KUV txiv lub npe hu ua Arthur. Thaum nws tseem hluas, nws npaj siab xav mus ua ib tug xibhwb hauv lub tshawj Methodist. Tiamsis thaum nws pib nyeem Cov Tub Kawm Vajlugkub tej ntaub ntawv thiab mus koom lawv, nws thiaj hloov siab tsis mus ua ib tug xibhwb lawm. Kuv txiv tau ua kevcai raus dej rau xyoo 1914 thaum nws muaj 17 xyoo. Thaum muaj Ntsuj Rog Thoob Qab Ntuj Zaum 1, luag yuam kuv txiv mus ua tub rog tiamsis nws tsis kam mus. Luag thiaj muab nws kaw hauv lub tsev loj cuj Kingston tau 10 lub hlis hauv lub xeev Ontario tebchaws Canada. Tom qab nws tawm hauv tsev loj cuj los, nws mam mus ua ib tug colporteur uas nimno peb hu ua ib tug tho kev.

Xyoo 1926, kuv txiv mam yuav kuv niam. Kuv niam hu ua Hazel Wilkinson. Twb yog kuv niam tais xub los ntseeg Yehauvas thaum xyoo 1908 es kuv niam thiaj paub qhov tseeb. Kuv niam xub yug kuv tus muam ces mam yug kuv. Kuv yug lub 4 Hlis tim 24, 1931. Kuv niam yug tau peb 4 leeg. Kuv txiv yeej ib txwm saib phau Vajlugkub rau nqe heev. Nws thiaj cob kom peb coj li nws thiab. Txojkev teev tiam Yehauvas tseem ceeb heev rau peb. Peb tsev neeg mus tshaj tawm txoj xov zoo lub tsev rau tsev tsis tu ncua.—Tubtxib Tes Haujlwm 20:20.

Ntsuj Rog Thoob Qab Ntuj Zaum 2 pib xyoo 1939. Xyoo tom qab xwb, tebchaws Canada txawm txwv Yehauvas Cov Timkhawv tes haujlwm. Hauv tsev kawm ntawv, cov tub kawm ntawv yuav tsum hawm tus chij thiab hu zaj nkauj qhuas tebchaws. Cov xibhwb tso cai rau kuv tus muam Dorothy wb tawm mus sab nraud thaum lawv tabtom ua li no. Tiamsis muaj ib zaug kuv tus xibhwb xav rhuav kuv ntsej muag, nws thiaj hais tias kuv yog ib tug neeg tais caus. Thaum peb yuav mus tsev, ib co tub kawm ntawv txawm muab kuv ntaus. Tej kev tsim txom no hajyam ua rau kuv “mloog Vajtswv lus heev dua li mloog neeg lus.”—Tubtxib Tes Haujlwm 5:29.

Lub 7 Hli xyoo 1942, kuv tau ua kevcai raus dej hauv ib lub rhawv dej tom teb. Thaum ntawd kuv tsuas muaj 11 xyoos xwb. Lub caij uas peb so tsis kawm ntawv, kuv ua ib tug vacation pioneer uas nimno hu ua ib tug pab tho kev. Muaj ib xyoos kuv tau nrog 3 tug kwvtij mus tshaj tawm rau cov neeg txiav ntoo hauv lub xeev Ontario sab qaum teb.

Lub 5 Hlis tim 1, 1949, kuv thiaj pib ua ib tug tho kev. Tom qab ntawd, kuv txawm raug caw mus ua tsev hauv ceg Npe-ee uas nyob tebchaws Canada. Tsis ntev tom qab ntawd, Npe-ee thiaj txais kuv mus ua haujlwm. Lawv muab kuv ua haujlwm hauv chav luam ntawv. Kuv thiaj kawm siv lub tshuab luam ntawv. Muaj ib zaug kuv ua haujlwm hmo ntuj tau ob peb lub lim tiam los luam daim ntawv tseb ntsig txog Yehauvas Cov Timkhawv raug tsim txom hauv tebchaws Canada.

Tom qab ntawd, kuv tau los ua haujlwm hauv Service Department uas yog chav saib xyuas kev tshaj tawm. Lawv kom kuv nrog cov tho kev uas yuav mus tshaj tawm hauv lub xeev Quebec tham vim cov Timkhawv hauv lub xeev ntawd raug tawm tsam hnyav heev. Mary Zazula yog ib tug tho kev uas xav mus tshaj tawm hauv lub xeev ntawd. Nws tuaj lub zos Edmonton xeev Alberta tuaj. Nws niam nws txiv yog tswv cuab hauv lub tshawj Orthodox. Thaum Mary thiab nws tus nus tsis kam tso kev kawm Vajlugkub tseg, nkawd niam thiab txiv thiaj muab nkawd ntiab tawm. Lub 6 Hli xyoo 1951, Mary nkawd tau ua kevcai raus dej ces 6 lub hlis tom qab ntawd nkawd txawm pib tho kev. Thaum kuv nrog Mary tham kuv pom tias nws hlub Yehauvas heev. Kuv txawm xav twjywm tias nws yog ib tug ntxhais uas zoo yuav ua pojniam heev. Cuaj lub hlis tom qab ntawd xwb, wb thiaj  sib yuav rau lub 1 Hlis tim 30, 1954. Wb sib yuav tau 1 lub lim tiam xwb, lawv txawm txib wb mus kawm ua tus saib xyuas thaj tsam. Wb thiaj mus saib xyuas ib thaj tsam hauv lub xeev Ontario sab qaum teb tau 2 lub xyoos.

Thaum txojkev tshaj tawm nthuav dav zuj zus thiaj li cheem tsum coob tus mus tshaj tawm txawv tebchaws. Mary wb xav tias wb twb tiv taus tej huab cua txias thiab tej yoov tshaj cum hauv tebchaws Canada ces wb yuav mus qhovtwg los yeej tau. Wb thiaj mus kawm Kile-a uas yog pab 27. Wb kawm tiav rau lub 7 Hli xyoo 1956. Lub koom haum thiaj txib wb mus rau tebchaws Brazil. Wb mus txog nrad rau lub 11 Hlis Ntuj.

Thaum wb mus txog nram tebchaws Brazil, wb pib kawm lus Portuguese. Thaum xub thawj, wb kawm tej lus yooj yoojyim kom paub hu tibneeg xwb. Ces wb mam li kawm seb yuav hais li cas thaum tseb Phau Tsom Faj lossis phau Tsim Dheev! Tom qab ntawd, wb mus tshaj tawm, wb ntsib ib tug pojniam uas xav mloog txoj xov zoo. Wb twb npaj lawm tias yog muaj tej tug uas xav mloog ces wb yuav nyeem ib nqes Vajlugkub txog Vajtswv lub Nceeg Vaj rau nws. Kuv thiaj nyeem Qhia Tshwm 21:3, 4 rau tus pojniam ntawd. Tiamsis thaum kuv nyeem tag nrho, kuv cia li tsaus muag kiag! Twb yog hnub ntawd tshav kub thiab vaum heev. Kuv tsis tau swm tej huab cua sov. Txawm wb nyob lub tebchaws ntawd tau ib ntus lawm los, kuv thev tsis taus tej huab cua kiag li.

Wb raug txib mus tshaj tawm hauv lub nroog Campos. Tamsim no lub nroog ntawd muaj 15 lub koom txoos lawm! Tiamsis thaum wb nyuam qhuav mus txog, tsuas muaj ib pawg thiab muaj ib lub tsev rau cov uas tshaj tawm txawv tebchaws nyob xwb. Muaj 4 tug muam uas yog cov tshaj tawm txawv tebchaws nyob hauv lub tsev ntawd. Lawv yog Esther Tracy, Ramona Bauer, Luiza Schwarz, thiab Lorraine Brookes (nimno Lorraine lub xeem yog Wallen). Peb cov uas tshaj tawm txawv tebchaws nyob ua ib tse. Kuv tes haujlwm yog ntxhua khaubncaws thiab txiav taws. Muaj ib hmos thaum peb kawm Phau Tsom Faj tas, Mary txawm khom ntawm rooj zaum. Wb tham txog tej uas wb tau ua hnub ntawd. Thaum Mary sawv, ua ciav muaj ib tug nab tawm plaws hauv qab hauv ncoo los. Ua rau peb ceeb loj heev! Kuv thiaj muab tus nab ntaus tuag kiag.

Wb kawm lus Portuguese tau 1 xyoos ces wb txawm raug txib mus ua tus saib xyuas thaj tsam. Wb mus xyuas tej koog uas tsis muaj fai fab lossis hluas taws xob li. Thaum tsaus ntuj lawv muab lev pua rau wb pw xwb. Thaum mus xyuas cov koom txoos, wb caij nees thiab caij tsheb nees xwb. Muaj ib zaug wb kuj caij tsheb nqaj mus rau ib lub zos uas nyob puag saum roob, mus qhia cov neeg hauv lub zos ntawd. Thaum wb mus txog, wb nyob hauv tej chaw so uas ntiav xwb. Npe-ee xa tau 800 Phau Tsom Faj thiab phau Tsim Dheev! tuaj rau ntawm lub tsev xa ntawv rau wb. Wb tau mus nqa ntau lwm mam nqa tas.

Xyoo 1962, pib muaj Kev Kawm Rau Cov Kwvtij Tuav Haujlwm hauv tebchaws Brazil. Npe-ee tau txib kuv mus ua tus cob qhia txojkev kawm no. Mary tsis nrog kuv mus. Kuv mus qhia cov kwvtij ib qho rau ib qho tau 6 lub hlis. Kuv mus txog lub nroog Manaus, Belém, Fortaleza, Recife, thiab Salvador. Thaum kuv nyob hauv Manaus, kuv tau npaj ib lub rooj sib txoos rau hauv ib lub tsev hu nkauj uas nto npe heev. Lub  caij ntawd los nag hlob heev, ua rau tej dej qias tas. Kuj tsis muaj chaw rau cov kwvtij nkauj muam so noj sus li thiab. Kuv thiaj qhia tej no rau ib tug thawj tub rog. Nws thiaj txib neeg nqa dej tuaj rau sawvdaws haus. Nws tseem txib nws cov tub rog mus tsa ob lub tsev ntaub uas loj heev rau peb siv ua noj ua haus thiab noj mov.

Thaum kuv mus qhia ntawv lawm, Mary ho mus tshaj tawm rau ib koog uas tsis nyiam Vajlugkub li. Cov neeg hauv koog ntawd tuaj tebchaws Portugal tuaj ua luam nkaus xwb. Mary thiaj qaug zog heev. Nws hais rau nws cov phoojywg tias, “Txawm muab nyiaj ntiav los, kuv yeej yuav tsis mus nyob Portugal teb ib zaug li.” Ua ciav tsis ntev xwb, hauv paus loj txawm txib wb mus tshaj tawm hauv tebchaws Portugal lawm tiag! Mary xav tsis thoob li. Tiamsis wb zoo siab hlo mus. Lub caij ntawd nom tswv tseem txwv tes haujlwm tshaj tawm txoj xov zoo hauv tebchaws Portugal.

Lub 8 Hli xyoo 1964, wb tau mus txog lub nroog Lisbon hauv tebchaws Portugal. Tub ceev xwm ua nyuaj heev rau peb cov kwvtij. Thaum wb mus txog, wb thiaj tsis tiv tauj lawv. Wb thiaj mus nyob hauv ib qho chaw so uas ntiav xwb. Thaum wb thov tau vixaj (visa) lawd, wb mam li mus ntiav tsev nyob ruaj chaw. Wb nyob tau 5 lub hlis wb mam li tiv tauj cov kwvtij hauv Npe-ee. Wb zoo siab kawg li thaum wb tau mus kev sib txoos lawm!

Vim nom tswv txwv peb tes haujlwm tshaj tawm, lawv thiaj muab peb tej Tsev Nceeg Vaj kaw tas. Peb thiaj sib txoos hauv cov kwvtij tej vaj tej tsev lawm xwb. Tub ceev xwm yeej soj ntshis peb thiab tuaj tshawb cov kwvtij tej tsev. Coob tus thiaj raug ntes coj mus nug. Cov tub ceev xwm tsim txom peb cov kwvtij nkauj muam kom lawv qhia seb cov twg yog cov uas coj tej kev sib txoos. Vim nom tswv ua tsiv npaum li no, cov kwvtij thiaj tsis sib hu raws xeem lawm. Peb tsuas hu tuav npe xwb, kom luag thiaj tsis paub lub xeem.

Qhov tseem ceeb dua ntais yog kom peb cov kwvtij tau tej ntaub ntawv Vajlugkub los nyeem, lawv thiaj thev taus tej kev sim siab. Mary thiaj muab tej zaj kawm hauv Phau Tsom Faj thiab lwm yam ntaub ntawv Vajlugkub ntaus dua coj mus luam ua ntau daim kom cov kwvtij tau saib.

Lub 6 Hli xyoo 1966, nom tswv coj peb mus hais plaub hauv lub nroog Lisbon. Lawv kom tias muaj 49 tug Timkhawv hauv lub koom txoos Feijó tau nyiag kev mus sib txoos hauv ib tug lub tsev. Peb thiaj npaj ua ntej peb yuav mus hais plaub. Kuv ua txuj ua li kuv yog tus kws lij choj es thom seb lawv yuav teb li cas. Thaum txog hnub ntawd, lawv txawm muab peb ua tus swb ib yam li peb twb xav lawm. Lawv txawm muab 49 tug kwvtij nkauj muam ntawd kaw hauv tsev loj cuj. Nom tswv teem txim tias yuav muab lawv kaw 45 hnub mus rau 5 lub hlis ntau. Txawm li ntawd los, tshaj plaub no ua tau timkhawv zoo heev. Thaum hais tshaj plaub ntawd, tus kws lij choj uas sawv cev rau peb tau hais Kamali-ee cov lus hauv phau Vajlugkub rau sawvdaws mloog. (Tubtxib Tes Haujlwm 5:33-39) Tsis tas li ntawd xwb, lawv kuj muab rooj plaub no tshaj ua xov xwm rau sawvdaws hnov. Peb zoo siab heev thaum peb tus kws lij choj pib kawm Vajlugkub thiab nrog peb mus kev sib txoos ua ke.

 Lub 12 Hlis xyoo 1966, kuv raug tsa ua tus kwvtij leg num rau ceg Portugal. Kuv siv sijhawm ntau heev los tshawb nrhiav tej kevcai lij choj. Peb thov kom nom tswv tso cai rau Yehauvas Cov Timkhawv teev tiam ywj siab hauv tebchaws Portugal. (Filipi 1:7) Thaum kawg, lub 12 Hlis tim 18, 1974, nom tswv thiaj tso cai rau peb. Kwvtij Nathan Knorr thiab Frederick Franz tau tuaj ntawm hauv paus loj tuaj koom peb txojkev zoo siab. Kuv tseem nco ntsoov tias hnub ntawd muaj 46,870 leej tuaj sib txoos ua ke hauv lub nroog Oporto thiab Lisbon.

Yehauvas ua rau txoj xov zoo nrov ncha mus txog tej koog pov txwv, xws li Azores, Cape Verde, Madeira, thiab São Tomé thiab Príncipe uas hais lus Portuguese. Hauv cov pov txwv no, Yehauvas cov tibneeg coob zuj zus tuaj, peb thiaj tsa ib co tsev Npe-ee ntxiv. Thaum ua tau cov tsev Npe-ee ntawd tiav lawd, Kwvtij Milton Henschel tuaj muab Npe-ee cob rau Yehauvas rau lub 4 Hlis tim 23, 1988. Muaj 45,522 tus kwvtij nkauj muam tuaj koom hnub ntawd. Nees nkaum leej yog cov tshaj tawm txawv tebchaws uas tau qhia Vajlugkub hauv Portugal yav tas los. Lawv txhob txwm tuaj koom hnub tshwj xeeb ntawd.

Mary wb kawm tau ntau yam ntawm cov kwvtij uas muaj kev ntseeg. Yav thaud, kuv tau nrog Kwvtij Theodore Jaracz mus xyuas lwm ceg. Nws qhia tau ib yam zoo heev rau kuv. Thaum ntawd, ceg uas wb mus xyuas muaj ib qho teeb meem loj heev. Cov kwvtij uas saib xyuas ceg ntawd twb nrhiav kev los tu qhov teeb meem ntawd kawg tswvyim lawm. Kwvtij Jaracz paub li ntawd, nws thiaj txhawb lawv tias: “Nimno cia lub hwj huam dawb huv pab daws qhov teeb meem no.” Kuv kuj nco ntsoov Kwvtij Franz cov lus uas nws tau hais rau Mary wb thaum wb mus xyuas Brooklyn. Peb ib pab kwvtij tau nug seb nws puas muaj lus dabtsi txhawb peb zog. Nws hais tias: “Peb yuav tsum nyob twjywm hauv Yehauvas lub koom haum, tsis hais thaum zoo thaum phem. Tsuas yog lub koom haum no xwb thiaj ua raws li Yexus tau sam hwm kom tshaj tawm txoj xov zoo txog Vajtswv lub Nceeg Vaj!”

Mary wb thiaj ua raws nraim li ntawd, mas wb zoo siab heev. Wb tseem niaj hnub nco txog lub caij uas wb mus xyuas lwm ceg. Wb tau mus txhawb Yehauvas cov tub qhe tsis hais tus laus tus hluas kom lawv pom tias Yehauvas saib lawv tes haujlwm rau nqe heev. Wb yeej siv txhua lub sijhawm los txhawb kom lawv rau siab ntso teev tiam Yehauvas tsis tseg.

Kuv pojniam wb twb teev tiam Yehauvas tau ntau xyoo lawm. Nimno wb twb muaj 80 tawm xyoo lawm. Mary muaj mob ntau yam. (2 Khaulee 12:9) Wb kuj ntsib lwm yam kev nyuaj siab thiab. Txawm li ntawd los, tej ntawd yimhuab ua rau wb txojkev ntseeg ruaj khov xwb. Thaum wb xav txog wb lub neej, wb pom tias Yehauvas tau foom koob hmoov ntau heev rau wb. Thiab wb tau pom Yehauvas txojkev hlub uas nws pub dawb rau txhua fab tiag tiag li. *—Saib cov lus hauv qab taw qhia.