1. (1) Yetha thiab Hana nkawd zoo sib xws li cas? (Saib daim duab ntawm sab no.) (2) Hauv zaj no peb yuav teb 2 lo lus nug twg?

YETHA yog ib tug thawj coj thiab ib tug tub rog uas siab loj siab tuab. Hana yog ib tug niam tsev txo hwjchim kawg li uas txhawb nqa nws tus txiv. Txawm nkawd zoo tsis sib thooj los, nkawd ob leeg puavleej teev tiam Yehauvas. Tsis tas li ntawd xwb, nkawd ua raws nkaus li tej uas nkawd tau fiv. Niaj hnub nimno zoo rau peb txhua tus xyaum coj li nkawd, es ua raws li tej uas peb tau cog tseg thiab. Hauv zaj no peb yuav teb 2 lo lus nug no: Thaum peb cog lus rau Yehauvas, puas tsim nyog peb ua raws li peb tau cog? Peb yuav xyaum Yetha thiab Hana nkawd li cas?

2, 3. Phau Vajlugkub qhia li cas txog tej lus uas peb cog tseg rau Vajtswv?

² Hauv phau Vajlugkub, tus yuav cog lus li cas los muaj. Ib txhia fiv rau Yehauvas tias lawv yuav muab ib yam dabtsi pub rau nws. Ib co kuj cog lus tias lawv yuav ua ib tes haujlwm rau Yehauvas. Muaj dua cov ho cog lus tias lawv yuav caiv ub caiv  no. Tej lawv cog tseg no tsis yog lwm tus yuam lawv, tiamsis yog lawv yeem lawv xwb. Thaum ib tug twg tau cog lus li cas lawd, Vajtswv xav kom nws ua raws li nws tau cog tseg. Vim li cas? Vim phau Vajlugkub qhia tias tej lus fiv thiab tej lus cog tseg yeej hnyav npaum li tej lus twv. (Chiv Keeb 14:22, 23; Henplais 6:16, 17) Phau Vajlugkub qhia li cas ntxiv txog tej uas peb cog tseg rau Vajtswv?

³ Mauxe Txoj Kevcai qhia tias yog leejtwg tau cog lus rau Yehauvas lawm, “nws yuav tsum ua raws li nws lub qhov ncauj tau hais lawd huvsi.” (Xwm Txheej Taug Kev 30:2) Tom qab no Xalaumoo kuj hais tias: “Thaum koj fiv li cas rau Vajtswv, koj tsis txhob cia ntev li pauj, rau qhov Vajtswv tsis txaus siab rau cov uas tsis thoob tsib. Koj cia li pauj raws li koj fiv.” (Laj Lim Tswvyim 5:4) Yexus kuj qhia li no thiab: “Nej twb hnov tej lus uas qhia rau cov neeg thaum ub hais tias, ‘Tsis txhob rhuav tej lus uas nej twv lawm, nej yuav tsum ua raws li tej lus uas nej twv rau [Yehauvas].’”—Mathai 5:33.

4. (1) Yog peb cog lus rau Vajtswv lawd, peb yuav tau ua li cas? (2) Peb yuav kawm dabtsi ntxiv txog Yetha thiab Hana nkawd?

⁴ Raws li peb tau kawm, peb yuav tsum ua txhua yam raws li peb tsa ncauj hais rau Yehauvas. Yog peb ua raws li peb tau cog tseg ces Yehauvas yuav zoo siab heev. Tiamsis yog peb thim peb cov lus cog tseg ces nws yuav tsis txaus siab rau peb. Peb paub li ntawd rau qhov Davi nug tias: “Leejtwg yuav nce mus rau saum [Yehauvas] lub roob? Thiab leejtwg yuav sawv rau hauv nws lub chaw dawb huv?” Davi thiaj teb tias Yehauvas tos txais cov uas “tsis cog lus dag” xwb. (Ntawv Nkauj 24:3, 4) Ua li, Yetha thiab Hana nkawd tau fiv li cas rau Yehauvas? Puas yoojyim rau nkawd ua raws li nkawd tau fiv? Cia peb kawm txog qhov ntawd.

5. Yetha tau fiv li cas rau Yehauvas thiab thaum kawg tau muaj li cas?

⁵ Thaum Yetha mus ntaus cov Asmoo, uas ua yeeb ncuab rau Vajtswv haiv neeg, nws thov Yehauvas kom pab nws ntaus yeej. (Cov Thawj 10:7-9) Yetha fiv li no: “Yog koj muab cov Asmoo rau hauv kuv txhais tes lawm, mas leejtwg uas tawm hauv kuv lub qhov rooj tuaj tos kuv rau thaum kuv kov yeej cov Asmoo rov qab los, tus ntawd yuav muab ua [Yehauvas] li.” Vajtswv thiaj pab Yetha ntaus yeej cov Asmoo raws li nws tau thov lawm tiag. Thaum Yetha mus txog tsev, ua ciav nws tus ntxhais tawm tuaj tos nws. Zaum no Yetha yuav tau muab nws tus ntxhais pub rau Yehauvas tiag. (Cov Thawj 11:30-34) Yetha tus ntxhais lub neej yuav zoo li cas xwb?

6. (1) Puas yoojyim rau Yetha thiab nws tus ntxhais ua raws li tej uas nws tau fiv? (2) Kevcai 23:21, 23 thiab Ntawv Nkauj 15:4 qhia li cas txog tej lus cog tseg?

⁶ Yetha yuav tau tso nws tus ntxhais mus ua haujlwm puv ntoob hauv Yehauvas lub tsev ntaub. Puas yog Yetha tsis xav tom ntej tom qab mam fiv, es nws thiaj fiv yuam kev lawd? Tsis yog. Yetha yeej paub tias tej zaum nws tus ntxhais yuav yog tus uas xub tawm tuaj tos nws. Puas yoojyim rau Yetha ua raws li nws tau fiv? Yeej tsis yoojyim li. Phau Vajlugkub hais tias thaum Yetha pom dheev nws tus ntxhais, mob nws siab heev nws txawm muab nws lub tsho dua rhe. Kuj nyuaj heev rau Yetha tus ntxhais thiab. Thaum Yetha qhia nws tus  ntxhais txog nws tej lus cog tseg, nws tus ntxhais thiaj tawm mus “quaj ntsuag txog nws txojkev ua ntxhais nkauj xwb.” Ua cas nws ho quaj? Nws quaj rau qhov nws txiv tsuas muaj nws tib leeg xwb. Nimno nws yuav tau mus ua haujlwm hauv Yehauvas lub tsev ntaub mus tag nws lub neej. Nws kuj yuav tsis tau txiv. Yog li ntawd, nws yuav tsis nrog luag muaj tub ki los ris nws txiv lub npe. Txawm li ntawd los, Yetha thiab nws tus ntxhais tsis xam pom nkawd tus kheej xwb. Yetha hais tias: “Kuv tau tsa ncauj fiv rau [Yehauvas] lawm, yuav thim tsis tau tej lus ntawd.” Nws tus ntxhais thiaj teb tias: “Cia li ua rau kuv raws li koj cog lus ntawd.” (Cov Thawj 11:35-39) Yetha thiab nws tus ntxhais yeej muab siab npuab Yehauvas heev. Txawm nyuaj npaum li cas los, nkawd yeej tsis kam hla tej lus uas Yetha fiv rau Yehauvas lawd.—Nyeem Kevcai 23:21, 23; Ntawv Nkauj 15:4.

7. (1) Hana raug kev nyuaj siab li cas? (2) Hana tau fiv li cas rau Yehauvas thiab thaum kawg tau muaj li cas? (3) Raws li Hana tej lus cog tseg, Xamuyee yuav ua lub neej zoo li cas? (Saib cov lus hauv qab taw qhia.)

⁷ Hana nyuaj siab heev vim nws xeeb tsis taus tub. Tsis tas li ntawd xwb, “Penina uas nrog Hana sib txeeb txiv pheej zes Hana ua rau nws chim” heev. (1 Xamuyee 1:4-7, 10, 16) Hana thiaj qhia tag nrho nws tej kev nyuaj siab rau Yehauvas thiab fiv lus rau Yehauvas li no: “Au [Yehauvas] uas muaj hwjchim loj kawg nkaus, yog koj tsa qhov muag saib txog kuv uas yog koj tus nkauj qhev txojkev txom nyem nyuaj siab, thiab nco txog kuv thiab pheej nco ntsoov kuv uas yog koj tus nkauj qhev es pub ib tug tub rau kuv, mas kuv yuav pub nws rov rau [Yehauvas] tag nws sim neej thiab tsis kheev rab chais nphav nws taubhau kiag li.” * (Saib cov lus hauv qab taw qhia.) (1 Xamuyee 1:11) Yehauvas mloog Hana tej lus thov. Xyoo tom qab nws thiaj yug tau ib tug metub. Nws muab tus metub tis npe hu ua Xamuyee. Hana zoo siab tshaj plaws li! Nws yeej nco ntsoov tej lus uas nws tau fiv rau Yehauvas. Nws thiaj hais tias Xamuyee ‘yog nws thov tau ntawm Vajtswv’ los.—1 Xamuyee 1:20.

8. (1) Puas yoojyim rau Hana tso Xamuyee mus? (2) Davi cov lus hauv Ntawv Nkauj 61 puas ua rau koj xav txog Hana tus qauv?

⁸ Thaum Xamuyee muaj 3 xyoos, Hana thiaj coj Xamuyee mus nrog tus Pov Thawj Hlob Eli nyob tom lub tsev ntaub hauv Silau. Hana hais tias: “Kuv thov kom tau tus menyuam no, mas [Yehauvas] pub raws li kuv tej lus thov rau kuv. Vim li no kuv thiaj muab nws qev rau [Yehauvas], muab nws pub rau [Yehauvas] tag nws sim neej.” (1 Xamuyee 1:24-28) Txij hnub ntawd mus Xamuyee thiaj nrog Eli nyob lawm. Phau Vajlugkub hais tias: “Tus metub Xamuyee kuj hlob zoo rau ntawm [Yehauvas] lub xubntiag.” (1 Xamuyee 2:21) Hana hlub Xamuyee tshaj plaws li, yeej tsis yoojyim rau nws tso Xamuyee mus. Nimno nws yuav tsis tau nrog nws tus metub nyob ua ke li qub lawm. Nws tsis paub xyov nws tus metub yuav nyob li cas noj li cas. Txawm li ntawd los, Hana ua raws nraim li tej lus uas nws tau fiv rau Yehauvas. Nws muab Yehauvas saib hlob dua tej uas nws lub siab ntshaw.—1 Xamuyee 2:1, 2; nyeem Ntawv Nkauj 61:1, 5, 8.

9. Peb yuav kawm ntxiv txog 2 lo lus nug twg?

⁹ Ob tug qauv no qhia meej tias peb  yuav tsum ua raws li tej lus uas peb tau cog tseg rau Yehauvas. Cia peb ho mus kawm txog 2 lo lus nug no: Niaj hnub no, peb ib txhia tau cog lus li cas rau Yehauvas? Puas tsim nyog peb ua raws li peb tau cog tseg ntawd?

10. (1) Lo lus cog tseg twg yog lo tseem ceeb dua ntais? (2) Tus uas cog lus li ntawd tau lees coj lub neej zoo li cas?

¹⁰ Cov Khixatia yeej thov Vajtswv Yehauvas thiab cog lus rau nws tias txawm lawv lub neej yuav zoo li cas los, lawv yuav teev tiam nws mus li. Lo lus cog tseg no yog ib los uas tseem ceeb heev. Yexus hais tias thaum peb cog lus li ntawd ces twb yog peb lees tias peb yuav ‘tswj peb tus kheej’ thiab muab Yehauvas saib hlob dua tej uas peb lub siab ntshaw. (Mathai 16:24) Hnub uas peb cob peb lub neej rau Yehauvas thiab ua kevcai raus dej, “peb yeej yog [Yehauvas] li” lawm. (Loos 14:8) Peb yuav tsum ua li peb tau cog lus tseg, es coj li tus sau nkauj tau hais no: “Kuv yuav muab dabtsi rau [Yehauvas] pauj qhov uas nws ua zoo ntau kawg rau kuv? Kuv yuav pauj tej uas kuv yeem lus tseg rau [Yehauvas], tab meeg nws haiv neeg sawvdaws.”—Ntawv Nkauj 116:12, 14.

11. Hnub uas koj ua kevcai raus dej, koj tau lees li cas?

 ¹¹ Koj puas tau muab koj lub neej cob rau Yehauvas thiab ua kevcai raus dej? Yog ib qho zoo heev uas koj twb ua lawd! Koj puas nco qab zaj lus qhia rau hnub uas koj ua kevcai raus dej? Koj puas nco qab thaum tus kwvtij nug li no: “Koj puas to taub tias qhov uas koj muab koj tus kheej cob rau Yehauvas thiab ua kevcai raus dej, qhia tias koj yog Yehauvas ib tug Timkhawv?” Thaum koj teb lo lus no tab meeg sawvdaws ces twb yog koj qhia tias koj tau muab koj lub neej cob rau Yehauvas lawm. Kuj qhia tias koj ua tau kevcai raus dej los ua Yehauvas ib tug Timkhawv lawm. Hnub ntawd, koj yeej ua rau Yehauvas xyiv fab tshaj plaws li!

12. (1) Peb yuav tsum xav txog cov lus nug twg? (2) Yuav kom peb muaj lub siab kub lug, peb yuav tsum ua li cas?

¹² Thaum koj ua kevcai raus dej twb yog koj cog lus tias koj muab koj lub neej los ua Yehauvas tes haujlwm. Koj yuav ua txhua yam raws li nws tej kevcai. Thaum ib tug neeg ua kevcai raus dej, zoo ib yam li nws nyuam qhuav pib taug txojkev uas Yehauvas taw qhia xwb. Tom qab peb raus dej tas lawd, peb yuav tsum tshuaj ntshis peb lub siab. Xav txog cov lus nug no: ‘Txij thaum kuv raus dej los, kuv puas hajyam nrog Yehauvas sib raug zoo ntxiv? Kuv puas tseem teev tiam Yehauvas kawg kuv lub siab? (Khaulauxi 3:23) Kuv puas thov Yehauvas tsis tseg? Kuv puas nyeem phau Vajlugkub txhua hnub? Kuv puas mus kev sib txoos tsis tu ncua? Kuv puas kub siab mus tshaj tawm tsis tseg?’ Tus tubtxib Petus ceeb toom tias yog peb tsis ceev faj ces peb yuav qaug zog thiab tso Yehauvas tes haujlwm tseg. Yuav kom peb muaj lub siab kub lug ua Yehauvas tes haujlwm, peb yuav tsum tuav kev ntseeg ruaj nreeg, kawm Vajtswv Txojlus kom paub ntau ntxiv, ua siab ntev thev, hwm thiab muab siab npuab Vajtswv.—Nyeem 2 Petus 1:5-8.

13. Cov uas twb muab lawv tus kheej cob rau Yehauvas lawd puas thim tau lawv tej lus cog tseg?

¹³ Thaum peb cog lus tias peb yuav teev tiam Yehauvas, peb thim tsis tau peb cov lus lawm. Tej zaum muaj tej tug Khixatia tsis xav teev tiam Yehauvas lawm, nws thiaj ua txuj hais tias nws tsis tau muab nws tus kheej cob rau Yehauvas. Nws kuj hais tias nws maj ua kevcai raus dej zog lawm. Tiamsis ua tsis tau li ntawd. * (Saib cov lus hauv qab taw qhia.) Hnub uas nws ua kevcai raus dej, nws twb lees muab nws tus kheej cob rau Yehauvas lawm. Yog li ntawd, yog nws tseem mus ua ib qho txhaum loj ces nws yuav tau ris lub txim tab meeg Yehauvas thiab lub koom txoos. (Loos 14:12) Cia peb tsis txhob ua li cov uas Yexus hais no: “Koj muab txojkev hlub uas koj muaj thaum chiv thawj tso tseg lawm.” Tiamsis cia peb xyaum pawg ntseeg uas Yexus hais no: “Kuv paub koj tes haujlwm thiab paub koj kev hlub, kev ntseeg, kev ua num rau luag thiab qhov uas ua siab ntev thev, thiab paub tias tej haujlwm uas koj ua thaum kawg no zoo dua thaum chiv thawj.” (Qhia Tshwm 2:4, 19) Yog li ntawd, cia peb ua raws li peb tau cog lus rau Yehauvas nws thiaj txaus siab rau peb.

14. Lo lus cog tseg twg kuj tseem ceeb kawg li thiab yog vim li cas?

¹⁴ Thaum ib tug txivneej thiab ib tug pojniam yuav sib sau ua neej, nkawd yeej cog lus tias nkawd yuav sib hlub mus li. Lo lus cog tseg no kuj tseem ceeb kawg li thiab. Yehauvas xav kom nkawd ua raws li nkawd tau cog tseg. Hauv ntau lub tebchaws thaum txis tshoob, tus nkauj nyab nraug vauv sib cog lus tias nkawd ib leeg yuav hlub ib leeg thiab sib hwm raws li Vajtswv txoj kevcai uas tau tsa rau cov txij nkawm. Nkawd hais cov lus no tab meeg Yehauvas thiab tibneeg huvsi. Tsis yog txhua rooj tshoob yuav qog tib co lus no. Txawm li ntawd los, txhua tus nkauj nyab nraug vauv yeej yeem sib sau ua neej tab meeg Vajtswv ib yam nkaus. Tom qab ua tshoob tas, nkawd yeej yog txij nkawm lawm, nkawd yuav tsum sib yuav mus li. (Chiv Keeb 2:24; 1 Khaulee 7:39) Yexus hais tias: “Yam uas Vajtswv muab lo tsheej xeeb ua ke lawm, neeg tsis txhob muab ua kom ncaim.” Yog li ntawd, tsis zoo rau ob niam txiv xav tias yog tsis sib hlub ces muab nrauj tseg los tau.—Malakau 10:9.

15. Coob leej ntau tus xav li cas txog kev txij nkawm, tiamsis cov Khixatia xav txawv li cas?

¹⁵ Peb sawvdaws puavleej yog neeg txhaum, yog li ntawd tsis muaj ib nkawm niam txiv uas yuav coj tau zoo tas zog. Phau Vajlugkub thiaj hais tias cov txij nkawm yuav “muaj kev ntxhov siab.” (1 Khaulee 7:28) Niaj hnub no coob leej ntau tus thiaj xav tau tias lam sib sau ib ntus tsis zoo mam sib nrauj. Tiamsis cov Khixatia tsis xav li ntawd vim lawv paub tias hnub txis tshoob twb yog hnub uas lawv sib cog lus tab meeg Vajtswv ntag. Yog li, cov txij nkawm yuav tsum coj raws li lawv tau cog tseg. Yog lawv muab lawv tej lus cog tseg rhuav kuj zoo ib yam li lawv cog lus dag xwb. Vajtswv ntxub cov uas hais lus dag. (Levi Tej Kevcai 19:12; Paj Lug 6:16-19) Cov txij nkawm yuav tsum nco ntsoov Povlauj cov lus no: “Koj tseem nrog koj tus pojniam nyob lov? Tsis txhob nrhiav kev muab nws tso tseg.” (1 Khaulee 7:27) Povlauj qhia li ntawd rau qhov nws paub tias Yehauvas ntxub cov uas txhob txwm muab lawv tus txij nkawm nrauj tseg.—Malakhi 2:13-16.

16. Phau Vajlugkub qhia li cas txog kev sib nrauj thiab sib cais?

¹⁶ Vajtswv Txojlus puas tso cai rau tej txij nkawm sib nrauj? Yexus qhia tias Vajtswv Txojlus tsuas tso cai sib nrauj yog tias yus tus txij nkawm mus ua nkauj ua nraug, es yus tsis zam txim rau nws. (Mathai 19:9; Henplais 13:4) Ua li, kev sib cais ne? Phau Vajlugkub kuj qhia txog qhov no thiab. (Nyeem 1 Khaulee 7:10, 11.) Phau Vajlugkub tsis qhia ntxaws ntxaws tias yuav tsum muaj li cas cov txij nkawm thiaj sib cais tau. Tiamsis yog ob niam txiv Khixatia muaj teeb meem loj heev lawm, tej zaum nkawd sib cais los tau. Muaj tej tug pom tias lawv tus txij nkawm tau fav xeeb rau Yehauvas lossis ua nruj ua tsiv heev, tej zaum yuav txov tau lawv txojsia lossis yuav rhuav tau lawv txojkev sib raug zoo nrog Yehauvas. Vim zoo li ntawd, ib txhia thiaj sib cais lawm. * (Saib cov lus hauv qab taw qhia.)

17. Cov niam txiv yuav tsum ua li cas lawv thiaj txawj sib hlub?

¹⁷ Yog tias ob niam txiv muaj teeb meem uas yuav tsum mus cuag cov txwj laus,  zoo rau cov txwj laus nug seb nkawd puas tau saib zaj yeeb yaj kiab Askiv, What Is True Love? (Kev Hlub Zoo Li Cas Tiag?), thiab puas tau nyeem phau ntawv, Koj Tsev Neeg Yeej Nrhiav Tau Kev Zoo Siab. Zaj yeeb yaj kiab thiab phau ntawv ntawd muaj tej hauv paus ntsiab lus uas yuav pab kom nkawd txawj sib hlub. Ib nkawm niam txiv tau hais li no: “Txij thaum wb kawm phau ntawv ntawd, wb lub neej kaj siab lawm ntau.” Muaj dua ib nkawm niam txiv twb sib yuav tau 22 lub xyoos, tiamsis muaj teeb meem heev tshuav sib nrauj xwb. Thaum tus niam saib daim yeeb yaj kiab ntawd tas, nws thiaj hais tias: “Wb twb ua kevcai raus dej tas lawm, tiamsis wb ib leeg yoog tsis tau ib leeg li. Thaum daim yeeb yaj kiab tawm, ua cas yuav raug kiag wb lub neej! Nimno kuv tus txiv wb coj tau zoo dua lawm.” Tej no qhia tseeb tias yog tej txij nkawm muab Yehauvas tej hauv paus ntsiab lus los siv ua neej ces lawv yuav kaj siab thiab txawj sib hlub dua.

18, 19. (1) Tej niam txiv Khixatia tau txhawb lawv cov menyuam li cas? (2) Cov uas ua haujlwm tshwj xeeb yuav tsum coj li cas?

¹⁸ Hauv zaj no peb twb kawm txog tej lus uas Yetha thiab Hana nkawd fiv rau Yehauvas. Twb yog Yetha thiab Hana nkawd fiv lus rau Yehauvas, nkawd ob tug menyuam thiaj tau ua haujlwm tshwj xeeb rau Yehauvas. Niaj hnub no, cov niam txiv Khixatia los yeej txhawb kom lawv cov menyuam muab lawv lub neej los ua haujlwm puv ntoob rau Yehauvas. Peb txhua tus yuav tau txhawb peb cov tub ntxhais hluas kom rau siab ntso ua Yehauvas tes haujlwm.—Cov Thawj 11:40; Ntawv Nkauj 110:3.

¹⁹ Niaj hnub no muaj txog li 67,000 tus tau koom nrog Yehauvas Cov Timkhawv Cuab Kwvtij Thoob Qab Ntuj Uas Tuav Haujlwm Puv Ntoob Tshwj Xeeb. Ib txhia pab ua haujlwm hauv Npe-ee, ib txhia pab ua Tsev Nceeg Vaj, hos ib txhia ua cov uas saib xyuas thaj tsam. Muaj dua ib txhia ua cov qhia tej kev kawm, cov tho kev tshwj xeeb, cov tubtxib tshaj tawm txawv tebchaws, cov tu tej Tsev Rooj Sib Txoos, thiab cov tu tej tsev kawm Vajlugkub. Txhua tus uas nqes tes ua tej haujlwm no yuav tsum tau suam npe rau daim ntawv “Yeem Lus Ua Lub Neej Yoojyim”. Daim ntawv no yog lawv cog lus tias txawm Yehauvas yuav muab tes haujlwm zoo li cas rau lawv ua los xij, lawv yuav rau siab ntso ua thiab ua lub neej yoojyim. Tsis tas li ntawd xwb, lawv yuav tau thov cai ua ntej lawv ua ib qho haujlwm uas them nyiaj. Lub koom haum tsis muab cov uas tuav haujlwm puv ntoob saib hlob dua lwm tus, tiamsis lawv suav tias tes haujlwm yog qhov uas tshwj xeeb. Cov kwvtij nkauj muam yuav tsum txo hwjchim ua raws li daim ntawv cog tseg no rau thaum lawv tseem ua haujlwm puv ntoob tshwj xeeb.

20. Puas tsim nyog peb ua raws li peb tau cog tseg rau Yehauvas thiab yog vim li cas?

²⁰ Hauv zaj no peb twb kawm txog 3 lo lus cog tseg rau Yehauvas lawm. Tej zaum koj twb cog lus raws li peb tau kawm no lawm thiab. Cia peb ua raws li peb tej lus cog tseg. (Paj Lug 20:25) Yog peb tsis ua raws li peb tau yeem lus tseg ces Yehauvas yuav tsis txaus siab rau peb. (Laj Lim Tswvyim 5:6) Cia peb xyaum tus sau nkauj, es hu nkauj qhuas Yehauvas li no: “Kuv thiaj yuav hu nkauj qhuas koj lub npe tsis tu li, rau thaum kuv niaj hnub pauj tej uas kuv tau yeem tseg lawm.”—Ntawv Nkauj 61:8.