LUB NTIAJ TEB PUAS YUAV NYOB TAU MUS LI?
Dej Hiav Txwv
TSIS yog peb nrhiav noj hauv dej hiav txwv xwb, tiam sis kuj muaj ntau yam hauv hiav txwv uas peb siv tau los ua tshuaj kho mob thiab. Dej hiav txwv tso tej pa oxintsee (oxygen) kom peb ua taus pa thiab kuj nqus cov pa tsis zoo mus. Ntxiv ntawd, dej hiav txwv kuj tswj tau huab cua thiab.
Muaj Teeb Meem Dab Tsi Rau Dej Hiav Txwv?
Vim huab cua txawv zuj zus, cw, pias deg, roob ris, tej tsiaj uas tuaj saum tej pob zeb hauv qab thu (coral reef), thiab lwm yam uas muaj sia nyob hauv dej hiav txwv tuag zuj zus mus lawm. Tej tsiaj uas tuaj saum tej pob zeb hauv qab thu ua zaub ua mov thiab ua chaw nkaum rau ib feem plaub cov tsiaj nyob hauv hiav txwv. Tiam sis cov neeg txawj ntse hais tias 30 xyoo tom ntej no, hom tsiaj no tuag yuav tas.
Cov neeg txawj ntse hais tias 90 feem pua cov noog uas nyob tom dej hiav txwv twb noj yas lawm. Thiab muaj cov tsiaj deg uas tuag coob heev txhua xyoo vim yog cov yas uas poob hauv dej hiav txwv.
Xyoo 2022, lub koom haum ntiaj teb UN tus thawj coj Athauni-aus Nkutheles (António Guterres) hais tias, “Peb pheej tsis tu peb cov dej hiav txwv es nim no thiaj li muaj teeb meem loj.”
Lub Ntiaj Teb Nyob Tau Mus Ib Txhis
Muaj ib phau ntawv sau tias “dej hiav txwv yeej txawj rov zoo tuaj” yog tib neeg tsis txhob pheej ua rau dej hiav txwv qias tsis huv. Yog thaum tib neeg pheej tsis ua dej hiav txwv qias, dej hiav txwv thiab tej tsiaj deg yeej txawj tu kom hiav txwv huv. Cia peb tham txog ob peb yam uas pab tau dej hiav txwv:
-
Muaj tej kab thiab nroj me me (phytoplankton) uas qhov muag pom tsis tau uas noj thiab khaws cov pa khonpee dai-oxais. Cov pa no yog cov uas ua rau lub ntiaj teb muaj huab cua kub. Cov kab thiab nroj me me no muaj peev xwm tuav cov pa khonpee dai-oxais ntau npaum nkaus li tag nrho cov ntoo, cov nyom, thiab tej nroj tsuag tuav ua ke.
-
Muaj ib hom kab me me uas qhov muag pom tsis tau, noj cov ntses uas tuag lawm tej pob txha thiab nqaij. Yog tsis muaj li no ces cov ntses tuag yuav ua rau dej hiav txwv qias tsis huv. Ces kuj muaj lwm cov tsiaj deg ho noj cov kab me me no thiab. Ib lub tsev kawm txog dej hiav txwv hais tias qhov uas ua li no “ua rau dej hiav txwv ntshiab si thiab huv si.”
-
Muaj ntau hom tsiaj deg uas thaum lawv lub plab muab tej zaub mov uas lawv noj zom tag tso tawm los, pab kom cov dej zoo es lwm cov tsiaj deg hauv hiav txwv thiaj tsis tuag.
Tib Neeg Ua Dab Tsi Los Pab
Yog peb rov siv tej hnab thiab tej taub dej uas peb muaj, yuav pab kom txhob muab yas pov pawg lug hauv dej hiav txwv
Yog tsis txhob muab khoom pov tseg rau hauv dej hiav txwv ces yeej tsis tau muab tu. Yog li ntawd, cov neeg txawj ntse thiaj hais kom tib neeg khaws thiab rov siv lawv tej hnab, tej twj, thiab tej taub ntim ub ntim no es thiaj li tsis tau siv tej khoom yas ib zaug xwb es yuav tau muab pov tseg.
Txawm li los, tseem tshuav ntau yam uas peb yuav tau ua. Tsis ntev tas los no muaj ib lub koom haum uas lub hom phiaj yog tu lub ntiaj teb, lawv mus rau 112 lub teb chaws thiab sau tau 9,200 tons tej khoom uas muab pov tseg tom hiav txwv. Txawm twb ntau npaum no los, tseem tsis tau ntau npaum li tej khoom uas muab pov tseg rau hauv hiav txwv txhua txhua xyoo.
Lub koom haum National Geographic tshawb pom tias, vim tib neeg pheej siv roj siv thee thiab lwm yam heev dhau lawm, ces ua rau cov tsiaj hauv dej hiav txwv tu tsis yeej kom dej hiav txwv huv.
Muaj Kev Cia Siab Li Cas Hauv Phau Vajlugkub?
‘Lub ntiaj teb puv nkaus txhua tsav yam uas koj tau tsim tseg. Muaj hiav txwv loj thiab dav heev, muaj tsiaj loj thiab tsiaj me suav tsis txheeb nyob hauv.’—Phau Ntawv Nkauj 104:24, 25.
Vajtswv tsim kom dej hiav txwv rov tu tau dej hiav txwv kom huv. Thiab Vajtswv yog tus tsim dej hiav txwv thiab tag nrho cov tsiaj deg, ces nws yeej muaj lub hwj chim kho tau txhua yam teeb meem uas los raug dej hiav txwv. Mus saib zaj “Vajtswv Cog Lus Tias Lub Ntiaj Teb Yuav Nyob Mus Li,” uas nyob sab 15.
