1, 2. Vim li cas Yehauvas Cov Timkhawv ho txawj xaiv tej tsoos zoo los hnav? (Saib daim duab ntawm sab no.)

IB PHAU ntawv xov xwm nyob rau sab Yus Luv tau piav txog tej tsoos tsho uas ib co thawj coj tshawj (tsev teev ntuj) tau hnav. Phau ntawv hais tias: “Tshav ntuj kub heev lawv thiaj hnav khaubncaws dog dig xwb.” Tiamsis phau ntawv ntawd hais tias Yehauvas Cov Timkhawv coj txawv. Thaum cov Timkhawv mus rooj sib txoos 3 hnub, lawv pom tej txivneej thiab tej tub hluas coj kas las vav (hlab caj dab) tas tus. Lawv kuj pom tej pojniam thiab tej ntxhais hluas hnav tej tsoos raug muag heev, tsis muaj ib tug hnav tej tiab luv luv. Coob leej ntau tus tau qhuas txog Yehauvas Cov Timkhawv li ntawd. Tus tubtxib Povlauj hais tias cov Khixatia yuav tsum “hnav tsoos kom phim thiab tsim nyog” Vajtswv cov tub qhe. (1 Timaute 2:9, 10) Povlauj sau cov lus no rau cov pojniam tiamsis lub ntsiab lus pab tau cov txivneej ib yam.

² Peb yog Vajtswv cov tibneeg, yog li ntawd peb yuav tsum xaiv tej tsoos zoo los hnav. Vajtswv kuj xav kom peb hnav tej tsoos zoo thiab. (Chiv Keeb 3:21) Phau Vajlugkub qhia meej tias Yehauvas yog tus uas kav tag nrho lub qab ntuj khwb thiab ib puas tsav yam. Yog li ntawd, nws yeej muaj cai qhia kom nws cov tub qhe txawj xaiv tej tsoos zoo los hnav. Cia peb xaiv tej tsoos uas haum Vajtswv Yehauvas siab, tsis txhob xam pom peb tus kheej xwb.

3. Raws li Mauxe Txoj Kevcai, Vajtswv tsis xav kom peb hnav tej tsoos zoo li cas?

 ³ Mauxe Txoj Kevcai txwv cov Yixayee kom tsis txhob caum tej haiv neeg nyob ib ncig lawv uas nyiam ua plees ua yi. Txoj Kevcai qhia tias pojniam txivneej nyias muaj nyias tsoos. Yehauvas tsis txaus siab rau cov txivneej uas hnav tsoos pojniam, thiab cov pojniam uas hnav tsoos txivneej. Tiam no luag tsim tib hom tsoos rau pojniam txivneej hnav huvsi. (Nyeem Kevcai 22:5.) Tiamsis raws li tej kevcai uas Yehauvas tau sam hwm rau cov Yixayee, peb yeej paub tias Yehauvas tsis nyiam li ntawd. Nws tsis txaus siab yog txivneej hnav tej tsoos phim pojniam thiab pojniam hnav tej tsoos phim txivneej. Nyias yuav tsum hnav nyias ib yam, kom paub tias tus twg yog pojniam tus twg yog txivneej.

4. Yuav ua li cas cov Khixatia thiaj paub xaiv tsoos tsho hnav?

⁴ Phau Vajlugkub tej hauv paus ntsiab lus yuav pab peb xaiv tej tsoos uas tsim nyog hnav. Peb sawvdaws nyias nyob nyias ib lub tebchaws. Tej lub tebchaws kub heev, tej lub no heev, nyias thiaj tsim nyias ib hom tsoos los hnav. Txawm li ntawd los, phau Vajlugkub tej hauv paus ntsiab lus pab tau peb txhua leej txhua tus. Cov kwvtij tsis tas qhia ib qho zuj zus seb peb yuav hnav li cas thiaj tsim nyog. Yehauvas yeej cia peb xaiv tej tsoos uas peb nyiam, tsuav tsis hla phau Vajlugkub tej hauv paus ntsiab lus ces yeej tsis txhaum. Cia peb kawm txog cov hauv paus ntsiab lus ntawd seb “Vajtswv lub siab nyiam li cas” tiag.​—Loos 12:1, 2.

5, 6. Peb cev tsoos tsho yuav ua rau lwm tus xav li cas?

⁵ Vajtswv tshoov tus tubtxib Povlauj los sau 2 Khaulee 6:4. (Nyeem.) Lub hauv paus ntsiab lus no tseem ceeb heev. Tej khaubncaws uas peb hnav ua rau sawvdaws pom tias peb yog tus neeg zoo li cas. (1 Xamuyee 16:7) Yog li ntawd, peb yog Vajtswv cov tub qhe peb yuav tsum xaiv tej tsoos uas phim Vajtswv lub npe. Tsis yog peb yuav ua ywj siab xwb. Yog peb coj raws li phau Vajlugkub tej hauv paus ntsiab lus, peb yuav tsis hnav tej khaubncaws pom pom zam lossis cuas cuas qab ua rau lwm tus xav phem txog peb. Peb kuj tsis hnav tej tsoos zawm zawm. Peb tsis xav ua rau peb cov kwvtij nkauj muam pab peb txaj muag.

⁶ Yog peb hnav tej tsoos uas zoo du lug ces luag lwm tus yuav saib taus peb thiab pom tias peb yog Yehauvas cov tub qhe tiag. Yuav ua rau ib txhia xav paub txog Yehauvas thiab txoj xov zoo uas peb qhia. Yog peb hnav zoo ces luag yuav qhuas tias peb lub koom haum yeej cob tau peb zoo tiag.

7, 8. Peb yuav tsum ua zoo xaiv khaubncaws hnav rau lub sijhawm twg?

⁷ Thaum peb xaiv khaubncaws hnav, tsim nyog peb xav txog peb tus Vajtswv, peb cov kwvtij nkauj muam, thiab cov uas peb qhia Vajlugkub rau. Peb cev tsoos tsho yuav tsum qhia tias peb hwm Yehauvas thiab saib txoj xov zoo muaj nqes. (Loos 13:8-10) Thaum peb mus kev sib txoos thiab mus tshaj tawm, yimhuab tseem ceeb rau peb xav txog tej no. Peb cev tsoos tsho yuav tsum phim Yehauvas cov tibneeg. (1 Timaute 2:10) Tiamsis peb yuav tsum nco ntsoov tias ib koog txawv ib koog. Peb yuav tau yoog cov uas nyob ib ncig peb. Txhob xaiv tej tsoos uas ua rau lwm tus tsis xis peb.

⁸ Nyeem 1 Khaulee 10:31. Thaum peb mus tej rooj sib txoos, peb yuav tsum hnav tej tsoos uas tsim nyog thiab zoo saib. Tsis txhob hnav hle zab hle zuav li lub qab ntuj neeg. Tsis hais thaum peb mus txog tom chaw sib txoos lossis tawm mus tom chaw so, peb yuav tsum hnav zoo txhob hnav dog dig peb thiaj tsis txaj muag qhia rau lwm tus tias peb yog Yehauvas Cov Timkhawv. Yog peb hnav zoo peb yuav qhia tau txoj xov zoo rau txhua tus.

9, 10. Filipi 2:4 pab peb xaiv tej tsoos zoo li cas?

⁹ Nyeem Filipi 2:4. Thaum peb xaiv khaubncaws hnav, ua cas ho zoo rau peb xav txog peb cov kwvtij nkauj muam? Peb yuav tsum xav txog lawv vim Vajtswv cov tibneeg niaj hnub xyaum raws li cov lus ntuas no: “Cia li muab nej lub neej uas nyiam kev ntiajteb tua pov tseg, tsis hais kev ua nkauj nraug, kev ua phem ua qias, kev ntshaw.” (Khaulauxi 3:2, 5) Tej zaum yav tas los peb cov kwvtij nkauj muam ib txhia tau ua nkauj ua nraug lawm. Nimno lawv los paub qhov tseeb tiamsis lawv yuav tsum tswj nrees lawv lub siab li nqe Vajlugkub hais kom txhob ntshaw tej kev phem kev qias. Yog  peb hnav tej khaubncaws zawm zawm lossis cuas cuas qab, tej zaum yuav nyuaj rau peb cov kwvtij nkauj muam tswj lawv lub siab. (1 Khaulee 6:9, 10) Peb yeej tsis xav ua nyuaj leejtwg, puas yog?

¹⁰ Thaum peb nrog cov kwvtij nkauj muam ua ke, peb ib leeg txhawb ib leeg kom coj lub neej dawb huv, xwv thiaj tsis qaug rau kev nkauj kev nraug. Thaum mus kev sib txoos lossis mus ua si, yog peb xaiv tej tsoos zoo los hnav ces hajyam pab tau sawvdaws coj dawb huv. Yehauvas yeej cia peb xaiv tej tsoos uas peb nyiam. Tiamsis cia peb xam pom peb cov kwvtij. Txhob hnav tej tsoos uas yuav ua rau peb cov kwvtij xav phem lossis hais phem txog peb. (1 Petus 1:15, 16) Phau Vajlugkub qhia tias kev hlub “tsis ua tej uas rhuav ntsej muag, tsis xam pom nws xwb.”​—1 Khaulee 13:4, 5.

11, 12. Laj Lim Tswvyim 3:1, 17 pab peb xaiv khaubncaws zoo li cas?

¹¹ Vajtswv cov tub qhe paub tias “muaj caij muaj nyoog rau txhua yam.” (Laj Lim Tswvyim 3:1, 17) Yog li ntawd, yuav muaj caij ntuj kub ntuj no, caij khwv caij so. Thaum peb xaiv khaubncaws hnav, peb yeej xaiv tej uas phim lub caij lub nyoog. Tiamsis txawm peb nyob lub caij twg los xij, peb yuav tsum xaiv tej tsoos uas haum Yehauvas siab xwb.​—Malakhi 3:6.

¹² Lub caij ntuj so kuj nyuaj rau ib txhia xaiv tej tsoos uas zoo saib. Txawm sov npaum li cas los, cia peb tsis txhob hnav tej tsoos pom pom nqaij thiaj tsis ua nyuaj rau peb cov kwvtij nkauj muam. (Yauj 31:1) Thaum mus ua si tom hiavtxwv los cia peb hnav tej khaubncaws da dej uas raug muag. (Paj Lug 11:2, 20) Coob leej ntau tus nyiam hnav tej khaubncaws da dej uas pom pom nqaij. Tiamsis cia peb hnav tej uas yuav ua rau Yehauvas tau ntsej muag, vim nws yog tus dawb huv.

13. Ib Khaulee 10:32, 33 pab peb xaiv khaubncaws zoo li cas?

¹³ Phau Vajlugkub qhia tias peb yuav tsum tsis txhob ua tej yam uas yuav txo tau peb cov kwvtij nkauj muam. Thaum peb xaiv tsoos tsho hnav cia peb nco ntsoov lub hauv paus ntsiab lus no. (Nyeem 1 Khaulee 10:32, 33.) Tsis yog peb xav txog cov uas nyob hauv lub koom txoos xwb, tiamsis peb yuav tsum xav txog cov uas tsis tau paub Yehauvas thiab. Tus tubtxib Povlauj hais tias: “Cia peb txhua tus ua rau lwm tus txaus siab xwv thiaj muaj qabhau txhawb tau lwm tus lub zog.” Povlauj hais ntxiv tias: “Rau qhov Khetos tsis ua yam uas txaus nws siab xwb.” (Loos 15:2, 3) Cia peb xyaum Yexus es xam pom Vajtswv thiab lwm tus ua ntej. Qhov ntawd zoo dua li yus xam pom yus xwb. Tsis txhob hnav tej khaubncaws uas yuav ua rau luag tsis xav mloog txoj xov uas peb qhia.

14. Cov niam txiv yuav cob tej menyuam li cas lawv thiaj paub xaiv tej tsoos zoo?

¹⁴ Cov niam txiv Khixatia muaj tes haujlwm uas qhia phau Vajlugkub tej hauv paus ntsiab lus rau  lawv cov menyuam. Cov niam txiv yuav tsum hnav zoo thiab cob kom lawv cov menyuam hnav zoo thiaj ua rau Vajtswv zoo siab. (Paj Lug 22:6; 27:11) Lawv yuav tsum ua tus qauv zoo rau tej menyuam xyaum. Qhia kom tej menyuam paub mus yuav tej khaubncaws uas tsim nyog hnav xwb. Tsis yog cov niam txiv yuav cia lawv cov menyuam hnav ywj siab, tiamsis cob kom tej menyuam paub xaiv tej tsoos uas qhia tias lawv hwm Vajtswv Yehauvas vim lawv ris nws lub npe.

15. Vajtswv pub dabtsi rau peb los pab kom peb muaj tswvyim?

¹⁵ Yehauvas pub phau Vajlugkub los pab kom peb muaj tswvyim txiav txim siab ua raws li nws nyiam. Tiamsis Yehauvas kuj xav kom peb xaiv tej tsoos uas peb nyiam thiab. Tus yuav nyiam hom khaubncaws zoo li cas los muaj. Ib txhia yuav taus tej khaubncaws kim, ib txhia yuav tsis taus. Txawm peb hnav cev khaubncaws zoo li cas los, peb yuav tsum tu du lug kom zoo saib thiab phim caij nyoog. Tsis tas li ntawd xwb, peb yuav tsum hnav tej khaubncaws uas phim koog peb nyob.

16. Ua cas tsim nyog peb hnav zoo?

¹⁶ Tsis yoojyim nrhiav tej khaubncaws uas zoo saib thiab tsim nyog los hnav. Tej khw feem ntau tsuas muag tej khaubncaws uas lub ntiajteb no nyiam xwb. Yog li ntawd, yuav tau siv sijhawm ntev zog thiaj nrhiav tau tej tiab thiab tej ris tsho uas phim ib tug Khixatia. Tsis txhob yuav tej khaubncaws zawm zawm. Yog peb hnav tej tsoos zoo, ces peb cov kwvtij nkauj muam yuav saib taus peb thiab yuav zoo siab tias peb xam pom lawv. Txawm peb tsis tau hnav raws nkaus li peb siab nyiam los, tsis muaj ib yam zoo tshaj qhov uas peb cev khaubncaws ua rau Yehauvas tau ntsej muag.

17. Yog ib tug kwvtij xav tseg hwj txwv, nws yuav tsum xav txog dabtsi ua ntej?

¹⁷ Puas zoo rau cov kwvtij tseg hwj txwv? Raws li Mauxe Txoj Kevcai, txivneej yuav tsum tseg hwj txwv. Tiamsis cov Khixatia tsis coj Mauxe Txoj Kevcai thiab txoj kevcai ntawd tsis tswj cov Khixatia lawm. (Levi Tej Kevcai 19:27; 21:5; Kalatia 3:24, 25) Niaj hnub no, muaj tej haiv neeg kuj cia txivneej tseg hwj txwv, tsuav lawv tu ntshis kom zoo saib xwb. Ib txhia kwvtij uas tuav haujlwm hauv lub koom txoos thiaj tseg hwj txwv. Thaum lawv mus qhia Vajlugkub los luag tsis xav li cas thiab. Txawm li ntawd los, ib txhia ho txiav txim siab chais hwj txwv. (1 Khaulee 8:9, 13; 10:32) Ho muaj dua lwm haiv neeg thiab lwm tebchaws uas tsis pom zoo txivneej tseg hwj txwv li. Yog li ntawd, thiaj tsis zoo rau cov kwvtij hauv tej tebchaws ntawd tseg hwj txwv. Yog muaj ib tug kwvtij twg tsis kam chais hwj txwv, yuav tsis yoojyim rau nws qhuas Vajtswv. Tej zaum nws yuav tuav tsis tau haujlwm hauv lub koom txoos vim nws “muaj chaw thuam.”​—1 Timaute 3:2, 7; Loos 15:1-3.

18, 19. Mikha 6:8 pab tau peb li cas?

¹⁸ Peb zoo siab kawg li uas Yehauvas tsis tsa kevcai los qhia ib qho zuj zus tias peb yuav tau hnav tej tsoos zoo li cas thiab tu peb tus kheej li cas. Nws cia peb txiav txim siab rau peb tus kheej txog tej ntawd, tsuav tsis hla nws tej hauv paus ntsiab lus xwb. Thaum peb paub xaiv peb tej tsoos tsho lossis paub tu peb tus kheej, ces qhia tias peb xav “ua lub neej txo hwjchim nrog peb tus Vajtswv sib raug zoo.”​—Mikha 6:8, TMZ.

¹⁹ Yog peb txo hwjchim ces peb yuav xam pom tias Yehauvas yog tus dawb huv thiab nws tej kevcai tsuas coj peb rau qhov zoo xwb. Peb yuav zoo siab coj peb lub neej raws li tej kevcai ntawd. Tsis tas li ntawd xwb, yog peb ua neeg txo hwjchim ces peb yuav txawj yoog thiab txawj xav txog lwm tus.

20. Peb tej tsoos tsho yuav tsum qhia li cas?

²⁰ Peb tej tsoos tsho yuav tsum qhia tias peb yog Yehauvas cov tub qhe. Yehauvas xav kom peb hnav tej tsoos du lug xwb. Peb yeej zoo siab ua raws li nws hais. Tsim nyog qhuas peb cov kwvtij nkauj muam uas hnav zoo thiab coj zoo. Vim lawv ua li ntawd, lwm tus thiaj xav kawm txoj xov zoo. Qhov no kuj ua rau Yehauvas tau koob meej thiab zoo siab xyiv fab. Thaum peb xaiv tej tsoos zoo ces yuav ua rau Yehauvas tau ntsej muag. Nws yog tus Vajtswv uas muab “koob meej thiab hwjchim meej mom los hnav.”​—Ntawv Nkauj 104:1, 2.