Tej Twj Siv Is Taws Nej Muaj Peevxwm Txiav Tau Peb Txojkev Phoojywg
Peb zoo siab tias txawm nyias nyob nyias ib sab ntuj los muaj xov tooj, muaj koos pis tawj thiab lwm yam twj siv Is Taws Nej ntawm tes, peb thiaj sib txuas lus tau. Tej twj uas peb siv no yeej pab tau coob leej ntau tus.
Tiamsis yog peb yuav siv coj los mus ntaus phoojywg xwb ces . . .
-
peb yuav tsis to taub peb tej phoojywg zoo.
-
peb yuav nyob kho siab khuav thiab peb lub neej yuav tsis muaj qab hau.
-
peb yuav xav txog peb tus kheej ntau xwb.
TEJ UAS KOJ YUAV TSUM PAUB
TO TAUB LWM TUS
Yuav kom peb to taub lwm tus peb yuav tsum ua lub siab ntev thiab ua tib zoo xav txog lawv. Peb yuav ua tsis tau li no yog peb ib sij taum xov tooj.
Yog peb tsuas pom siv xov tooj teb tus ub tus no tas li xwb ces thaum peb ib tug phoojywg cheem tsum kev pab tiag tiag los peb yuav tsis paub. Peb yuav xav tias yog ib lub nra hnyav thiab peb tsuas lam teb tsuag tsuag kom tag kev tag cai xwb.
MUAB XAV LI NO: Thaum koj ntaus ntawv mus rau koj cov phoojywg lawv puas pom tias koj yeej mob siab txog lawv tiag?—1 PETUS 3:8.
NYOB KHO SIAB KHUAV
Tej neeg tshawb fawb nrhiav pom tias tom qab tibneeg mus saib lwm tus lub neej hauv Is Taws Nej tag, ua rau lawv xav tias lawv lub neej tsis muaj qab hau li thiab ua cas lawv tseem nkim sijhawm mus saib tej ntawd lawm thiab.
Tsis tag li ntawd thaum peb mus saib lwm tus lub neej peb tsuas pom lawv tej kev lom zem nkaus xwb. Qhov no yuav ua rau peb muab peb lub neej piv rau lawv lub thiab xav tias ua cas peb tsis muaj kev lom zem npaum lawv.
MUAB XAV LI NO: Thaum siv tej vej xaij zeem phoojywg peb yuav tsum ua li cas peb thiaj li tsis muab peb lub neej piv rau lwm tus lub?—KALATIAS 6:4.
XAM POM TUS KHEEJ
Ib tug xibhwb qhia ntawv pom tias nws cov tub kawm tsuas xav ntaus phoojywg kom tau noj luag xwb. Cov uas coj li no tsuas xav kom luag ua txhua yam los pab lawv xwb. Lawv muab lawv tej phoojywg saib yam li tej twj uas siv ntawm tes. Thaum xav siv ces siv, tsis siv ces muab pov ntawm tej.
MUAB XAV LI NO: Tej uas kuv muab tso rau hauv Is Taws Nej puas qhia tias kuv nrog lwm tus sib tw ua neej lossis tsuas xam pom kuv tus kheej nkaus xwb?—KALATIAS 5:26.
KOJ YUAV TAU UA LI CAS
TSHUAJ KOJ TUS KHEEJ
Yog koj paub siv koj lub twj ces yuav pab kom koj haj yam ncawg koj cov phoojywg thiab nrog lawv sib raug zoo.
VAJLUGKUB TEJ HAUV PAUS NTSIAB LUS: ‘Tus uas muaj kev hlub tsis xam pom nws xwb.’—1 KAULEETHAUS 13:4, 5.
Xaiv lossis sau seb koj xav xyaum li cas.
-
Nrog tibneeg sib tham tim ntsej tim muag ntau dua li ntaus ntawv mus rau lawv
-
Muab koj lub xov tooj cia lossis tua kom txhob nrov thaum nrog lwm tus tham
-
Txhob siv sijhawm mus saib tej vej xaij zeem phoojywg heev heev
-
Ua tib zoo mloog thaum lwm tus nrog koj tham
-
Yog koj ib tug phoojywg tab tom ntsib kev nyuab siab hu mus nrog nws tham
