1, 2. (1) Ua cas peb ho paub tias tibneeg yeej nrog tau Vajtswv ntaus phoojywg? (2) Peb yuav kawm txog dabtsi hauv zaj no?

TXIJ thaum peb xeev xwm los mus txog hnub tsis muaj peb lawd, peb yeej ntshaw txojkev hlub. Tsis yog txojkev hlub li hluas nkauj hluas nraug, tiamsis yog txojkev hlub uas los ntawm tej phoojywg kwvluag. Tiamsis tseem muaj ib txojkev hlub uas tseem ceeb tshaj ntawd, yog Yehauvas txojkev hlub rau peb. Muaj coob leej xav tias peb twb pom tsis tau Vajtswv thiab nws muaj hwjchim heev, peb puas nrog tau nws ntaus phoojywg tiag? Peb yeej nrog tau!

² Phau Vajlugkub qhia tias muaj ib co tibneeg tau nrog Vajtswv ntaus phoojywg. Peb yuav tsum xyaum lawv tus qauv. Vim li cas? Vim peb xav nrog Vajtswv sib raug zoo thiab. Cia peb kawm txog Aplahas tus qauv. (Nyeem Yakaunpau 2:23.) Ua li cas Vajtswv thiaj suav tias Aplahas yog Nws tus phoojywg? Twb yog nws muaj kev ntseeg. Phau Vajlugkub hais tias nws yog “txhua tus ntseeg . . . li txiv.” (Loos 4:11) Thaum koj kawm zaj no, ua tib zoo xav seb koj yuav xyaum Aplahas li cas thiaj txhawb tau koj txojkev sib raug zoo nrog Yehauvas.

3, 4. (1) Aplahas txojkev ntseeg raug sim li cas? (2) Ua cas Aplahas ho yeem muab Yiha xyeem?

³ Thaum Aplahas muaj li 125 xyoos, Yehauvas hais kom nws muab nws tus tub Yiha tua xyeem rau Yehauvas. ^[1] (Saib cov lus qhia rau zaj no.) Aplahas thiaj npaj taws npaj riam huvsi thiab coj Yiha nrog nws mus. Thaum ntawd Yiha muaj li 25 xyoos, nws kwv ib tsuag taws raws nws txiv qab. Ob txiv tub maj mam taug kev duj duam nce toj mus saum roob lawm. Lub sijhawm ntawd ntshe mob Aplahas siab tshaj plaws li.​—Chiv Keeb 22:1-8.

⁴ Tej zaum Aplahas txojkev ntseeg tsis tau raug sim li ntawd ib zaug li. Tej txhia xav yuam kev tias Vajtswv phem heev nws thiaj hais kom Aplahas muab nws tus tub tua xyeem. Muaj dua ib txhia xav tias Aplahas tsis hlub nws tus tub nws thiaj yeem ua li ntawd. Tiamsis cov uas hais li ntawd tsis muaj kev ntseeg thiab lawv tsis paub tias kev ntseeg tseeb yog li cas tiag. (1 Khaulee 2:14-16) Tsis yog Aplahas tsis paub es nws lam tau lam mloog Vajtswv lus. Aplahas muaj kev ntseeg tiag tiag. Nws paub tias txhua yam Yehauvas hais kom nws ua puavleej zoo xwb. Aplahas paub tseeb tias yog nws mloog Vajtswv lus ces Yehauvas yeej yuav foom koob hmoov rau nkawd ob txiv tub. Ua li cas Aplahas thiaj muaj kev ntseeg npaum li no? Twb yog nws kawm paub txog Yehauvas thiab pom Yehauvas txhais tes, nws thiaj muaj kev ntseeg ua luaj.

5. (1) Ua cas Aplahas ho paub txog Yehauvas? (2) Aplahas xav li cas txog tej uas nws tau kawm?

⁵ Kawm paub txog Yehauvas. Aplahas loj hlob hauv lub moos Aw. Cov tibneeg uas nyob hauv lub moos ntawd teev tiam tej vajtswv cuav xwb. Aplahas txiv kuj teev tiam tej vajtswv ntawd thiab. (Yausua 24:2) Yog li ntawd, leejtwg yog tus qhia Aplahas txog tus tseem Vajtswv? Phau Vajlugkub qhia tias Aplahas yog Xeeb caj ces. Xeeb yog Nau-a tus tub thiab nws muaj kev ntseeg kawg li. Xeeb tuag thaum Aplahas muaj li 150 xyoo. Tej zaum twb yog nws qhia Yehauvas rau nws tej xeeb leej xeeb ntxwv huvsi, Aplahas thiaj paub txog Yehauvas. Tej uas Aplahas tau kawm ua rau Aplahas muaj kev hlub thiab kev ntseeg rau Yehauvas.

6, 7. Thaum Aplahas pom Yehauvas txhais tes, txhawb tau nws txojkev ntseeg li cas?

⁶ Pom Yehauvas txhais tes. Muaj ib txhia hais tias xav yam twg kom tau yam ntawd. Aplahas yog ib tug uas tau ua li ntawd. Tej uas Aplahas kawm txog Yehauvas raug nws siab heev, ua rau nws hwm Yehauvas tus uas “loj dua ntais uas tsim ntuj tsim teb.” (Chiv Keeb 14:22) Phau Vajlugkub muab kev hwm Vajtswv hu ua kev “ntshai Vajtswv.” (Henplais 5:7) Yog peb xav nrog Vajtswv sib raug zoo, peb yuav tsum paub ntshai Nws. (Ntawv Nkauj 25:14) Aplahas paub ntshai Vajtswv, nws thiaj mloog Vajtswv lus.

⁷ Vajtswv tau hais kom Aplahas thiab Xala tawm lub moos Aw mus nyob ib lub tebchaws txawv. Lub sijhawm ntawd Aplahas thiab Xala twb laus heev lawm, tiamsis nkawd tseem tso vaj tso tsev tseg mus nyob tsev ntaub tas nkawd lub neej. Aplahas paub tias yuav ntsib ntau yam xwm txheej, tiamsis nws txiav txim siab mloog Yehauvas lus tuag nthi. Vim Aplahas mloog lus, Vajtswv thiaj tiv thaiv thiab foom koob hmoov rau nws. Muaj ib zaug, ib tug vajntxwv cia li coj Xala mus ua nws pojniam. Aplahas tseem ntshai tsam nws raug tua thiab, tiamsis Yehauvas ua txujci cawm nkawd dim. Muaj ntau zaus uas Yehauvas tau pab nkawd li no. (Chiv Keeb 12:10-20; 20:2-7, 10-12, 17, 18) Twb yog Aplahas pom Yehauvas txhais tes li no, nws thiaj muaj kev ntseeg ua luaj.

8. Yuav ua li cas peb thiaj kawm paub txog Yehauvas thiab pom nws txhais tes pab peb?

⁸ Peb puas ua tau Yehauvas tus phoojywg kwvluag? Peb yeej ua tau yog peb kawm txog  Vajtswv ib yam li Aplahas. Yav thaud Aplahas twb tsis muaj phau Vajlugkub li peb. (Daniyee 12:4; Loos 11:33) Yog peb kawm phau Vajlugkub, peb yuav paub ntau yam txog tus “loj dua ntais uas tsim lub ntuj thiab lub ntiajteb.” Tej uas peb kawm ua rau peb hwm thiab hlub Yehauvas, peb thiaj xav mloog nws lus. Yog peb mloog nws lus, ces peb yuav pom nws txhais tes tiv thaiv thiab foom koob hmoov rau peb. Qhov no yuav txhawb tau peb txojkev ntseeg ntxiv. Yog peb teev tiam Yehauvas kawg siab kawg ntsws, peb yuav txaus siab rau peb lub neej thiab nyob kaj siab lug. (Ntawv Nkauj 34:8; Paj Lug 10:22) Peb yimhuab kawm paub txog Yehauvas thiab pom nws txhais tes pab peb, ces peb yimhuab nrog nws sib raug zoo.

9, 10. (1) Yuav tsum ua li cas txojkev phoojywg thiaj loj hlob? (2) Aplahas ua li cas qhia tias nws saib txojkev phoojywg nrog Yehauvas rau nqe?

⁹ Kev phoojywg kwvluag muaj nqes heev. (Nyeem Paj Lug 17:17.) Tsis zoo li tej khoom kim kim uas yus yuav los txawb hauv tsev. Tiamsis zoo ib yam li tsob paj uas yuav tau tu ntshis thiaj tawg zoo nkauj. Aplahas saib nws txojkev sib raug zoo nrog Yehauvas rau nqe ib yam li ntawd. Nws thiaj nrhiav kev los txhawb kom nws txojkev sib raug zoo nrog Yehauvas hajyam ruaj khov. Nws ua li no li cas?

¹⁰ Txhua yam uas Aplahas ua qhia tias nws mloog Vajtswv lus thiab paub ntshai Vajtswv. Zoo li thaum Aplahas tsev neeg thiab tej tub qhe mus rau tebchaws Khana-as, nws yeej tso siab plhuav rau Yehauvas. Ua ntej nws txiav txim siab ua ib yam dabtsi, tsis hais loj los me, nws yeej mus cuag Yehauvas. Thaum Aplahas muaj 99 xyoos, ua ntej tseem tsis tau muaj Yiha, Yehauvas sam hwm kom Aplahas thiab txhua tus txivneej hauv nws lub tsev ua kevcai txiav. Aplahas puas ua xyem xyav? Nws tsis ua. Aplahas tso siab plhuav rau Yehauvas thiab ua kevcai txiav “rau hnub ntawd” kiag.​—Chiv Keeb 17:10-14, 23.

11. Vim li cas Aplahas txhawj txog Xaudoo thiab Kaumaula tiamsis Yehauvas tau pab nws li cas?

¹¹ Txawm Yehauvas sam hwm li cas los, Aplahas yeej ua raws nraim. Vim li no nkawd txojkev sib raug zoo thiaj nyob ruaj khov. Thaum muaj tej yam uas Aplahas tsis to taub, nws yeej tsis ntshai mus cuag Yehauvas. Xws li thaum Yehauvas hais tias nws yuav muab lub moos Xaudoo thiab Kaumaula rhuav tshem, Aplahas nyuaj siab heev. Nws xav tias Yehauvas yuav loj xov rhuav tshem cov zoo cov phem huvsi. Tej zaum Aplahas txhawj txog nws tus xeeb ntxwv Lauj thiab Lauj tsev neeg uas nyob hauv Xaudoo heev. Aplahas thiaj qhia tag nrho nws tej kev nyuaj siab rau Yehauvas. Vajtswv Yehauvas ua siab ntev teb nws. Aplahas pom tias Yehauvas yog ib tug Vajtswv uas khuvleej tibneeg. Yehauvas piav tias thaum nws txiav txim, nws tshuaj txhua tus lub siab thiab cawm cov zoo.​—Chiv Keeb 18:22-33.

12, 13. (1) Qhov uas Aplahas kawm paub txog Yehauvas thiab pom tej uas Yehauvas tau ua, pab tau nws li cas? (2) Aplahas tau hais li cas thiaj qhia tias nws tso siab plhuav rau Yehauvas?

 ¹² Aplahas kawm paub txog Yehauvas thiab pom Yehauvas pab nws ua ntu zus, Aplahas txojkev phoojywg nrog Yehauvas thiaj ruaj khov. Tom qab no thaum Yehauvas hais kom Aplahas muab nws tus tub Yiha xyeem rau Yehauvas, nws yeej paub tias Yehauvas tsuas hais rau qhov zoo xwb. Tsis yog Yehauvas ntxeev siab ua phem ua limhiam. Nws tso siab plhuav rau Yehauvas vim Yehauvas ib txwm khuvleej thiab tiv thaiv nws. Yehauvas kuj ua siab ntev heev rau nws. Vim li cas peb ho paub tias Aplahas xav li ntawd tiag?

¹³ Thaum Aplahas coj nws tus tub mus, nws hais rau 2 tug tub qhe tias: “Neb nrog nees luav nyob ntawm no, kuv thiab kuv tus tub yuav mus rau tim ub, mus pe hawm Vajtswv tag, [wb] mam li rov los rau ntawm neb no.” (Chiv Keeb 22:5) Aplahas twb paub tias nws yuav muab Yiha tua xyeem rau Yehauvas, ua cas nws ho hais li ntawd? Puas yog nws dag nkawd xwb? Tsis yog. Phau Vajlugkub hais tias Aplahas ntseeg tias Yehauvas muaj peevxwm tsa tau nws tus tub ciaj sawv rov los. (Nyeem Henplais 11:19.) Thaum Aplahas thiab Xala nkawd twb laus heev lawd, Yehauvas tau ua txujci kom nkawd xeeb taus tub. (Henplais 11:11, 12, 18) Yog li ntawd, Aplahas paub tseeb tias tsis muaj ib yam dabtsi uas Yehauvas yuav ua tsis tau li. Nws ntseeg tias txawm Yiha tuag lawm los, Yehauvas yeej tsa tau nws ciaj sawv rov los kom Vajtswv tej lus cog tseg muaj tiav. Vim li no, Aplahas thiaj tau los ua “txhua tus ntseeg . . . li txiv.”

14. Puas nyuaj rau koj mloog Yehauvas tej lus sam hwm thiab Aplahas tus qauv pab tau koj li cas?

¹⁴ Niaj hnub no Yehauvas tsis hais kom muab peb cov menyuam tua xyeem rau nws, tiamsis nws xav kom peb ua raws li nws tej lus sam hwm. Tej lub sijhawm peb yuav tsis to taub Yehauvas tej lus sam hwm lossis yuav nyuaj rau peb mloog nws lus. Koj puas xav li ntawd thiab? Xav txog qhov uas Yehauvas sam hwm kom peb tshaj tawm txoj xov zoo. Nyuaj heev rau ib txhia ua raws li cov lus sam hwm ntawd. Tej zaum lawv txaj muag thiab ntshai nrog tibneeg tham. Lwm cov ho ntshai coj txawv ntawm cov neeg uas lawv nrog ua haujlwm thiab kawm ntawv ua ke. (Khiav Dim 23:2; 1 Thexalaunika 2:2) Thaum nyuaj heev rau peb ua raws li Yehauvas tej lus sam hwm, cia peb xav txog Aplahas tus qauv. Nws muaj kev ntseeg heev thiab siab loj heev. Yog peb ua tib zoo xav txog cov uas muaj kev ntseeg, yuav ua rau peb xav xyaum lawv thiab txav ze peb tus Phoojywg, Yehauvas.​—Henplais 12:1, 2.

15. Aplahas puas zoo siab tias nws tau siv nws lub neej los ua raws li Yehauvas sam hwm?

¹⁵ Thaum kawg Aplahas puas zoo siab tias nws tau siv nws lub neej los ua raws li  Yehauvas sam hwm? Nws zoo siab heev, nws thiaj teev tiam Yehauvas mus txog ntua hnub uas nws tu siav. (Chiv Keeb 25:8) Aplahas tuag thaum nws muaj 175 xyoos. Thaum nws xav txog nws lub neej, nws txaus siab kawg li. Vim li cas? Vim nws muab nws lub neej xaus rau nws txojkev sib raug zoo nrog Yehauvas, thiab nws xav tau txojsia ib txhis tsis kawg yav tom hauv ntej.

16. Hauv lub Vaj Kaj Siab, dabtsi yuav ua rau Aplahas zoo siab?

¹⁶ Phau Vajlugkub hais tias Aplahas “tos rawv lub nroog uas tsim tsa rau saum tej taw tiag uas Vajtswv tsim thiab Vajtswv ua.” (Henplais 11:10) Lub nroog ntawd yog Vajtswv lub Nceeg Vaj. Aplahas ntseeg tias muaj ib hnub nws yuav pom lub Nceeg Vaj ntawd kav ib puas tsav yam hauv ntiajteb no. Thaum Aplahas sawv rov los nyob hauv ntiajteb no, nws yuav zoo siab heev uas nws tau nrog Yehauvas ntaus phoojywg dua. Tsis tas li ntawd xwb, nws yuav zoo siab heev thaum nws hnov tias txij nws tiam los, nws tus qauv pab tau Vajtswv cov tibneeg coob leej ntau tus. Aplahas yuav pom tias qhov uas nws coj Yiha mus xyeem saum lub roob Mauliya piv txog ib yam uas tseem ceeb kawg nkaus. (Henplais 11:19) Thiab Aplahas yuav pom tias qhov ntawd pab tau tsheej plhom leej los paub tias mob Yehauvas siab npaum li cas thaum Nws muab nws tus Tub Yexus Khetos los tuag txhiv noob neej. (Yauhas 3:16) Aplahas tus qauv pab peb hajyam nco Yehauvas txiaj ntsig rau tus nqe txhiv uas yog qhov khoom pub muaj nqes tshaj plaws li!

17. (1) Koj txiav txim siab yuav ua li cas xwb? (2) Peb yuav kawm dabtsi rau zaj tom ntej?

¹⁷ Cia peb txhua tus txiav txim siab los xyaum Aplahas txojkev ntseeg. Peb yuav tsum kawm paub txog Yehauvas, thiab peb yuav tsum nco ntsoov tej uas Yehauvas tau ua los pab peb. Yog peb rau siab ntso kawm txog Yehauvas thiab mloog nws lus, nws yuav foom koob hmoov rau peb thiab tiv thaiv peb. (Nyeem Henplais 6:10-12.) Thov kom Yehauvas ua peb tus Phoojywg Kwvluag mus ib txhis! Rau zaj tom ntej, peb yuav kawm txog 3 tug uas kuj muaj kev ntseeg thiab tau los ua Vajtswv cov phoojywg kwvluag.