1. Ua cas Khayee ho txiav txim siab tau tsis zoo thiab thaum kawg zoo li cas?

MUAJ ib zaug Khayee chim kawg li. Yog nws tswj tau nws lub siab ces nws yuav ua tau zoo, tiamsis yog nws cia nws lub siab tswj nws ces nws yuav ua tau yuam kev. Khayee txiav txim siab li cas xwb? Phau Vajlugkub qhia tias Khayee txiav txim tau tsis zoo. Nws cia nws lub siab tswj nws, thiaj ua rau nws muab nws tus kwv Anpee tua tuag lawm. Thaum kawg Khayee thiaj tsis tau nrog Yehauvas sib raug zoo lawm.—Chiv Keeb 4:3-16.

2. Ua cas ho tseem ceeb rau peb txiav txim siab zoo zoo?

² Niaj hnub no muaj ntau yam uas peb yuav tau txiav txim siab ua hauv peb lub neej. Tej zaum muaj tej yam yuav hloov hlo peb lub neej. Yog peb txiav txim tau zoo ces peb yuav kaj siab ua neej dua. Yog peb txiav txim tau tsis zoo ces peb yuav ntsib kev nyuaj siab ntxhov plawv.—Paj Lug 14:8.

3. (1) Yuav ua li cas peb thiaj muaj tswvyim txiav txim tau zoo? (2) Peb yuav kawm txog 2 lo lus nug twg?

 ³ Yuav ua li cas peb thiaj muaj tswvyim txiav txim siab? Peb yuav tsum muaj kev ntseeg rau Vajtswv thiab ntseeg tias Nws yog tus pub tswvyim rau peb. Tsis tas li ntawd xwb, peb yuav tsum ntseeg tias Vajtswv Txojlus yuav pab tau peb tiag. (Nyeem Yakaunpau 1:5-8.) Thaum peb nyeem phau Vajlugkub thiab kawm ntxiv txog Yehauvas, peb yuav pom tias nws lub tswvyim yeej zoo dua tiag thiab nws tsuas xav kom peb tau qhov zoo xwb. Qhov ntawd yuav ua rau peb pom tias yeej tsim nyog peb siv phau Vajlugkub los pab peb txiav txim siab. Zaj no peb yuav kawm txog 2 lo lus nug no: Yuav ua li cas peb thiaj txiav txim tau zoo? Tom qab peb txiav txim siab tas, puas zoo rau peb hloov siab?

4. Adas tau txiav txim siab li cas thiab thaum kawg zoo li cas?

⁴ Txij thaum ntuj tsim teb raug los, tibneeg yuav tau txiav txim siab txog ntau yam. Adas uas yog thawj tug txivneej yuav tau txiav txim seb nws yuav mloog tus Tswv Tsim lus los yuav mloog Eva uas yog nws tus pojniam lus. Thaum kawg Adas yeem mloog Eva lus, nws thiaj ua tau yuam kev loj kawg nkaus li. Yehauvas thiaj muab nkawd ntiab tawm hauv lub vaj Edee, nkawd thiaj txawj laus txawj tuag. Vim Adas txiav txim tau tsis zoo, noob neej thiaj ntsib ntau yam kev nyuaj siab ntxhov plawv los txog niaj hnub nimno.

5. Ua cas ho zoo rau peb txiav txim siab rau peb tus kheej?

⁵ Ib txhia xav tias lawv lub neej yuav yoojyim dua yog lawv tsis tas txiav txim siab txog ib yam dabtsi li. Tej zaum koj kuj xav li ntawd thiab. Nco ntsoov tias tsis yog Yehauvas tsim peb zoo li tej tshuab uas tsis txawj xav es yuav muab lem li cas los tau. Tiamsis Yehauvas xav kom peb txawj txiav txim siab zoo rau peb tus kheej, nws thiaj pub nws Txojlus los tsav tswvyim rau peb. Yog li ntawd, qhov uas peb xyaum kom paub txiav txim zoo, yeej tseem ceeb kawg li.

6, 7. (1) Cov Yixayee yuav tsum txiav txim siab li cas? (2) Ua cas ho nyuaj ua luaj rau cov Yixayee txiav txim siab ua qhov zoo? (Saib daim duab ntawm sab 9.)

⁶ Thaum cov Yixayee los nyob hauv tebchaws Khana-as, lawv yuav tau txiav txim seb lawv yuav teev tiam Yehauvas los teev tiam lwm haiv neeg tej dab mlom. (Nyeem Yausua 24:15.) Tej zaum koj yuav xav tias qhov ntawd yeej tsis nyuaj txiav txim li. Yog lawv teev tiam Yehauvas, lawv yuav tau txojsia tiamsis yog lawv mus teev tiam tej vajtswv cuav ces lawv yuav raug puam tsuaj. Thaum txog cov thawj coj tiam, cov Yixayee txiav txim siab tsis zoo kiag li. Ntau zaus lawv tau tso Yehauvas tseg mus teev dab teev mlom. (Cov Thawj 2:3, 11-23) Tiam Eliya nyob los, Yehauvas haiv neeg yuav tau txiav txim seb lawv yuav teev tiam Yehauvas los teev tiam tus dab Npa-as. (1 Vajntxwv 18:21) Tsim nyog lawv paub tias txojkev pe hawm Yehauvas yog txoj zoo tshaj. Tus neeg thoob tsib yeej tsis lam pe hawm ib tug vajtswv uas muab pob zeb pob  ntoos txua. Cov Yixayee twb paub li ntawd los lawv tseem “ua siab ywj fab ywj fwj rau ob tog.” Eliya thiaj pab kom lawv txiav txim siab pe hawm Yehauvas uas yog tus tseem Vajtswv.

⁷ Ua cas ho nyuaj ua luaj rau cov Yixayee txiav txim siab ua qhov zoo? (1) Cov Yixayee tsis muaj kev ntseeg rau Yehauvas thiab tsis kam mloog nws lus. Lawv tsis tso siab rau Yehauvas thiab tsis siv sijhawm los kawm txog nws thiab nws lub tswvyim. Lawv thiaj tsis paub txiav txim siab zoo. (Ntawv Nkauj 25:12) (2) Kuj muaj lwm haiv neeg nrog cov Yixayee nyob thiab. Tej haiv neeg ntawd tsis teev tiam Yehauvas, lawv thiaj txw kom cov Yixayee mus ua phem. Cov Yixayee tseem cia tej haiv neeg ntawd txiav txim siab rau lawv thiab. Thaum kawg, cov Yixayee thiaj mus xyaum coj raws li tej haiv neeg ntawd thiab mus pe hawm lawv tej dab tej mlom. Cov Yixayee tsis nco tias Yehauvas twb ceeb toom lawv txog tej no puag ntxov los lawm.—Khiav Dim 23:2.

8. Cov Yixayee tus qauv qhia peb li cas?

⁸ Cov Yixayee tus qauv qhia tias cov uas xav muaj tswvyim txiav txim siab zoo yuav tsum coj raws li Vajtswv Txojlus. Kalatia 6:5 hais tias peb txhua tus nyias yuav tau ris nyias lub nra. Yog li ntawd, tsis zoo rau peb cia lwm tus txiav txim siab rau peb. Peb txhua tus yuav tsum kawm seb Vajtswv xav kom peb ua li cas ces peb mam txiav txim siab ua li ntawd.

9. Ua cas ho tsis zoo rau peb cia lwm tus txiav txim siab rau peb?

⁹ Ib txhia cia lwm tus txiav txim siab rau lawv li cas? Tej zaum lawv cia lwm tus txw lossis yaum lawv mus ua tej yam tsis zoo. (Paj Lug 1:10, 15) Tsis zoo rau peb cia lwm tus txiav txim siab rau peb. Txawm lwm tus yuav yws npaum li cas los, peb yuav tsum txiav txim siab raws li peb lub siab uas paub cais qhov zoo qhov phem. Tsis txhob ua tej yam uas yuav ua rau peb lub siab rov nkaug peb. Nco ntsoov tias yog peb cia lwm tus txiav txim siab rau peb ces twb yog peb raws tus neeg ntawd. Yog peb raws neeg qab ces peb yuav raug teeb meem.

10. Povlauj tau ceeb toom cov kwvtij hauv Kalatia li cas?

¹⁰ Tus tubtxib Povlauj tau ceeb toom kom cov Kalatia txhob cia lwm tus txiav txim siab rau lawv. (Nyeem Kalatia 4:17.) Ib co kwvtij hauv lub koom txoos Kalatia xav ua cov uas txiav txim siab rau lwm tus. Vim li cas? Vim lawv xav kom lwm tus raws lawv qab es txhob raws cov tubtxib. Cov ntawd tsis txo hwjchim, lawv xav tsab ua loj, lawv thiaj tsis xav kom cov kwvtij nyias txiav txim siab rau nyias tus kheej.

11. Thaum lwm tus yuav tau txiav txim siab txog ib yam dabtsi, peb pab tau nws li cas xwb?

¹¹ Zoo rau peb xyaum tus tubtxib Povlauj. Nws yeej paub tias nws cov kwvtij muaj cai txiav txim siab rau lawv tus kheej, nws thiaj tsis yuam lawv ua li nws hais. (Nyeem 2 Khaulee 1:24.) Niaj hnub no, tsim nyog cov txwj laus xyaum Povlauj tus qauv. Thaum ib tug Khixatia mus cuag cov txwj laus, cov txwj laus tsuas muab Vajtswv Txojlus piav rau  nws xwb. Tus Khixatia mam li txiav txim siab rau nws tus kheej. Vim li cas? Vim tej uas tus Khixatia txiav txim siab ua ntawd thaum kawg txawm zoo txawm phem los nws yog tus uas yuav tau ris. Yog li ntawd, tsim nyog peb nco ntsoov li no: Peb pab tau kom lwm tus nkag siab phau Vajlugkub tej lus qhuab ntuas. Tiamsis tom qab peb piav tej ntawd tas, peb yuav tsum cia nws txiav txim seb nws yuav ua li cas. Yog nws siv tswvyim ces nws yuav txiav txim siab tau zoo. Tiamsis peb tsis muaj cai txiav txim siab rau nws.

12, 13. Ua cas tsis zoo rau peb txiav txim siab thaum peb npau taws lossis qaug zog?

¹² Niaj hnub no, tibneeg feem coob tsuas ua raws li lawv lub siab ntshaw xwb. Tiamsis qhov uas lawv coj li ntawd tsis zoo. Phau Vajlugkub qhia tias peb ntseeg tsis tau peb lub siab vim peb yog neeg txhaum. (Paj Lug 28:26) Tsis tas li ntawd xwb, peb “lub siab yog tus uas dag ntxias heev dua lwm yam huvsi.” (Yelemi 17:9) Phau Vajlugkub qhia tias muaj coob leej ntau tus tau ua raws li lawv lub siab ntshaw lawv thiaj raug teeb meem. (1 Vajntxwv 11:9; Yelemi 3:17; 13:10) Yog peb coj li ntawd, thaum kawg yuav zoo li cas?

¹³ Yehauvas tau sam hwm kom peb hlub nws kawg siab kawg ntsws, thiab kom peb hlub peb cov kwvtij zej zog ib yam li peb hlub peb tus kheej. (Mathai 22:37-39) Tiamsis raws li cov nqe Vajlugkub uas peb tau kawm hauv nqe 12, peb yuav tsum ceev faj txhob cia peb lub siab tswj peb. Muab xav li no, thaum ib tug uas npau taws heev nws yuav txiav txim siab tau tsis zoo. (Paj Lug 14:17; 29:22) Yog nws qaug zog, kuj nyuaj rau nws txiav txim siab thiab.  (Xwm Txheej Taug Kev 32:6-12; Paj Lug 24:10) Yog li ntawd, peb yuav tsum cia Vajtswv txoj kevcai tswj peb lub siab, peb thiaj txiav txim siab tau zoo. (Loos 7:25) Tsis txhob cia peb lub siab tswj peb.

14. Tom qab peb txiav txim siab txog ib yam dabtsi lawd, peb pauv puas tau siab?

¹⁴ Peb yuav tsum siv tswvyim thaum peb txiav txim siab ua ib yam dabtsi. Tom qab peb txiav txim siab tas, puas yog peb yuav tau ua raws li ntawd xwb xwb li? Tsis yog. Muaj tej lub sijhawm peb xav pauv siab los tau. Yehauvas kuj tau ua li ntawd thiab. Nyob rau Yauna tiam, Yehauvas hais tias nws yuav muab lub nroog Ninave rhuav tshem. Tiamsis tau muaj li cas xwb? Phau Vajlugkub hais tias: “Thaum Vajtswv pom tej uas lawv ua thiab pom qhov uas lawv tig kiag ntawm lawv tej kev phem, Vajtswv kuj hloov siab tsis tso tej xwm txheej phem uas nws hais tias nws yuav tso los raug lawv lawm.” (Yauna 3:10) Yog li ntawd, thaum cov Ninave ntxeev dua siab tshiab lawd, Yehauvas kuj hloov siab tsis rau txim rau lawv thiab. Tus qauv no qhia tias Yehauvas txawj xav heev. Nws txo hwjchim thiab hlub tshua tibneeg heev. Yehauvas tsis coj li neeg ntiajteb uas npau taws ces lam tau lam rau txim rau luag.

15. Vim li cas zaum puav tsim nyog peb hloov siab?

¹⁵ Yog peb twb txiav txim siab txog ib yam dabtsi lawd, tiamsis peb pom tias yam ntawd hloov lawd ces tsim nyog peb pauv siab. Phau Vajlugkub qhia tias Yehauvas tau ua li ntawd. (1 Vajntxwv 21:20, 21, 27-29; 2 Vajntxwv 20:1-5) Tej zaum peb kuj tshawb pom tej yam tshiab txog yam uas peb txiav txim siab yuav ua ntawd, peb thiaj pauv siab. Vajntxwv Davi tau ua li ntawd. Thaum ub muaj ib tug tau dag txog Xa-u tus tub xeeb ntxwv Mefinpause rau Davi, Davi thiaj txiav txim siab yuam kev faib Mefinpause daim teb rau tus ntawd lawm. Tiamsis thaum Davi hnov txog tej xov ntawd tias yog dag xwb, Davi thiaj pauv siab. (2 Xamuyee 19:24-29) Peb yuav tau xyaum ua li ntawd. Thaum tsim nyog pauv siab ces peb yuav tau pauv thiab.

16. (1) Peb yuav tsum nco ntsoov li cas thaum peb txiav txim siab ua ib yam dabtsi? (2) Ua cas ho zoo rau peb rov muab tej uas peb twb txiav txim siab lawd coj los luj thiab peb yuav ua li ntawd li cas?

¹⁶ Phau Vajlugkub qhia tias peb yuav tsum tsis txhob maj txiav txim siab txog tej yam tseem ceeb. (Paj Lug 21:5) Peb yuav tsum ua tib zoo luj ua ntej tso peb thiaj txiav txim tau zoo. (1 Thexalaunika 5:21) Ua ntej yuav txiav txim siab ua ib yam dabtsi, tus txiv tsev yuav tsum tshawb nrhiav tej nqe Vajlugkub thiab tej ntaub ntawv uas lub koom haum tau luam. Kuj zoo rau nws nug seb nws tsev neeg ho xav li cas txog yam ntawd. Nco ntsoov tias yav thaum ub Vajtswv tau txhawb kom Aplahas mloog nws pojniam hais thiab. (Chiv Keeb 21:9-12) Cov txwj laus los yuav tsum ua tib zoo tshawb nrhiav Vajlugkub thaum lawv txiav txim siab ua ib yam dabtsi. Tom qab lawv twb txiav txim siab tas lawd, yog muaj tej ntsiab lus tawm tshiab uas  tuaj ntawm lub koom haum tuaj, lawv yuav tsum hloov raws li ntawd txhob ntshai poob ntsej muag. Cov txwj laus uas txo hwjchim thiab txawj xav yuav zoo siab hloov thaum tsim nyog. Kuj zoo rau peb xyaum tus qauv no thiab. Yog peb ib leeg yoog ib leeg li no ces lub koom txoos yuav muaj kev sib haum xeeb thiab koom tau ib lub siab.—Tubtxib Tes Haujlwm 6:1-4.

17. Yuav ua li cas peb thiaj txiav txim siab tau zoo?

¹⁷ Tej zaum peb yuav tau txiav txim siab txog tej yam uas tseem ceeb heev. Tej txhia txiav txim seb lawv yuav xaiv tus txij nkawm twg. Lwm cov ho txiav txim seb thaum twg lawv mam pib ua haujlwm puv ntoob rau Yehauvas. Ua ntej peb txiav txim siab, peb yuav tau lauj sijhawm los ua zoo xav thiab thov Yehauvas pab peb. Peb yuav tsum tso siab rau Yehauvas, ua tib zoo mloog thiab coj raws li nws tej lus qhuab ntuas peb thiaj txiav txim siab tau zoo. (Paj Lug 1:5) Yehauvas tau pub nws Txojlus rau peb. Yog li ntawd, peb yuav tsum ua tib zoo tshawb nrhiav phau Vajlugkub tej hauv paus ntsiab lus thiab thov kom Yehauvas coj peb txoj hau kev. Nws yuav pab kom peb paub coj peb thiaj muaj tswvyim txiav txim siab tau zoo raws li nws lub siab nyiam. Ua ntej peb yuav txiav txim siab, cia peb nco ntsoov xav txog cov lus nug no: ‘Qhov uas kuv txiav txim siab ua no puas qhia tias kuv hlub Yehauvas? Qhov no puas pab kom kuv tsev neeg muaj kev xyiv fab thiab kev sib haum xeeb? Qhov no puas qhia tias kuv muaj lub siab ntev thiab lub siab hlub luag?’

18. Ua cas Yehauvas ho xav kom peb txiav txim siab rau peb tus kheej?

¹⁸ Yehauvas tsis yuam kom peb hlub nws thiab teev tiam nws. Nws qheb kev rau peb seb peb puas txiav txim siab los teev tiam nws. (Yausua 24:15; Laj Lim Tswvyim 5:4) Tom qab peb tshawb nrhiav Vajtswv Txojlus thiab txiav txim siab txog ib yam twg lawd, Yehauvas xav kom peb ua raws li peb tau txiav txim siab ntawd. Yog peb muaj kev ntseeg rau Yehauvas thiab coj raws li nws tej hauv paus ntsiab lus, peb yuav muaj tswvyim txiav txim siab tau zoo. Tej uas peb ua yuav qhia tias peb yeej ruaj siab rau Yehauvas tiag.—Yakaunpau 1:5-8; 4:8.