KUV tseem nco qab ntsoov, muaj ib tagkis uas no heev hauv lub nroog Brookings xeev South Dakota tebchaws U.S.A. Hnub ntawd no heev vim ze lub caij los daus lawm. Peb nyob hauv ib lub tsev teb tshee na xwb, tsis muaj qhov cub nte. Peb tseem sawv ntawm ib thoob dej txiag thiab. Cia kuv piav seb vim li cas peb thiaj nyob hauv lub tsev ntawd.

Kuv yug lub 3 Hlis tim 7, 1936. Kuv niam kuv txiv yug tau peb 4 leeg. Kuv yog tus tub ntxawg. Peb nyob lub xeev South Dakota. Kuv tsev neeg ua teb noj xwb, tiamsis qhov ntawd tsis yog yam uas tseem ceeb tshaj hauv peb lub neej. Xyoo 1934, kuv niam kuv txiv nkawd tau ua kevcai raus dej teev tiam Yehauvas. Thaum nkawd muab nkawd lub neej cob rau Yehauvas, nkawd tau txiav txim siab muab Yehauvas tes haujlwm tso ua ntej. Kuv txiv tau ua tus company servant, uas nimno hu ua tus dhia haujlwm ntawm pab txwj laus, hauv peb lub koom txoos nyob lub zos Conde xeev South Dakota. Tom qab no, kuv txiv hlob Alfred ho tau tuav ib ntus thiab.

Peb tsev neeg yeej ib txwm mus kev sib txoos tsis tu ncua. Peb kuj rau siab ntso mus tshaj tawm ib lub tsev rau ib lub txog txojkev cia siab yav tom ntej. Kuv niam kuv txiv nkawd cob qhia tau peb zoo heev thiab tso tau qauv zoo rau peb xyaum, peb thiaj loj hlob los teev tiam Yehauvas. Thaum kuv thiab kuv tus muam Dorothy wb muaj 6 xyoo, wb pib ua tus tshaj tawm uas tsis tau raus dej. Xyoo 1943 kuv rau npe koom txoj Kev Kawm Tshaj Tawm uas pib rau tib xyoos ntawd.

Mus koom tej rooj sib txoos kuj yog ib yam tseem ceeb heev rau peb tsev neeg thiab. Kuv  tseem nco ntsoov xyoo 1949, lub rooj sib txoos hauv lub nroog Sioux Falls xeev South Dakota. Kwvtij Grant Suiter cev ib zaj lus qhuab qhia hu ua “It Is Later Than You Think!” (Hnub Kawg Los Sai Tshaj Li Koj Xav!) Nws qhia tias cov uas tau muab lawv lub neej cob rau Yehauvas lawd yuav tsum siv lawv lub dag lub zog tshaj tawm txoj xov zoo txog Vajtswv lub Nceeg Vaj. Tom qab ntawd, kuv thiaj muab kuv tus kheej cob rau Yehauvas. Thaum txog lub rooj sib txoos hauv lub zos Brookings lub 11 Hlis tim 12, 1949, kuv thiaj ua kevcai raus dej. Vim li no kuv thiaj nyob hauv lub tsev teb uas kuv tau hais lawd. Peb 4 leeg sawv tos yuav ua kevcai raus dej hauv thoob dej txiag ntawd.

Thaum kuv muaj 15 xyoos kuv txiav txim siab tias kuv yuav ua ib tug tho kev. Kuv thiaj pib tho kev rau lub 1 Hlis tim 1, 1952. Phau Vajlugkub hais tias: “Tus uas nrog nraim tus txawj ntse nws kuj yuav txawj ntse.” Kuv pom tias phau Vajlugkub yeej pab kom kuv tsev neeg coob tus txawj ntse thiab muaj tswvyim. Lawv thiaj txhawb kom kuv tho kev ntxiv mus. (Paj Lug 13:20) Ntau zaus, kuv nrog peb txiv hlob Julius mus qhia Vajlugkub. Thaum ntawd peb txiv hlob muaj 60 xyoo. Txawm nws laus tshaj kuv los, wb nyiam mus qhia Vajlugkub ua ke heev. Nws tau qhia kuv txog ntau yam. Tsis ntev xwb, kuv tus muam Dorothy kuj pib tho kev lawm thiab.

Thaum kuv tseem hluas, kuv niam kuv txiv nyiam caw cov kwvtij saib xyuas thaj tsam thiab lawv cov pojniam los so hauv peb tsev. Muaj ib nkawm niam txiv yog Jesse thiab Lynn Cantwell. Nkawd hlub thiab pab kuv heev. Tsis tas li ntawd xwb, nkawd yog ob tug uas txhawb kom kuv tho kev. Thaum twg nkawd mus xyuas cov koom txoos uas nyob ze peb, nkawd kuj caw kuv nrog nkawd mus tshaj tawm thiab. Kuv nyiam nrog nkawd ua ke heev. Kuv xav kom kuv kub siab ua Yehauvas tes haujlwm ib yam li nkawd.

Tom qab ntawd, tus kwvtij tshiab uas saib xyuas peb thaj tsam yog Kwvtij Bud Miller thiab nws tus pojniam Joan. Lub caij ntawd kuv muaj 18 xyoo lawm. Thaum ntawd muaj ib pab uas txiav txim seb leejtwg yuav mus ua tub rog. Txoj kevcai sam hwm tias cov tub hluas yuav tsum rau npe, kuv thiaj ua li ntawd. Pab ntawd thiaj muab ib txoj haujlwm rau kuv tuav. Tiamsis kuv lub siab tsis pub kuv ua, rau qhov tes haujlwm ntawd kuj hla Yexus cov lus sam  hwm kom txhob koom kev nom kev tswv. Kuv thiaj thov lawv kom muab kuv rau npe tso ua ib tug xibhwb kuv thiaj tau tshaj tawm txoj xov zoo.—Yauhas 15:19.

Thaum Kwvtij Miller qhia kuv tias nws mam nrog kuv mus ntsib pab uas txiav txim ntawd, ua rau kuv zoo siab kawg li. Nws hais taus thiab tsis ntshai leejtwg li. Nws kuj paub phau Vajlugkub zoo heev. Nws nrog kuv mus kuv thiaj ua taus siab tawv. Xyoo 1954, thaum lub caij ntuj so yuav xaus, lawv thiaj txiav txim siab muab kuv rau npe ua ib tug xibhwb, es tsis tas ua tub rog. Zaum no tsis muaj dabtsi cuam tshuam tes haujlwm uas kuv ua rau Yehauvas lawm.

Tsis ntev tom qab ntawd xwb, kuv txawm raug txib mus ua haujlwm hauv Npe-ee. Kuv ua haujlwm hauv Watchtower Farm, uas nyob hauv Staten Island xeev New York. Kuv ua haujlwm tau 3 lub xyoos. Cov kwvtij nkauj muam paub tab uas kuv nrog ua haujlwm qhia tau ntau yam rau kuv. Lub caij no mas lomzem kawg li.

Hauv Watchtower Farm kuj muaj ib tshooj xov tooj cua hu ua WBBR. Xyoo 1924 mus txog xyoo 1957, Yehauvas Cov Timkhawv siv tshooj xov tooj cua no los tshaj tawm txoj xov zoo. Npe-ee kuj txib li 15 rau 20 leej mus ua liaj ua teb. Peb cov uas ua teb feem coob tsuas yog cov hluas uas tsis tau ua teb dua. Tiamsis kuj muaj ib tug kwvtij laus uas yog ib tug xaiv tseg hu ua Eldon Woodworth nrog peb ua thiab. Peb saib nws zoo li peb leej txiv. Nws tau qhia ntau yam rau peb. Thaum peb tsis sib haum, Kwvtij Woodworth kheev hais tias: “Xav tsis thoob li uas peb yog neeg txhaum xwb, tiamsis Yehauvas tseem txib peb los ua nws tes haujlwm thiab.”

Kwvtij Frederick W. Franz kuj nrog peb ua haujlwm thiab. Nws paub phau Vajlugkub zoo heev thiab nws ntse kawg li. Nws kuj hlub peb sawvdaws thiab. Kwvtij Harry Peterson yog tus uas ua zaub mov rau peb noj. Tiag mas, nws lub xeem yog Papargyropoulos tiamsis peb hais tsis tau peb thiaj muab tis hu ua Peterson. Kwvtij Peterson kuj yog ib tug xaiv tseg uas nyiam mus qhia Vajlugkub heev. Txawm nws ua haujlwm hauv Npe-ee los, nws yeej rau siab ntso mus tshaj tawm txoj xov zoo. Txhua lub hlis, nws tseb tau ntau pua phau ntawv. Nws kuj paub phau Vajlugkub zoo heev thiab teb tau tej lus nug uas peb muaj.

Hauv Watchtower Farm peb mus de txiv hmab txiv ntoo thiab zaub coj los cub ntim lam hwj cia. Ib xyoos twg, peb ntim tau txog li 45,000 lam hwj cia rau cuab kwvtij Npe-ee tau noj. Kuv ua haujlwm nrog ib tug muam hu ua Etta Huth uas ntse kawg li. Nws yog tus qhia seb peb yuav ntim zaub thiab txiv li cas rau hauv tej lam hwj. Kuj muaj cov muam uas nyob ze peb tuaj pab peb ua haujlwm thiab. Thaum lawv tuaj, Etta yog tus qhia lawv ua haujlwm. Txawm Etta txawj ntim lam hwj heev los, nws yeej mloog cov kwvtij uas tuav haujlwm saib xyuas lus. Nws tso tau ib tug qauv zoo heev rau peb xyaum.

Angela Romano kuj yog ib tug ntxhais hluas uas tau tuaj pab peb ua haujlwm. Thaum Angela los paub Yehauvas, Etta yog tus uas pab txhawb nws lub zog. Angela wb sib yuav rau lub 4 Hlis xyoo 1958. Nimno wb twb teev tiam Yehauvas ua ke tau 58 lub xyoos lawm. Wb txojkev txij nkawm ruaj khov twb yog vim Angela muab siab npuab Yehauvas heev. Kuv pojniam ntse kawg li, txawm wb raug tej kev nyuaj siab zoo li cas los, nws yeej txawj pab kuv.

Nyob rau xyoo 1957, cov kwvtij tau muab lub xov tooj cua WBBR muag lawm. Kuv thiaj mus ua haujlwm hauv lub Npe-ee uas nyob Brooklyn ib nyuag ntu. Thaum Angela wb sib yuav ces kuv thiaj tawm Npe-ee. Wb tho kev hauv Staten Island tau 3 lub xyoos. Lub sijhawm ntawd kuv kuj mus ua haujlwm ib ntus rau cov uas yuav peb lub xov tooj cua. Lawv muab lub xov tooj cua tis npe ua WPOW.

Angela wb npaj ua lub neej yoojyim kom wb thiaj ua tau Yehauvas tes haujlwm. Xyoo 1961, wb thiaj mus ua 2 tug tho kev tshwj xeeb hauv lub nroog Falls City xeev Nebraska. Tiamsis thaum wb mus txog tod, wb txawm raug caw mus kawm txoj Kev Kawm Rau Cov Kwvtij Tuav Haujlwm hauv lub zos South Lansing xeev New York ib lub hlis. Tej uas wb tau kawm txhawb zog heev. Wb xav tias tom qab wb kawm tas, wb yuav rov mus rau lub xeev Nebraska. Tiamsis ua cas wb txawm raug txib mus rau lwm qhov lawm. Lub koom haum muab wb xa mus tshaj tawm rau hauv tebchaws Qhab Meem. Lub tebchaws ntawd mas zoo nkauj heev. Wb tau pom thiab tau saj ntau yam tshiab. Wb kuj tau hnov ntau yam suab txawv heev thiab. Wb xav qhia txoj xov zoo txog lub Nceeg Vaj rau cov neeg hauv lub tebchaws ntawd kawg li.

Tiamsis tsis ntev xwb, tebchaws Qhab Meem txawm hloov nom tswv ces wb thiaj khiav mus rau South Vietnam lawm. Ob xyoos tom qab ntawd, kuv txawm mob hnyav heev, wb thiaj rov los tebchaws U.S.A. Kuv so tau ib ntus kuv thiaj zoo. Thaum kuv zoo lawd, kuv pojniam wb thiaj rov tho kev dua.

Lub 3 Hlis xyoo 1965, lub koom haum tau txib wb mus ncig xyuas cov koom txoos. Wb zoo siab tias wb tau ua tus saib xyuas thaj tsam thiab cheeb tsam tau 33 lub xyoos. Lub sijhawm ntawd, wb kuj pab npaj tej rooj sib txoos thiab. Kuv nyiam tes haujlwm no kawg li rau qhov kuv ib txwm nyiam mus tej rooj sib  txoos. Wb tau mus xyuas cov koom txoos nyob hauv lub nroog New York City thiab ib ncig ntawd tau ob peb lub xyoos. Lub sijhawm ntawd, cov rooj sib txoos yog nyob rau hauv Yankee Stadium.

Angela wb tau ua ntau yam haujlwm tshwj xeeb rau Yehauvas. Txawm cov haujlwm no nyuaj heev los, kuj lomzem kawg li thiab. Xyoo 1995, cov kwvtij txib kuv mus qhia txojkev kawm Ministerial Training School. Peb lub xyoos tom qab ntawd, wb rov mus ua haujlwm hauv Npe-ee. Kuv zoo siab kawg li uas tom qab 40 lub xyoos kuv tseem tau rov mus ua haujlwm hauv Npe-ee dua. Kuv ua haujlwm hauv chav Service Department tau ib ntus thiab ua tus qhia tej kev kawm tshaj tawm. Nyob rau xyoo 2007, Pab Uas Ntaus Thawj tau tsim tsa ib chav tshiab hu ua Chav Saib Xyuas Kev Kawm Vajlugkub. Kuv kuj tau ua tus saib xyuas chav no tau ib ntus thiab.

Tau ob peb lub xyoos no tej kev kawm tshaj tawm hauv Npe-ee hloov lawm ntau. Xws li Kev Kawm Rau Cov Txwj Laus uas pib xyoo 2008 hauv Patterson thiab Brooklyn. Thaum txog xyoo 2010 twb muaj tshaj li 12,000 tus txwj laus tuaj kawm tiav lawm. Nimno kuj muaj txojkev kawm no nyob rau lwm tebchaws lawm thiab. Tsis tas li ntawd xwb, xyoo 2010 tau muab txojkev kawm Ministerial Training School hloov ua Kev Kawm Vajlugkub Rau Cov Kwvtij. Lub koom haum kuj tsa tau ib txojkev kawm tshiab hu ua Kev Kawm Vajlugkub Rau Cov Txij Nkawm thiab.

Lub 9 Hlis xyoo 2014, lub koom haum tau muab ob txojkev kawm no hloov ua Kev Kawm Rau Cov Qhia Lub Nceeg Vaj. Nimno cov kwvtij nkauj muam, tsis hais cov muaj txij nkawm los tsis muaj, puavleej tau mus lawm. Thaum cov kwvtij nkauj muam hnov tias lawv lub tebchaws yuav muaj txojkev kawm no, ua rau lawv xyiv fab heev. Nimno coob leej ntau tus yuav muaj feem mus kawm thiab. Kuv tau ntsib coob tus uas tau tso ntau tsav ntau yam tseg kom lawv thiaj mus tau txojkev kawm no, ua rau kuv zoo siab kawg li.

Txij thaum kuv ua kevcai raus dej los txog niaj hnub nimno, Yehauvas cov tibneeg tau pab tsav tswvyim rau kuv. Kuv tau pom cov laus cov hluas thiab lwm haiv neeg kub siab ua Yehauvas tes haujlwm. Lawv tus qauv pab tau kuv paub Yehauvas thiab teev tiam nws zoo dua. Kuv ua Yehauvas tsaug uas kuv tau ntsib cov kwvtij nkauj muam ntawd thiab tau nrog lawv ua ke thiaj pab tau kuv txawj ntse.