Xyaum Yehauvas Cov Phoojywg
“[Yehauvas] yuav nrog cov uas paub ntshai nws ua phoojywg.”—NTAWV NKAUJ 25:14.
1-3. (1) Peb puas nrog tau Vajtswv ntaus phoojywg? (2) Hauv zaj no peb yuav kawm txog leejtwg?
PHAU VAJLUGKUB hais 3 zaug tias Aplahas yog Vajtswv tus phoojywg. (2 Vaj Keeb Kwm 20:7; Yaxaya 41:8; Yakaunpau 2:23) Tsuas yog Aplahas tib leeg xwb thiaj tau lub npe ntawd. Puas yog Vajtswv nrog nws tib leeg ntaus phoojywg xwb? Tsis yog. Phau Vajlugkub qhia tias peb txhua tus yeej ua tau Vajtswv tus phoojywg.
2 Muaj coob tus hauv phau Vajlugkub uas muaj kev ntseeg thiab paub ntshai Vajtswv. Lawv kuj tau los ua Vajtswv cov phoojywg thiab. (Nyeem Ntawv Nkauj 25:14.) Povlauj hais tias lawv yog cov “timkhawv coob nyob puag ncig peb yam li tauv huab.” Lawv txhua tus puavleej yog Vajtswv cov phoojywg.—Henplais 12:1.
3 Cia peb kawm txog 3 tug qauv hauv phau Vajlugkub: (1) Luv uas yog ib tug poj ntsuam neeg Mau-a, (2) Hexekhiya uas yog ib tug vajntxwv kav Yuda, thiab (3) Maivliag uas yog Yexus niam. Vim li cas lawv thiaj tau los ua Vajtswv cov phoojywg? Peb yuav xyaum lawv li cas?
TUS NYAB UAS MUAB SIAB NPUAB VAJTSWV THIAB NIAM POG
4, 5. (1) Luv yuav tau txiav txim siab li cas? (2) Vim li cas ho tsis yoojyim rau Luv txiav txim siab? (Saib daim duab ntawm sab 13.)
4 Na-aumi thiab nws 2 tug nyab Luv thiab Aupa, tawm hauv tebchaws Mau-a mus rau tebchaws Yixayee. Thaum lawv cov pog nyab tabtom mus txog ib tog kev, Aupa ua ib siab rov qab mus rau tebchaws Mau-a lawm. Tiamsis Na-aumi txiav txim siab tias nws yuav tsum mus kom txog nws lub qub teb qub chaw. Ua li Luv ne? Nws puas yuav thim rov qab, los nws yuav nrog nws niam pog mus kom txog Npelehee?—Luv 1:1-8, 14.
5 Tag nrho Luv cov neej tsa nyob nram Mau-a lawm. Yog nws rov mus nrog lawv nyob tej zaum lawv yuav saib xyuas nws. Nws twb yog neeg Mau-a, nws hais lawv yam lus, thiab paub lawv tej kev lig kevcai. Yog nws nrog Na-aumi mus tej zaum nws yuav txom nyem dua. Na-aumi txhawj tsam Luv nrhiav tsis tau txiv lossis tsis muaj vaj tse nyob. Nws thiaj kom Luv rov qab mus nram Mau-a. Aupa “twb rov qab mus rau nws haiv neeg thiab nws tej dab lawm.” (Luv 1:9-15) Tiamsis Luv tsis kam rov qab mus nrog nws haiv neeg thiab teev lawv tej dab qhuas.
6. (1) Luv txiav txim siab li cas? (2) Npau-a hais li cas rau Luv thiab yog vim li cas?
6 Tej zaum Luv tus txiv lossis nws niam pog qhia Yehauvas rau nws, nws thiaj paub tias Yehauvas tsis zoo li tej vajtswv cuav hauv Mau-a. Nws pom tias yeej tsim nyog nws hlub thiab pe hawm Yehauvas. Luv thiaj txiav txim siab li cas? Nws hais rau Na-aumi tias: “Koj haiv neeg los yog kuv haiv neeg thiab, koj tus Vajtswv los yog kuv tus Vajtswv.” (Luv 1:16) Luv txiav txim tau zoo heev. Nws yeej muaj kev hlub rau nws niam pog tiag tiag. Tiamsis qhov tseem ceeb tshaj yog Luv hlub Yehauvas. Thaum Npau-a pom Luv, nws thiaj qhuas tias ‘Luv los cawm siav rau hauv Yehauvas phab tis,’ ib yam li tej me noog nkaum hauv nws txiv phab tis. (Nyeem Luv 2:12; Ntawv Nkauj 36:7; 91:1-4) Yehauvas tsom kwm tiv thaiv Luv, thiab muab nqe zog rau nws vim nws muaj kev ntseeg heev. Luv yeej tsis xav txog lig ib zaug li.
7. Cov uas tsis muab lawv tus kheej cob rau Yehauvas yuav tsum xav txog dabtsi?
7 Niaj hnub no muaj coob tus los kawm txog Yehauvas, tiamsis lawv tsis muab lawv tus kheej cob rau Nws thiab ua kevcai raus dej. Kuj zoo ib yam li lawv tsis kam los nkaum hauv Yehauvas phab tis. Yog muaj li no rau koj ces ua tib zoo xav seb yog vim li cas koj ho tsis tau muab koj tus kheej cob rau Yehauvas. Txhua leej txhua tus nyias yeej teev tiam nyias ib tug vajtswv. (Yausua 24:15) Tiamsis tus uas muaj tswvyim yuav los teev tiam tus tseem Vajtswv Yehauvas. Yog koj muab koj tus kheej cob rau Yehauvas, yuav qhia tias koj yeej tso siab plhuav rau nws. Txawm koj ntsib kev nyuaj siab li cas los, Yehauvas yuav pab koj teev tiam nws mus li. Vajtswv tau tsom kwm Luv ib yam li ntawd.
‘NWS TUAV RAWV YEHAUVAS’
8. Hexekhiya lub neej thaum yau zoo li cas?
8 Hexekhiya lub neej yav tas los tsis thooj li Luv lub. Nws haiv neeg twb muab cob rau Vajtswv lawm. Tiamsis lub caij Hexekhiya nyob, cov Yixayee coob tus tso Vajtswv tseg lawm. Vajntxwv Aha uas yog Hexekhiya txiv, ua limhiam kawg li. Nws ua saib tsis taus Vajtswv lub tuam tsev ib qho li, thiab yaum kom cov tibneeg mus pe hawm luag tej vajtswv. Nws kuj muab 2 Vajntxwv 16:2-4, 10-17; 2 Vaj Keeb Kwm 28:1-3.
Hexekhiya cov kwvtij ib txhia hlawv ciaj xyeem rau ib tug vajtswv cuav. Thaum Hexekhiya tseem yau nws tau pom ntau yam kev phem!—9, 10. (1) Vajntxwv Aha tus qauv phem puas ua rau Hexekhiya tu siab rau Yehauvas? (2) Ua cas peb ho tsis muaj cai npau taws rau Yehauvas? (3) Yehauvas cia peb txhua tus txiav txim li cas?
9 Txawm Vajntxwv Aha tus qauv phem kawg li los, Hexekhiya tsis xyaum raws li nws txiv tus qauv, thiab nws tsis tu siab rau Yehauvas. Niaj hnub no, muaj ib co twb tsis tau ntsib tej teeb meem li Hexekhiya, tiamsis lawv ho npau taws lossis tu siab rau Yehauvas thiab nws lub koom haum. (Paj Lug 19:3) Peb puas muaj cai chim rau Yehauvas li ntawd? Muaj dua ib txhia xav tias lawv yog noob phem ces lawv yeej yuav hloov tsis tau. Zoo li ib txhia hais nplooj yoog kav, noob yoog tsav. (Exekhee 18:2, 3) Puas muaj tseeb li ntawd tiag?
10 Hexekhiya lub neej qhia tias tsis muaj tseeb li ntawd. Peb yeej tsis muaj cai npau taws rau Yehauvas ib zaug li. Yehauvas tsis ua limhiam rau tibneeg. (Yauj 34:10) Cov niam txiv yog cov uas cob qhia menyuam. (Paj Lug 22:6; Khaulauxi 3:21) Tej tug qhia tau zoo, tej tug qhia tau phem. Txawm li ntawd los, tus menyuam yuav tsum txiav txim siab seb nws yuav coj li cas. Vim li cas? Vim Yehauvas cia peb txhua leej txhua tus txiav txim seb peb yuav coj zoo los coj phem. (Kevcai 30:19) Ua li, Hexekhiya yuav coj li cas?
Coob tus hluas txais yuav qhov tseeb txawm lawv tsev neeg tsis txais yuav (Saib nqe 9, 10)
11. Vim li cas Hexekhiya thiaj yog ib tug vajntxwv uas zoo tshaj plaws?
11 Hauv tebchaws Yuda, Hexekhiya txiv yog ib tug vajntxwv uas kav phem tshaj plaws. Txawm li ntawd los, Hexekhiya tau los ua ib tug vajntxwv uas zoo tshaj plaws li. (Nyeem 2 Vajntxwv 18:5, 6.) Nws coj zoo thiab mloog cov cev Vajtswv lus, xws li Yaxaya, Mikha, thiab Hauxeya. Nws thiaj kub siab kho Yehauvas lub tuam tsev thiab thov Vajtswv zam txim rau cov tibneeg. Nws mus thoob plaws lub tebchaws thiab muab tej dab mlom tshem huv tibsi pov tseg. (2 Vaj Keeb Kwm 29:1-11, 18-24; 31:1) Tom qab no thaum Xenakhawli uas yog Axilia tus vajntxwv yuav tuaj ua rog rau Yeluxalees, Hexekhiya tso siab plhuav rau Yehauvas. Nws paub tias Yehauvas yeej yuav tiv thaiv lawv, nws thiaj txhawb cov tibneeg kom ua siab loj siab tuab. (2 Vaj Keeb Kwm 32:7, 8) Muaj ib zaug Yehauvas tau ntuas Hexekhiya vim nws khav theeb. Hexekhiya kuj txo hwjchim mloog Yehauvas lus. (2 Vaj Keeb Kwm 32:24-26) Peb pom tseeb tias Hexekhiya tsis raws nws txiv qab, tiamsis nws nrog Yehauvas ntaus phoojywg. Yeej tsim nyog peb xyaum Hexekhiya tus qauv.
12. Coob tus tau xyaum Hexekhiya li cas?
12 Niaj hnub no tibneeg tsis txawj sib hlub, ib txhia niam txiv thiaj tsis hlub lawv tej metub menyuam. (2 Timaute 3:1-5) Muaj coob tus Khixatia kuj los ntawm tej yim zoo li no, tiamsis lawv txiav txim siab los nrog Vajtswv Yehauvas ntaus phoojywg. Lawv tau xyaum Hexekhiya es txiav txim siab los ua qhov zoo. Vajtswv yeej cia peb txiav txim seb peb yuav coj li cas. Peb puas yuav hwm thiab teev tiam Yehauvas ib yam li Hexekhiya?
‘KUV YOG YEHAUVAS TUS NKAUJ QHEV’
13, 14. (1) Tes haujlwm Vajtswv muab rau Maivliag puas yoojyim? (2) Maivliag teb Kali-ee li cas?
13 Ntau pua xyoo tom qab Hexekhiya, muaj ib tug ntxhais hu ua Maivliag. Nws txo hwjchim heev thiab nrog Yehauvas sib raug zoo. Yehauvas muab ib teg haujlwm tseem ceeb heev rau Maivliag. Nws yuav xeeb tub thiab tu tus metub ntawd. Tus metub ntawd yog Vajtswv tus Tub ntag. Yog Yehauvas tsis tso siab rau Maivliag, Yehauvas yeej yuav tsis muab tes haujlwm tseem ceeb no rau nws. Thaum Maivliag hnov txog qhov no, nws xav li cas xwb?
‘Kuv yog Yehauvas tus nkauj qhev’ (Saib nqe 13, 14)
14 Yeej yog ib qho koob hmoov zoo kawg nkaus rau Maivliag. Tiamsis tej zaum nws yuav txhawj txog ntau yam. Tus tubtxib Kali-ee qhia rau Maivliag tias lub hwj Luka 1:26-38.
huam dawb huv yuav los roos nws ces nws yuav xeeb tub. Tiamsis Maivliag tseem yog ib tug nkauj xwb, thiab Kali-ee twb tsis qhia rau Maivliag tsev neeg tias nws yuav xeeb tub li cas. Sawvdaws yuav xav li cas rau nws? Lawv puas yuav ntseeg tias qhov no yog Vajtswv ua txujci tiag? Yauxej thiab Maivliag nkawd twb sib qhaib lawm, Yauxej puas yuav ntseeg tias nws tsis tau mus tham hluas nraug? Tsis tas li ntawd xwb, yuav ua li cas nws thiaj txawj cob qhia Vajtswv tus Tub? Peb tsis paub tias Maivliag txhawj npaum li cas, tiamsis nws teb Kali-ee li no: “Kuv yog [Yehauvas] tus nkauj qhev. Cia li muaj rau kuv raws li koj tej lus.”—15. Maivliag muaj kev ntseeg npaum li cas?
15 Maivliag muaj kev ntseeg heev! Nws zoo siab ua txhua yam raws li Vajtswv hais, ib yam li tus nkauj qhev. Nws tso siab tias Yehauvas yuav saib xyuas nws thiab tiv thaiv nws. Ua li cas Maivliag ho muaj kev ntseeg ua luaj li? Kev ntseeg tsis yog ib yam uas yus cia li nthos nkaus tau. Peb yuav tsum rau siab ntso txhawb peb txojkev ntseeg, thiab thov kom Vajtswv foom koob hmoov rau peb. (Kalatia 5:22; Efexau 2:8) Maivliag siv zog heev, nws txojkev ntseeg thiaj ruaj khov. Cia peb kawm seb Maivliag tau ua li cas.
16. Dabtsi qhia tias Maivliag khaws tej uas nws hnov cia?
16 Maivliag khaws tej uas nws hnov cia. Phau Vajlugkub hais tias: “Txhua tus yuav tsum maj mloog tsis txhob maj hais.” (Yakaunpau 1:19) Maivliag xyaum tau li no ntag. Hmo uas yug Yexus, cov tub yug yaj tuaj qhia Maivliag txog tej uas ib tug tubtxib saum ntuj tau hais rau lawv. Tom qab no thaum Yexus muaj 12 xyoos, nws cov lus ua rau Maivliag xav tsis thoob. Txhua yam uas Maivliag tau hnov, nws muab khaws cia thiab ua tib zoo xav hauv nruab siab.—Nyeem Luka 2:16-19, 49, 51.
17. Tej uas Maivliag tham txog qhia peb li cas?
17 Tej uas Maivliag tham txog. Phau Vajlugkub tsuas muab Maivliag cov lus lo puav sau cia xwb. Qhov uas nws hais ntau tshaj yog nyob hauv Luka 1:46-55. Nqe Vajlugkub ntawd qhia tias Maivliag paub cov Nqe Lus Henplais zoo heev. Maivliag cov lus hais raws li Xamuyee niam Hana cov lus puag thaud. (1 Xamuyee 2:1-10) Nyob rau hauv Luka, peb pom tias Maivliag qog Hana cov lus 20 zaus. Yog li ntawd, Maivliag yeej nyiam tham txog tej uas nws tau kawm ntawm nws tus Phoojywg Yehauvas.
18. Peb yuav xyaum Maivliag li cas?
18 Tej lub sijhawm peb kuj zoo li Maivliag thiab. Yog muaj ib teg haujlwm uas nyuaj heev rau peb ua, cia peb nco ntsoov Maivliag tus qauv es txo hwjchim los ua tes haujlwm ntawd. Tso siab plhuav tias Yehauvas yuav pab peb. Peb yuav xyaum Maivliag li cas ntxiv thiab? Peb yuav tsum khaws Yehauvas cov lus cia thiab ua tib zoo xav txog nws thiab nws lub ntsiab. Yog peb ua li no ces peb yuav zoo siab hlo qhia tej uas peb kawm rau txhua leej txhua tus.—Ntawv Nkauj 77:11, 12; Luka 8:18; Loos 10:15.
19. Peb yuav tau dabtsi yog peb xyaum Yehauvas cov phoojywg hauv phau Vajlugkub?
19 Luv, Hexekhiya, thiab Maivliag lawv puavleej yog Yehauvas cov phoojywg ib yam li Aplahas. Lawv yog cov “timkhawv coob nyob puag ncig peb yam li tauv huab.” Cov timkhawv ntawd puavleej yog Vajtswv cov phoojywg thiab. Cia peb xyaum lawv kam tiag. (Henplais 6:11, 12) Yog peb ua li no, peb yuav tau ua Yehauvas cov phoojywg mus ib txhiab ib txhis tsis kawg.