Yog peb pheej xav hais tias ua cas lwm tus coj txawv ua luaj, ces peb yuav hais tias qhov lawv txawv ntawd yog ib yam tsis zoo. Twb yog peb tabtom xaiv ntsej xaiv muag lawm ntag. Thaum peb yog ib tug neeg xaiv ntsej muag ces yuav tsis yooj yim rau peb xav txog luag.

“Thaum muaj neeg zoo siab, nej cia li nrog lawv zoo siab; thaum muaj neeg quaj ntsuag, nej cia li nrog lawv quaj ntsuag.”​—LOOS 12:15.

Nqi no qhia tias peb yuav tsum xav txog luag lwm tus. Xav txog luag lwm tus yog muab koj tus kheej tso rau luag qhov chaw seb tus ntawd xav li cas.

Yog xav txog luag ces peb yuav pom tau tias peb yeej zoo sib thooj ib yam. Xws li, nws thiab peb tej kev xav zoo thiab coj ib yam. Tsis tas li ntawd, qhov uas peb xav txog luag lwm tus pab tau peb pom tias sawvdaws yeej yog ib tse tibneeg, ces thaum ntawd thiaj li yuav pab tau peb xav qhov zoo.

Xav txog luag yuav pab peb saib taus lwm tus. As Malis (Anne-Marie) nyob rau Afika sab hnub poob, saib tsis taus cov tibneeg txom nyem. Nws qhia tias qhov pab tau nws yog xav txog luag. Nws hais tias: “Thaum kuv pom cov tibneeg txom nyem raug kev nyuaj siab, kuv rov nug kuv tus kheej tias ua li kuv ne, yog kuv lub neej zoo li ntawd kuv yuav ua li cas. Ua li no, kuv mam pom tias lawv thiab kuv yeej zoo sib xws thiab kuv zoo tsis tshaj lawv.” Yog li ntawd, thaum peb xav txog tej yam teeb meem lwm tus raug, peb yuav tsis kam thuam lawv.

Yog koj pheej xav tsis zoo txog ib pawg neeg twg ces xav seb nej zoo sib thooj li cas. Ua tib zoo xav seb zoo li cas thaum lawv

• noj mov nrog lawv tsev neeg

• ua haujlwm ib hnub

• nrog tej phoojywg ua ke

• mloog tej nkauj lawv nyiam

Muab koj tso rau lawv qhov chaw. Ces xav li no:

• ‘Thaum ib tug ua saib tsis taus kuv ces kuv yuav ua li cas?’

• ‘Thaum ib tug uas twb tsis paub kuv li txiav tsim tsis zoo rau kuv ne, kuv yuav ua li cas?’

• ‘Yog kuv ho yog lawv pab lawv pawg, kuv ho xav kom lwm tus saib taus kuv li cas?’