Tus neeg paub haujlwm yog ib tug uas koj tso siab tau. Yog koj muab yam haujlwm twg rau nws ua los, koj yeej tso siab tias nws yuav ua kom zoo thiab nws yuav ua kom tiav raws caij raws nyoog.

Txawm menyuam tseem yau los lawv yeej kawm tau kom paub haujlwm. Ib phau ntawv uas pab niam txiv cob qhia menyuam hais tias: “Thaum menyuam muaj 15 lub hlis xwb nws twb paub ua raws li niam txiv hais lawm. Thaum muaj li 18 lub hlis niam txiv ua dabtsi los nws xav ua tibsi.” Phau ntawv hais ntxiv tias: “Nyob rau ntau qhov chaw thaum menyuam muaj li 5 mus txog 7 xyoo xwb niam txiv twb pib muab haujlwm hauv vaj hauv tsev rau lawv ua lawm. Txawm lawv tseem yau los lawv yeej paub ua haujlwm heev.”​—Parenting Without Borders.

Cov hluas coob tus hlob cev tsis hlob siab, lawv thiaj tsis paub tab. Ib txhia tawm vaj tawm tsev mus nyob lawv tiamsis nyob tsis tsheej ho rov los thawj lawv niam lawv txiv. Ib txhia ua li no vim niam txiv tsis qhia kom lawv paub tab lawv lub neej. Lawv thiaj tsis txawj txuag nyiaj thiab leg haujlwm hauv vaj hauv tsev.

Vim li no zoo rau koj cob koj cov menyuam tamsim no kom lawv paub ua neej. Ib phau ntawv uas qhia txog kev tu menyuam hais tias: “Txhob cia menyuam tos koj noj koj haus mus txog thaum lawv muaj 18 xyoo es cia li muab lawv ntiab tawm mus ua lawv neej.”​—How to Raise an Adult.

Muab haujlwm rau menyuam ua.

VAJLUGKUB TEJ HAUV PAUS NTSIAB LUS: “Ua neeg nquag koj lub neej thiaj li muaj nplua mias.”​—Paj Lug 14:23, TMZ.

Tej menyuam yeej nyiam pab niam pab txiv ua haujlwm thaum tseem yau. Yog li thaum lawv tseem yau kav tsij muab haujlwm hauv vaj hauv tsev rau lawv ua.

Ib txhia niam txiv tsis xav txib menyuam ua haujlwm hauv vaj hauv tsev vim lawv xav tias menyuam tej haujlwm tom tsev kawm ntawv twb txaus lawm. Tsis tas nrhiav haujlwm ntxiv rau lawv ua.

Tiamsis cov menyuam uas lawv niam lawv txiv txib ua haujlwm hauv vaj hauv tsev kawm tau ntawv zoo dua. Cov menyuam ntawd siab sib dua thiab ua haujlwm tiav. Tsis tas li ntawd xwb, phau ntawv Parenting Without Borders hais tias, “yog peb tsis pub menyuam pab peb ua haujlwm hauv vaj hauv tsev thaum yau ces thaum lawv hlob tuaj lawv yuav xav tias lawv tsis tas pab lwm tus los tau . . .  Lawv kuj xav tias txawm lawv tsis ua los lwm tus yeej yuav ua rau lawv.”

Raws li phau ntawv ntawd hais, yog menyuam xyaum ua haujlwm hauv vaj hauv tsev, menyuam yuav tsis tos luag noj xwb tiamsis nws yuav sib zog khwv kom muaj pub rau luag. Tsis tas li ntawd xwb, nws yuav paub tias hauv nws tsev neeg nws yeej muaj ib tes haujlwm tshwj xeeb uas nws yuav tsum tau ua.

Qhia tias nyias yuav tau ris nyias tej teeb meem.

VAJLUGKUB TEJ HAUV PAUS NTSIAB LUS: “Cia li mloog tej lus taw qhia thiab khaws tej lus qhuab qhia, koj thiaj tau tswvyim rau tom hauv ntej.”​—Paj Lug 19:20.

Thaum koj tus menyuam ua yuam kev, xws li ua raug lwm tus tej khoom ub khoom no puas tsis txhob muab npog. Txawm tsis yog nws txhob txwm los nws yuav tau kho thiab mus thov txim.

Yog menyuam paub lees txim ces yuav pab tau lawv li no:

• Lawv yuav coj ncaj thiab paub lawv qhov txhaum.

• Lawv yuav tsis liam tus ub tus no.

• Lawv yuav tsis hais tias tim li ub li no.

• Lawv yuav thov txim ntawm luag.