Tus neeg uas thev taus, txawm lub neej tsis mus raws li siab xav los nws yeej nyob tus yees li qub. Nws coj tau li ntawd vim nws twb raug ntau yam los lawm thiab uv dhau tej ntawd tibsi. Nws zoo li tus menyuam uas ntog ntau zaus mam li paub taug kev.

Thaum menyuam ua tsis tau ib yam dabtsi, raug kev nyuaj siab, lossis raug luag ntuas ua rau lawv tu siab heev. Tej tug cia li tso tseg lawm xwb. Tiamsis menyuam yuav tsum to taub li no:

• Muaj qee yam peb yeej ua tsis tau.​—Yakaunpau 3:2.

• Tsis muaj ib tug uas yuav tsis ntsib kev ntxhov siab.​—Laj Lim Tswvyim 9:11, NW.

• Yuav tsum muaj tus ntuas yus thiaj ntse tuaj.​—Paj Lug 9:9.

Yog koj tus menyuam twb nyiaj dhau tej kev ceeblaj ntau zaus lawd ces thaum nws ntsib teeb meem hauv nws lub neej nws yuav thev taus dua.

Thaum menyuam ua tsis tau.

VAJLUGKUB TEJ HAUV PAUS NTSIAB LUS: “Tus ncaj ncees txawm ntog xya zaus los tseem sawv los thiab.”​—Paj Lug 24:16.

Pab menyuam ntsuas seb qhov teeb meem puas loj npaum li nws xav. Zoo li thaum menyuam xeem tsis tau ntawv, tej tug ua li cas xwb? Tej zaum nws yuav tso tseg thiab hais tias: “Dabtsi los kuv ua tsis tau li!”

Yuav kom koj tus menyuam thev taus, qhia kom nws xav seb nws yuav kawm li cas ntxiv nws thiaj xeem tau rau lwm zaus. Yog koj qhia li no ces nws yuav txawj tawm tswvyim thaum nws tws kev. Thaum txog caij rov xeem ntawv, nws yuav tso siab plhuav xeem tsis ntshai li.

Nco ntsoov txhob qhia hlo tias koj tus menyuam yuav tau ua li cas. Tiamsis pab tswvyim rau nws thiab cia nws xav nws seb nws yuav kawm li cas nws thiaj xeem tau. Koj kuj nug nws li no: “Koj yuav kawm li cas ntxiv koj thiaj paub lub ntsiab uas koj xeem?”

Thaum muaj kev nyuaj siab.

VAJLUGKUB TEJ HAUV PAUS NTSIAB LUS: “Nej twb tsis paub yuav muaj xwm dabtsi rau tagkis.”​—Yakaunpau 4:14.

Tsis muaj leejtwg paub tias lub neej yuav mus li cas. Tus uas nplua nuj yeej tsis paub tias thaum  twg nws yuav pluag. Hos tus noj qab nyob zoo los yeej tsis paub tias thaum twg nws yuav muaj mob. Phau Vajlugkub hais tias: “Qhov uas sib tw dhia yeej tsis nyob ntawm tus uas nrawm, qhov uas kov yeej kev ua rog yeej tsis nyob ntawm tus uas muaj zog, . . . rau qhov yeej tsis muaj leejtwg paub tias xwm txheej yuav los raug nws rau thaum twg.”​—Laj Lim Tswvyim 9:11, NW.

Koj yeej nrhiav kev los tiv thaiv koj tus menyuam kom txhob raug mob. Tiamsis qhov tseeb tiag koj yuav tiv thaiv tsis tau koj tus menyuam txhua zaus.

Thaum koj tus menyuam ntsib kev nyuaj siab xws li nws tus phoojywg khiav mus nyob lwm qhov lossis nws ib tug txheeb ze tau tas sim neej lawm, pab kom nws paub nyiaj dhau qhov ntawd. Yog koj pab menyuam li no ces thaum nws loj, txawm nws poob haujlwm poob nyiaj poob txiaj los, nws yuav nyiaj dhau thiab. *

Thaum luag ntuas menyuam rau qhov zoo.

VAJLUGKUB TEJ HAUV PAUS NTSIAB LUS: “Cia li mloog tej lus taw qhia . . . koj thiaj tau tswvyim rau tom hauv ntej.”​—Paj Lug 19:20.

Thaum lwm tus ntuas menyuam tsis yog nws txhob txwm hais kom chob menyuam siab. Twb yog nws pab hais kom menyuam hloov rau qhov zoo xwb.

Yog koj qhia kom menyuam mloog luag tej ntuas ces yuav pab tau neb ob niam txiv thiab. Ib leej txiv hu ua Yauhas (John) hais tias: “Yog koj niaj zaus pab daws koj cov menyuam tej teeb meem ces lawv yuav tsis sawm zoo. Lawv yuav tsim teeb meem rau koj tu tas li xwb. Nej cov niam txiv tub yuav ntsib plaub ntug tas li.”

Koj yuav pab koj tus menyuam li cas kom nws pom tias zoo rau luag pab ntuas nws? Thaum luag ntuas koj tus menyuam tsis hais tom tsev kawm ntawv lossis lwm qhov, qhia kom nws tsis txhob xav tias tsis tsim nyog luag hais nws. Zoo rau koj nug nws li no:

• “Vim li cas tus neeg ntawd ho ntuas koj?”

• “Nws cov lus ntuas yuav pab koj hloov li cas ntxiv?”

• “Lwm zaus lwm tus ntuas koj, koj yuav coj li cas?”

Nco ntsoov tias kev qhuab ntuas yuav pab tau koj tus menyuam tamsim no thiab rau yav laus.