Yeej Kho Tau Txojkev Xaiv Ntsej Muag
Txhiab leej ntau tus tau coj raws li phau Vajlugkub tej hauv paus ntsiab lus li tau hais hauv phau ntawv no. Lawv hloov tau ntau yam kom tsis txhob xaiv ntsej xaiv muag lawm. Niaj hnub nimno, cheem peb tseem yog neeg muaj txhaum, peb yuav tshem tsis tau txojkev xaiv ntsej xaiv muag kom tu noob nrho. Ua li, yuav yog thaum twg tav twg thiaj li kho tau txojkev xaiv ntsej xaiv muag?
Lub Tsoom Fwv Uas Coj Kev Ncaj Ncees
Txij puag thaum ub los txog niaj hnub nimno, tibneeg tej tsoom fwv yeej kho tsis tau txojkev xaiv ntsej xaiv muag. Ua li, lub tsoom fwv twg thiaj li yuav kho tau?
Yuav tsum yog ib lub tsoom fwv uas:
-
1. Txhawb kom tibneeg ib tug xav zoo rau ib tug
-
2. Kho tau txhua tus txojkev ntsawv siab
-
3. Cov thawj coj tsis xaiv ntsej xaiv muag
-
4. Kho txhua haiv neeg kom sib koom siab
Phau Vajlugkub qhia tias Vajtswv twb npaj tseg tau ib roog nom tswv saum ntuj ceeb tsheej lawm.—Lukas 4:43, NWT.
Vajtswv lub tsoom fwv yuav ua li hais no:
1. Muaj Txojkev Cob Qhia Siab Tshaj
“Lawv yuav paub koj txojkev ncaj ncees.”—YAXAYAS 26:9
“Thaum ntawd txhua tus yuav ua ncaj ua ncees, yuav muaj kev thajyeeb thiab nyob kaj siab lug mus ibtxhis.”—YAXAYAS 32:17.
Cov nqi Vajlugkub no qhia tias Vajtswv lub tsoom fwv yuav qhia txojkev ncaj ncees rau tibneeg. Thaum tibneeg kawm tau qhov yog thiab qhov tsis yog lawm, lawv yuav pib hloov lawv tus cwj pwm. Thaum ntawd ces lawv yuav pom tau hais tias txhua tus ib leeg yuav tau hlub ib leeg.
2. Kho Txojkev Tsis Ncaj Ncees
Vajtswv “yuav so lawv tej kua muag huv tibsi mus. Tej kev tuag, kev ntxhov siab, kev quaj ntsuag thiab kev mob kev nkeeg yuav tsis muaj ib zaug li lawm. Tej uas sawvdaws ibtxwm muaj los twb ploj tas lawm.”—TSHWMSIM 21:4.
Nqi Vajlugkub no qhia tias Vajtswv lub tsoom fwv yuav kho tag nrho txhua yam kev ntsawv siab. Cov tibneeg uas raug tej kev tsis ncaj ncees los yuav tsis muaj txojkev ntxub ntxaug ntxiv lawm.
3. Tus Thawj Uas Coj Kev Ncaj Ncees
“Nws yuav tsis txiav txim raws li nws lub qhovmuag pom lossis nws lub pobntseg hnov, nws yuav txiav txim ncaj ncees rau cov neeg pluag thiab tsa cov neeg uas tsis muaj leejtwg pab txoj cai.”—YAXAYAS 11:3, 4.
Nqi Vajlugkub no qhia tias Yexus Khetos yog tus huab tais ntawm Vajtswv lub tsoom fwv saum ntuj. Nws yuav kav ncaj ncees thoob plaws lub ntiajteb. Nws tsis xaiv ib haiv tibneeg dhau ib haiv tibneeg thiab tej neeg thoob ntiajteb yuav mloog nws tej kevcai.
4. Sib Koom Siab
Vajtswv lub tsoom fwv qhia kom sawvdaws “muaj lub siab xav ib yam nkaus, muaj lub siab hlub ib yam nkaus thiab sawvdaws koom ua ib lub siab.”—FILIPIS 2:2.
Nqi Vajlugkub no qhia tias Vajtswv lub tsoom fwv cov pejxeem tsis yog lam sib raug zoo xwb tiamsis sawvdaws yuav “koom ua ib lub siab” vim ib leeg hlub ib leeg tiag tiag.
