Vajtswv puas yog tus tsim lub qab ntuj khwb thiab txhua yam ciaj sia, lossis nyob nyob es cia li tshwm los xwb? Qhov uas ob tug kws tshawb txuj thiab phau Vajlugkub tau hais yeej sib txawv lawm deb heev. Ib txhia ntseeg tias ob tug kws tshawb txuj no hais yog lawm. Hos lwm cov ho ntseeg li phau Vajlugkub qhia. Tibneeg kuj sau ntaub sau ntawv thiab mus sib cam hauv TV tias lawv zaj yog zaj yog. Txawm li los coob leej tseem tsis tau paub tias tog twg thiaj yog tog yog.

Tej zaum cov xibhwb tom tsev kawm ntawv qhia rau koj tias lub qab ntuj khwb nyob nyob cia li tshwm los xwb, tsis muaj tus tsim. Tiamsis lawv puas muaj pov thawj qhia tias yeej tsis muaj ib tug tsim tiag? Dua li ntawd, tej zaum koj kuj hnov cov xibhwb ntawm tej kev ntseeg qhia tias yeej muaj ib tug tsim txhua yam. Tiamsis lawv puas muaj pov thawj txhawb tej uas lawv hais los lawv tsuas hais rau koj kom koj cia li ntseeg xwb?

Tej zaum koj twb muab txhua yam no xav mus xav los lawm, tiamsis koj tsis paub tseeb tias xyov puas muaj tus uas tsim ib puas tsav yam tiag. Lossis tej zaum koj ho xav tias txawm koj paub thiab tsis paub los, qhov ntawd tsis tseem ceeb dabtsi.

Phau Tsim Dheev! no yuav qhia seb yog vim li cas coob leej ntau tus ho ntseeg tias muaj tus tsim ib puas tsav yam, thiab vim li cas tseem ceeb ua luaj rau peb paub tias lub qab ntuj khwb los qhov twg los.