1. Kev hu nkauj puas muaj nqes?

IB TUG neeg txawj teej nkauj hais tias: “Tej uas muab sau cia tsav tswvyim rau neeg. Lub suab paj nruag nrov kho siab zim. Tiamsis thaum hu nkauj nrog suab paj nruag rub tau cov uas mloog lub siab thim xav.” Thaum peb hu nkauj qhuas Vajtswv ces peb txav ze rau nws. Tej nkauj uas peb hu kuj qhuas peb Leej Txiv Yehauvas thiab qhia tias peb hlub nws. Txawm yus ib leeg hu lossis nrog coob tus hu ua ke, qhov uas hu nkauj rau Yehauvas yog ib feem ntawm peb txojkev pe hawm dawb huv.

2, 3. (1) Thaum tuaj sib txoos ua ke, tej txhia xav li cas txog kev hu nkauj? (2) Hauv zaj no peb yuav teb cov lus nug twg?

² Ua li, thaum peb tuaj sib txoos ua ke peb puas seev suab hu nkauj los peb txaj muag hu? Muaj tej haiv neeg, cov txivneej tsis nyiam hu nkauj rau lwm tus hnov. Yog muaj li no rau hauv lub koom txoos tej zaum sawvdaws yuav txaj muag hu nkauj. Yog cov txwj laus tsis hu nkauj lossis ho sawv mus ua lwm yam haujlwm, lub koom txoos yuav tsis  kub siab hu nkauj lawm.​—Ntawv Nkauj 30:12.

³ Kev hu nkauj yog ib feem ntawm peb txojkev pe hawm Yehauvas. Yog li ntawd, thaum lub koom txoos hu nkauj ua ke, peb tsis txhob sawv mus ua lwm yam. Peb yuav tau nug peb tus kheej li no: ‘Kuv xav li cas txog kev hu nkauj tom kev sib txoos? Yog kuv txaj muag seev suab hu nkauj, dabtsi yuav pab tau kuv? Yuav ua li cas kuv thiaj kub siab lug hu nkauj?’

4, 5. Cov Yixayee tau npaj li cas thiaj muaj kev hu nkauj hauv lub tuam tsev?

⁴ Cov uas pe hawm Yehauvas yeej ib txwm hu nkauj thiab ntaus nkauj nog ncas qhuas nws. Thaum haiv neeg Yixayee muab siab npuab Yehauvas, lawv kub siab lug hu nkauj rau nws. Zoo ib yam li thaum Davi npaj siab ua lub tuam tsev, nws kom cov Levi 4,000 leej hu nkauj thiab tshuab raj, ntaus nkauj nog ncas qhuas Yehauvas. Muaj 288 leej yog cov uas “tau kawm hu nkauj rau [Yehauvas] thiab txawj hu.”​—1 Vaj Keeb Kwm 23:5; 25:7.

⁵ Thaum cov Yixayee muab lub tuam tsev cob rau Yehauvas, lawv kuj ntaus nkauj nog ncas xyiv fab hlo hu nkauj ua ke. Phau Vajlugkub hais tias: “Cov tshuab raj thiab cov hu nkauj yuav tsum tsa suab nrov ib txhij qhuas thiab ua [Yehauvas] tsaug. Mas thaum lawv tsa suab nrov nrog suab raj thiab suab nruas npuaj tooj liab thiab lwm yam suab phim nkauj . . . [Yehauvas] lub hwjchim ci ntsa iab puv nkaus Vajtswv lub tuam tsev.” Tej uas cov Yixayee ua no yeej txhawb tau lawv txojkev ntseeg kawg li!​—2 Vaj Keeb Kwm 5:13, 14; 7:6.

6. Thaum Nehemi ua tswv xeev hauv Yeluxalees, nws tau npaj cov hu nkauj thiab cov ntaus nkauj li cas?

⁶ Nehemi txhib kom cov Yixayee cia li kho Yeluxalees tus ntsa loog thiab kom cov Levi hu nkauj, ntaus nkauj nog ncas qhuas Vajtswv. Thaum lawv muab tus ntsa loog cob rau Yehauvas, ua rau sawvdaws zoo siab xyiv fab kawg li. Nehemi tsa 2 pab hu nkauj ua Vajtswv tsaug. Lawv taug ua ib kab sab saum tus ntsa loog. Ib pab mus rau sab xis, ib pab mus rau sab laug, lawv mam mus sib tshuam ze ntawm Yehauvas lub tuam tsev. Lawv ntaus nkauj nog ncas thiab hu nkauj nrov ncha mus deb kawg li. (Nehemi 12:27, 28, 31, 38, 40, 43) Yehauvas txaus siab heev rau qhov lawv kub siab lug hu nkauj qhuas ntxhias nws.

7. Yexus tau ua li cas qhia tias kev hu nkauj muaj feem nrog cov Khixatia txojkev pe hawm?

⁷ Lub sijhawm Yexus nyob los kev hu nkauj tseem ceeb kawg li. Xav txog hmo tshwj xeeb tshaj plaws uas yog tus Tswv Pluas Hmo. Thaum Yexus nrog nws cov thwjtim noj hmo tas, lawv kuj hu nkauj qhuas Yehauvas thiab.​—Nyeem Mathai 26:30.

8. Cov Khixatia thawj 100 xyoo uas hu nkauj qhuas Vajtswv ua qauv rau peb li cas?

⁸ Nyob thawj 100 xyoo, cov Khixatia sib txoos hauv lawv tej tsev xwb. Txawm tej tsev ntawd tsis thooj li lub tuam tsev hauv Yeluxalees los cov Khixatia tseem kub siab lug hu nkauj qhuas  Vajtswv. Tus tubtxib Povlauj thiaj hais li no: “Thaum nej hu nkauj, tsis hais tej nkauj uas Daviv sau lossis tej nkauj qhuas Vajtswv lossis tej nkauj uas cov ntseeg ibtxwm hu qhuas Vajtswv, nej yuav tsum zoo siab hlo ua Vajtswv tsaug.” (Khaulauxi 3:16, TMZ) Peb kuj xyaum tau li ntawd thiab. Thaum peb hu nkauj cia peb nco ntsoov “ua Vajtswv tsaug.” Cov nkauj kuj yog tej zaub mov uas tus qhev ncaj thiab ntse tau npaj los txhawb peb txojkev ntseeg.​—Mathai 24:45.

9. (1) Vim li cas tej txhia txaj muag hu nkauj thaum mus kev sib txoos thiab tej rooj sib txoos? (2) Peb yuav hu nkauj qhuas Vajtswv li cas? (3) Leejtwg yuav tsum ntaus thawj hlo hu nkauj? (Saib daim duab ntawm sab 3.)

⁹ Koj puas txaj muag hu nkauj? Tej zaum koj haiv neeg lossis koj tsev neeg ib txwm txaj muag hu nkauj. Thaum koj mloog tej nav loob (lossis cov neeg hu nkauj) hauv xov tooj cua lossis hauv this vis (TV) tej zaum koj xav tias koj suab tsis zoo npaum li lawv. Txawm li cas kuj xij, peb txhua tus muaj feem hu nkauj qhuas Yehauvas. Yog li ntawd, tuav koj phau nkauj kom siab, tsa koj taubhau, thiab seev suab xyiv fab hlo hu qhuas Vajtswv! (Exala 3:11; nyeem Ntawv Nkauj 147:1.) Tej lub Tsev Nceeg Vaj kuj muaj this vis uas tso tawm cov npe ntawv nkauj tshwm rau sawvdaws pom ces yoojyim tsa suab hu nrov. Thaum muaj Kev Kawm Rau Cov Kwvtij Tuav Haujlwm, cov txwj laus kuj hu nkauj thiab. Qhov no qhia tias thaum muaj kev sib txoos tseem ceeb heev rau cov txwj laus ntaus thawj hlo hu nkauj.

10. Yog peb ntshai hu nkauj nrov, peb yuav tsum nco ntsoov li cas?

 ¹⁰ Coob tus ntshai tias yog lawv kub siab lug hu nkauj ntshe yuav hu tau nrov dhau lawm. Ib txhia kuj xav tias suab tsis zoo ces yuav tsum tsis txhob hu nrov nrov. Tiamsis xav li no, thaum peb tham pem peb kuj tham tau yuam kev thiab, los peb yeej tsis nyob ntsiag to xwb. (Yakaunpau 3:2) Yog li ntawd, txawm peb lub suab tsis zoo ua luaj twg los peb yuav tsum hu nkauj qhuas Yehauvas.

11, 12. Peb yuav tsum ua li cas thiaj txawj hu nkauj?

¹¹ Tej zaum peb tsis xav hu nkauj vim peb tsis paub hu. Ua li, peb yuav tsum ua li cas peb thiaj paub hu nkauj? *​—Saib cov lus hauv qab taw qhia.

¹² Yog koj xav hu nkauj nrov koj yuav tsum xyaum hloov pa. Peb txoj pa zoo ib yam li fai fab lossis hluavtaws xob uas ua rau lub teeb cig. Thaum peb nqus pa yuav ua rau peb lub suab nrov tuaj. Thaum peb hu nkauj, peb yuav tsum hu nrov ib yam li thaum peb tham lus lossis tso mas suab hais lus. * (Saib cov lus hauv qab taw qhia.) Phau Vajlugkub kuj hais txog cov uas pe hawm Yehauvas kom “cia li hu nkauj nrov rau Vajtswv.”​—Ntawv Nkauj 81:1.

13. Yuav ua li cas peb thiaj hu tau nkauj nrov?

¹³ Thaum koj pe hawm Vajtswv ua ib tse neeg lossis thaum koj nyob ib leeg, koj kuj xyaum tau li no: (1) Xaiv ib zaj nkauj uas koj nyiam hu. (2) Nyeem kom nrov nrov. (3) Ua ib pas nyeem kom tag nrho ib kab. (4) Seev suab hu kab ntawd kom nrov. (Yaxaya 24:14) Thaum koj ua li no koj yuav hu tau nkauj nrov zuj zus tuaj. Tsis txhob ntshai, tsis txhob txaj muag!

14. (1) Peb yuav tsum ua li cas thiaj hu tau nkauj nrov? (Saib lub ntsiab me “ Xyaum Kom Txawj Hu Nkauj.”) (2) Koj xav xyaum li cas ntxiv?

¹⁴ Yuav kom hu tau nkauj nrov, yuav tsum rua qhov ncauj loj loj. Tiamsis yog koj xav tias koj lub suab yau dhau lawm koj yuav ua li cas? Nco ntsoov tias lub suab tsis yog tawm hauv qhov ncauj los xwb tiamsis yog tawm hauv nrog  cev tuaj. Yog li ntawd, koj yuav tsum ua ib ce xoob thuav koj lub suab thiaj nrov nkoov. Yog koj xyaum hu nkauj uj iv kuj pab tau koj thiab. Yog koj lub suab soob dhau lawm ua kom lub qa muag zog lub suab thiaj laus ntxhawv.

15. (1)  Rooj sib txoos txwm xyoo 2016, tau muaj lus tshaj tawm li cas? (2) Vim li cas ho muab phau nkauj kho dua tshiab?

¹⁵ Nyob rau xyoo 2016, txhua tus uas tau koom rooj sib txoos txwm xyoo zoo siab xyiv fab kawg li. Kwvtij Xatefanau Lej (Stephen Lett) uas yog ib tug ntawm Pab Uas Ntaus Thawj tau tshaj tawm tias muaj ib phau nkauj tshiab hu ua “Sing Out Joyfully” to Jehovah (Xyiv Fab Hlo Hu Nkauj Rau Yehauvas). Nws piav tias tau muab phau ntawv nkauj kho kom phim cov lus hauv phau Vajlugkub New World Translation uas kho dua tshiab xyoo 2013. Kuj tau ntxiv ob peb zaj txog kev tshaj tawm txoj xov zoo thiab txog tus nqe txhiv. Tsis tas li ntawd xwb, vim kev hu nkauj yog ib feem ntawm peb txojkev pe hawm, Pab Uas Ntaus Thawj thiaj xav npaj ib phau ntawv ruaj khov rau sawvdaws siv. Lawv thiaj pom zoo luam daim khaum uas zoo ib yam li phau Vajlugkub New World Translation.

16, 17. Tau muab phau nkauj tshiab hloov li cas lawd?

 ¹⁶ Tau muab cov nkauj uas tham txog tib lub ntsiab coj los tso ua ke kom yoojyim nrhiav. Thawj 12 zaj hais txog Yehauvas, 8 zaj tom qab hais txog Yexus thiab tus nqe txhiv. Muaj ntau lub ntsiab sib txuas zws mus thoob phau nkauj. Kuj muaj txheej txheem qhia txog tej ntsiab ntawd thiab. Ua li no thiaj yoojyim rau cov kwvtij xaiv seb yuav hu zaj nkauj twg thaum lawv muaj lus qhuab qhia.

¹⁷ Tau muab tej lo hloov xwv txhua tus thiaj hu tau tawm hauv nruab siab tuaj thiab to taub lub ntsiab. Kuj tau muab tej lus uas tibneeg niaj hnub hais los hloov tej lus qub qub uas tsis muaj neeg siv lawm. Kuj tau hloov tej zaj kom phim tej kev sib txoos thiab kev tshaj tawm txoj xov zoo.

18. Vim li cas peb yuav tsum xyaum hu cov nkauj tshiab? (Saib cov lus hauv qab taw qhia.)

¹⁸ Ntau zaj hauv phau nkauj tshiab zoo ib yam li tej lus thov Vajtswv. Tej nkauj no pab tau peb qhia siab rau Yehauvas. Kuj muaj cov nkauj uas pab peb ‘ib leeg txhawb ib leeg lub zog kom sib hlub thiab ua haujlwm zoo.’ (Henplais 10:24) Peb yuav ua li cas thiaj cim tau cov nkauj? Yog peb mloog tej nkauj uas cov kwvtij nkauj muam twb hu cia lawd, peb yuav cim tau zoo dua. Thiab yog koj xyaum tej nkauj no hauv tsev ces koj yuav tsis ntshai thiab tsis txaj muag seev suab hu nkauj lwm qhov. *​—Saib cov lus hauv qab taw qhia.

19. Txhua tus hauv lub koom txoos muaj feem pe hawm Yehauvas li cas?

¹⁹ Nco ntsoov tias kev hu nkauj yog ib feem ntawm peb txojkev pe hawm. Thaum peb hu nkauj peb qhia rau Yehauvas tias peb hlub nws thiab nco nws txiaj ntsig rau txhua yam uas nws tau ua. (Nyeem Yaxaya 12:5.) Thaum peb kub siab lug hu nkauj yuav txhawb tau lwm tus kom kub siab hu thiab. Txawm tus laus tus hluas, tus uas ib txwm tuaj thiab tus tuaj tshiab los, peb txhua tus muaj feem pe hawm Yehauvas li no. Yog li ntawd, tsis txhob ntshai hu nkauj tawm hauv koj lub siab tuaj. Ua raws li tus uas sau nkauj hais no: “Cia li hu nkauj rau [Yehauvas].” Cia li hu nkauj xyiv fab hlo rau Vajtswv!​—Ntawv Nkauj 96:1.