1, 2. (1) Yehauvas Cov Timkhawv txawv lwm txojkev ntseeg li cas? (2) Peb yuav kawm txog dabtsi hauv zaj no thiab zaj tom ntej?

TIBNEEG kheev nug Yehauvas Cov Timkhawv tias: “Nej tus xibhwb yog leejtwg?” Lawv pheej nug li no vim ntau txojkev ntseeg muaj ib tug xibhwb coj lawv pawg ntseeg. Tiamsis peb zoo siab tias peb tus xibhwb, lossis Thawj Coj, tsis yog ib tug neeg uas muaj kev txhaum tiamsis yog Yexus Khetos! Yexus ua txhua yam raws li nws Leej Txiv Yehauvas uas yog nws tus Thawj Coj kom nws ua.—Mathai 23:10.

² Niaj hnub no kuj muaj ib pab txiv neej uas yog “tus qhev ncaj thiab ntse” ua tus coj Vajtswv cov tibneeg hauv ntiajteb no. (Mathai 24:45) Yog li ntawd, ua li cas peb ho paub tias Yehauvas yog tus uas txib Yexus los coj lub koom haum tiag? Zaj no thiab zaj tom ntej peb yuav kawm txog 3 lub ntsiab uas pab kom peb paub tseeb txog qhov no. Peb yuav kawm tias txawm Yehauvas txib neeg ua tus coj nws haiv neeg xwb los Nws yeej yog tus coj lawv.—Yaxaya 58:11.

3. Ua cas Mauxe thiaj coj tau haiv neeg Yixayee?

³ Lub hwj huam dawb huv tau coj cov uas sawv cev rau  Vajtswv. Thaum ub Vajtswv tau xaiv Mauxe los ua tus coj haiv neeg Yixayee. Ua cas Mauxe thiaj tuav tau tes haujlwm ntawd? Twb yog Yehauvas pub nws lub hwj huam dawb huv pab Mauxe. (Nyeem Yaxaya 63:11-14.) Yog li ntawd, thiaj hais tau tias Yehauvas yog tus coj nws haiv neeg.

4. Ua cas cov Yixayee ho paub tias Yehauvas pub nws lub hwj huam dawb huv los pab Mauxe? (Saib daim duab ntawm sab 14.)

⁴ Cov Yixayee puas paub tias Yehauvas pub nws lub hwj huam dawb huv los pab Mauxe? Lawv yeej paub! Yehauvas lub hwj huam pab kom Mauxe ua tau tej txujci tseem ceeb, thiab kom nws qhia tau Yehauvas lub npe rau Falau uas yog tus kav tebchaws Iyi. (Khiav Dim 7:1-3) Lub hwj huam dawb huv kuj pab kom Mauxe hlub cov Yixayee thiab ua siab ntev coj lawv. Vim li no, Mauxe thiaj coj tsis thooj li lwm haiv neeg tej thawj coj uas quab yuam caij tsuj cov pejxeem. (Khiav Dim 5:2, 6-9) Yog li ntawd, Yehauvas yeej yog tus uas xaiv Mauxe los coj Nws haiv neeg tiag.

5. Yehauvas kuj tau pub nws lub hwj huam dawb huv rau leejtwg thiab?

⁵ Yehauvas kuj tau pub nws lub hwj huam dawb huv rau leejtwg thiab? Phau Vajlugkub hais tias Yehauvas pub nws lub hwj huam los pab kom “Yausua uas yog Noo tus tub muaj lajlim tswvyim plab plaws puv npo.” (Kevcai 34:9) Tsis tas li ntawd xwb, Yehauvas lub hwj huam tau “los kav kiag Kide-oo.” (Cov Thawj 6:34) Thiab Yehauvas tau pub nws lub hwj huam “los nrog nraim Davi” kom nws thiaj tuaj zog. (1 Xamuyee 16:13) Lawv paub tias lawv yuav tsum vam khom Vajtswv lub hwj huam, lawv thiaj ua tau haujlwm tiav. (Yausua 11:16, 17; Cov Thawj 7:7, 22; 1 Xamuyee 17:37, 50) Yog li ntawd, Yehauvas yog tus muab hwjchim rau lawv, tsim nyog qhuas nws tib leeg xwb.

6. Ua cas Vajtswv thiaj xav kom cov Yixayee hwm lawv cov thawj coj?

⁶ Cov Yixayee twb pom tias Yehauvas tau pub nws lub hwj huam dawb huv rau Mauxe, Yausua, Kide-oo, thiab Davi lawv. Yog li ntawd, tsim nyog cov Yixayee hwm cov txivneej ntawd thiab. Thaum cov Yixayee pib yws Mauxe, Yehauvas thiaj hais tias: “Cov neeg no yuav saib tsis taus kuv ntev li cas?” (Xwm Txheej Taug Kev 14:2, 11) Qhov no qhia tias Yehauvas yog tus xaiv cov txivneej no los coj Nws haiv neeg. Thaum cov Yixayee saib taus cov txivneej ntawd ces twb yog lawv saib taus Yehauvas ua lawv tus Thawj Coj ntag.

7. Cov tubtxib saum ntuj tau pab Mauxe li cas?

⁷ Cov tubtxib saum ntuj tau pab cov uas sawv cev rau Vajtswv. (Nyeem Henplais 1:7, 14.) Vajtswv cov tubtxib saum ntuj tau coj Mauxe txoj hau kev. (1) Ib tug tubtxib saum ntuj los tshwm “hauv tsob pos” nrog Mauxe tham thiab txib kom nws mus coj cov Yixayee tawm hauv tebchaws Iyi mus. (Tubtxib Tes Haujlwm 7:35, NN) (2) Vajtswv kom cov tubtxib saum ntuj muab txoj Kevcai rau Mauxe xwv Mauxe thiaj paub cob qhia cov Yixayee. (Kalatia 3:19) (3) Yehauvas hais rau Mauxe tias: “Coj cov pejxeem mus rau lub chaw uas kuv hais rau koj lawm. Kuv tus tubtxib saum ntuj yuav ua koj ntej mus.” (Khiav Dim 32:34) Phau Vajlugkub tsis tau hais tias cov Yixayee pom kiag ib tug tubtxib twg. Tiamsis thaum lawv hnov Mauxe tej lus qhia thiab pom tej haujlwm uas Mauxe ua, lawv yeej paub tias yuav tsum yog ib tug tubtxib saum ntuj los coj Mauxe kev xwb.

8. Cov tubtxib saum ntuj tau pab Yausua thiab Hexekhiya li cas?

⁸ Cov tubtxib saum ntuj tau pab leejtwg  thiab? Phau Vajlugkub hais tias Yehauvas “tus thawj tub rog” uas yog ib tug tubtxib saum ntuj tau pab Yausua ntaus yeej cov neeg Khana-as. (Yausua 5:13-15; 6:2, 21) Tom qab no, thaum Hexekhiya ua vajntxwv kav Vajtswv cov tibneeg, Axilia pab tub rog txawm tuaj ntaus lub nroog Yeluxalees. Tiamsis tib hmos xwb, Yehauvas ib tug “tubtxib saum ntuj tawm mus tua Axilia cov tub rog hauv lawv lub yeej tuag 185,000 leej.”—2 Vajntxwv 19:35.

9. Txawm cov uas sawv cev rau Vajtswv yog neeg txhaum xwb los, nws xav kom cov Yixayee ua li cas?

⁹ Cov tubtxib saum ntuj yog ib co plig uas zoo kawg nkaus. Tiamsis cov txivneej uas lawv tau pab ntawd yog neeg txhaum xwb. Muaj ib zaug, Mauxe ua tau ib yam uas saib tsis taus Yehauvas. (Xwm Txheej Taug Kev 20:12) Thaum cov Kinpe-oo tuaj cuag Yausua thiab thov nrog lawv cog lus sib raug zoo, Yausua tsis nco qab nug Yehauvas ua ntej nws nrog lawv sib cog lus. (Yausua 9:14, 15) Tsis tas li ntawd xwb, muaj ib zaug Vajntxwv Hexekhiya khav theeb, nws tsis nco Yehauvas txiaj ntsig. (2 Vaj Keeb Kwm 32:25, 26) Txawm cov txivneej no yog neeg txhaum xwb los, Yehauvas xav kom cov Yixayee mloog lawv lus. Cov Yixayee yeej pom tias Yehauvas cia cov tubtxib saum ntuj los txhawb cov txivneej no tiag. Vim li ntawd, Yehauvas thiaj yog tus uas coj nws cov tibneeg.

10. Vajtswv Txoj Kevcai tau coj Mauxe li cas?

¹⁰ Vajtswv Txojlus tau coj cov uas sawv cev rau Yehauvas. Phau Vajlugkub tau muab txoj Kevcai uas Yehauvas pub rau cov Yixayee hu ua “Mauxe phau kevcai.” (1 Vajntxwv 2:3) Txawm hu li ntawd los, yeej yog Yehauvas pub txoj Kevcai ntawd rau cov Yixayee. Txoj Kevcai ntawd tsis yog sau rau cov pejxeem coj xwb, Mauxe los yuav tsum tau coj thiab. (2 Vaj Keeb Kwm 34:14) Yog li ntawd, thaum Yehauvas hais kom Mauxe ua lub tsev ntaub sib ntsib, Mauxe thiaj “ua txhua yam raws li uas [Yehauvas] hais.”—Khiav Dim 40:1-16.

11, 12. (1) Yehauvas tau hais kom Yausua thiab cov vajntxwv ua li cas? (2) Vajtswv Txojlus tau pab cov uas coj Vajtswv haiv neeg li cas?

¹¹ Thaum Yausua sawv los coj haiv neeg Yixayee, nws kuj muaj Vajtswv Txojlus coj nws txoj hau kev thiab. Yehauvas qhia Yausua tias: “Koj yuav tsum niaj hnub niaj hmo tshawb nrhiav kom koj thiaj paub ceev faj ua raws li txhua yam uas sau rau hauv.” (Yausua 1:8) Tom qab no, cov vajntxwv uas tau los kav Vajtswv haiv neeg yuav tsum nyeem txoj Kevcai txhua hnub thiab. Tsis tas li ntawd xwb, lawv yuav tsum muab txoj Kevcai theej dua ib phau rau lawv thiab coj raws nraim li “tej kevcai txhua nqe.”—Nyeem Kevcai 17:18-20.

¹² Vajtswv Txojlus tau pab cov uas coj Vajtswv haiv neeg li cas? Cia peb kawm txog Vajntxwv Yauxiya. Thaum nrhiav tau Mauxe Txoj Kevcai thiab muab nyeem rau Yauxiya mloog tas, nws ua li cas xwb? * (Saib cov lus hauv qab taw qhia.) Phau Vajlugkub hais tias: “Thaum vajntxwv hnov tej lus hauv phau kevcai lawd, nws txawm dua rhe nws lub tsho.” Yauxiya thiaj sam hwm kom muab tag nrho tej dab mlom hauv lub tebchaws rhuav pov tseg. Nws kuj sam hwm kom cov pejxeem ua Kevcai Hla Dhau thoob lub tebchaws thiab. (2 Vajntxwv 22:11; 23:1-23) Yauxiya thiab cov uas Yehauvas tau tsa ua thawj yeej saib Vajtswv Txojlus rau nqe heev, lawv thiaj hloov los coj raws li Vajtswv Txojlus qhia. Tej uas lawv tau hloov ntawd pab tau cov pejxeem ua raws li Vajtswv lub siab nyiam.

13. Cov uas coj Vajtswv haiv neeg tsis coj li lwm haiv neeg tej li cas?

 ¹³ Lwm haiv neeg tej thawj coj tsuas coj raws li neeg lub tswvyim xwb. Xws li, cov thawj coj thiab tej pejxeem hauv tebchaws Khana-as tau ua ntau yam kev phem kev qias. Lawv ua ntsaum noj ntsaum qe, txivneej deev txivneej, pojniam deev pojniam, tibneeg deev tsiaj, tua menyuam txi dab, thiab teev dab teev mlom loj heev. (Levi Tej Kevcai 18:6, 21-25) Tsis tas li ntawd xwb, cov thawj coj hauv tebchaws Npanpiloo thiab tebchaws Iyi tsis muaj tej kevcai uas cob qhia kom tej pejxeem coj huv li Vajtswv haiv neeg. (Xwm Txheej Taug Kev 19:13) Vim li no Vajtswv haiv neeg thiaj pom tias lawv cov thawj coj tsis thooj li lwm haiv neeg cov. Vajtswv haiv neeg tej thawj coj pab lawv pe hawm Vajtswv kom dawb huv, kom txhob ua nkauj ua nraug, thiab kom tu cev thiab tu vaj tu tsev huv siab si. Yog li ntawd, Yehauvas yeej yog tus uas coj cov thawj ntawd, lawv thiaj muaj tej kevcai zoo npaum li ntawd.

14. Ua cas Yehauvas ho rau txim rau cov thawj coj ib txhia?

¹⁴ Tsis yog txhua tus vajntxwv uas tau kav Vajtswv cov tibneeg yuav coj tau zoo. Ib co tsis cia Vajtswv lub hwj huam dawb huv coj lawv txoj hau kev. Lawv kuj tsis mloog cov tubtxib saum ntuj lus thiab tsis ua raws li Vajtswv Txojlus qhia. Yehauvas thiaj rau txim rau lawv. Nws kuj muab ib co tshem tawm tsis pub coj nws haiv neeg lawm. (1 Xamuyee 13:13, 14) Tom qab no, Yehauvas thiaj tsa dua ib tug uas zoo kawg nkaus los coj nws haiv neeg.

15. (1) Cov cev Vajtswv lus qhia li cas txog tus thawj coj uas zoo kawg nkaus? (2) Leejtwg yog tus thawj coj uas zoo kawg nkaus?

¹⁵ Yehauvas twb cog lus ntau pua xyoo lawm tias nws yuav tsa ib tug uas zoo kawg nkaus los coj nws haiv neeg. Mauxe qhia rau cov Yixayee tias: “[Yehauvas] uas yog nej tus Vajtswv yuav tsa ib tug xibhwb cev lus zoo yam li kuv tshwm los hauv nej cov kwvtij, mas nej yuav tsum mloog nws lus.” (Kevcai 18:15) Yaxaya hais tias tus ntawd yuav “ua tus thawj thiab tus uas kav ib tsoom neeg.” (Yaxaya 55:4) Daniyee hais ntxiv tias Vajtswv yuav tsa tus Mexiyas “ua ib tug thawj.” (Daniyee 9:25) Thaum Yexus Khetos los hauv ntiajteb no, nws mam li hais tawm tias nws yog lawv “tib tug Kws xibhwb” ntawd. (Nyeem Mathai 23:10.) Yexus cov thwjtim thiaj zoo siab hlo raws nws qab. Lawv puavleej ntseeg tias nws yog tus uas Yehauvas tau xaiv los ua tus thawj. (Yauhas 6:68, 69) Ua cas lawv thiaj ntseeg tau li ntawd?

16. Ua cas peb thiaj paub tias Vajtswv pub lub hwj huam dawb huv rau Yexus tiag?

¹⁶ Lub hwj huam dawb huv tau coj Yexus. Thaum Yexus ua kevcai raus dej tas, Yauhas pom “rooj ntug qheb kiag thiab [lub hwj huam] zoo li ib tug nquab nqes los rau saum nws.” Tom qab ntawd, lub hwj huam txawm “txhib Yexus mus rau hauv tebchaws moj sab qhua.” (Malakau 1:10-12) Vajtswv lub hwj huam dawb huv kuj pab Yexus tshaj tawm txoj xov zoo thiab ua ntau yam txujci tseem ceeb hauv ntiajteb no. (Tubtxib Tes Haujlwm 10:38) Tsis tas li ntawd xwb, lub hwj huam dawb huv kuj pab Yexus muaj kev hlub, kev xyiv fab, thiab muaj kev ntseeg ruaj nreeg. (Yauhas 15:9; Henplais 12:2) Tsis muaj ib tug thawj coj twg uas yuav zoo npaum li Yexus. Nws tes haujlwm thiab tej txujci uas nws tau ua qhia tias Vajtswv yog tus uas pub lub hwj huam dawb huv rau nws. Tej no qhia tias Yehauvas yeej xaiv Yexus los ua tus Thawj Coj lawm tiag.

17. Cov tubtxib saum ntuj tau pab Yexus li cas?

¹⁷ Cov tubtxib saum ntuj tau pab Yexus. Tom qab Yexus ua kevcai raus dej tas,  “cov tubtxib saum ntuj los ua koom tu” nws. (Mathai 4:11) Ua ntej Yexus tuag, kuj “muaj ib tug tubtxib saum ntuj los tshwm rau Yexus thiab txhawb nws lub zog.” (Luka 22:43) Yexus yeej paub tias Yehauvas yuav xa cov tubtxib saum ntuj los pab nws thaum twg los tau.—Mathai 26:53.

18, 19. Vajtswv Txojlus coj Yexus txoj hau kev li cas?

¹⁸ Vajtswv Txojlus tau coj Yexus txoj hau kev. Txij hnub uas Yexus pib tshaj tawm mus txog hnub uas nws tuag saum tus ncej ntoo, Yexus yeej cia Vajtswv Txojlus coj nws txoj hau kev. Thaum luag twb muab Yexus dai saum tus ncej ntoo lawm los, nws tseem hais tau ib co lus uas muaj raws li tej lus faj lem txog tus Mexiyas thiab. (Mathai 4:4; 27:46; Luka 23:46) Tiamsis cov thawj coj uas nyob rau lub caij ntawd zoo tsis thooj li Yexus. Lawv tsuas coj tej nqe hauv Vajtswv Txojlus uas lawv nyiam xwb. Yog li ntawd, Yexus thiaj hais Yaxaya tej lus ntsig txog lawv li no: “Cov neeg no hwm kuv ntawm daim tawv ncauj xwb tiamsis lawv lub siab nyob deb kuv. Qhov uas lawv pe hawm kuv tsis muaj qabhau kiag li, lawv muab neeg tej kevcai los qhia ib yam li yog Vajtswv tej lus nkaw.” (Mathai 15:7-9) Yehauvas yeej tsis xaiv cov txivneej uas tsis coj raws li nws Txojlus los coj nws haiv neeg ib zaug li.

¹⁹ Yexus kuj muab Vajtswv Txojlus los qhia tibneeg. Thaum cov thawj coj sim Yexus, nws tsis siv nws lub tswvyim tiamsis nws  muab Vajtswv Txojlus los teb xwb. (Mathai 22:33-40) Tsis tas li ntawd, Yexus tsis tham txog nws lub neej nyob saum ntuj lossis tham txog lub sijhawm uas Yehauvas nkawd tsim lub qab ntuj khwb kom luag qhuas nws. Nws tsuas qhia Vajtswv Txojlus thiab “qheb lawv lub siab kom to taub Vajtswv txojlus” xwb.—Luka 24:32, 45.

20. (1) Yexus qhuas txog Yehauvas li cas? (2) Yexus txawv Helauj Akipa I li cas?

²⁰ Cov uas mloog Yexus qhia yeej qhuas nws heev. Tiamsis Yexus tsuas qhuas tias Yehauvas yog tus qhia nws xwb. (Luka 4:22) Muaj ib zaug ib tug txivneej uas nplua nuj qhuas tias Yexus yog tus “Xibhwb uas zoo kawg.” Yexus teb tias: “Ua cas koj hu kuv tias tus zoo kawg? Tsis muaj leejtwg zoo tsuas yog Vajtswv tib leeg xwb.” (Malakau 10:17, 18) Yexus txo hwjchim kawg li, puas yog? Tau 8 lub xyoos tom qab ntawd, Helauj Akipa I sawv ua tus thawj kav Yudia. Tiamsis Helauj tsis txo hwjchim li Yexus. Muaj ib hnub nws hnav ib ce tsoos vajntxwv uas ci nplas. Thaum cov pejxeem pom nws thiab hnov nws hais lus, lawv txawm qhuas zom zaws tias: “No yog ib tug timtswv lub suab, tsis yog suab neeg.” Helauj zoo siab heev uas lawv qhuas nws li ntawd. Vim nws “tsis muab koob meej rau Vajtswv,” Yehauvas ib tug tubtxib saum ntuj thiaj rau txim rau nws. Helauj “thiaj raug kas muab noj txog tuag.” (Tubtxib Tes Haujlwm 12:21-23) Yog li ntawd, Helauj tsis yog ib tug uas Yehauvas tau xaiv los ua thawj coj. Yexus tsis coj li Helauj. Tej uas Yexus tau ua yeej ua pov thawj tias Yehauvas tau xaiv nws los ua thawj coj. Tsis tas li ntawd, nws tsuas qhuas tias Yehauvas thiaj yog tus Thawj Coj uas loj ntuas ntais xwb.

21. Zaj tom ntej, peb yuav kawm txog dabtsi?

²¹ Yehauvas yeej xav kom Yexus ua tus Thawj Coj, tiamsis tsis yog coj ib ntus xwb. Tom qab Yexus tuag es Vajtswv tsa nws sawv ciaj rov los, Yexus hais rau nws cov thwjtim tias Yehauvas tau muab “hwjchim tag nrho saum ntuj thiab hauv ntiajteb” cob rau nws. Nws kuj hais ntxiv tias: “Kuv niaj hnub yuav nrog nraim nej mus txog lub sijhawm kawg.” (Mathai 28:18-20) Tiamsis Yexus yuav coj tau peb li cas yog tias nws yog ib tug plig thiab nyob saum ntuj ceeb tsheej? Vajtswv ho tsa leejtwg los sawv cev rau Yexus hauv ntiajteb no? Yuav ua li cas cov Khixatia thiaj paub tseeb tias leejtwg yog tus sawv cev rau Vajtswv tiag? Zaj tom ntej yuav teb cov lus nug ntawd.