1, 2. (1) Niaj hnub no coob leej muaj kev ntxhov siab li cas thiab tej ntawd puas ua rau lawv qaug zog? (2) Yaxaya 41:10, 13 ho pab tau peb li cas?

MUAJ ib tug muam uas yog ib tug tho kev thiab tus txiv yog ib tug txwj laus tau hais tias: “Txawm kuv niaj hnub kawm Vajlugkub los, kuv tseem muaj kev ntxhov siab. Kuv twb ntxhov siab tau ntau xyoo lawm, ua rau kuv noj tsis qab pw tsis tsaug zog. Kuj tsis yoojyim rau kuv nrog lwm tus sib raug zoo. Muaj tej lub caij kuv tsis xav ua dabtsi kiag li.”

² Koj puas tau ntsib li tus muam no? Peb tseem nyob hauv Xatas lub qab ntuj phem, vim li no coob leej thiaj raug kev ntxhov siab. Kev ntxhov siab zoo li tog hlau nres nkoj uas muab yus tuav cia mus tsis tau qhovtwg. (Paj Lug 12:25) Ib txhia muaj kev ntxhov siab vim lawv ib tug neeg tau tas sim neej lawm. Ib txhia kuj yog muaj mob muaj nkeeg lossis raug lwm tus tawm tsam. Muaj ib co ho ntxhov siab vim tsis muaj txaus noj txaus siv. Kev ntxhov siab ua rau yus qaug zog heev, ib txhia thiaj tsis qab siab ua neej. Tiamsis nco ntsoov tias Vajtswv yeej pab tau peb.​—Nyeem Yaxaya 41:10, 13.

3, 4. (1) Phau Vajlugkub tau muab txhais tes ua piv txwv li cas? (2) Ua cas ib txhia thiaj tsaug leeg?

³ Phau Vajlugkub kheev muab neeg tej tes taw los ua piv txwv qhia. Muaj ntau nqe Vajlugkub thiaj hais txog cov uas tau txhawb lwm tus  txhais tes. Qhov ntawd txhais tias lawv tau txhawb tus ntawd lub zog. (1 Xamuyee 23:16; Exala 1:6) Kuj txhais tau tias lawv txhawb kom nws muaj kev cia siab rau yav tom hauv ntej.

⁴ Phau Vajlugkub kuj hais txog cov uas txhais tes tsaug leeg. Qhov ntawd txhais tias tus ntawd qaug zog thiab tag kev cia siab lawm. (2 Vaj Keeb Kwm 15:7; Henplais 12:12) Thaum koj muaj kev nyuaj siab, qaug zog, lossis tsis nrog Yehauvas sib raug zoo li qub lawd, tej zaum yuav ua rau koj xav tso ib puas tsav yam tseg. Leejtwg thiaj txhawb tau koj lub zog? Yuav ua li cas koj thiaj muaj zog thev dhau thiab rov muaj kev zoo siab xyiv fab?

5. (1) Thaum peb muaj kev nyuaj siab peb xav li cas xwb? (2) Leejtwg thiaj pab tau peb thaum peb muaj kev nyuaj siab? (3) Hauv zaj no peb yuav kawm txog dabtsi?

⁵ Nyeem Xefaniya 3:16, 17. Thaum peb muaj kev nyuaj siab cia peb tsis txhob qaug zog lossis cia peb txhais tes tsaug leeg. Peb Leej Txiv Yehauvas xav kom peb muab peb tej kev nyuaj siab tso plhuav rau nws. (1 Petus 5:7) Yehauvas yuav tsom kwm peb ib yam li nws tau tsom kwm nws haiv neeg Yixayee. Nws hais rau lawv tias nws “txhais tes tsis luv uas yuav cawm tsis tau kom dim.” Nws yeej ib txwm cawm cov uas muab siab npuab nws. (Yaxaya 59:1) Nyob rau zaj no, peb yuav kawm txog 3 tug qauv hauv phau Vajlugkub uas qhia tias Yehauvas yeej xav txhawb nws cov tibneeg lub zog. Txawm lawv ntsib kev nyuaj siab zoo li cas los, Yehauvas yeej pab tau lawv muaj siab ua Nws tes haujlwm ntxiv. Cia peb kawm seb cov qauv no txhawb tau peb lub zog li cas.

6, 7. Zaj no pab tau peb li cas?

⁶ Tom qab Yehauvas cawm cov Yixayee tawm hauv tebchaws Iyi los, cov Amalej txawm tuaj tua cov Yixayee. Mauxe hais kom Yausua uas yog ib tug muaj siab loj siab tuab coj cov Yixayee mus ntaus rog. Tom qab ntawd Mauxe, Aloo, thiab Hawj txawm nce mus rau saum ib lub roob. Puas yog lawv mus khiav nkaum? Tsis yog. Lawv mus rau saum roob lawv thiaj pom lub tshav rog.

⁷ Thaum Mauxe lawv mus txog saum roob, Mauxe txawm tsa Vajtswv tus pas nrig rau saum ntuj. Nws tsa tes thaum twg, Yehauvas pab cov Yixayee kov yeej thaum ntawd. Tiamsis nws tso tes thaum twg cov Amalej kov yeej thaum ntawd. Thaum Aloo thiab Hawj pom tias Mauxe tsaug leeg lawd, nkawd thiaj maj nroos mus nqa ib “lub pob zeb los rau Mauxe zaum, mas ob tug thiaj pab tsa Mauxe ob txhais tes ib leeg ib sab, nws txhais tes thiaj tsa khov kho mus txog hnub poob qho.” Yog li ntawd, vim muaj Yehauvas nqes tes pab cov Yixayee, lawv thiaj tua yeej cov Amalej lawm.​—Khiav Dim 17:8-13.

8. (1) Thaum cov neeg Khuj tuaj tua Yuda, Axa ua li cas xwb? (2) Peb yuav xyaum Axa li cas?

⁸ Nyob rau Vajntxwv Axa tiam, Yehauvas kuj nqes tes pab nws cov tibneeg thiab. Muaj ib zaug Xelag uas yog neeg Khuj txawm tuaj ua rog rau Vajtswv cov tibneeg. Xelag muaj 1,000,000 tus tub rog uas muaj zog heev. Hauv phau Vajlugkub tsis muaj ib pab tub rog yuav coob npaum li ntawd. Lawv coob tshaj Axa cov tub rog yuav luag 2 npaug diam. Txawm li ntawd los, Axa tsis txhawj tsis ntshai. Tamsim ntawd nws thov kiag Yehauvas pab. Tiag mas, tibneeg yeej ntaus tsis yeej ib pab tub rog coob npaum li ntawd tiamsis “Vajtswv ua tau txhua yam huvsi.” (Mathai 19:26) Vajtswv siv nws lub hwjchim los “ua rau cov neeg Khuj swb Axa.” Thaum kawg Axa muaj lub siab xib rau Yehauvas tas nws tiam neej.​—2 Vaj Keeb Kwm 14:8-13; 1 Vajntxwv 15:14.

9. (1) Thaum Nehemi los rau hauv Yeluxalees, nws pom lub nroog zoo li cas xwb? (2) Vajtswv teb Nehemi cov lus thov li cas?

⁹ Thaum Nehemi los rau hauv Yeluxalees, nws pom lub nroog zoo li cas xwb? Tsis muaj dabtsi tiv thaiv lub nroog ua rau cov Yudai qaug zog heev. Lwm haiv neeg niaj hnub hem lawv, lawv thiaj tso tes tsis kho tus ntsa loog lawm. Nehemi xav li cas txog tej no? Nws puas tso tes thiab? Nws tsis tso. Nehemi tso siab rau Yehauvas ib  yam li Mauxe, Axa, thiab lwm cov tub qhe uas ncaj ncees. Nehemi txawm thov Yehauvas txog tej ntawd, Yehauvas thiaj nqes tes pab lawv. Yehauvas siv nws lub “hwjchim loj kawg” thiab nws “txhais tes uas muaj zog” los txhawb cov Yudai. (Nyeem Nehemi 1:10; 2:17-20; 6:9.) Koj puas ntseeg tias Yehauvas tseem siv nws lub “hwjchim loj kawg” thiab nws “txhais tes uas muaj zog” los pab nws cov tibneeg niaj hnub no thiab?

10, 11. (1) Xatas siv dabtsi los txo peb zog? (2) Yehauvas tau pub dabtsi los txhawb peb zog? (3) Tej kev kawm uas Yehauvas tau npaj tseg txhawb puas tau koj?

¹⁰ Dab Ntxwg Nyoog yeej nrhiav nrhw kev los cuam tshuam peb tes haujlwm rau Yehauvas. Nws siv tej tseem fwv, tej thawj coj cuav, thiab cov uas fav xeeb los dag txog peb lossis hem kom peb ntshai. Ntxwg Nyoog ua li no vim nws xav txwv peb tes haujlwm tshaj tawm txog lub Nceeg Vaj. Txawm nws ua npaum li cas los Yehauvas yeej yuav pub nws lub hwj huam dawb huv los txhawb peb lub zog. (1 Vaj Keeb Kwm 29:12) Yog li ntawd, peb yuav tsum thov kom Vajtswv pub lub hwj huam dawb huv rau peb, xwv peb thiaj kov yeej Xatas thiab nws lub qab ntuj phem. (Ntawv Nkauj 18:39; 1 Khaulee 10:13) Vajtswv pub nws Txojlus thiab cov ntaub ntawv uas peb niaj hli luam los txhawb peb lub zog. Txawm cov lus hauv Xekhaliya 8:9, 13 (nyeem) yog hais rau lub sijhawm uas lawv tabtom kho lub tuam tsev hauv Yeluxalees xwb los, tseem txhawb tau peb lus zog niaj hnub nimno.

¹¹ Yehauvas tau npaj cov kev sib txoos, cov rooj sib txoos, thiab lwm yam kev kawm los txhawb peb lub dag lub zog. Tej kev kawm no yuav pab peb teev tiam Vajtswv tawm hauv lub siab dawb paug tuaj thiab kom peb txawj tuav haujlwm. Kuj yuav pab peb npaj los ua haujlwm ntxiv rau Yehauvas thiab. (Ntawv Nkauj 119:32) Koj puas cia Yehauvas txhawb koj lub zog li no?

12. Peb yuav ua li cas peb thiaj tsis qaug zog?

¹² Yehauvas tau pab nws haiv neeg kov yeej cov Amalej thiab cov Khuj. Nws pub dag zog rau Nehemi thiab cov Yudai kho tau Yeluxalees tus ntsa loog tiav. Niaj hnub no los, Yehauvas yuav pub dag zog rau peb thiab. Txawm peb muaj kev ntxhov siab, raug kev tawm tsam, lossis tsis muaj leejtwg xav mloog txoj xov zoo los, Yehauvas yuav pab kom peb tshaj tawm tau txoj xov zoo tsis tseg. (1 Petus 5:10) Puas yog Yehauvas yuav ua txujci los kho peb tej teeb meem huvsi? Tsis yog. Yog peb xav kom Yehauvas pab peb ces peb yuav tsum nyeem Vajtswv Txojlus txhua txhua hnub. Peb yuav tsum kawm cov ntaub ntawv uas peb yuav tham tom kev sib txoos thiab mus koom txoos tsis tu ncua. Tsis tas li ntawd xwb, peb yuav tsum nco ntsoov hmo uas peb tsev neeg pe hawm Vajtswv ua ke thiab thov Vajtswv tsis tseg. Tsis txhob pub ib yam dabtsi los cuam tsuam tej uas Yehauvas tau npaj tseg los txhawb peb lub zog. Yog koj pom tias koj tu ncua yam twg, cia li thov Vajtswv pab koj. Koj yuav pom Vajtswv lub hwj huam ua rau koj “muaj lub siab xav thiab muaj peevxwm ua raws li nws lub siab nyiam.” (Filipi 2:13) Ua li, peb puas txhawb tau lwm tus lub zog thiab?

13, 14. (1) Ib tug kwvtij uas tus pojniam tau tas sim neej lawd tau kev txhawb zog qhovtwg los? (2) Peb txhawb tau lwm tus li cas?

¹³ Yehauvas pub tau ib cuab kwvtij thoob ntiajteb los txhawb peb lub zog. Tus tubtxib Povlauj hais tias: “Txhawb nej txhais tes uas tsis muaj zog thiab lub hauv caug uas tsaug leeg, thiab kho txojkev kom ncaj rau nej txhais kotaw.” (Henplais 12:12, 13) Cov Khixatia nyob thawj 100 xyoo sib pab sib txhawb li ntawd. Niaj hnub no los, peb kuj xyaum li ntawd thiab. Muaj ib tug kwvtij uas tus pojniam tas sim neej lawd, tau raug ntau yam kev nyuaj siab. Nws hais tias: “Kuv pom tias tus yuav raug kev nyuaj siab li cas los muaj, tsis muaj leejtwg yuav tav tau.” Dabtsi pab tau tus kwvtij no? Nws thov Vajtswv thiab niaj hnub kawm Vajlugkub thiaj pab tau nws thev dhau tej kev nyuaj siab. Nws hais ntxiv tias: “Twb yog muaj cov kwvtij nkauj muam hauv lub koom txoos nplig kuv siab kuv thiaj thev taus. Thaum kawg kuv pom tias peb yuav tsum nrog Yehauvas sib raug zoo ua ntej kev txom nyem los raug peb.”

¹⁴ Aloo thiab Hawj tau pab Mauxe tsa nws ob txhais npab thaum cov Yixayee nrog cov Amalej ntaus rog. Niaj hnub no los, cia peb nrhiav kev los txhawb peb cov kwvtij nkauj muam sawvdaws. Txhawb cov laus, cov muaj mob muaj nkeeg, cov uas raug tsev neeg tawm tsam, cov uas nyob ib leeg kho siab khuav, thiab cov uas nyuaj siab vim muaj ib siab ob qeg. Peb kuj txhawb tau cov hluas uas raug yaum mus ua phem lossis raug yaum mus caum lub qab ntuj no. (1 Thexalaunika 3:1-3; 5:11, 14) Tsis hais thaum peb mus sib txoos ua ke, mus tshaj tawm ua ke, noj mov ua ke, los yog tham xov tooj, cia peb siv lub sijhawm ntawd los txhawb lwm tus lub zog thiab nrhiav kev los pab lawv tiag tiag.

15. Peb cov lus txhawb tau lwm tus lub zog li cas?

¹⁵ Tom qab Axa tua yeej cov Khuj, Axaliya uas yog ib tug cev Vajtswv lus, tau txhawb Axa thiab nws cov tibneeg li no: “Cia li ua siab tuab. Tsis txhob cia nej txhais tes tsaug leeg, rau qhov tej haujlwm uas nej ua nej yuav tau nqe zog.” (2 Vaj Keeb Kwm 15:7) Nws cov lus ua rau Axa txhawb nqa kev pe hawm tseeb. Cia peb xyaum Axaliya es hais lus txhawb lwm tus lub zog, xwv thiaj pab tau lwm tus rau siab ntso teev tiam Yehauvas. (Paj Lug 15:23) Tsis tas li ntawd xwb, yog peb ua zoo teb tom tej kev sib txoos, yuav txhawb tau sawvdaws lub zog thiab.

16. (1) Cov txwj laus xyaum tau Nehemi li cas? (2) Cov kwvtij nkauj muam tau txhawb koj li cas?

¹⁶ Vim muaj Yehauvas nqes tes pab, Nehemi thiab cov Yudai thiaj muaj siab ua haujlwm. Lawv kho tus ntsa loog 52 hnub xwb twb tiav kiag lawm! (Nehemi 2:18; 6:15, 16) Puas yog Nehemi nyob ntsia lawv ua haujlwm xwb? Tsis yog. Nws nqes tes pab lawv kho tus ntsa loog thiab. (Nehemi 5:16) Cov txwj laus coob tus kuj xyaum Nehemi. Lawv pab ua, kho, thiab tu tej Tsev Nceeg Vaj rau peb siv. Cov txwj laus kuj caw cov uas raug kev nyuaj siab mus tshaj tawm nrog lawv thiab mus xyuas lawv hauv tsev, xwv thiaj txhawb tau lawv lub zog.​—Nyeem Yaxaya 35:3, 4.

17, 18. Thaum peb raug kev nyuaj siab peb yuav tsum nco ntsoov li cas?

¹⁷ Yog peb nrog peb cov kwvtij nkauj muam teev tiam Yehauvas ua ke, peb yuav koom tau ib lub siab. Peb yuav sib raug zoo ua kwvtij kwvluag thiab hajyam muaj kev cia siab rau Vajtswv lub Nceeg Vaj. Yog peb txhawb lwm tus txhais tes, yuav pab tau lawv ua siab ntev thev kev nyuaj siab thiab tos ntsoov Vajtswv tej lus cog tseg. Thaum peb pab lwm tus li no, kuj pab tau peb ntsia ntsoov lub neej yav tom hauv ntej thiab.

¹⁸ Thaum peb xav txog tej uas Yehauvas tau ua los pab thiab tiv thaiv nws cov tub qhe yav tas los, ua rau peb yimhuab muaj kev ntseeg ntxiv. Thaum koj raug kev nyuaj siab “txhob cia koj txhais tes tsaug leeg”! Yog koj thov Yehauvas pab koj, nws txhais tes yuav txhawb nqa koj thiab coj koj txoj hau kev mus txog thaum nws lub Nceeg Vaj foom koob hmoov laub lug rau noob neej.​—Ntawv Nkauj 73:23, 24.