21, 22)

¹⁴ Muaj ntau zaus cov ntseeg nyob thawj 100 xyoo raug tsim txom, hos muaj qee zaug lawv twb tsis faj tias lawv yuav raug tsim txom li. Cia peb mus tham txog thaum Npananpas thiab tus tub txib Povlauj nkawd mus qhia txoj xov zoo nyob ib cheeb tsam ntawm lub nroog Lixathas. Thaum thawj, txhua tus tos txais nkawd thiab mloog tej uas nkawd qhia. Tom qab no, muaj ib co neeg tawm tsam “txawm ntxias kom sawvdaws tuaj lawv tog.” Ces ib txhia txawm mloog thiab muab pob zeb ntaus Povlauj sab sab thiab xav hais tias nws tuag lawm. (Tes Haujlwm 14:19) Tiam sis Npananpas thiab Povlauj txawm mus qhia txoj xov zoo dua lwm qhov lawm xwb. Qhov uas nkawd ua li no pab tau “ntau leej los ntseeg,” thiab tej nkawd hais thiab nkawd ua txhawb tau cov ntseeg heev. (Nyeem Tes Haujlwm 14:21, 22.) Qhov uas Npanapas thiab Povlauj tsis tso tseg txawm nkawd raug tsim txom pab tau coob leej ntau tus. Tej no qhia tias yog peb kub siab lug ua tes hauj lwm uas Yehauvas muab rau peb ua ces nws yeej yuav foom koob hmoov rau peb.

15. Koj khaws tau Kwv Tij Majmevleem tus yam ntxwv li cas?

¹⁵ Ua ntej xyoo 1914, Yehauvas cov tib neeg tos ntsoov yuav muaj ib yam dab tsi tshwm sim. Xws li Kwv Tij Alexadaw Hus Majmevleem (Alexander Hugh Macmillan) thiab lwm cov xav tias tshuav tsis ntev xwb lawv yuav tau mus nyob saum ntuj ceeb tsheej. Thaum lub 9 Hlis xyoo 1914, nws cev ib zaj lus qhuab qhia thiab hais tias: “Zaum no ntshe yuav yog zaum kawg rau kuv cev lus qhuab qhia lawm xwb.” Tiam sis tsis muaj tseeb li ntawd. Tom qab no Kwv Tij Majmevleem sau tias: “Peb ib txhia maj mus saum ntuj ceeb tsheej zog lawm. Peb yuav tau kub siab lug ua tus Tswv tes hauj lwm.” Kwv Tij Majmevleem phwb tes tsog ua hauj lwm rau Yehauvas. Nws kub siab lug mus qhia txoj xov zoo, mus txhawb cov kwv tij uas raug kaw hauv tsev loj cuj, thiab txawm nws hnub nyoog nchav lawm los nws yeej mus kev sib txoos tsis tu ncua. Qhov uas Kwv Tij Majmevleem kub siab lug ua Yehauvas tes hauj lwm pab tau nws li cas? Nyob rau xyoo 1966, ua ntej nws yuav nruam sim nws tau sau hais tias: “Kuv txoj kev ntseeg yeej tseem ruaj khov khwb kho ib yam li thaum kuv tseem hluas.” Nws tso tau ib tug yam ntxwv zoo kawg li rau peb xyaum, tshwj xeeb rau cov uas tau thev kev sim siab ntev tshaj li lawv xav tseg.​—Henplais 13:7.

16. Ib yam uas los raug Kwv Tij Ntsenees thiab nws tus poj niam nthawv nthav yog dab tsi? (Yakaunpaus 4:14)

¹⁶ Yeej muaj kab mob kev nkeeg los raug Yehauvas cov tib neeg coob leej ntau tus nthawv nthav. Xws li muaj ib zaj sau txog Kwv Tij Hanpaws Ntsenees (Herbert Jennings) b thiab nws tus poj niam nkawd lub neej ua ob tug tub txib tshaj tawm txawv teb chaws hauv teb chaws Nkana (Ghana). Muaj ib ntus, nws txawm tau tus kab mob nyuaj siab. Nws thiaj li nco txog cov lus nyob hauv Yakaunpaus 4:14 thiab hais tias yog ib yam mob uas tseem yog “tagkis” es nkawd thiaj tsis paub txog. (Nyeem.) Nws sau hais tias: “Wb yuav tau tawm hauv lub teb chaws Nkana, tseg tej phooj ywg kwv luag rau tom qab es rov los mus kho kuv tus mob rau teb chaws Kanada (Canada).” Yehauvas yeej pab Kwv Tij Ntsenees thiab nws tus poj niam nkawd kub siab  lug teev tiam nws tab txawm nkawd raug kev nyuaj siab.

17. Kwv Tij Ntsenees pab tau cov ntseeg li cas?

¹⁷ Cov lus uas Kwv Tij Ntsenees hais txhawb tau sawvdaws kawg nkaus li. Muaj ib tug muam sau hais tias: “Thaum kuv nyeem txog Kwv Tij Ntsenees zaj, raug kuv siab kawg nkaus li. Qhov uas nws yuav tau tso nws tes hauj lwm uas nws ua rau Yehauvas tseg los mus kho nws tus mob, pab tau kom kuv ua tib zoo luj kuv lub neej thiab.” Hos muaj ib tug kwv tij sau hais tias: “Kuv twb ua ib tug txwj laus tau kaum lub xyoos lawm tiam sis kuv yuav tau tso tes hauj lwm no tseg vim kuv muaj tus kab mob nyuaj siab. Kuv saib zoo yam li kuv ua yam twg los tsis yog yam ntawd mas kuv tsis muaj siab nyeem txog lwm tus lub neej. Tiam sis qhov uas Kwv Tij Ntsenees ua siab ntev thev txhawb tau kuv lub zog kawg li.” Qhov no qhia tau tias thaum ib yam twg los raug peb nthawv nthav tiam sis yog peb rub lub siab ntev ces yuav txhawb tau lwm tus lub zog. Txawm lub neej tsis mus raws li lub siab xav los peb kuj tseem ua tau yam ntxwv qhia tias kom nco ntsoov thev thiab tuav rawv kev ntseeg.​—1 Petus 5:9.

18. Raws li ob daim duab, koj khaws tau dab tsi los ntawm tus poj ntsuam nyob rau Nai Ntsaw Lia?

¹⁸ Tus kab mob khaus viv-19 (COVID-19) kuj raug Yehauvas cov tib neeg coob kawg nkaus li. Xws li tus poj ntsuam nyob rau teb chaws Nai Ntsaw Lia (Nigeria). Nws tsuas muaj me ntsis nyiaj thiab zaub mov noj xwb. Muaj ib tag kis nws tus ntxhais nug nws tias nkawd yuav noj dab tsi tom qab nkawd noj nkawd tais txhuv tag. Tus niam thiaj hais tias nkawd tsis muaj nyiaj thiab zaub mov los kom nkawd nco ntsoov xyaum tus poj ntsuam uas nyob hauv lub nroog Xalefas. Tus poj ntsuam ntawd nkawd ob niam tub noj nkawd pluas mov ua zaum kawg thiab tso siab rau Yehauvas. (1 Vajntxwv 17:8-16) Ua ntej nkawd ob  niam tub hauv Nai Ntsaw Lia xav txog yuav noj dab tsi ua su rau hnub ntawd, cov kwv tij nkauj muam kuj xa tau ib thawv zaub mov tuaj rau ob tug tau noj uas kav nkawd nyog li ob lub lim tiam. Tus muam ntawd tsis xav tias Yehauvas yuav ua tib zoo mloog cov lus nws hais rau nws tus ntxhais. Tej no qhia tias yog peb tso siab rau Yehauvas ces thaum muaj ib yam twg los raug nthawv nthav es peb pom nws cev tes los pab peb ces yuav yim huab ua rau peb txoj kev sib raug zoo nrog nws loj zuj zus ntxiv.​—1 Petus 5:6, 7.

19. Alijxim Yawsos thev kev tsim txom li cas?

¹⁹ Tau ob peb xyoos no, muaj kev tsim txom los raug nthawv nthav rau peb cov kwv tij nkauj muam los lawv yeej ua siab ntev thev. Xws li muaj ib tug kwv tij npe hu ua Alijxim Yawsos (Aleksey Yershov) uas nyob Lav Xias teb. Xyoo 1994 thaum nws ua kev cai raus dej, Yehauvas cov tib neeg nyob kaj siab lug. Tom qab no, txhua yam nyob hauv teb chaws Lav Xias hloov tag. Nyob rau xyoo 2020, luag txawm tuaj tshawb Kwv Tij Yawsos lub tsev thiab nqa nws tej txhiam laj txhiam tam ib txhia mus lawm. Ob peb lub hlis tom qab ntawd, nom tswv txawm liam txim rau nws vim muaj ib tug uas ua txuj kawm Vajlugkub tau ib xyoos ntau, muab Kwv Tij Yawsos yees tseg coj mus rau lawv. Qhov uas tus ntawd ua li no mas phem kawg li!

20. Kwv Tij Yawsos tsav nws txoj kev sib raug zoo nrog Yehauvas li cas?

²⁰ Qhov uas Kwv Tij Yawsos raug no kuj pab tau nws ntau yam. Nws txoj kev sib raug zoo nrog Yehauvas huab yam loj ntxiv. Nws hais tias: “Kuv poj niam wb thov Yehauvas ua ke ntau dua qhov qub. Kuv xam pom tias yog tsis muaj Yehauvas pab ces kuv yeej ua tsis tau dab tsi. Qhov kuv lauj sij hawm kawm Vajlugkub pab tau kom kuv tsis txhob qaug zog. Kuv xav txog tej yam ntxwv uas nyob hauv phau Vajlugkub. Muaj ntau zaj yeej qhia kom peb nyob twj ywm thiab cia siab rau Yehauvas.”

21. Peb khaws tau dab tsi nyob hauv zaj no?

²¹ Peb khaws tau ntawm zaj no tias ua neej nyob hauv lub qab ntuj no, yeej yuav muaj tej yam los raug peb nthawv nthav. Txawm li ntawd los Yehauvas yeej yuav pab nws cov tib neeg yog tias lawv tso siab rau nws. Raws li nqe Vajlugkub rau zaj kawm no, “tus neeg ncaj ncees tiv ntau yam kev nyuaj siab, tiamsis [Yehauvas] cawm nws dim tej kev ntxhov siab ntawd huv tibsi.” (Phau Ntawv Nkauj 34:19) Yog li ntawd, cia peb tsis txhob xav txog peb tej kev nyuaj siab xwb tiam sis cia peb nco ntsoov txog qhov uas Yehauvas yeej muaj hwj chim pab tau peb. Yog peb coj yam li no ces peb yuav hais tau ib yam li tus tub txib Povlauj tias: “Kuv thev taus tej no tib si vim Vajtswv pub dag pub zog rau kuv.”​—Filipis 4:13.