1. Puas tau muaj ib lub caij zoo li lub peb nyob no? Piav seb.

TSIS tau muaj dua ib lub caij uas yuav zoo li lub peb nyob no. Peb pom muaj raws nkaus li phau Vajlugkub tej lus faj lem. Yehauvas tabtom coj ib pab neeg coob coob “hauv txhua lub tebchaws txhua xeem txhua yam lus” los ua nws haiv neeg. Lawv yog “ib haiv neeg coob heev,” coob tshaj 8 plhom leej. Lawv sawvdaws zoo siab hlo ua “koom tu [Vajtswv] . . . nruab hnub hmo ntuj.” (Qhia Tshwm 7:9, 15; Yaxaya 60:22) Lawv hlub Vajtswv thiab hlub tibneeg heev. Tsis tau muaj dua ib zaug uas tibneeg yuav los paub Yehauvas coob npaum li no.

2. Cov uas tsis muaj kev sib raug zoo nrog Vajtswv coj li cas xwb? (Saib daim duab ntawm sab no.)

² Phau Vajlugkub qhia tias lub caij peb nyob no cov uas tsis muaj kev sib raug zoo nrog Vajtswv yuav tsis muaj kev hlub rau lwm leej lwm tus. Tus tubtxib Povlauj hais tias neeg yuav “xam pom lawv tus kheej xwb, ntshaw nyiaj txiag,” thiab yuav “nyiam kev lomzem heev dua li nyiam Vajtswv.” (2 Timaute 3: 1-4) Lawv yeej tsis muaj lub siab xib Vajtswv. Lawv tsuas nyiam ua li lawv lub siab ntshaw xwb. Lawv xav tias yog mus vuag tej uas lawv ntshaw, lawv yuav muaj kev zoo siab, tiamsis yeej tsis muaj li. Vim tibneeg nyias tsuas xam pom nyias tus kheej xwb, lub neej nyob hauv lub qab ntuj no thiaj nyuaj ua luaj.

3. Peb yuav kawm txog dabtsi hauv zaj no thiab yog vim li cas?

³ Tus tubtxib Povlauj yeej paub tias neeg tsuas yuav xam pom lawv tus kheej xwb thiab yuav yoojyim rau cov Khixatia xyaum tus cwj pwm no. Nws thiaj ceeb toom lawv kom “txav deb” lossis zam txhob mus nrog cov neeg zoo li ntawd ua ke. (2 Timaute 3:5) Tiamsis peb yeej zam tsis dhau lawv txhua lub sijhawm. Yog li, peb yuav ua li cas tiv thaiv peb tus kheej kom ua tau haum Yehauvas siab? Hauv zaj no peb yuav kawm txog txojkev hlub rau Yehauvas thiab txojkev ntshaw hauv 2 Timaute 3:2-4, seb ho txawv li cas. Cia peb ua tib zoo xav seb peb yuav ua li cas thiaj muaj Yehauvas txojkev hlub, peb thiaj yuav muaj kev zoo siab thiab kev kaj siab.

4. Puas txhaum yog peb hlub peb tus kheej? Piav seb.

⁴ Povlauj sau tias: “Neeg yuav xam pom lawv tus kheej xwb.” Ua li, puas txhaum yog peb hlub peb tus kheej? Yeej tsis txhaum. Peb yuav tau saib xyuas peb tus kheej zoo zoo. Yehauvas tsim kom peb paub ua li no. Yexus kuj hais tias: “Koj yuav tsum hlub kwvtij zej zog ib yam li koj hlub koj tus kheej.” (Malakau 12:31) Yog peb tsis paub hlub peb tus kheej, peb kuj yuav tsis paub hlub lwm tus thiab. Phau Vajlugkub hais tias: “Cov txiv yuav tsum hlub tus pojniam ib yam li nws hlub nws lub cev. Tus uas hlub nws tus pojniam kuj yog nws hlub nws tus kheej. Rau qhov tsis muaj leejtwg yuav ntxub nws lub cev tsuas muaj uas yug thiab tu kom zoo xwb.” (Efexau 5:28, 29) Yog li ntawd, peb yuav tau hlub peb tus kheej thiab.

5. Cov uas tsuas hlub lawv tus kheej xwb coj li cas?

⁵ Hauv 2 Timaute 3:2 peb pom tias neeg tsuas yuav xam pom, lossis hlub lawv tus kheej nkaus xwb. Yog leejtwg tsuas hlub nws tus kheej xwb ces nws yuav muab nws tus kheej xav loj dhau. (Nyeem Loos 12:3.) Nws yuav tsis xav txog luag lwm tus. Tsis tas li ntawd xwb, yog thaum twg mus tsis raws li nws siab xav, nws yuav muab liam rau lwm tus. Cov uas zoo li ntawd yeej tsis muaj kev zoo siab li.

6. Vim peb hlub Vajtswv peb thiaj coj tau li cas?

⁶ Cov neeg tshawb Vajlugkub ib txhia hais tias tos Povlauj xub tham txog tus cwj pwm uas neeg xam pom lawv tus kheej ua ntej, los twb yog tim tus cwj pwm no tibneeg thiaj muaj tej cwj pwm uas hais tom qab ntawd. Ua li, Vajtswv txojkev hlub pab tau neeg muaj tej cwj pwm zoo li cas xwb? Vajtswv txojkev hlub pab tau neeg muaj kev xyiv fab, kev siab tus, kev thev taus, kev khuvleej, kev ua zoo, kev ua ncaj, thiab muaj lub siab mos siab muag thiab paub tswj tus kheej. (Kalatia 5:22, 23) Tus sau nkauj hais tias: “Haiv neeg uas lawv  tus Vajtswv yog [Yehauvas] yuav tau nyob kaj siab lug.” (Ntawv Nkauj 144:15) Yehauvas yog tus Vajtswv uas muaj kev zoo siab, nws cov tibneeg thiaj nyob kaj siab lug. Lawv tsis zoo li cov uas tsuas xam pom lawv tus kheej es xav tau luag li xwb. Yehauvas cov tibneeg zoo siab hlo pub rau luag, lawv thiaj nyob kaj siab lug.​—Tubtxib Tes Haujlwm 20:35.

7. Peb yuav tsum xav txog cov lus nug twg thiaj pab tau peb hlub Vajtswv?

⁷ Peb puas hlub Vajtswv dua li peb hlub peb tus kheej? Ua tib zoo xav txog 2 nqes Vajlugkub no: “Tsis txhob ua siab hlob txeeb ua ib yam dabtsi rau yus lossis tsab ua loj tiamsis yuav tsum txo hwjchim xam pom lwm tus zoo dua yus. Nej tsis txhob nyias xam pom nyias tus kheej xwb yuav tsum xam pom lwm tus thiab.” (Filipi 2:3, 4) Xav txog cov lus nug no: ‘Kuv puas yuav cov lus ntuas no? Kuv puas ua raws li Vajtswv lub siab nyiam? Kuv puas rau siab ntso pab cov hauv lub koom txoos thiab cov uas kuv qhia Vajlugkub rau?’ Yeej tsis yoojyim ua li no rau qhov peb yuav tau siv dag siv zog thiab tso ib txhia kev lomzem tseg. Tiamsis yog peb ua raws li cov lus no, peb yuav muaj kev zoo siab tiag tiag vim peb paub tias peb ua rau Vajtswv zoo siab!

8. Vim ib txhia Khixatia hlub Vajtswv, lawv thiaj tau ua li cas?

⁸ Ib txhia Khixatia tau tso ntau yam tseg kom ua tau haujlwm puv ntoob rau Vajtswv vim lawv hlub nws. Ib tug muam hu ua Elikam (Ericka) yog ib tug kws kho mob, tiamsis nws zoo siab hlo tso nws txoj haujlwm tseg mus ua ib tug tho kev. Nws ua li no, nws tus txiv nkawd thiaj tau mus tshaj tawm rau ntau lub tebchaws. Nws hais tias: “Vim wb mus pab cov koom txoos uas hais lwm yam  lus, wb tau txais koob hmoov ntau thiab muaj phoojywg coob heev. Wb yeej tau lub neej zoo kawg li tiag.” Tus muam no tseem yog ib tug kws kho mob, tiamsis qhov tseem ceeb tshaj, nws siv nws lub neej los qhia tibneeg txog Yehauvas thiab los pab cov kwvtij nkauj muam. Nws hais tias qhov no thiaj ua rau nws “xyiv fab thiab muaj kev zoo siab tiag tiag.”

9. Ua li cas tus neeg ntshaw nyiaj txiag ho tsis muaj kev zoo siab?

⁹ Povlauj hais tias tibneeg yuav “ntshaw nyiaj txiag.” Ob peb xyoos tas los no ib tug tho kev tau nrog ib tug txivneej hauv tebchaws Ayalees (Ireland) tham txog Vajtswv. Tus txivneej txawm rho kiag ib co nyiaj ntsuab los thiab nthe tias: “Nov yog kuv tus vajtswv!” Feem coob yuav tsis hais kiag li tus txivneej no, tiamsis hauv lawv lub siab yeej tsis txawv deb. Lawv ntshaw nyiaj txiag thiab tej qhov txhia chaw. Phau Vajlugkub ceeb toom tias: “Tus uas nyiam nyiaj muaj npaum twg yeej tsis txaus nws lub siab, tus uas nyiam nyiaj txiag kuj tsis txaus siab rau tej uas tau lawm.” (Laj Lim Tswvyim 5:10) Tus neeg ntshaw nyiaj txiag txawm muaj npaum li cas los yimhuab xav tau ntau ntxiv. Nws rau siab ntso khwv kom tau lub neej vam meej, tiamsis nws tsuas lob tau “ntau yam kev txom nyem” los rau nws xwb.​—1 Timaute 6:9, 10.

10. Phau Vajlugkub hais li cas txog kev pluag thiab kev nplua nuj?

¹⁰ Peb txhua tus yeej cheem tsum nyiaj txiag. Nyiaj kuj tiv thaiv tau peb thiab. (Laj Lim Tswvyim 7:12) Ua li, yog peb muaj txaus noj txaus siv xwb, peb puas yuav muaj kev kaj siab? Yeej muaj! (Nyeem Laj Lim Tswvyim 5:12.) Yakhe tus tub Aku tau sau tias: “Thov tsis txhob cia kuv pluag thiab tsis txhob cia kuv nplua nuj, thov pub rau kuv noj kom txaus nkaus xwb.” Nws tsis xav kom txom nyem dhau tsam nws ho mus ua tub sab. Nws paub tias kev ua tub sab txhaum Vajtswv lawm. Tiamsis ua li cas nws ho tsis xav ua neeg nplua nuj thiab? Nws hais tias: “Tsam kuv noj tsau ces tsis lees yuav koj thiab hais tias, ‘[Yehauvas] yog leejtwg?’” (Paj Lug 30:8, 9) Koj puas tau pom cov neeg uas tso siab rau lawv tej nyiaj txiag xwb? Lawv yeej tsis tso siab rau Vajtswv li.

11. Yexus hais li cas txog nyiaj txiag?

¹¹ Tus neeg uas ntshaw nyiaj txiag yeej ua tsis tau haum Vajtswv siab. Yexus hais tias: “Tsis muaj leejtwg yuav ua qhev tau rau ob tug lospav, rau qhov nws yeej yuav ntxub ib tug nyiam ib tug, lossis yuav npuab ib tug saib tsis taus ib tug. Nej yuav ua Vajtswv li qhev thiab ua nyiaj txiag li qhev ua ke tsis tau.” Nws kuj hais ntxiv tias: “Tsis txhob khaws nyiaj txiag cia rau nej hauv ntiajteb, qhov ntawd muaj kab ntsaum thiab xeb noj thiab tub sab tho qhov tsev mus nyiag. Tiamsis nej yuav tsum khaws nyiaj txiag cia rau nej saum ntuj ceeb tsheej, qhov ntawd kab ntsaum thiab xeb tsis noj thiab tub sab tsis tho qhov tsev mus nyiag.”​—Mathai 6:19, 20, 24.

12. Lub neej yoojyim pab tau peb teev tiam Vajtswv li cas? Piav seb.

¹² Yehauvas cov tub qhe yeej tas zog xyaum ua lub neej yoojyim. Lawv pom tias ua lub neej yoojyim thiaj muaj sijhawm teev tiam Yehauvas thiab kuj ua rau lawv kaj siab dua. Ib tug kwvtij hu ua Yaj (Jack) nyob tebchaws U.S.A. muaj ib lub tsev loj heev thiab ib txoj haujlwm zoo kawg li. Tiamsis nws muab tej  ntawd tso huvsi tseg nws thiaj tau nrog nws pojniam tho kev. Nws hais tias: “Wb muaj av dav thiab muaj tsev zoo nkauj kawg li, yeej nyuaj heev rau wb muab tej ntawd tso tseg.” Tiamsis nws pom tias tej teeb meem pem haujlwm tsuas ua rau nws ntxhov siab tas li xwb. Nws hais tias: “Kuv pojniam ua ib tug tho kev mas nws niaj hnub nyob kaj siab lug. Nws hais tias nws tus lospav yog tus zoo tshaj plaws. Nimno kuv kuj ua ib tug tho kev lawm thiab. Zaum no wb ob leeg ua haujlwm rau tib tug lospav lawm xwb, Yehauvas!”

13. Yuav ua li cas peb thiaj paub tias peb ntshaw nyiaj txiag los tsis ntshaw?

¹³ Peb yuav tsum ua tib zoo ntsuam xyuas seb peb puas yog neeg ntshaw nyiaj txiag los tsis yog. Xav txog cov lus nug no: ‘Kuv lub neej puas qhia tias kuv ntseeg tej uas phau Vajlugkub hais txog nyiaj txiag? Kuv puas niaj hnub xav txog kev khwv noj khwv haus xwb? Kuv puas saib tej qhov txhia chaw muaj nqes dua kuv txojkev sib raug zoo nrog Yehauvas thiab lwm tus? Kuv puas ntseeg tias Yehauvas pub tau txhua yam rau kuv?’ Yehauvas yeej yuav tsom kwm tus uas tso siab plhuav rau nws!​—Mathai 6:33.

14. Peb yuav tsum nco ntsoov li cas txog kev lomzem?

¹⁴ Phau Vajlugkub qhia tias nyob rau tiam kawg, tibneeg yuav “nyiam kev lomzem.” Zoo li peb tau kawm, yeej tsis txhaum rau peb hlub peb tus kheej thiab mus khwv noj khwv haus, tsuav tsis ua dhau hwv lawm xwb. Ib txhia xav tias yuav tsum tsis txhob muaj kev lomzem hlo li, tiamsis Yehauvas tsis xav li ntawd, tsis yog txhua txojkev lomzem yuav txhaum. Phau Vajlugkub txhawb kom Vajtswv cov tibneeg “cia li mus, mus noj . . . tej zaub mov zoo siab xyiv fab, thiab mus haus . . . tej cawv txiv hmab ua zoo siab hlo.”​—Laj Lim Tswvyim 9:7.

15. Cov uas “nyiam kev lomzem” coj li cas?

¹⁵ Hauv 2 Timaute 3:4, peb kawm txog cov uas nyiam kev lomzem tsis nyiam Vajtswv. Nqe no hais tias lawv “nyiam kev lomzem heev dua li nyiam Vajtswv.” Puas yog lawv nyiam Vajtswv tiamsis nyiam tsis tas xwb? Ib tug tshawb fawb Vajlugkub hais tias: “Qhov no tsis yog txhais tias lawv nyiam Vajtswv me me thiab. Qhov no txhais tias lawv yeej tsis nyiam Vajtswv hlo li.” Phau Vajlugkub hais tias tej kev lomzem hauv lawv lub neej “muab lawv laum” lawm. (Luka 8:14) Cov uas nyiam kev lomzem yuav tau ua tib zoo xav txog cov lus ceeb toom no.

16, 17. Hais txog kev lomzem, Yexus tso tus qauv li cas?

¹⁶ Yexus tso tau ib tug qauv zoo heev rau peb xyaum. Nws kuj mus nrog luag “noj tshoob” thiab nrog luag noj “ib pluag” mov. (Yauhas 2:1-10; Luka 5:29) Thaum nws mus koom lawv rooj tshoob tsis muaj cawv txiv hmab txaus haus, Yexus kuj ua txujci muab dej hloov ua cawv. Muaj ib zaug tibneeg thuam tias Yexus noj tsau haus qaug. Tiamsis Yexus teb tias lawv xav yuam kev lawm.​—Luka 7:33-36.

 ¹⁷ Txawm Yexus mus koom nrog luag ua kev zoo siab los, nws tsis muab kev lomzem coj los ua yam uas tseem ceeb tshaj hauv nws lub neej. Nws muab Yehauvas tso ua ntej thiab siv zog pab lwm tus. Nws yeem raug luag tsim txom tuag saum ntoo los cawm noob neej txojsia. Yexus hais rau cov uas raws nws qab tias: “Thaum luag thuam thiab tsim txom nej thiab dag iab hiam txhua yam lus phem rau nej vim yog tim kuv, nej tau nyob kaj siab lug. Cia li zoo siab xyiv fab rau qhov nej twb muaj nqe zog ntau rau saum ntuj ceeb tsheej lawm, vim luag twb tsim txom cov xibhwb cev Vajtswv lus uas nyob ua nej ntej ib yam nkaus.”​—Mathai 5:11, 12.

18. Yuav ua li cas peb thiaj paub seb puas yog peb nyiam kev lomzem dhau lawm?

¹⁸ Peb puas nyiam kev lomzem dua li nyiam Vajtswv? Muab xav li no: ‘Kuv puas saib kev lomzem tseem ceeb dua kev sib txoos thiab kev tshaj tawm txoj xov zoo? Kuv puas yeem tso tej kev lomzem tseg kom tau teev tiam Vajtswv? Ua ntej kuv yuav ua ib yam kev lomzem twg, kuv puas ua tib zoo xav seb Yehauvas puas txaus siab tso?’ Vim peb hlub Vajtswv thiab xav ua haum nws siab peb thiaj zam tej uas peb paub tias nws ntxub. Txawm tej uas peb tsis paub tseeb seb Yehauvas puas pom zoo los kuj zoo rau peb zam tej ntawd thiab.​—Nyeem Mathai 22:37, 38.

19. Cov zoo li cas yuav tsis muaj kev kaj siab ib zaug li?

¹⁹ Xatas lub qab ntuj no ua rau noob neej nyob txom nyem ntsuav tau 6,000 xyoo. Nyob rau tiam kawg no lub ntiajteb puv ntia tej neeg uas xam pom lawv tus kheej xwb, lawv ntshaw nyiaj txiag, thiab nyiam kev lomzem dua li nyiam Vajtswv. Lawv xav ua kom txaus nkaus lawv lub siab ntshaw xwb. Lawv tsis xam pom leejtwg li. Cov uas coj li ntawd yeej tsis muaj kev kaj siab. Tiamsis phau Vajlugkub hais tias: “Tus uas Yakhauj tus Vajtswv pab, thiab nws lub chaw vam nyob hauv nws tus Vajtswv [Yehauvas], tus ntawd tau nyob kaj siab lug.”​—Ntawv Nkauj 146:5.

20. Vim koj hlub Vajtswv koj thiaj nyob kaj siab lug li cas?

²⁰ Yehauvas cov tub qhe yeej hlub nws tiag tiag. Txhua xyoo muaj neeg los paub thiab hlub Yehauvas coob zuj zus. Qhov no ua pov thawj tias Vajtswv lub Nceeg Vaj yeej kav lawm tiag. Tshuav tsis ntev xwb peb yuav tau txais tej koob hmoov uas zoo tshaj plaws. Thaum peb mloog Yehauvas lus yuav ua rau nws zoo siab ces peb yuav muaj kev kaj siab. Cov uas hlub Yehauvas yuav tau nyob kaj siab lug mus ib txhis! Hauv zaj tom ntej, peb yuav kawm tias tus uas xam pom nws tus kheej thiab tus uas hwm Yehauvas coj txawv li cas.