LUB NTIAJ TEB PUAS YUAV NYOB TAU MUS LI?
Hav Zoov
IB TXHIA NEEG txawj ntse hais tias hav zoov pab kom peb ua taus pa, vim rau qhov tej ntoo pab nqus tej pa phem hu ua khonpee dai-oxais thiab tso tawm cov pa oxintsee kom peb ua taus pa. Thoob ntiaj teb, feem ntau tej tsiaj thiab nroj tsuag nyob hauv hav zoov. Yog tsis muaj hav zoov ces peb yeej ciaj tsis taus.
Muaj Teeb Meem Dab Tsi Los Raug Tej Hav Zoo?
Txhua txhua xyoo, tib neeg muab txhiab txhiab plhom tus ntoo txiav kom lawv thiaj ua tau liaj tau teb. Kwv lam li 75 lub xyoos dhau los no, tej hav zoov nuj txeeg loj loj hauv ntiaj teb no twb pawv hlo lawm ib nrab.
Yog thaum muab hav zoov ua puam tsuaj tag lawm ces tag nrho tej tsiaj thiab nroj tsuag yuav ploj mus thiab.
Lub Ntiaj Teb Nyob Tau Mus Ib Txhis
Ib co neeg txawj ntse kawm thiab pom tias tej lub hav zoov uas muab tej ntoo txiav tag lawm los, nyob nyob, lub hav zoo ntawd yeej txawj rov ntsuab xiab tuaj. Qhov no ua rau lawv xav tsis thoob li. Cov neeg txawj ntse tshawb pom li no:
-
Muaj ib co neeg txawj ntse tshuaj tej lub hav zoov uas tib neeg muab cog qoob loo, seb tej thaj av ntawd zoo li cas tom qab tib neeg tsis siv lawm. Lawv tshuaj 2,200 thaj av uas nyob sab Amelikas thiab nyob Afika sab hnub poob. Lawv pom tias twb tsis tau muaj kaum xyoo, cov av twb rov qab zoo tuaj lawm.
-
Ib phau ntawv qhia tias cov neeg txawj ntse xav tias 100 xyoo tom ntej no xwb, tej hav zoov no yuav rov hlav ntsuab xiab npaum nkaus li thaum tib neeg tsis tau muab tej ntoo ntov pov tseg.
-
Tsis ntev tas los no, cov neeg txawj ntse hauv teb chaws Nplaxi (Brazil) sim cog ntoo seb puas yuav pab kom rov muaj hav zoov sai.
-
Lub koom haum National Geographic qhia tias: “Cov neeg txawj ntse pom tias lawv yeej tsis tas cog ntoo. Tej thaj av uas lawv tsis cog ntoo, tsib xyoos xwb tej ntoo twb hlav rov tuaj lawm.”
Tib Neeg Ua Dab Tsi Los Pab
Nyob thoob ntiaj teb, tib neeg yeej siv zog kawg li los pab tiv thaiv tej hav zoov hav tsuag thiab kho tej hav zoov uas neeg muab ntoo ntov. Lub koom haum UN thiaj hais tias tau 25 lub xyoos no “tib neeg ntov ntoo tsawg tshaj ib nrab yav tag los lawm.”
Txawm tib neeg yuav ua npaum li no los pab tej hav zoov hav tsuag los yeej tseem cawm tsis tau tej hav zoov nuj txeeg. Lub koom haum Global Forest Watch hais tias, “Ob peb xyoo dhau los no, nyob rau tej thaj chaw vaum vaum, muaj tshav muaj nag, tib neeg tseem tas zog muab tej ntoo ntov li qub.”
Muaj tej lub tuam txhab nyiag ntov tej ntoo tsis raws kev raws cai kom thiaj ua lag ua luam tau nyiaj ntau heev. Vim li no tej hav zoov nyob rau tej thaj chaw sov sov, vaum vaum, muaj tshav muaj nag thiaj ploj zuj zus mus lawm.
Cov neeg uas tshuaj xyuas hav zoov mus saib seb yuav muab tsob ntoo twg txiav thiab yuav cog cov twg ntxiv
Muaj Kev Cia Siab Li Cas Hauv Phau Vajlugkub?
“Vajtswv [Yehauvas] a tsim txhua yam ntoo tuaj zoo nkauj kawg nkaus rau hauv thiab txi txiv zoo kawg li.”—Chivkeeb 2:9.
Vajtswv tsim kom hav zoov hav tsuag txawj rov hlav, rov tuaj ntsuab xwb xiab zoo li qub kom tib neeg thiaj tau siv. Nws yeej txawj txuag tej hav zoov hav tsuag kom nyob mus li.
Phau Vajlugkub qhia tias Vajtswv yuav tsis cia tib neeg rhuav lub ntiaj teb ua puas tsus. Mus saib zaj “Vajtswv Cog Lus Tias Lub Ntiaj Teb Yuav Nyob Mus Li,” uas nyob sab 15.
a Vajtswv lub npe hu ua Yehauvas.—Khiav Dim 3:14 cov lus hauv qab taw qhia hauv phau Txoj Moo Zoo Uas Yog Vajtswv Txojlus Phau Txhais Tshiab xyoo 2000 hais tias, “[Tus Tswv] lub npe ua lus Henplais hu ua Yaves (lossis Yehauvas).”
