1. Yehauvas qhia rau Mauxe tias nws yog ib tug Vajtswv zoo li cas? Thiab vim li cas qhov no tseem ceeb ua luaj?

MUAJ ib zaug Vajtswv tau tshwm los rau Mauxe pom. Yehauvas qhia nws lub npe thiab tej yeeb yam qhuas lug rau Mauxe. Thawj qhov yeeb yam uas Yehauvas qhia rau Mauxe yog nws txojkev khuvleej. (Nyeem Khiav Dim 34:5-7.) Vim li cas? Vim Mauxe xav paub seb Yehauvas puas yuav pab nws tiag. (Khiav Dim 33:13) Yehauvas thiaj tsis piav txog nws lub dag zog thiab lub tswvyim tiamsis qhia Mauxe paub tias nws yog ib tug Vajtswv uas khuvleej thiab hlub tshua nws cov tub qhe thiab yeej xav pab lawv tiag. Peb puas zoo siab tias Yehauvas hlub peb npaum li ntawd? Hauv zaj no peb yuav kawm tias yog peb khuvleej lwm tus peb yuav mob siab lawv thiab xav pab lawv.

2. Vim li cas tibneeg ho paub khuvleej lwm tus?

² Yehauvas tsim peb tibneeg muaj tus yam ntxwv zoo li Nws, peb thiaj txawj khuvleej thiab hlub tshua lwm tus. Txawm cov  uas tsis paub Vajtswv los lawv yeej paub khuvleej lwm tus thiab. (Chiv Keeb 1:27) Hauv phau Vajlugkub peb pom ntau tus qauv zoo. Thaum Xalaumoo ua Vajntxwv, muaj ob tug pojniam tuaj hais plaub sib txeeb ib tug metub. Xalaumoo thiaj kom muab tus menyuam phua 2 sab rau ob tug pojniam ntawd. Leej niam hlub tus menyuam heev nws thiaj kom muab rau tus pojniam tod. (1 Vajntxwv 3:23-27) Falau tus ntxhais kuj muaj lub siab khuvleej lwm tus thiab. Thaum nws pom dheev Mauxe, nws paub tias yog cov Henplais li menyuam uas yuav tsum muab tua pov tseg. Tiamsis nws “khuvleej tus menyuam ntawd” heev, nws thiaj coj mus tu.​—Khiav Dim 2:5, 6.

3. Vim li cas zoo rau peb kawm seb phau Vajlugkub hais li cas txog txojkev khuvleej?

³ Yehauvas yog tus Vajtswv uas muaj kev khuvleej, nws xav kom peb xyaum coj li nws. (Efexau 5:1) Vajtswv tsim peb muaj lub siab khuvleej tiamsis peb yog neeg txhaum, ntau zaus peb tsuas xav txog peb tus kheej xwb. Tsis yoojyim rau peb khuvleej luag lwm tus. Yuav ua li cas peb thiaj khuvleej lwm tus thiab xav pab lawv? Cia peb kawm seb Yehauvas tau khuvleej tibneeg li cas thiab tibneeg tau khuvleej lwm tus li cas. Tsis tas li ntawd xwb, peb yuav xyaum Vajtswv txojkev khuvleej li cas thiab yog vim li cas tseem ceeb rau peb xyaum li ntawd.

4. (1) Vim li cas Yehauvas tso 2 tug tubtxib saum ntuj mus rau lub moos Xaudoo? (2) Tej uas Lauj tsev neeg raug qhia peb li cas?

⁴ Thaum peb nyeem phau Vajlugkub, muaj ntau qhov peb pom Yehauvas txojkev khuvleej. Cia peb kawm seb Yehauvas tau khuvleej Lauj li cas. Yehauvas pom tias Lauj coj ncaj thiab “ntxhov siab heev” rau tej kev qias vuab tsuab hauv lub moos Xaudoo thiab Kaumaula. Cov neeg ntawd tsis hwm Yehauvas li, nws thiaj txiav txim siab muab lawv rhuav tshem. (2 Petus 2:7, 8) Yehauvas tso 2 tug tubtxib saum ntuj mus ceeb toom Lauj thiab nws tsev neeg kom khiav tawm vim Vajtswv yuav muab lub moos Xaudoo thiab Kaumaula rhuav tshem. Phau Vajlugkub hais tias: “Tiamsis Lauj tseem ua xyem xyav, mas ob tug tubtxib thiaj ntsiab nkaus Lauj thiab nws pojniam thiab nws ob tug ntxhais tes cab mus vim yog [Yehauvas] khuvleej nws, ob tug thiaj coj nws tawm los rau nraum ntug moos.” (Chiv Keeb 19:16) Yehauvas yeej to taub txog tej uas Lauj raug. Niaj hnub no los Nws kuj to taub tej uas peb raug thiab.​—Yaxaya 63:7-9; Yakaunpau 5:11; 2 Petus 2:9.

5. Phau Vajlugkub qhia li cas txog txojkev khuvleej?

⁵ Yehauvas qhia nws cov tibneeg tias lawv yuav tsum khuvleej luag lwm tus li cas? Hauv txoj kevcai uas Yehauvas muab rau nws cov tibneeg, muaj ib nqes hais tias yog leejtwg tau txais kwvtij zej zog lub tsho ntev yuam nqe, mas nws yuav tsum xa lub tsho ntawd rov qab ua ntej hnub poob kom tus ntawd thiaj tau npua. (Nyeem Khiav Dim 22:26, 27.) Yog nws tsis khuvleej luag,  tej zaum nws yuav tsis xa lub tsho rov qab. Tiamsis Yehauvas qhia kom nws haiv neeg paub khuvleej luag. Lub hauv paus ntsiab lus no yog li cas? Peb yuav tsum xam pom cov kwvtij nkauj muam uas txom nyem. Yog leejtwg cheem tsum kev pab, peb cia li zoo siab hlo pab.​—Khaulauxi 3:12; Yakaunpau 2:15, 16; nyeem 1 Yauhas 3:17.

6. Peb yuav xyaum Yehauvas txojkev khuvleej rau nws haiv neeg Yixayee li cas?

⁶ Txawm cov Yixayee ib sij ua txhaum ib zaug los, Yehauvas tseem khuvleej lawv qees. Phau Vajlugkub hais tias: “[Yehauvas] uas yog lawv tej poj koob yawm txwv tus Vajtswv txib nws cov tub qhe hais lus tuaj rau lawv tsis tu ncua li, vim nws khuvleej nws haiv neeg.” (2 Vaj Keeb Kwm 36:15) Hnub uas Yehauvas txiav txim, nws tsis xav kom ib tug twg raug puam tsuaj li. (2 Petus 3:9) Yog li ntawd, tsim nyog peb khuvleej cov uas tsis tau los paub Yehauvas es ceeb toom txhua leej txhua tus xwv lawv thiaj pom Vajtswv txojkev khuvleej.

7, 8. Vim li cas Alees tsev neeg thiaj ntseeg tau tias Yehauvas khuvleej lawv?

⁷ Niaj hnub no Yehauvas tseem khuvleej nws cov tub qhe qees. Xyoo 1990 muaj kev ntxub ntxaug hauv tebchaws Npauxinia (Bosnia). Tej haiv neeg pheej sawv sib tua. Lub caij ntawd Alees muaj 12 xyoos. * (Saib cov lus hauv qab taw qhia.) Nws nrog nws tsev neeg thiab lwm cov Timkhawv caij tsheb npav mus koom rooj sib txoos hauv tebchaws Xawnpia (Serbia). Zaum no Alees niam thiab txiv tabtom yuav mus ua kevcai raus dej. Thaum lawv mus txog ntawm ciam teb, cov tub rog pom tias Alees tsev neeg yog lwm haiv neeg, cov tub rog thiaj kom lawv tawm hauv tsheb npav. Twb tau 2 hnub lawm los, cov tub rog tsis tso lawv mus li. Muaj ib tug hu mus rau tus thawj tub rog seb yuav muab lawv ua li cas. Tus thawj tub rog txawm hais tias, “Cia li muab lawv mus tua xwb!”

⁸ Thaum cov tub rog tabtom sib tham seb yuav muab lawv ua li cas, txawm muaj 2 tug txivneej los rau ntawm Alees lawv. Nkawd qhia tias nkawd yog Yehauvas Cov Timkhawv. Twb yog cov kwvtij hauv lub tsheb npav qhia rau nkawd txog Alees lawv tsev neeg. Ob tug kwvtij txawm hais kom Alees thiab nws tus kwv mus rau hauv nkawd lub tsheb vim cov tub rog tsis saib menyuam yaus li ntaub ntawv. Nkawd hais kom ob niam txiv zos kev sab nram qab tsib taug hla ciam teb, es lawv mam li mus sib ntsib sab tid. Alees ntshai heev, tsis paub xyov yuav quaj los yuav luag. Nws niam nws txiv hais tias, “Neb xav tias cov tub rog yuav cia wb mus no lov?” Tiamsis thaum nkawd mus, ua cas cov tub rog tsis muaj ib tug pom li. Thaum lawv sawvdaws mus dhau ciam teb, Alees thiab nws tus kwv rov pom nkawd niam thiab txiv, lawv sawvdaws thiaj tau mus rooj sib txoos. Lawv ntseeg ruaj tias Yehauvas teb lawv tej lus thov. Peb paub tias Yehauvas tsis tiv thaiv nws cov tub qhe li ntawd txhua lub sijhawm. (Tubtxib Tes Haujlwm 7:58-60) Txawm li ntawd los, Alees hais tias: “Zoo li yog Yehauvas cov tubtxib saum ntuj kaw cov tub rog qhov muag es peb thiaj dim.”​—Ntawv Nkauj 97:10.

9. Yexus puas khuvleej cov neeg coob coob uas raws nws qab? (Saib daim duab ntawm sab 9.)

⁹ Yexus kuj khuvleej tibneeg kawg li thiab. Thaum nws pom cov neeg coob coob lawv  zoo “ib yam li pab yaj uas tsis muaj tus tswv yug.” Yexus thiaj “qhuab qhia lawv ntau yam.” (Mathai 9:36; nyeem Malakau 6:34.) Tiamsis cov Falixai tsis coj li Yexus. Lawv tsis khuvleej ib tug twg li thiab tsis xav pab lwm tus. (Mathai 12:9-14; 23:4; Yauhas 7:49) Koj puas xav pab lwm tus los paub Yehauvas ib yam li Yexus thiab?

10, 11. Puas yog peb yuav tsum khuvleej luag txhua lub sijhawm? Piav seb.

¹⁰ Puas yog peb yuav tsum khuvleej luag txhua lub sijhawm? Tsis yog. Muaj ib zaug Yehauvas txib kom Vajntxwv Xa-u mus ntaus cov Amalej, tsis txhob tseg ib tug tsiaj thiab ib tug tibneeg li. Xa-u puas ua li Yehauvas hais? Nws tsis ua. Nws tseg Amalej tus Vajntxwv Aka, uas yog Yehauvas haiv neeg ib tug yeeb ncuab. Nws kuj tseg tej tsiaj txhu uas zoo zoo thiab. Tej zaum yog Xa-u khuvleej lawv. Tiamsis qhov uas nws ua li ntawd yog nws tsis mloog Yehauvas lus, Yehauvas thiaj tsis yuav nws ua vajntxwv lawm. (1 Xamuyee 15:3, 9, 15) Yehauvas yeej txiav txim ncaj ncees. Nws paub tibneeg lub siab thiab paub tias thaum twg thiaj tsim nyog khuvleej. (Zaj Nkauj Ntsuag 2:17; Exekhee 5:11) Tshuav tsis ntev xwb, Yehauvas yuav txiav txim rau cov uas tsis kam mloog nws lus. (2 Thexalaunika 1:6-10) Thaum ntawd nws yuav tsis khuvleej cov neeg phem lawm. Nws yuav muab lawv rhuav tshem thiaj qhia tias nws khuvleej cov neeg ncaj ncees thiab xav cawm lawv dim.

¹¹ Peb puas muaj cai txiav txim tias tus twg tsim nyog dim tus twg tsis tsim nyog? Peb tsis muaj, tiamsis peb yeej muaj peevxwm pab tibneeg npaum li pab tau. Peb yuav ua li cas thiaj qhia tias peb khuvleej luag? Cia peb kawm ntxiv txog qhov no.

12. Yog peb khuvleej luag lwm tus, peb yuav ua li cas?

¹² Sib pab txhua lub sijhawm. Yehauvas sam hwm kom cov Khixatia khuvleej sawvdaws, tsis hais cov kwvtij nkauj muam hauv lub koom txoos lossis tej neeg zej zos. (Yauhas 13:34, 35; 1 Petus 3:8) Kev khuvleej txhais tias yus “mob siab txog tus uas raug txom nyem.” Ib tug uas muaj kev khuvleej zoo siab hlo pab cov uas raug txom nyem. Yog li ntawd, peb yuav pab lawv li cas? Peb kuj pab lawv tu vaj tu tsev lossis ua lwm yam haujlwm thiab.​—Mathai 7:12.

13. Thaum raug xwm txheej, Vajtswv cov tibneeg ua dabtsi xwb?

¹³ Pab cov uas raug xwm txheej. Thaum peb hnov txog cov uas raug xwm txheej ua rau peb khuvleej lawv kawg li. Coob tus yeej paub tias Yehauvas cov tibneeg txawj sib pab rau lub caij uas cheem tsum. (1 Petus 2:17) Ib tug muam hauv Nyiv Pooj teb tau pom tim ntsej tim muag li ntawd. Nyob rau xyoo 2011, tau muaj av qeeg tom plawv hiavtxwv ze Nyiv Pooj teb. Dej hiavtxwv ntas loj heev tuaj kuav lub nroog  nws nyob. Tus muam ntawd hais tias thaum nws pom cov kwvtij nkauj muam tuaj lwm lub zos thiab lwm tebchaws tuaj kho vaj kho tsev thiab kho cov Tsev Nceeg Vaj mas “txhawb thiab nplig” tau nws siab heev. Nws hais ntxiv tias: “Thaum raug tej txwm txheej no, kuv mam pom tias Yehauvas yeej mob siab peb kawg li. Cov Timkhawv los ib leeg mob siab heev txog ib leeg. Cov kwvtij viv ncaus thoob ntiajteb los kuj thov Vajtswv pab peb thiab.”

14. Peb pab tau cov laus thiab cov muaj mob ntsuav li cas?

¹⁴ Pab cov laus thiab cov muaj mob ntsuav. Thaum peb pom cov laus thiab cov muaj mob ntsuav, peb yeej hlub tshua lawv kawg li. Peb xav pom hnub uas tsis muaj kev txom nyem li lawm, peb thiaj thov kom Vajtswv lub Nceeg Vaj los. Tiamsis ua ntej Vajtswv lub Nceeg Vaj los, cia peb rau siab pab cov muaj mob thiab cov laus. Muaj ib tug txivneej tau sau txog nws niam. Nws niam mob Axaimaw (Alzheimer), ua rau nws tsis nco qab mus siv tsev dej ces lo tej khaub ncaws tag. Thaum tabtom muaj li ntawd, ob tug muam txawm mus txog. Nkawd pheej mus xyuas nws niam tsis tu ncua. Nkawd thiaj thov cia nkawd pab tu nws. Nws niam hais tias: “Kuv txaj muag heev tiamsis ua tsaug neb pab kuv.” Tom qab ntawd, nkawd kuj nrog nws nyob tham pem thiab haus mentsis dej, nkawd mam mus lawm. Tus txivneej kuj ua nkawd tsaug thiab hais tias cov Timkhawv “ua raws  nkaus li tej uas lawv qhia.” Koj puas khuvleej cov laus thiab cov muaj mob ntsuav es pab lawv npaum li koj pab tau?​—Filipi 2:3, 4.

15. Yog peb tshaj tawm txoj xov zoo, yuav pab tau lwm tus li cas?

¹⁵ Pab tibneeg los paub Yehauvas. Yog peb qhia tibneeg txog Vajtswv thiab nws lub Nceeg Vaj, yuav pab tau lawv tiag. Peb kuj pab tau lawv pom tias yog lawv xyaum raws li Yehauvas tej lus qhia ces lawv yuav tau lub neej zoo tshaj plaws. (Yaxaya 48:17, 18) Thaum peb tshaj tawm txoj xov zoo, peb qhuas Yehauvas thiab qhia tias peb khuvleej luag lwm tus. Yog li ntawd, koj puas ua tau ntau zog ntxiv los mus tshaj tawm txoj xov zoo?​—1 Timaute 2:3, 4.

16. Yog peb khuvleej luag lwm tus yuav pab tau peb li cas?

¹⁶ Thaum peb khuvleej luag kuj pab tau peb thiab. (Efexau 4:31, 32) Cov neeg tshawb fawb txog tej kev nyuaj siab pom tias yog peb khuvleej luag peb yuav noj qab nyob zoo thiab muaj kev sib raug zoo nrog lwm tus dua. Thaum peb pab cov raug kev txom nyem, peb yuav zoo siab, muaj kev vam, thiab tsis kho siab ua luaj twg. Thaum peb muaj lub siab dawb paug pab lwm tus, peb yuav kaj siab vim peb ua raws li Yehauvas tau cob qhia peb. Yog peb muaj lub siab khuvleej luag peb yuav txawj hlub peb tus txij nkawm, peb tej metub menyuam, thiab peb tej phoojywg kwvluag. Tsis tas li ntawd xwb, thaum peb muaj kev nyuaj siab los lwm tus yuav khuvleej thiab nplig peb.​—Nyeem Mathai 5:7; Luka 6:38.

17. Vim li cas peb thiaj khuvleej luag lwm tus?

¹⁷ Puas yog peb khuvleej luag kom peb tau zoo xwb? Tsis yog. Peb khuvleej luag vim peb xav xyaum Yehauvas thiab xav kom lwm tus qhuas nws. Yehauvas yog tus muaj kev hlub thiab kev khuvleej loj dua ntais. (Paj Lug 14:31) Nws tso tus qauv zoo tshaj plaws rau peb xyaum. Yog li ntawd, cia peb xyaum nws es khuvleej luag lwm tus. Yog peb ua li ntawd peb yuav nrog tau cov kwvtij nkauj muam sawvdaws sib raug zoo.​—Kalatia 6:10; 1 Yauhas 4:16.