Tsis Muaj Ntau Los Tseem Zoo Siab
DANIEL THIAB MIRIAM sib yuav rau lub 9 Hlis xyoo 2000. Nkawd nyob hauv lub nroog Barcelona tebchaws Xapee. Daniel piav tias: “Wb kuj muaj haujlwm zoo nrog luag ua, muaj noj muaj hnav, xav mus ncig lub tebchaws twg los yeej tau. Wb tseem mus tshaj tawm txoj xov zoo tsis tu ncua thiab.” Tiamsis muaj ib hnub nkawd lub neej hloov hlo.
Thaum mus lub rooj sib txoos xyoo 2006, Daniel hnov ib zaj lus qhuab qhia uas raug siab heev. Tus kwvtij uas cev zaj lus qhia nug tias: “Koj puas ua txhua yam los pab cov ‘uas raug cab nrhaj nrhuj nrheev mus tua’ kom tau txojsia ib txhis tsis kawg?” (Paj Lug 24:11) Tus kwvtij thiaj piav tias peb tes haujlwm yog mus tshaj tawm txoj xov zoo kom pab tibneeg tau txojsia. (Tubtxib Tes Haujlwm 20:26, 27) Daniel hais tias: “Kuv mloog mas zoo li Yehauvas hais lus rau kuv ntag.” Tus kwvtij kuj tham tias yog peb siv zog ua Yehauvas tes haujlwm peb yuav zoo siab dua. Daniel paub tias yeej muaj li ntawd tiag rau qhov nws pom Miriam zoo siab heev txij thaum Miriam ua ib tug tho kev los.
Zaj lus qhuab qhia ntawd raug Daniel siab heev, nws thiaj txiav txim siab hloov nws lub neej. Nws thiaj ua haujlwm tsawg kom nws ua tau ib tug tho kev. Nws kuj xav tias ntshe Miriam nkawd yuav zoo siab dua yog nkawd mus tshaj tawm rau tej koog uas tsis muaj cov tshaj tawm coob.
THAUM KAWG MUAJ XOV ZOO HEEV
Lub 5 Hlis xyoo 2007, Daniel thiab Miriam nkawd thiaj tso haujlwm tseg khiav mus nyob tebchaws Panama uas nkawd tau mus xyuas ib zaug lawm. Nkawd mus tshaj tawm rau koog povtxwv Bocas del Toro Archipelago hauv lub hiavtxwv Caribbean. Cov tibneeg feem coob yog neeg Ngabe. Hauv tebchaws Panama, Daniel nkawd xav tias nkawd cov nyiaj yuav txaus siv li 8 lub hlis.
Hauv koog povtxwv ntawd, nkawd tsuas caij nkoj thiab tsheb kauj vab xwb. Nkawd nco txog thawj zaug uas nkawd caij tsheb kauj vab nce toj roob hauv pes tau li 30 kilumev (20 mais), sov heev ua rau Daniel yuav luag tsaus muag. Txawm li ntawd los, thaum nkawd mus txog chaw, cov neeg Ngabe zoo siab tos txais nkawd. Thaum nkawd kawm tau lawv cov lus mentsis, lawv hajyam nyiam nkawd. Tsis ntev xwb, twb muaj 23 leeg nrog nkawd kawm Vajlugkub lawm.
Tom qab nkawd muab nyiaj noj tas, Daniel hais tias: “Wb nyuaj siab kawg li, xav tias cia wb rov qab mus tebchaws Xapee. Wb tsis xav tso cov uas wb kawm Vajlugkub nrog tseg li.” Ib lub hlis tom qab, nkawd hnov xov tias cov kwvtij cia nkawd ua ob tug tho kev tshwj xeeb. Miriam thiaj hais tias: “Zoo siab tshaj plaws li uas wb tsis tau rov mus Xapee!”
NKAWD TXOJKEV ZOO SIAB
Xyoo 2015 lub koom haum tau muab ntau yam hloov, Daniel nkawd thiaj tsis ua ob tug tho kev tshwj xeeb lawm. Nkawd ua li cas xwb? Nkawd ua li Ntawv Nkauj 37:5 tau hais: “Cia li muab koj txojkev rau [Yehauvas] coj, tso siab plhuav rau nws, nws yuav ua kom tiav.” Nkawd nrhiav tau haujlwm ua los pab nkawd tho kev. Nimno nkawd mus pab ib lub koom txoos hauv lub xeev Veraguas tebchaws Panama.
Daniel hais tias: “Ua ntej wb tsiv, wb tsis xav tias wb yuav tso tau lub neej hauv Xapee tseg. Tamsim no wb tsis muaj ntau tiamsis wb yeej muaj txaus noj txaus siv, tsis tu ncua ib yam dabtsi.” Qhov uas ua rau nkawd zoo siab tshaj plaws yog dabtsi? Nkawd hais tias: “Tsis muaj ib yam ua rau wb zoo siab npaum li qhov uas wb pab tibneeg los paub txog Yehauvas!”