Tswj Lub Siab Thiab Txojkev Xav
Phau Vajlugkub hais kom peb tswj peb lub siab thiab xav txog tej yam zoo.
TXOJKEV CHIM
VAJLUGKUB TEJ HAUV PAUS NTSIAB LUS: “Ua tau siab ntev zoo dua li muaj zog.”—Pajlug 16:32.
YOG LI CAS? Yog peb tswj tau peb lub siab ces peb yuav ua tau siab ntev. Thaum luag ua tsis ncaj rau peb, yog peb tswj tsis tau peb lub siab ces yuav tsim ntau yam teeb meem. Cov neeg tshawb fawb hais tias thaum peb lub siab ceev thiab npau taws, peb yuav hais lus yuam kev lossis ua tej yam uas peb yuav xav txog lig.
KOJ YUAV UA LI CAS? Xyaum tswj lub siab kom tsis txhob chim sai peb thiaj tswj tau peb tus kheej. Muaj ib txhia xav tias lawv muaj peevxwm yog lawv ua neeg nyaum tiamsis twb yog lawv tswj tsis taus lawv tus kheej. Phau Vajlugkub hais tias: “Yog koj tswj tsis tau koj kev chim, ces koj tsis muaj kev pab ib yam li lub nroog uas tsis muaj ntsayeej thaiv thiab qhib lug rau yeebncuab tuaj tua ntag.” (Pajlug 25:28) Peb yuav tsum paub seb tau muaj li cas ua ntej peb yuav teb luag lossis ua ib yam dabtsi. Phau Vajlugkub hais ntxiv tias: “Yog koj txawj xav, koj yuav tsum tswj kom tau koj txojkev chim.” (Pajlug 19:11) Yog li ntawd, txhob tuaj leejtwg tog. Ua tib zoo mloog seb qhov teeb meem yog li cas tso peb thiaj li tsis chim sai.
ZOO SIAB RAU TEJ PEB MUAJ
VAJLUGKUB TEJ HAUV PAUS NTSIAB LUS: “Nej yuav tsum niaj hnub ua Vajtswv tsaug.”—Kaulauxais 3:15.
YOG LI CAS? Cov neeg uas zoo siab rau tej lawv muaj yeej nyob tau kaj siab lug. Txawm lawv muaj kev ntxhov siab, xws li tus uas lawv hlub tau tas simneej los lawv tseem muaj kev zoo siab. Lawv hais tias yam uas pab tau lawv yog lawv xav txog qhov zoo thiab tej lawv muaj, tsis yog xav txog lawv txojkev txomnyem.
KOJ YUAV UA LI CAS? Txhua hnub, zoo rau peb xav thiab sau tej yam zoo uas peb muaj cia, tsis hais yam loj thiab me. Xws li thaum lub hnub tawm tim npoo ntuj, thaum peb nrog ib tug peb hlub tshua tham, lossis zoo siab tias peb tseem muaj sia nyob. Tej no yuav pab tau peb kaj siab lawm ntau.
Peb lub neej yuav kaj siab yog tias peb xav txog tej yam uas peb tsev neeg thiab cov phoojywg tau ua rau peb. Qhia rau lawv paub tias peb ris lawv txiaj ntsig. Peb sau tau ib tsab ntawv, ntaus ntawv hauv e-mail lossis hauv xov tooj. Yog peb ua li no, peb yuav hajyam muaj kev sib raug zoo nrog lawv thiab peb yuav zoo siab vim peb tau ua ib yam zoo rau lawv.—Tes Haujlwm 20:35.
LWM TEJ HAUV PAUS NTSIAB LUS HAUV VAJLUGKUB
Yog koj xav theej tawm phau Vajlugkub los mloog, mus saib lub vej xaij jw.org. Muaj 40 yam lus rau koj xaiv
TXHOB NROG LUAG SIB CAV.
“Kev pib sib cav sib ceg mas zoo ib yam li lub pasdej tauv uas pib paim. Cia li cheem tsis txhob pub kom nthuav loj tuaj.”—PAJLUG 17:14.
TXHOB TXHAWJ DHAU TXOG YAV TOM NTEJ.
“Tsis txhob txhawj rau tagkis, rau qhov tagkis yeej muaj kev txhawj txaus rau tagkis lawm. Kev nyuaj siab hnub twg yeej muaj txaus rau hnub ntawd, tsis tas yuav mus nrhiav kev nyuaj siab los ntxiv.”—MATHAIS 6:34.
TXHOB UA SIAB CEEV, UA TIB ZOO XAV UA NTEJ TSO.
“Tej uas koj totaub thiab tej uas koj paub txhij paub txhua yuav tsomkwm koj.”—PAJLUG 2:11.
Tej Yam No Yuav Pab Tau Koj Thiab
TSIM DHEEV!
Yuav Thev Taus Kev Nyuaj Siab Li Cas
Xav txog tej hauv paus ntsiab lus hauv phau Vajlugkub uas yuav pab tau peb thev taus peb tej kev nyuaj siab.
