Saib Txoj Sia Muaj Nqis
VIM LI CAS HO TSEEM CEEB?
Thaum koj ua tej uas ua tau rau koj muaj mob muaj nkeeg los sis ua rau lwm tus muaj mob ces twb yog koj saib txoj sia tsis muaj nqis.
-
Yog ib tug haus luam yeeb, ua tau rau nws mob kheeb xawm (cancer) thiab ua rau nws lub cev tua tsis yeej kab mob. Ntau zaus cov neeg uas tas sim neej vim yog mob kheeb xawm hauv lub ntsws, twb yog lawv haus luam yeeb los sis nyob ze cov neeg haus luam yeeb.
-
Thaum muaj ib pab neeg coob coob tuaj sib sau ua ke, yog cia li muaj ib tug nqa phom tuaj tua lawv, yeej ua rau lawv ntshai rwg. Tej neeg tshawb fawb hais tias, “Thaum muaj neeg nqa phom tuaj tua tsev kawm ntawv, txawm cov uas tsis raug mob li cas los yeej ua rau lawv ntshai rwg mus lawm tsheej xyoo.”
-
Cov neeg siv yeeb siv tshuaj thiab qaug dej qaug cawv, tsim tau teeb meem. Thaum tib neeg tsis xyuam xim thiab saib txoj sia tsis rau nqi ces ua tau rau tej neeg zej zog raug mob.
KOJ UA TAU LI CAS?
Tso tej yam tsis zoo tseg. Yeej tsis lig rau koj tso tej yam tsis zoo tseg, xws li quav luam yeeb, quav yeeb quav tshuaj, quav dej quav cawv, thiab E-luam yeeb. Tej kev phem no tsuas ua mob ua nkeeg rau koj xwb. Thiab yog koj tsis tso tej yam phem no tseg ces kuj yog koj saib koj tsev neeg thiab lwm leej lwm tus txoj sia tsis muaj nqis.
Txhob ua rau koj thiab lwm tus raug mob. Yuav kom ib tug twg txhob raug mob hauv koj lub tsev, koj yuav tau tu thiab kho koj lub tsev kom zoo. Ua tib zoo tsav tsheb, thiab thaum tsheb puas los coj mus kho kom thiaj tsis tsim tau teeb meem. Tsis txhob cia lwm tus yuam koj ua tej yam uas yuav ua rau koj raug mob los sis txov tau koj txoj sia.
Ua zoo rau txhua tus. Yog peb saib txoj sia muaj nqis ces peb yuav ua zoo rau txhua haiv neeg, tsis hais tus muaj tus pluag. Twb vim yog kev xaiv ntsej muag thiab kev ntxub ntxaug, thiaj li muaj kev ua nruj ua tsiv, kev ua tsov ua rog.
YEHAUVAS COV TIM KHAWV UA LI CAS LOS PAB?
Yehauvas Cov Tim Khawv pab lwm tus kom ua tau lub neej zoo. Peb txoj kev kawm Vajlugkub thiab tej kev sib txoos, twb pab tau coob leej ntau tus tso tej yam phem tseg lawm.
Peb coj raws nraim li tej lus qhia thaum ua vaj ua tsev kom thiaj tsis muaj ib tug raug mob. Cov neeg uas tuaj pab ua peb cov tsev sib txoos thiab cov tsev kawm Vajlugkub yeej tau kev cob qhia lawm, kom lawv thiaj tsis raug mob. Peb yeej ib sij tshuaj kom txhua yam mus zoo raws li txoj cai, thiaj tsis muaj teeb meem.
Peb pab cov uas raug xwm txheej. Nyob rau tib xyoos xwb, peb mus pab txog li 200 qhov xwm txheej nyob thoob qab ntuj, thiab peb siv cov nyiaj siab dawb uas sawv daws pub txog li 12 plhom nyiaj duas las mus pab cov uas raug xwm txheej.
Thaum tus kab mob Enpaulas (Ebola) huam tuaj nyob rau sab hnub poob Afika xyoo 2014 thiab hauv teb chaws Democratic Republic of Congo xyoo 2018, peb cob qhia kom sawv daws yuav tsum ua li cas, thiaj tsis kis tus kab mob. Peb xa ib co neeg mus qhia thiab tham txog lub ntsiab “Mloog Lus Thiaj Cawm Tau Txoj Sia.” Peb tsim kom muaj chaw ntxuav tes nyob ze ntawm lub qhov rooj uas yuav nkag mus rau hauv peb tej tsev pe hawm. Peb qhia tias tseem ceeb rau sawv daws ntxuav tes, thiab qhia lwm yam los pab kom tsis txhob kis tus kab mob no.
Nyob rau teb chaws Sierra Leone, muaj ib tshooj xov tooj cua qhuas Yehauvas Cov Tim Khawv vim peb pab tej pej xeem kom thiaj li tsis kis tus kab mob Enpaulas.
Thaum muaj tus kab mob Enpaulas huam nyob hauv teb chaws Liberia xyoo 2014, muaj lub chaw ntxuav tes nyob ntawm ib lub Tsev Nceeg Vaj
a Txoj kev cai no qhia tias thaum ub cov neeg nyob sab Middle East pom tias lawv yuav tsum ceev faj thiab tiv thaiv tsev neeg thiab lwm leej lwm tus kom txhob raug mob.
