1, 2. Thaum Povlauj thiab Xila mus rau lub moos Filipi nkawd raug dabtsi? (Saib daim duab ntawm sab no.)

POVLAUJ thiab Xila yog 2 tug tshaj tawm txawv tebchaws. Nkawd tabtom qhia txoj xov zoo hauv lub moos Filipi tiamsis nkawd txawm raug cab mus rau hauv lub tshav puam loj lawm. Cov pejxeem sau nthwv los tawm tsam nkawd, cov thawj coj teem txim tsuag tsuag, muab nkawd tej khaubncaws dua pes rhe xuas pas nplawm. Lawv coj nkawd mus kaw hauv tsev lojfaj nyob chav sab hauv thiab muab cuab xauv nkawd kotaw tibsi. (Tubtxib Tes Haujlwm 16:16-24) Tej uas Povlauj thiab Xila raug no yeej tsis ncaj. Povlauj yog neeg Loos, twb tsim nyog lawv coj nws mus hais plaub tas tso! *​—Saib cov lus hauv qab taw qhia.

² Thaum Povlauj nyob hauv tsev lojfaj tej zaum nws xav  txog tej uas nws tau ntsib hnub ntawd. Thaum nkawd mus txog lub moos Filipi, twb tsis tau muaj ib lub tsev sablaj nyob qhovtwg. Cov Yudai mus pe hawm Vajtswv sab nraum lub moos ze ntawm ntug dej xwb. (Tubtxib Tes Haujlwm 16:13, 14) Ntau lub moos uas Povlauj mus xyuas twb muaj tsev sablaj huvsi lawm, tiamsis ua li cas lub moos Filipi ho tsis muaj? Tej zaum tsis tau muaj neeg coob los coj Yudai kevcai. Lub caij ntawd, yuav tsum muaj txog li 10 leej txivneej, luag mam cia muaj lub tsev sablaj. Cov tibneeg hauv lub moos Filipi khav heev rau qhov lawv yog neeg Loos. (Tubtxib Tes Haujlwm 16:21) Lawv xav tias Povlauj thiab Xila yog neeg Yudai xwb, nkawd yeej tsis yog neeg Loos li. Txawm Povlauj thiab Xila tsis tau ua txhaum los lawv thiaj muab nkawd cab mus kaw.

3. Txawm Povlauj tsis to taub tias vim li cas nws ho raug kaw hauv tsev lojfaj los, nws coj tus cwj pwm zoo li cas xwb?

³ Tej zaum hauv tsev lojfaj Povlauj kuj xav txog lub sijhawm nws tseem nyob hauv sab Axia uas ze ntug dej Hiavtxwv Kili. Povlauj mus tshaj tawm qhovtwg los lub hwj huam dawb huv txwv nws. (Tubtxib Tes Haujlwm 16:6, 7) Ua li, nws yuav mus rau qhovtwg? Yehauvas qhia tsi ntsees rau nws tias yuav mus rau qhovtwg. Muaj ib hmos thaum nws so hauv lub moos Rhau-a, Povlauj ua yog toog pom ib tug txivneej hu nws tias: “Cia li tuaj pab peb hauv lub xeev Makhedaunia.” Povlauj thiaj sawb sim kiag mus rau lub xeev ntawd. (Nyeem Tubtxib Tes Haujlwm 16:8-10.) Tiamsis ua cas Povlauj mus txog Makhedaunia nws txawm raug kaw thiab. Tej zaum nws xav tias vim li cas Yehauvas ho cia nws raug tej xwm ntawd es thaum twg nws mam tau dim. Txawm li ntawd los, nws tseem xyiv fab hlo tuav kev ntseeg ruaj nreeg. Phau Vajlugkub qhia tias “Povlauj thiab Xila . . . thov Vajtswv thiab hu nkauj qhuas Vajtswv.” (Tubtxib Tes Haujlwm 16:25) Vajtswv thiaj pab nkawd ua siab tus.

4. Peb puas tau raug tej yam zoo li Povlauj raug thiab?

⁴ Puas tau muaj ib zaug koj ntsib tej yam zoo li Povlauj thiab? Koj twb thov Vajtswv lub hwj huam dawb huv coj koj txoj hau kev tiamsis tom qab ntawd, tsis mus raws li koj siab xav. Koj tseem raug ntau yam teeb meem thiab. (Laj Lim Tswvyim 9:12) Tej zaum koj yuav xav tias, ‘Ua cas Yehauvas ho cia tej no los raug kuv?’ Yuav ua li cas koj thiaj ua taus siab ntev thev taus thiab tso siab plhuav rau Yehauvas? Cia peb kawm ntxiv seb tej uas Povlauj thiab Xila nkawd raug pab tau peb li cas.

5. Tej uas Povlauj raug hloov sai npaum li cas?

⁵ Thaum ib tag hmo Povlauj thiab Xila nkawd tabtom hu nkauj qhuas Vajtswv, txawm muaj av qeeg loj heev. Tamsim ntawd txhua lub qhov rooj txawm qheb pes plho thiab tej saw hlau uas khi cov neeg raug txim kuj pluam tag tibsi. Thaum tus uas zov tsev lojfaj tsim dheev los nws rho hlo ntaj yuav nkaug nws tiamsis Povlauj qw tawg ntho rau nws tias: “Peb txhua tus tseem nyob ntawm no.” Thaum kawg, tus uas zov tsev lojfaj thiab nws tsev neeg kuj los ua kevcai raus dej lawm thiab. Thaum kaj ntug, cov thawj txawm hais kom muab Povlauj thiab Xila tso mus. Tiamsis thaum lawv hnov tias Povlauj nkawd yog neeg Loos, cov thawj paub tias lawv ua yuam  kev lawm. Lawv thiaj mus coj kiag nkawd tawm thiab xa nkawd mus. Thaum Povlauj nkawd mus xyuas Lidia thiab txhawb cov kwvtij hauv Filipi tas, nkawd mam tawm hauv lub moos mus kaj siab lug. (Tubtxib Tes Haujlwm 16:26-40) Povlauj yeej tsis xav tias txhua yam yuav hloov sai npaum li ntawd!

6. Peb yuav kawm txog dabtsi hauv zaj no?

⁶ Tej uas Povlauj raug qhia li cas rau peb? Qhia tias Yehauvas ua tau tej yam uas peb tsis nco ras txog li. Yog li ntawd, thaum peb ntsib kev tawm tsam peb yuav tsum ua siab tus. Povlauj nco ntsoov tej uas Yehauvas tau pab nws lawd. Puag tom qab no, Povlauj thiaj sau ntawv mus rau cov kwvtij hauv Filipi hais tias lawv yuav tsum txhob ntxhov siab tiamsis cia li muaj “Vajtswv txojkev siab tus.” Hauv zaj no peb yuav kawm txog Povlauj cov lus hauv Filipi 4:6, 7. (Nyeem.) Peb kuj yuav kawm tias Yehauvas tau pab lwm tus li cas. Thiab peb yuav kawm tias yog peb muaj “Vajtswv txojkev siab tus” peb yuav tso siab plhuav rau Yehauvas thiab nyiaj dhau tej kev tawm tsam.

7. (1) Povlauj sau ntawv mus txhawb cov kwvtij hauv Filipi li cas? (2) Povlauj cov lus txhawb tau peb li cas?

⁷ Thaum cov kwvtij hauv Filipi txais Povlauj tsab ntawv lawv xav li cas xwb? Tej zaum lawv tseem nco thaum Povlauj thiab Xila raug kaw hauv tsev lojfaj, thiab nco tej uas Yehauvas tau pab nkawd. Nimno Povlauj thiaj sau ntawv mus txhawb kom lawv txhob ntxhov siab. Lawv yuav tsum thov “Vajtswv txojkev siab tus uas ntau dhau li neeg nkag siab tau . . . tsom kwm [lawv] lub siab.” Qhov uas “ntau dhau li neeg nkag siab tau” txhais li cas? Tej phau Vajlugkub muab txhais tias “zoo tshaj qhov yus xav tau” thiab “yeej tsis muaj leejtwg yuav paub.” Povlauj qhia lawv tias “Vajtswv txojkev siab tus” zoo tshaj txhua yam uas neeg lub siab xav tau. Yog li ntawd, txawm peb tws kev los, Yehauvas yeej ua tau txhua yam. Nws ua tau tej yam uas peb tsis nco ras txog li.​—Nyeem 2 Petus 2:9.

8, 9. (1) Txawm Povlauj raug ntau yam kev tsis ncaj ncees hauv lub moos Filipi los thaum kawg pab tau cov kwvtij li cas? (2) Ua li cas cov kwvtij hauv Filipi ho ntseeg tau Povlauj cov lus?

⁸ Povlauj tsab ntawv txhawb tau cov kwvtij hauv Filipi lub zog heev. Kaum lub xyoos dhau los Yehauvas cia Povlauj thiab Xila raug kaw. Tiamsis tej uas nkawd raug “hwj xwm txoj xov zoo thiab qhia kom pom tias txoj xov zoo muaj tseeb.” (Filipi 1:7) Cov thawj hauv lub moos Filipi tsis kav ua teeb meem rau lub koom txoos Khixatia lawm. Tej zaum lawv hnov tias Povlauj yog neeg Loos, Luka thiaj tsis raug xwm dabtsi.  Thaum Povlauj thiab Xila mus lawd, Luka thiaj tau nyob hauv Filipi txhawb lub koom txoos Khixatia tshiab.

⁹ Thaum cov kwvtij hauv Filipi nyeem Povlauj tsab ntawv, lawv yeej paub tias Povlauj raug kev txom nyem los lawm. Nws raug ntau yam kev tawm tsam kev tsim txom. Thaum nws sau ntawv mus rau lub koom txoos Filipi nws tabtom raug kaw hauv lub nroog Loos thiab. Txawm Povlauj raug li ntawd los, “Vajtswv txojkev siab tus” kav rawv nws.​—Filipi 1:12-14; 4:7, 11, 22.

10, 11. (1) Thaum peb ntsib kev nyuaj siab, peb yuav tsum ua dabtsi? (2) Txawm peb raug kev nyuaj siab los Yehauvas yuav pab peb li cas?

¹⁰ Thaum ntsib kev nyuaj siab peb yuav ua li cas thiaj muaj “Vajtswv txojkev siab tus”? Povlauj hais tias peb yuav tsum thov Vajtswv. Yog li ntawd, thaum koj ntxhov siab txog ib yam dabtsi, nco ntsoov thov Vajtswv. (Nyeem 1 Petus 5:6, 7.) Yehauvas yeej hlub koj kawg li, nws mloog ntsoov koj tej lus thov. Thaum koj thov Vajtswv, nco ntsoov ua nws tsaug rau txhua yam koob hmoov uas koj tau txais los. Yehauvas yeej ua tau “txhua yam ntau dua li tej uas peb thov thiab peb xav txog.”​—Efexau 3:20.

¹¹ Povlauj thiab Xila nkawd yeej tsis xav tias Yehauvas yuav ua txujci pab nkawd. Txawm niaj hnub no Yehauvas tsis ua txujci li ntawd pab peb lawm los, nws yeej ua tau tej yam uas peb tsis nco xav txog li thiab. (1 Khaulee 10:13) Tiamsis puas yog peb yuav cia li nyob tos Yehauvas kho peb tej teeb meem xwb? Tsis yog. Peb yuav tsum ua raws li peb tej lus thov. (Loos 12:11) Yog peb ua raws li ntawd ces yuav qhia tias peb yeej xav tau Yehauvas txojkev pab tiag. Yehauvas yuav foom koob hmoov rau peb thiab. Txawm peb yuav raug li cas los xij, peb yuav tsum nco ntsoov tias tej uas Yehauvas pub rau peb yuav zoo tshaj tej uas peb ntshaw. Tej zaum nws yuav ua ib yam dabtsi uas peb twb tsis tau ras txog li. Cia peb kawm seb yav tas los Yehauvas tau pab nws cov tub qhe li cas xwv peb thiaj vam khom nws.

12. (1) Vajntxwv Hexekhiya ua li cas thaum Vajntxwv Xenakhawli tuaj tawm tsam Yeluxalees? (2) Yehauvas tau cawm nws haiv neeg li cas thiab peb kawm tau li cas?

¹² Muaj ntau zaus Yehauvas tau ua tej uas neeg twb tsis xav txog li. Thaum Vajntxwv Hexekhiya kav tebchaws, Axilia tus Vajntxwv Xenakhawli tuaj ntaus yeej txhua lub nroog hauv tebchaws Yuda, tshuav Yeluxalees xwb. (2 Vajntxwv 18:1-3, 13) Thaum Xenakhawli sawv mus ntaus Yeluxalees, Vajntxwv Hexekhiya ua li cas? Nws thov Yehauvas pab. Tom qab ntawd nws mus cuag Yaxaya tus uas cev Vajtswv lus. (2 Vajntxwv 19:5, 15-20) Thaum Xenakhawli nplua Vajntxwv Hexekhiya los nws yeej them tibsi. (2 Vajntxwv 18:14, 15) Hexekhiya kuj npaj lub nroog zoo zoo, Axilia tuaj qhwv los lub nroog thiaj tsis poob yoojyim. (2 Vaj Keeb Kwm 32:2-4) Thaum kawg tau muaj li cas? Tib hmos xwb, Yehauvas txib nws ib tug tubtxib saum ntuj los tua Xenakhawli 185,000 leej tub rog tuag tas. Hexekhiya yeej tsis tau xav tias  yuav muaj tej yam zoo li ntawd ib zaug li!​—2 Vajntxwv 19:35.

13. (1) Tej uas Yehauvas tau ua rau Yauxej qhia li cas rau peb? (2) Xala tau txais koob hmoov dabtsi?

¹³ Xav txog tus tub hluas Yauxej. Nws raug kaw hauv Iyi tebchaws tau ntau xyoo. Nws yeej tsis xav tias muaj ib hnub nws yuav tau los ua tus 2 uas loj tshaj hauv Iyi tebchaws. Yehauvas tseem txib nws los cawm nws tsev neeg txojsia thiab. (Chiv Keeb 40:15; 41:39-43; 50:20) Tej uas Yehauvas ua rau Yauxej zoo tshaj tej uas nws xav tau. Yauxej pog koob Xala kuj tau txais tej koob hmoov uas zoo kawg nkaus li thiab. Xala yeej tsis xav tias muaj ib hnub nws yuav tau puag ib tug metub. Nws xav tias ntshe nws yuav saws nws tus nkauj qhev tej tub ki los ua nws xeeb ntxwv xwb, tiamsis Yehauvas cia li pub Xala muaj Yiha.​—Chiv Keeb 21:1-3, 6, 7.

14. Peb yeej tso siab tau tias Yehauvas yuav pab peb li cas?

¹⁴ Peb paub tias yog tsis tau txog lub ntiajteb tshiab, Yehauvas yuav tsis ua txujci tshem peb tej teeb meem. Peb tsis xav yws tias ua cas Yehauvas tsis ua li peb siab nyiam. Peb paub tias yav tas los Yehauvas twb ua tau ntau yam txujci phimhwj pab  nws haiv neeg lawm. Nws yeej tsis tau hloov li. (Nyeem Yaxaya 43:10-13.) Peb yeej tso siab tau rau nws. Nws yeej yuav muab peevxwm rau peb kom peb ua tau raws li nws siab nyiam. (2 Khaulee 4:7-9) Peb kawm tau li cas txog Hexekhiya, Yauxej thiab Xala lawv? Peb kawm tau tias txawm peb raug kev tawm tsam kev sim siab npaum li cas los, yog peb muab siab npuab Yehauvas nws yeej yuav pab peb.

15. (1) Yog peb muaj ntau yam teeb meem peb yuav ua li cas thiaj muaj “Vajtswv txojkev siab tus”? (2) Vim li cas peb thiaj nrog tau Vajtswv sib raug zoo?

¹⁵ Thaum peb ntsib ntau yam teeb meem peb yuav ua li cas muaj “Vajtswv txojkev siab tus”? Peb yuav tsum tuav rawv peb txojkev sib raug zoo nrog Yehauvas. Yexus Khetos tus nqe txhiv qheb kev rau peb los nrog Yehauvas sib raug zoo lawm. Yehauvas tau ua zoo tshaj li neeg xav, puas yog? Twb yog muaj tus nqe txhiv Yehauvas thiaj zam tau peb lub txim. Peb thiaj muaj lub siab dawb paug txav ze rau nws.​—Yauhas 14:6; Yakaunpau 4:8; 1 Petus 3:21.

16. Piav seb yog peb muaj “Vajtswv txojkev siab tus” yuav pab tau peb li cas?

¹⁶ Yog peb muaj “Vajtswv txojkev siab tus uas ntau dhau li neeg nkag siab tau,” yuav pab tau peb li cas? Phau Vajlugkub hais tias Vajtswv txojkev siab tus yuav “tsom kwm” peb lub siab thiab txojkev xav. (Filipi 4:7) Qhov no txhais li cas? Puag thaum ub lo lus Kili, “tsom kwm” yog hais rau pab tub rog uas tiv thaiv ib lub nroog. Lub moos Filipi kuj muaj tub rog tiv thaiv cov pejxeem, lawv thiaj nyob tso siab lug. Thaum peb muaj “Vajtswv txojkev siab tus” peb yuav kaj siab ib yam li ntawd. Peb yuav nyob tso siab lug tsis txhawj tsis ntshai. Peb paub tias Yehauvas yeej hlub tshua peb, nws xav kom peb tau zoo xwb. (1 Petus 5:10) Yog peb nco ntsoov li ntawd ces peb yuav tsis cia tej kev ntxhov siab, kev tu siab los txo peb lub zog.

17. Thaum kev ceeblaj txom nyem loj kawg li los txog, yuav ua li cas peb thiaj tso siab tau rau Yehauvas?

¹⁷ Kev ceeblaj txom nyem loj kawg li twb los yuav txog. (Mathai 24:21, 22) Peb tsis paub tias yuav muaj xwm dabtsi los raug peb ib tug twg. Txawm li ntawd los peb yuav tsum tsis txhob txhawj dhau lawm. Peb tsis paub tias Vajtswv yuav cawm peb li cas, tiamsis peb paub zoo tias peb tus Vajtswv Yehauvas yeej yuav pab peb li nws ib txwm pab nws cov tub qhe puag thaum ub. Vajtswv yeej yuav ua kom muaj tiav raws li nws lub ntsiab. Yog li ntawd, cia peb nco ntsoov tias “Vajtswv txojkev siab tus uas ntau dhau li neeg nkag siab tau yuav tsom kwm [peb] lub siab thiab [peb] tej kev xav,” rau txhua txojke uas peb twb tsis nco ras txog li!