XAV txog hnub uas koj zoo siab tshaj plaws. Hnub ntawd puas yog hnub uas koj ntsib koj tus txij nkawm lossis yog hnub uas koj puag rawv koj tus metub hauv koj lub xubntiag? Puas yog hnub koj muab koj tus kheej cob rau Yehauvas es ua kevcai raus dej? Hnub koj ua kevcai raus dej ntshe yog hnub uas tseem ceeb thiab ua rau koj xyiv fab tshaj plaws li. Hnub ntawd cov uas pom koj ua kevcai raus dej kuj zoo siab heev tias koj hlub Yehauvas kawg siab kawg ntsws, kawg tswvyim plab plaws, thiab kawg dag kawg zog.​—Malakau 12:30.

Txij hnub koj ua kevcai raus dej los, koj yeej zoo siab xyiv fab teev tiam Yehauvas. Tiamsis, ib txhia tsis xyiv fab li ntawd lawm. Vim li cas? Yuav ua li cas peb thiaj zoo siab xyiv fab teev tiam Yehauvas ntxiv?

Yehauvas cog lus tias tsis ntev tom ntej no, nws yuav siv lub Nceeg Vaj los rhuav tshem lub sim ceeb phem no thiab yuav muab lub ntiajteb kho dua tshiab. Txoj xov zoo no yeej ua rau peb xyiv fab kawg nkaus li. Tsis tas li ntawd xwb, Xefaniya 1:14 hais tias: “[Yehauvas] hnub tseem ceeb los ze lawm, los ze zuj zus los sai kawg li.” Tiamsis yog peb tos ntev loo es tsis txawj los txog ces tej zaum yuav ua rau peb tsis muaj kev zoo siab xyiv fab teev tiam Vajtswv li qub lawm.​—Paj Lug 13:12.

Thaum peb nrog cov uas hlub Yehauvas ua ke, peb muaj kev zoo siab xyiv fab teev tiam nws. Tej zaum peb pom Yehauvas cov tibneeg coj tus cwj pwm zoo peb thiaj xav los paub qhov tseeb, los teev tiam Vajtswv. (1 Petus 2:12) Tiamsis yog ib tug Khixatia twg raug ntuas vim nws tsis coj raws li Vajtswv tej kevcai, peb yuav xav li cas xwb? Tej zaum lawv yuav poob siab thiab tsis muaj kev zoo siab xyiv fab lawm.

Xatas siv nws lub qab ntuj phem los haub kom peb ntseeg tias peb yuav tsum tau tej yam uas peb ntshaw. Yog peb tsis ceev faj, tej no yuav ua rau peb tsis muaj kev zoo siab xyiv fab teev tiam Yehauvas. Zoo rau peb nco ntsoov Yexus cov lus no: “Tsis muaj leejtwg yuav ua qhev tau rau ob tug lospav, rau qhov nws yeej yuav ntxub ib tug nyiam ib tug, lossis yuav npuab ib tug saib tsis taus ib tug. Nej yuav ua Vajtswv li qhev thiab ua nyiaj txiag li qhev ua ke tsis tau.” (Mathai 6:24) Yog peb pheej siv peb lub dag lub zog mus vuag tej uas peb lub siab ntshaw, peb yeej yuav tsis muaj kev zoo siab xyiv fab teev tiam Yehauvas.

Cov uas hlub Yehauvas yeej tsis xav tias qhov uas teev tiam Vajtswv yog lub nra hnyav. (1 Yauhas 5:3) Yexus hais tias: “Txhua tus uas ua haujlwm khwv thiab ris lub nra hnyav, cia li los cuag kuv, kuv yuav pub nej tau so los siav. Cia li muab kuv rab quab los kwv thiab kawm ntawm kuv, rau qhov kuv siab mos siab muag tsis muab hlob, mas nej lub siab thiaj tau so. Rau qhov kuv rab quab kuj yoojyim kwv, thiab kuv lub nra kuj sib.” (Mathai 11:28-30) Cov Khixatia tes haujlwm yog ib teg haujlwm kaj siab thiab xyiv fab kawg li. Muaj ntau yam ua rau peb zoo siab xyiv fab ua Yehauvas tes haujlwm. Cia peb kawm txog 3 yam.​—Hanpaku 3:18.

Peb teev tiam tus Vajtswv zoo siab uas pub txojsia. (Tubtxib Tes Haujlwm 17:28) Peb nco txiaj ntsig rau tus Tswv Tsim uas pub txojsia rau peb. Yog li ntawd, txawm peb nyuam qhuav ua kevcai raus dej lossis twb ua tau ntev los lawm, peb yeej zoo siab xyiv fab teev tiam nws.

Héctor [he·taws] yog ib tug kwvtij uas tau ncig xyuas cov koom txoos. Nws ua tes haujlwm no tau 40 xyoo. Nimno nws laus heev lawm, tiamsis nws tseem zoo siab xyiv fab teev tiam Yehauvas. (Ntawv Nkauj 92:12-14) Vim nws tus pojniam muaj mob, nws thiaj ua tsis tau Vajtswv tes haujlwm npaum li yav thaud. Txawm li ntawd los nws tseem zoo siab xyiv fab teev tiam Yehauvas. Héctor hais tias: “Txawm kuv pojniam mob hnyav zuj zus thiab nyuaj heev rau kuv tu nws los, kuv yeej tsis cia tej ntawd los txo kuv txojkev zoo siab xyiv fab teev tiam Vajtswv. Kuv paub tias twb yog muaj Yehauvas tus uas tsim tibneeg kuv thiaj muaj txojsia nyob. Vim li no kuv thiaj hlub nws thiab xav teev tiam nws kawg siab kawg ntsws. Kuv rau siab ntso mus tshaj tawm tsis tseg thiab cia siab ntsoov rau lub Nceeg Vaj, kuv thiaj zoo siab xyiv fab.”

Yehauvas tau npaj tus nqe txhiv kom peb zoo siab xyiv fab ua neej. “Vajtswv hlub ntiajteb kawg li nws thiaj pub nws tib leej Tub los kom txhua tus uas ntseeg leej Tub ntawd thiaj tsis puam tsuaj tiamsis yuav tau txojsia ib txhis tsis kawg.” (Yauhas 3:16) Muaj tseeb tiag, yog peb muaj kev ntseeg rau Yexus tus nqe txhiv, ces Vajtswv yuav zam peb tej kev txhaum thiab peb yuav tau txojsia ib txhis tsis kawg. Yeej tsim nyog peb nco Yehauvas txiaj ntsig rau tus nqe txhiv, puas yog? Yog peb nco Yehauvas txiaj ntsig rau tus nqe txhiv, ces peb yeej yuav zoo siab xyiv fab teeb tiam nws xwb.

Kwvtij Jesús [he·xuj] uas nyob Mev teb (Mexico) hais tias: “Kuv ua kuv txoj haujlwm qhev xwb. Tej thaud, luag twb tsis kom kuv ua los, kuv yeem ua kom tshaj ntau hnub thiab ntau txoos teev. Kuv ua li ntawd vim kuv ntshaw nyiaj heev. Tom qab no kuv mam los kawm paub Yehauvas thiab paub tias nws  tau muab nws tus Tub uas nws hlub los txhiv noob neej. Qhov no thiaj ua rau kuv xav teev tiam nws heev. Yog li ntawd, kuv thiaj muab kuv lub neej cob rau Yehauvas. Kuv txiav txim siab tawm txoj haujlwm uas kuv twb ua tau 28 lub xyoos lawd thiab los ua haujlwm puv ntoob rau Yehauvas.” Jesús ua li ntawd, nws thiaj zoo siab xyiv fab teev tiam Yehauvas.

Peb coj lub neej dawb huv, peb thiaj muaj kev zoo siab xyiv fab. Ua ntej koj los paub Yehauvas, koj coj lub neej zoo li cas xwb? Tus tubtxib Povlauj tau hais rau cov Khixatia hauv lub nroog Loos tias yav thaum ub lawv “txeev ua lub txim li qhev” tiamsis nimno lawv tau los “ua txojkev ncaj ncees li qhev” lawm. Vim lawv coj lub neej dawb huv, lawv yuav tau txojsia ib txhis tsis kawg. (Loos 6:17-22) Peb los coj lub neej raws li Yehauvas tej kevcai thiab. Peb tsis ua kev nkauj kev nraug lossis ua nruj ua tsiv peb thiaj tsis raug kev nyuaj siab ntxhov plawv. Qhov no ua rau peb zoo siab xyiv fab kawg li, puas yog?

Jaime [hai·mes] yog ib tug nyiam ntaus nrig heev, nws ntseeg tias tsis muaj Vajtswv thiab tibneeg txia ntawm tsiaj los xwb. Thaum Jaime pib mus kev sib txoos, nws pom tias sawvdaws sib hlub heev. Nws thov Yehauvas pab kom nws muaj kev ntseeg, nws thiaj hloov tau. Jaime hais tias: “Ntev mus ntev tuaj kuv thiaj pom tias Yehauvas yog ib Leej Txiv uas muaj kev hlub kev khuvleej. Kuv coj Yehauvas tej kevcai ncaj ncees thiaj tiv thaiv tau kuv. Yog kuv tsis hloov, ntshe kuv twb tuag li kuv cov phoojywg uas nrog kuv ntaus nrig thaum ub lawm. Kuv lub neej tsis muaj ib zaug uas yuav zoo siab xyiv fab npaum li thaum kuv los teev tiam Yehauvas.”

Yog hnub kawg tsis tau los txog, peb yuav tsum coj li cas? Nco ntsoov tias peb ua Vajtswv tes haujlwm thiab tos rawv txojsia ib txhis tsis kawg. Yog li ntawd, “peb tsis txhob qaug zog qhov uas ua zoo, rau qhov yog peb tsis tsaug leeg peb yuav tau sau raws li lub sijhawm.” (Kalatia 6:8, 9) Yehauvas yeej yuav pab kom peb thev taus tej kev sim siab uas yuav los raug peb. Cia peb rau siab ntso coj tej yeeb yam zoo uas yuav pab kom peb dim “txojkev tsim txom loj kawg,” thiab cia peb zoo siab xyiv fab teev tiam Yehauvas mus li.​—Qhia Tshwm 7:9, 13, 14; Yakaunpau 1:2-4.

Peb tso siab tias Yehauvas yeej yuav pub nqe zog rau peb, yog peb ua tiag thev. Nws pom peb tes haujlwm thiab pom qhov uas peb hlub nws thiab hwm nws lub npe. Yog peb zoo siab xyiv fab teev tiam Yehauvas tsis tseg, ces peb yuav hais ib yam li Davi tias: “Kuv muab [Yehauvas] tso rau ntawm kuv lub hauv ntej tsis tu li. Vim nws nyob ntawm kuv sab xis kuv thiaj tsis ua zog. Vim li ntawd kuv lub siab thiaj xyiv fab thiab . . . nyob tso siab plhuav.”​—Ntawv Nkauj 16:8, 9.