Nyob rau xyoo 2012, cov neeg tshawb fawb nrhiav tau ib lub hub av uas tawg ua tej dwb daim tas. Luag tau puab lub hub ntawd muaj li 3,000 xyoo dhau los lawm. Cov neeg tshawb fawb zoo siab heev thaum lawv nrhiav tau lub hub ntawd. Vim li cas? Vim muaj ib co lus Khana-as kos rau ntawm lub hub.

Thaum cov neeg tshawb fawb muab tej dwb daim rov sib lo ua ke, lawv pom cov lus no: “Eshba’al Ben Beda” (Esanpa-as Npees Npedas) uas txhais tias “Esanpa-as uas yog Npedas tus tub.” Zaum no yog thawj zaug uas cov neeg tshawb fawb nrhiav pom lub npe ntawd sau rau tej yam uas nyob txheej thaum ub.

Phau Vajlugkub kuj hais txog ib tug hu ua Esanpa-as thiab. Nws yog Vajntxwv Xa-u ib tug tub. (1 Vaj Keeb Kwm 8:33; 9:39) Tus xibhwb Yosef Garfinkel yog ib tug ntawm cov uas nrhiav tau lub hub. Nws hais tias thaum ntej lawv tsuas pom lub npe Esanpa-as tshwm hauv phau Vajlugkub xwb, tiamsis nimno lawv tshawb pom lub npe ntawd kos rau ib lub hub uas yog puab rau Vajntxwv Davi tiam. Ib txhia thiaj ntseeg tias cov neeg nyob Davi tiam thiaj siv lub npe ntawd xwb. Qhov no ua pov thawj tias phau Vajlugkub yeej muaj raws li keeb kwm tiag.

Hauv phau Vajlugkub, Xa-u tus tub Esanpa-as kuj muaj dua ib lub npe hu ua Inpause. (2 Xamuyee 2:10) Ua cas lawv ho muab “npa-as” hloov ua “npause” li ntawd? Cov neeg tshawb fawb hais tias tej zaum tus uas sau 2 Xamuyee tsis xav siv lub npe Esanpa-as tsam ces cov neeg Yixayee ho xav txog Khana-as tus dab Npa-as. Cov Khana-as ntseeg tias tus dab ntawd tswj tau dej nag. Tiamsis tseem muaj lub npe Esanpa-as sau nyob hauv phau ntawv 1 Vaj Keeb Kwm.