Cov Niam Txiv, Nej Puas Pab Menyuam Los Ua Kevcai Raus Dej?
“Koj tseem tos ua dabtsi? Cia li sawv tsees ua kevcai raus dej.”—TUBTXIB TES HAUJLWM 22:16.
1. Ua ntej menyuam yuav ua kevcai raus dej, cov niam txiv Khixatia yuav tsum paub li cas?
MUAJ ib tug muam hu ua Nploxom Npalas (Blossom Brandt) piav txog lub caij thaum nws tseem yau thiab txiav txim siab ua kevcai raus dej. Nws hais tias: ‘Tau ntau lub hlis, kuv pheej taij kuv niam kuv txiv tias kuv xav ua kevcai raus dej. Nkawd kuj nrog kuv tham txog qhov no ntau zaus lawm thiab. Nkawd xav kom kuv paub tias qhov kuv txiav txim siab ua ntawd tseem ceeb npaum li cas. Thaum txog lub 12 Hlis tim 31 xyoo 1934, kuv thiaj ua kevcai raus dej lawm. Yog hnub uas tseem ceeb tshaj plaws li rau kuv.’ Niaj hnub no los, cov niam txiv xav pab lawv cov menyuam kom paub txiav txim siab zoo. Yog lam muab kevcai raus dej ncua tseg, tej zaum yuav ua rau menyuam txojkev sib raug zoo nrog Yehauvas tsuag. (Yakaunpau 4:17) Ua ntej menyuam ua kevcai raus dej, cov niam txiv uas thoob tsib yuav tsum paub seb nkawd tus menyuam puas tau npaj txhij los ua Khetos ib tug thwjtim los tsis tau.
2. (1) Cov saib xyuas thaj tsam ib txhia pom tias muaj li cas rau cov hluas? (2) Hauv zaj no peb yuav kawm txog dabtsi?
2 Cov saib xyuas thaj tsam ib txhia pom tias cov hluas coob tus tsis tau ua kevcai raus dej. Cov no yeej paub qhov tseeb thaum yau los thiab twb tiav nkauj tiav nraug lawm los tseem tsis tau ua kevcai raus dej. Lawv kuj mus tej kev sib txoos, mus qhia Vajlugkub, thiab suav tias lawv yog Yehauvas ib tug Timkhawv. Tiamsis ua cas lawv tseem tsis tau muab lawv tus kheej cob rau Yehauvas thiab ua kevcai raus dej. Tej zaum kuj yog lawv niam lawv txiv xav tias lawv tsis tau npaj txhij. Hauv zaj no peb yuav kawm txog 4 yam uas ua rau cov niam txiv ntshai tsis kam txhawb lawv cov menyuam ua kevcai raus dej.
KUV TUS MENYUAM PUAS TAU MUAJ HNUB NYOOG?
3. Nploxom niam thiab txiv ntshai li cas?
3 Nploxom niam thiab txiv ntshai tsam nws tsis tau paub tab txaus. Nkawd tsis paub xyov Nploxom puas to taub tias ua kevcai raus dej yog li cas tiag. Yuav ua li cas cov niam txiv thiaj paub tias lawv tus menyuam twb npaj txij muab nws tus kheej cob rau Yehauvas lawm?
4. Niaj hnub no, Yexus cov lus sam hwm hauv Mathai 28:19, 20 pab tau cov niam txiv li cas?
4 Nyeem Mathai 28:19, 20. Phau Vajlugkub tsis qhia tias yuav tsum muaj pes tsawg xyoo thiaj ua tau kevcai raus dej. Tiamsis zoo rau cov niam txiv xav zoo zoo seb qhov uas coj tibneeg los ua thwjtim yog txhais li cas tiag. Cov lus Kili hauv Mathai 28:19 uas hais tias, “coj . . . neeg los ua kuv li thwjtim” txhais tias thaum peb qhia Vajlugkub rau ib tug twg, peb lub hom phiaj yog kom lawv los ua ib tug txawj kawm Vajlugkub lossis ib tug thwjtim. Ib tug thwjtim yog ib tug uas tau kawm tej uas Yexus qhia thiab xav ua raws li nws hais. Tsis tsim nyog muab menyuam mos liab ua kevcai raus dej. Txawm li ntawd los, txij thaum menyuam yug los, cov niam txiv lub hom phiaj yuav tsum yog los pab kom menyuam muab nws tus kheej cob rau Yehauvas thiab los ua Khetos ib tug thwjtim. Phau Vajlugkub hais tias cov menyuam yaus los kuj nkag siab tau thiab nyiam qhov tseeb hauv phau Vajlugkub.
5. Raws li phau Vajlugkub qhia, vim li cas peb thiaj paub tias thaum Timaute ua kevcai raus dej nws tseem hluas?
5 Timaute yog ib tug thwjtim uas thaum tseem hluas tau txiav txim siab los teev tiam Yehauvas. Tus tubtxib Povlauj hais tias “txij thaum yau los” Timaute twb pib kawm qhov tseeb hauv phau Vajlugkub lawm. Timaute txiv tsis teev tiam Yehauvas tiamsis nws niam thiab niam tais yog 2 tug uas pab kom nws nyiam Vajtswv Txojlus. Vim li no, Timaute thiaj muaj kev ntseeg loj heev thiab thaum nws tiav nraug, nws tau tuav haujlwm zoo heev hauv lub koom txoos.—Tubtxib Tes Haujlwm 16:1-3; 2 Timaute 1:5; 3:14, 15.
6. Cov niam txiv uas thoob tsib yuav pab lawv cov menyuam li cas?
6 Menyuam ib tug yeej txawv ib tug. Tsis yog txhua tus yuav paub tab sai ib yam. Tej txhia menyuam nkag siab qhov tseeb, txawj txiav txim siab zoo, thiab xav ua kevcai raus dej thaum lawv tseem yau heev. Lwm cov hlob zog lawv mam li npaj txhij ua kevcai raus dej. Cov niam txiv uas thoob tsib yuav tsis yuam lawv tus menyuam ua kevcai raus dej, tiamsis yuav pab kom nws txojkev ntseeg loj hlob zuj zus. Cov niam txiv zoo siab heev thaum lawv tus menyuam ua raws li Paj Lug 27:11 hais. (Nyeem.) Tiamsis lawv yuav tau nco ntsoov tias lawv lub hom phiaj yog pab menyuam los ua Yexus ib tug thwjtim. Zoo rau lawv xav txog qhov no: ‘Kuv tus menyuam puas paub tias Vajtswv Yehauvas yog leejtwg tiag nws thiaj xav muab nws tus kheej cob rau Yehauvas thiab ua kevcai raus dej?’
KUV TUS MENYUAM PUAS TAU PAUB TXAUS?
7. Puas yog ib tug yuav tsum paub txhij paub txhua txog tej uas phau Vajlugkub qhia thiaj ua tau kevcai raus dej? Piav seb.
Tom qab ua kevcai raus dej tas, txhua tus thwjtim yuav tau kawm ntxiv kom paub Vajtswv zuj zus
7 Cov niam txiv qhia lawv cov menyuam vim lawv xav pab kom menyuam paub qhov tseeb zoo. Tej uas lawv kawm yuav pab kom menyuam muab lawv tus kheej cob rau Vajtswv. Tiamsis tsis tas menyuam yuav paub txhij paub txhua txog tej uas phau Vajlugkub qhia ua ntej nws muab nws tus kheej cob rau Yehauvas thiab ua kevcai raus dej. Tom qab ua kevcai raus dej tas, txhua tus thwjtim yuav tau kawm ntxiv kom paub Vajtswv zuj zus. (Nyeem Khaulauxi 1:9, 10) Ua li, ua ntej ib tug ua kevcai raus dej, nws yuav tsum paub npaum li cas?
8, 9. Tau muaj li cas rau tus zov tsev lojfaj hauv Filipi thiab zaj no pab tau peb li cas?
8 Ib tse neeg txheej thaum ub tso tau ib tug qauv zoo rau cov niam txiv niaj hnub nimno. (Tubtxib Tes Haujlwm 16:25-33) Xyoo 50, thaum Povlauj mus tshaj tawm txoj xov zoo zaum 2, nws mus rau lub moos Filipi. Hauv lub moos ntawd, Povlauj thiab Xila raug iab hiam, raug ntes, thiab raug kaw hauv tsev lojfaj. Thaum ib tag hmo, txawm muaj av qeeg loj heev txhua lub qhov rooj txawm qheb tag huvsi. Tus uas zov tsev lojfaj xav tias cov uas raug kaw khiav tag lawm nws txawm rho kiag ntaj yuav tua nws tus kheej. Tiamsis Povlauj hais kom nws txhob ua li ntawd. Tom qab ntawd, Povlauj thiab Xila nkawd thiaj qhia qhov tseeb txog Yexus rau nws thiab nws tsev neeg. Lawv ntseeg txhua yam uas nkawd qhia thiab pom tias tseem ceeb heev rau lawv ua li Yexus tau sam hwm. Lawv thiaj tsis ncua sijhawm ua kevcai raus dej. Zaj no pab tau peb li cas?
9 Tej zaum tus uas zov tsev lojfaj yog Loos ib tug qub tub rog. Nws tsis paub Vajtswv Txojlus. Yog li, yuav kom nws los ua tau ib tug Khixatia, nws yuav tsum kawm tej ntsiab lus yoojyim hauv phau Vajlugkub, nkag siab tej uas Yehauvas lub siab nyiam, thiab muaj lub siab xav ua li Yexus tej lus qhia tiag. Tej uas nws kawm hmo ntawd, ua rau nws lub siab kub lug xav ua kevcai raus dej. Tiamsis tom qab nws ua kevcai raus dej tas, nws yuav tau rau siab ntso kawm ntxiv thiab. Yog li, thaum koj tus menyuam hais rau koj tias nws xav ua kevcai raus dej vim nws hlub Yehauvas thiab xav ua haum Nws siab, koj yuav ua li cas? Tej zaum koj kuj cia nws nrog cov txwj laus tham seb nws puas tau npaj txhij ua kevcai raus dej lawm. * (Saib cov lus hauv qab taw qhia.) Nws yeej yuav kawm ntxiv txog Yehauvas mus ib txhis li, ib yam li txhua tus Khixatia uas tau ua kevcai raus dej.—Loos 11:33, 34.
KUV TUS MENYUAM YUAV KAWM DABTSI THIAJ ZOO?
10, 11. (1) Ib txhia niam txiv xav li cas? (2) Dabtsi thiaj yuav tiv thaiv tau menyuam?
10 Cov niam txiv ib txhia xav tias yuav zoo dua yog nkawd tus menyuam mus kawm ntawv qeb siab thiab tau haujlwm zoo tso mam li ua kevcai raus dej. Cov niam txiv no yeej xav kom lawv cov menyuam vam meej xwb, tiamsis lawv yuav tsum xav txog cov lus nug no: ‘Dabtsi thiaj yuav pab kuv tus menyuam ua lub neej vam meej tiag? Phau Vajlugkub puas txhawb kom peb ua tej no? Yehauvas xav kom peb siv peb lub neej li cas?’—Nyeem Laj Lim Tswvyim 12:1.
11 Tseem ceeb heev rau peb nco ntsoov tias txhua yam hauv lub qab ntuj no tawm tsam tej uas Yehauvas lub siab nyiam thiab nws txojkev xav. (Yakaunpau 4:7, 8; 1 Yauhas 2:15-17; 5:19) Menyuam yuav tsum muaj kev sib raug zoo nrog Yehauvas thiaj tiv thaiv tau lawv ntawm Xatas, lub qab ntuj no, thiab lub qab ntuj txojkev xav. Yog cov niam txiv muab kev kawm ntawv qeb siab thiab haujlwm tso ua ntej ces menyuam yuav xav tias tej uas nyob hauv lub qab ntuj no tseem ceeb dua txojkev sib raug zoo nrog Yehauvas. Thaum menyuam xav li no lawd, yuav pab tsis tau lawv. Cov niam txiv uas hlub lawv tej menyuam yuav tsis cia lub qab ntuj no qhia menyuam tias dabtsi thiaj pab tau lawv vam meej. Qhov uas muab Yehauvas tso ua ntej hauv peb lub neej thiaj yog tib qho uas yuav pab kom peb muaj lub neej vam meej thiab muaj kev kaj siab xwb.—Nyeem Ntawv Nkauj 1:2, 3.
YOG KUV TUS MENYUAM UA TXHAUM NE?
12. Vim li cas ib txhia niam txiv thiaj tos kom menyuam laus zog tso mam cia ua kevcai raus dej?
12 Muaj ib leej niam tsis kam nws tus ntxhais ua kevcai raus dej. Vim li cas? Nws piav tias: “Kuv txaj muag qhia tias twb yog tim kuv ntshai tsam muaj ib hnub kuv tus ntxhais ho raug rho tawm hauv lub koom txoos mus.” Cov niam txiv coob tus kuj xav ib yam li tus muam no thiab. Lawv ntshai tsam menyuam ho mus ua tau yuam kev, lawv thiaj tos kom menyuam laus zog tso mam cia ua kevcai raus Chiv Keeb 8:21; Paj Lug 22:15) Cov niam txiv zoo li no xav tias yog menyuam tsis tau ua kevcai raus dej ces nws thiaj tsis raug rho tawm. Tiamsis vim li cas qhov uas lawv xav no yuam kev lawm?—Yakaunpau 1:22.
dej. (13. Yog ib tug uas tsis tau ua kevcai raus dej ua txhaum loj, Yehauvas puas suav txim rau nws? Piav seb.
13 Cov niam txiv yeej tsis cia menyuam ua kevcai raus dej yog nws tsis tau npaj txhij muab nws tus kheej cob rau Yehauvas. Tiamsis lawv yuav tsum tsis txhob xav tias yog menyuam tsis tau ua kevcai raus dej ces nws ua txhaum los Yehauvas yuav tsis suav txim rau nws. Yog tus menyuam twb paub tej uas Yehauvas nyiam thiab tsis nyiam lawd, nws yuav tau ris nws lub nra. (Nyeem Yakaunpau 4:17.) Cov niam txiv uas txawj xav yuav tsis txwv menyuam kom txhob ua kevcai raus dej tiamsis lawv yuav ua ib tug qauv zoo rau menyuam xyaum. Thaum menyuam tseem me, lawv yeej qhia kom menyuam paub nyiam tej uas Yehauvas nyiam thiab ntxub tej uas Yehauvas ntxub. (Luka 6:40) Thaum tus menyuam hlub Yehauvas lawd, nws yuav xav ua raws li Yehauvas siab nyiam. Qhov no yuav tiv thaiv tau nws tsis kam mus ua txhaum loj.—Yaxaya 35:8.
LWM TUS PAB TAU
14. Cov txwj laus pab tau cov niam txiv li cas?
14 Thaum cov txwj laus nrog menyuam tham txog tej hom phiaj ua Yehauvas tes haujlwm, yeej pab tau cov niam cov txiv lawm ntau. Ib tug muam tseem nco txog thaum nws muaj 6 xyoo es Kwvtij Laxaum (Russell) siv sijhawm nrog nws tham. Nws hais tias, “Nws siv 15 feeb los nrog kuv tham txog kuv tej hom phiaj ua Yehauvas tes haujlwm.” Qhov no pab tau tus muam li cas? Thaum nws loj hlob, nws thiaj mus ua ib tug tho kev. Nws tho kev tau tshaj li 70 lub xyoos! Peb pom tseeb tias tej lus uas peb hais rau menyuam yeej txhawb tau lawv mus tas lawv sim neej. (Paj Lug 25:11) Cov txwj laus kuj caw tau cov niam txiv thiab lawv cov menyuam mus pab ua haujlwm tom Tsev Nceeg Vaj es cia menyuam ua tej haujlwm uas lawv ua tau.
15. Lwm cov hauv lub koom txoos pab tau cov menyuam li cas?
Ntawv Nkauj 35:18.
15 Lwm cov hauv lub koom txoos kuj pab tau li cas thiab? Lawv siv tau sijhawm los txhawb cov menyuam. Thaum ib tug menyuam tsa tes teb lossis cev ib zaj lus tom kev sib txoos, koj puas nrhiav sijhawm mus qhuas nws? Thaum ib tug menyuam qhia Vajlugkub tom tsev kawm ntawv lossis raug sim es nws txiav txim siab tau zoo, koj puas txhawb nws lub zog? Zoo rau peb mus nrog cov menyuam tham ua ntej thiab tom qab txhua txojkev sib txoos. Yog peb ua li no, cov menyuam yuav pom tias lawv kuj muaj nqes thaum ib “tsoom zeej sawvdaws tuaj txoos ua ke.”—PAB MENYUAM LOS UA KEVCAI RAUS DEJ
16, 17. (1) Vim li cas thiaj tseem ceeb heev rau menyuam ua kevcai raus dej? (2) Cov niam txiv yuav ua li cas thiaj muaj kev zoo siab xyiv fab? (Saib daim duab ntawm sab 9.)
16 Cov niam txiv muaj tes haujlwm los qhuab qhia menyuam kom paub hlub Yehauvas. Qhov no yog ib tes haujlwm zoo tshaj plaws li. (Ntawv Nkauj 127:3; Efexau 6:4) Vim haiv neeg Yixayee yog ib haiv uas twb muab cob rau Yehauvas lawm, tsis tas muab lawv tej menyuam cob rau Yehauvas ntxiv. Tiamsis nimno tsis zoo li ntawd. Txawm tej niam txiv Khixatia hlub Yehauvas los, tsis yog lawv cov menyuam yuav cia li loj hlob los hlub Yehauvas thiab. Yog li ntawd, txij hnub uas yug tau menyuam los, cov niam txiv yuav tsum pab menyuam muab nws tus kheej cob rau Vajtswv thiab ua kevcai raus dej los ua Yexus ib tug thwjtim. Puas yuav muaj dabtsi tseem ceeb tshaj qhov no lawm thiab? Tsis muaj. Rau qhov thaum txog lub sijhawm ceeblaj txom nyem loj kawg li, cov uas muab lawv tus kheej cob rau Yehauvas, ua kevcai raus dej, thiab rau siab ntso teev tiam Yehauvas thiaj yuav dim.—Mathai 24:13.
Cov niam txiv lub hom phiaj yuav tsum yog los pab lawv cov menyuam ua Yexus ib tug thwjtim (Saib nqe 16, 17)
17 Thaum Nploxom Npalas xav ua kevcai raus dej, nws niam thiab txiv ua tib zoo saib seb nws puas tau npaj txhij lawm tiag. Thaum nkawd pom tias nws yeej tsim nyog ua kevcai raus dej lawm, nkawd thiaj cuab nws lub zog. Nploxom piav tias hmo ua ntej nws ua kevcai raus dej, nws txiv tau ua li cas. Nws hais tias: “Kuv txiv hais kom peb sawvdaws txhos caug ces nws mam thov Vajtswv. Nws thov Yehauvas tias nws zoo siab kawg li uas nws tus me ntxhais tau txiav txim siab muab nws tus kheej cob rau Nws lawm.” Tom qab 60 lub xyoos, Nploxom hais tias: “Am tsis, kuj yeej yuav nco ntsoov hmo ntawd mus ib txhis li hod!” Cov niam txiv, nej yuav zoo siab xyiv fab thiab txaus siab heev thaum nej pom nej cov menyuam muab lawv tus kheej cob rau Yehauvas thiab ua kevcai raus dej.
^ nqe 9 Cov niam txiv siv tau phau ntawv Questions Young People Ask—Answers That Work, Volume 2, sab 304-310 los nrog lawv tus menyuam tham. Mus saib lub ntsiab me “Tej Lus Nug Uas Peb Muaj” hauv phau Tes Num Rau Lub Nceeg Vaj, lub 4 Hlis xyoo 2011, sab 2 ua lus Askiv.