1-3. (1) Lub caij Xekhaliya cev Vajtswv lus, ua li cas rau cov Yixayee lawm xwb? (2) Vim li cas Yehauvas thiaj hais kom cov Yixayee rov los cuag nws?

IB THOOJ ntawv uas ya yuj yees, ib tug pojniam zaum hauv lub tawb efa, 2 tug pojniam uas muaj ob phab tis zoo li os dej dub. Tej uas Xekhaliya tau pom no phimhwj heev. (Xekhaliya 5:1, 7-9) Vim li cas Yehauvas ho ua rau Xekhaliya pom tej no? Lub caij Xekhaliya cev Vajtswv lus, ua li cas rau cov Yixayee lawm xwb? Thiab tej yog toog no muaj nqes li cas rau peb tiam no?

² Cov Yixayee poob cev qhev rau Npanpiloo tau 70 lub xyoos lawm. Tiamsis xyoo 537 ua ntej Yexus, Yehauvas cov tibneeg zoo siab heev vim lawv dim lawm. Lawv tau rov qab los rau Yeluxalees, los txhim kho lub tuam tsev dua tshiab thiab teev tiam Yehauvas. Lawv ua 1 xyoos xwb, twb tiag tau tej taw tag lawm. Cov pejxeem sawvdaws zoo siab heev lawv thiaj “qw nrov heev thiab tej suab ntawd nrov mus deb kawg” li. (Exala  3:10-13) Tiamsis cov tebchaws nyob ib ncig lawv txawm pib tawm tsam los cheem tes haujlwm kho lub tuam tsev. Cov Yixayee thiaj qaug zog zuj zus thiab tseg tsis ua lub tuam tsev lawm. Lawv nyias kho nyias tej vaj tse thiab mus ua nyias tej liaj teb lawm xwb. Yehauvas lub tuam tsev thiaj nyob nphob xuav tau 16 lub xyoos. Yuav ua li cas thiaj kho tiav lub tuam tsev? Lawv yuav tsum rov los cuag Yehauvas tsis txhob xav txog lawv tus kheej xwb. Yehauvas xav kom lawv ua siab tuab siab tawv thiab muaj lub siab kub lug teev tiam nws.

³ Nyob rau xyoo 520, Yehauvas thiaj txib Xekhaliya mus cev Nws tej lus rau cov Yixayee. Yehauvas txhawb kom lawv nco ntsoov tias nws tso lawv dim Npanpiloo los ua dabtsi. Xekhaliya lub npe txhais tias “Yehauvas Nco Ntsoov.” Txawm cov Yixayee tsis nco qab Yehauvas txhais tes pab lawv lawm los, Nws tseem nco ntsoov lawv. (Nyeem Xekhaliya 1:3, 4.) Yehauvas cog lus tias nws yuav pab lawv tsim tsa kom muaj kev pe hawm tseeb. Nws kuj sam hwm tias lawv yuav tsum pe hawm nws kawg siab kawg ntsws, nws thiaj txais yuav lawv txojkev pe hawm. Cia peb kawm txog Xekhaliya zaj yog toog 6 thiab 7. Peb yuav kawm seb Yehauvas txhawb cov Yixayee li cas, thiab 2 zaj yog toog no muaj nqes li cas rau peb tiam no.

4. (1) Hauv Xekhaliya zaj yog toog 6, nws pom dabtsi? (2) Vim li cas thooj ntawv ho muab sau rau 2 sab tibsi? (Saib daim duab 1 ntawm sab 15.)

⁴ Nyob rau hauv Xekhaliya tshooj 5, nws sau txog ib zaj yog toog txawv heev. (Nyeem Xekhaliya 5:1, 2.) Xekhaliya tsa muag ntsia pom ib thooj ntawv ya yuj yees saum nruab ntug. Thooj ntawv ntawd ntev li 9 meter (30 feet) thiab dav li 4.5 meter (15 feet) thiab nthuav pom muaj npe ntawv sau rau 2 sab huvsi. (Xekhaliya 5:3) Lub caij ntawd luag tsuas sau rau 1 sab xwb, tiamsis tej lus uas sau rau thooj ntawv ntawd yog tej lus txiav txim. Tej lus ntawd tseem ceeb heev thiaj muab sau rau 2 sab huvsi.

5, 6. Yehauvas puas txaus siab rau txhua txojkev ua tub sab?

⁵ Nyeem Xekhaliya 5:3, 4. Vajtswv yuav txiav txim rau txhua tus raws li lawv tes haujlwm. Yehauvas cov tibneeg yimhuab muaj lub nra hnyav vim lawv saws nws lub npe. Cov uas hlub Vajtswv paub tias yog lawv ua tub sab yuav ua puas tsuas Vajtswv lub npe. (Paj Lug 30:8, 9) Tej txhia ua tub sab vim lawv xav tias tsis mob leejtwg. Tiamsis ua tub sab tub nyiag yeej tsis zoo kiag li. Tus uas ua tub sab qhia tias nws saib tej uas nws lub siab ntshaw tseem ceeb dua Yehauvas, tseem ceeb dua Nws lub npe, thiab Nws tej kev lig kevcai.

⁶ Xekhaliya 5:3, 4 hais tias tej lus foom tsis zoo yuav “nkag rau hauv cov tub sab lub tsev” thiab yuav “ua rau tej ntoo tej pob zeb uas ua tsev puam tsuaj tag huvsi.” Nqe no qhia tias yog Yehauvas cov tibneeg ib tug twg ua txhaum Yehauvas yeej yuav muab nthuav tawm thiab tus ntawd yuav raug  teem txim. Txawm nws zais tau ntawm tub ceev xwm, ntawm tej lospav, cov txwj laus, thiab nws niam nws txiv los nws yeej zais tsis tau ntawm Yehauvas li. Vajtswv yeej yuav nthuav nws txojkev txhaum tawm los. (Henplais 4:13) Peb zoo siab kawg li uas peb tau nrog cov neeg uas “xav xyaum zoo rau txhua fab.”​—Henplais 13:18.

7. Zaj yog toog txog thooj ntawv ya yuj yees muaj nqes li cas rau peb?

⁷ Yehauvas ntxub txhua txojkev ua tub sab, tsis hais loj los me. Yeej yog ib qho koob hmoov zoo kawg li uas Yehauvas caw peb los paub nws thiab ua raws li nws tej hauv paus ntsiab lus, peb thiaj tsis ua puas tsuas nws lub npe. Yog peb ua lub neej ncaj ncees peb yuav zam dhau Yehauvas txojkev txiav txim rau cov neeg tawv ncauj.

8. Lus twv yog dabtsi?

⁸ Thooj ntawv ya yuj yees kuj muaj ib co lus sam hwm ntxiv thiab. Yog hais rau cov uas tuav Vajtswv lub npe “cog lus twv dag.” (Xekhaliya 5:4) Lus twv yog dabtsi? Lus twv yog lus cog tseg tias yus yuav ua los tsis ua ib yam dabtsi ntxiv lawm. Lus twv kuj yog tej lus uas ib tug twg hais tias nws tsis dag.

9, 10. Vajntxwv Xedekhiya puas ua raws li nws tau twv lawd?

⁹ Yog leejtwg tuav Yehauvas lub npe cog lus twv, nws yuav tsum ua raws li nws tau cog tseg. Cia peb kawm txog Xedekhiya. Nws yog tus vajntxwv kawg uas kav hauv Yeluxalees. Nws tuav Yehauvas lub npe cog lus tias nws yuav zwm rau Npanpiloo tus  vajntxwv tiamsis nws tsis ua raws li nws tau cog lus tseg. Yehauvas thiaj hais tias Xedekhiya yuav “tuag rau hauv Npanpiloo vim nws saib tsis taus tus vajntxwv hauv Npanpiloo tej lus twv tseg thiab muab tej lus cog tseg rhuav.”​—Exekhee 17:16.

¹⁰ Vajntxwv Xedekhiya tuav Yehauvas lub npe cog lus, Yehauvas thiaj xav kom nws ua raws li nws tej lus twv. (2 Vaj Keeb Kwm 36:13) Tiamsis Xedekhiya tsis ua raws li nws cog lus tseg thiab thov Iyi pab kom nws dim ntawm Npanpiloo txhais tes. Txawm nws thov Iyi pab los yeej pab tsis tau li.​—Exekhee 17:11-15, 17, 18.

11. Lo lus cog tseg twg tseem ceeb dua ntais?

¹¹ Tej xwm uas los raug Xedekhiya qhia rau peb tias Yehauvas hnov ntsoov tej uas peb cog tseg. Yog peb xav ua haum Vajtswv siab, peb yuav tsum tuav rawv tej lus uas peb tau cog tseg. (Ntawv Nkauj 76:11) Thaum peb muab peb lub neej cob rau Yehauvas twb yog peb cog lus tias peb yuav teev tiam nws, txawm raug kev txom nyem li cas los xij. Lo lus cog tseg no tseem ceeb dua lwm lo tibsi.

12. Vim peb muab peb lub neej cob rau Vajtswv lawm, peb yuav tsum niaj hnub coj li cas?

¹² Peb yuav tsum ua raws li peb tau cog tseg rau Yehauvas. Peb “niaj hnub” raug kev sim siab, tsis hais loj los me. Thaum peb thev dhau tej kev sim siab ntawd ces qhia tias peb muaj kev sib raug zoo nrog Yehauvas tiag. (Ntawv Nkauj 61:8) Xws li thaum yus mus ua haujlwm lossis kawm ntawv es muaj ib tug pheej xav nrog yus txuas lus, yus puas yuav mloog Yehauvas lus los tsis mloog? (Paj Lug 23:26) Yog yus ib leeg teev tiam Yehauvas xwb, yus puas thov Yehauvas pab kom yus coj tau li ib tug Khixatia txhua lub sijhawm? Txawm yuav ntsib tej kev sim siab zoo li cas los, peb puas ua Yehauvas tsaug txhua hnub uas nws hlub thiab coj peb txoj hau kev? Peb puas teem sijhawm nyeem Vajlugkub txhua hnub? Thaum peb muab peb lub neej cob rau Yehauvas, twb yog peb cog lus tias peb yuav ua txhua yam raws li tau hais no. Yog peb mloog Yehauvas lus thiab muab yam uas zoo tshaj pub rau nws ces qhia tias peb hlub Yehauvas, peb yog nws teej nws tug lawm. Peb tsis pe hawm Yehauvas rau tej lub caij xwb, peb niaj hnub pe hawm nws tsis tseg. Yog peb muab siab npuab Yehauvas, nws cog lus tias peb yuav vam meej.​—Kevcai 10:12, 13.

13. Xekhaliya zaj yog toog 6 pab tau peb li cas?

¹³ Xekhaliya zaj yog toog 6 pab peb pom tias yog peb hlub Yehauvas tiag, peb yuav tsis ua tub sab, tsis hla peb tej lus cog tseg. Peb kuj kawm tau tias txawm cov Yixayee ua yuam kev ntau yam los, Yehauvas yeej nco ntsoov nws tej lus cog tseg rau lawv thiab tsis tso lawv tseg li. Yehauvas paub tias tsis yoojyim rau lawv vim muaj yeeb ncuab nyob puag ncig lawv. Tej uas Yehauvas ua no qhia tias peb yuav tsum ua raws li peb tau cog tseg. Vajtswv yeej yuav pab peb tiag. Nws thiaj qhia rau peb tias tshuav tsis ntev xwb nws yuav muab kev txhaum kev phem tshem tawm hauv lub ntiajteb no mus. Cia peb kawm txog qhov no hauv Xekhaliya zaj yog toog 7.

14, 15. (1) Xekhaliya pom dabtsi hauv zaj yog toog 7? (Saib daim duab 2 ntawm sab 15.) (2) Tus pojniam hauv lub tawb piv txwv txog dabtsi? (3) Vim li cas tus tubtxib saum ntuj ho muab lub hau kaw nkaus rau lawm?

¹⁴ Tom qab Xekhaliya ua yog toog pom thooj ntawv uas ya yuj yees, txawm muaj ib tug tubtxib saum ntuj hais rau nws tias: “Tsa muag ntsia.” Xekhaliya tsa muag ntsia pom ib lub tawb “efa.” (Nyeem Xekhaliya 5:5-8.) Lub hau tawb yog txhuas. Thaum cem lub hau tawb ua ciav Xekhaliya pom “ib tug pojniam zaum hauv lub tawb” ntawd. Tus tubtxib saum ntuj hais rau Xekhaliya tias tus pojniam ntawd yog “kev txhaum kev phem.” Tus pojniam txawm yuav dhia tawm los tiamsis tus tubtxib muab nws thawb kiag rov hauv lub tawb thiab muab lub hau kaw nkaus rau. Zaj yog toog no txhais li cas?

¹⁵ Zaj yog toog no qhia rau peb tias Yehauvas yeej yuav tsis cia kev txhaum kev phem txeem rau hauv nws haiv neeg. Thaum Yehauvas pom tej yam phem nws yeej muab tshem kiag tamsid. (1 Khaulee 5:13) Twb yog vim li ntawd tus tubtxib saum ntuj thiaj muab lub hau kaw nkaus rau.

16. (1) Ua li cas rau lub tawb lawm? (Saib daim duab 3 ntawm sab 15.) (2) Ob tug pojniam coj lub tawb mus rau qhovtwg?

¹⁶ Tom qab ntawd, Xekhaliya pom 2 tug pojniam uas muaj ob phab tis zoo li os dej dub. (Nyeem Xekhaliya 5:9-11.) Ob tug pojniam ntawd tsis thooj li tus uas zaum hauv lub tawb. Nkawd ob phab tis muaj zog heev. Nkawd cia li tsaws kiag lub tawb nqa hlo “kev txhaum kev phem” mus lawm.  Nkawd “coj mus rau tebchaws Sina” uas yog tebchaws Npanpiloo. Vim li cas nkawd thiaj coj mus rau qhov ntawd?

17, 18. (1) Vim li cas ho npaj ib qho chaw cia tim Npanpiloo rau “kev txhaum kev phem” nyob? (2) Peb yuav tsum ua dabtsi?

¹⁷ Tiam Xekhaliya nyob, cov Yixayee yeej paub zoo tias coj “kev txhaum kev phem” mus rau tim Npanpiloo yog txhais li cas. Lub nroog Npanpiloo puv ntia kev plees ke yi kev teev dab teev mlom. Cov Yudai thiab Xekhaliya lawv yeej tau nyob hauv lub nroog ntawd los lawm, lawv niaj hnub tawm tsam kev ntseeg cuav. Yog li ntawd, zaj yog toog no ua pov thawj tias Yehauvas yeej yuav tsis cia ib yam dabtsi qias puas tsuas nws txojkev pe hawm dawb huv.

¹⁸ Zaj yog toog no kuj pab tau cov Yudai nco ntsoov tias lawv yuav tsum tsis txhob cia tej yam qias los tsuas txojkev pe hawm dawb huv. Yehauvas cov tibneeg yuav tsis cia kev txhaum kev phem txeem rau hauv lawv. Niaj hnub no Yehauvas coj peb los nyob hauv nws lub koom haum dawb huv, peb pom nws txojkev hlub kev tiv thaiv. Yog li ntawd, peb txhua tus yuav tsum nqe tes hlo pab tu kom dawb huv. Txhob cia kev txhaum kev phem nyob nrog Yehauvas cov tibneeg ib qho li.

19. Ob zaj yog toog uas Xekhaliya pom muaj nqes li cas rau peb tiam no?

¹⁹ Xekhaliya zaj yog toog 6 thiab 7 ceeb toom cov neeg phem tias Yehauvas yuav tsis cia kev phem kev limhiam nyob mus li. Peb uas yog Yehauvas cov tub qhe yuav tsum ntxub kev txhaum kev phem. Ob zaj yog toog no txhawb peb tias yog peb rau siab ntso ua haum peb Leej Txiv siab, nws yuav tsis foom phem rau peb tiamsis nws yuav tiv thaiv thiab foom koob hmoov rau peb xwb. Txawm peb nyob hauv lub qab ntuj phem no es nyuaj heev los Yehauvas yeej yuav pab kom peb thev taus. Tiamsis peb puas tso siab tias kev pe hawm tseeb yuav nyob mus txog thaum kawg? Lub sijhawm muaj kev ceeblaj txom nyem loj kawg li los ze lawm, Yehauvas puas yuav tiv thaiv nws lub koom haum tiag? Peb yuav teb 2 lo lus nug no rau zaj tom ntej.