1. Kev Txij Nkawm

Tib neeg nyias xav lawm nyias ib yam txog txoj kev ua txij ua nkawm tias nyias yuav ua li cas lub neej thiaj ruaj khov.

TUS NRU LUS: Vajtswv yog tus tsim txoj kev sib yuav. Yog li, nws paub tias ib khub niam txiv yuav tsum ua li cas, nkawd thiaj muaj kev zoo siab. (Malakaus 10:6-9) Ib leeg yuav tsum xam pom ib leeg thiab ib leeg yuav tsum pab ib leeg, ua li no txoj kev txij nkawm thiaj li ruaj khov. Ib tug txiv uas hlub nws tus poj niam, yuav ua zoo thiab saib xyuas nws tus poj niam. Thiab ib tug poj niam uas hwm nws tus txiv yuav txhawb thiab hais lus saib taus nws tus txiv.

PAB TAU LEEJ TWG: Muaj ib khub niam txiv uas nyob teb chaws Nyab Laj hu ua Kuam thiab This. Nkawd tsis muaj kev zoo siab li. Kuam hais li no tias: “Kuv tsis txawj xav. Kuv hais tej lus uas rhuav kuv tus poj niam xwb.” Nws tus poj niam thiaj xav nrauj nws. Niam Kuam hais tias: “Kuv cia li tsis tso siab rau kuv tus txiv thiab kuv tsis xav hwm nws li lawm.”

Thaum Kuam nkawd ob niam txiv kawm phau Vajlugkub, nkawd thiaj coj raws li nqe Vajlugkub nyob hauv Efexus 5:33 hais. Kuam hais tias: “Nqe Vajlugkub no pab tau kuv kom ua siab zoo, hlub kuv tus poj niam, thiab nrhiav rau nws noj nws haus. Thaum kuv ua li no, kuv tus poj niam thiaj hlub thiab hwm kuv.” Niam Kuam hais tias: “Thaum kuv ua raws li Efexus 5:33 hais es hwm kuv tus txiv, nws thiaj li txawj hlub thiab tsom kwm kuv, wb thiaj tsis muaj teeb meem lawm.”

 2. Saib Taus Lwm Tus

Ntau zaus tib neeg saib tsis taus lwm leej lwm tus vim lawv yog lawv ib haiv neeg, lawv nqaij tawv thiab tej tsoos tsho zoo sib txawv, lawv muaj lawv ib txoj kev ntseeg, los sis lawv yog ib tug uas poj niam nyiam poj niam los sis txiv neej nyiam txiv neej.

TUS NRU LUS: Phau Vajlugkub tsis qhia kom peb xaiv ntsej xaiv muag thiab ntxub lwm leej lwm tus txawm tias lawv yog haiv neeg twg, lawv muaj lawv pluag, los sis lawv yog ib tug neeg uas poj niam nyiam poj niam los yog txiv neej nyiam txiv neej. Tiam sis phau Vajlugkub qhia kom peb saib taus txhua leej txhua tus. (Tes Haujlwm 10:34) Txawm tias peb tsis ntseeg li lawv ntseeg los sis tsis coj li lawv coj, peb yeej tseem saib taus lawv thiab ua zoo rau lawv.​—Mathais 7:12.

PAB TAU LEEJ TWG: Muaj ib tug txiv neej hu ua Daniyees, luag ib txwm qhia rau nws tias cov neeg Axias tuaj txeeb nws lub teb lub chaw nyob. Nws thiaj li ntxub cov neeg Axias thiab hais lus saib tsis taus lawv. Nws hais tias, “Kuv xav tias qhov uas kuv ua ntawd yeej tsis phem ua luaj twg thiab yog ua los tiv thaiv kuv lub teb chaws xwb.”

Thaum Daniyees kawm Vajlugkub, nws thiaj li hloov nws txoj kev xav. Nws hais tias, “Kuv yuav tsum saib tib neeg li Vajtswv saib, thiab txawm yog lawv yog haiv neeg twg los, yeej tsis muaj ib tug zoo tshaj ib tug.” Daniyees hais ntxiv tias, “Nim no thaum kuv ntsib lwm haiv neeg, kuv tsis xav txog tias lawv tuaj qhov twg tuaj lawm. Kuv saib taus txhua tus thiab kuv kuj muaj tej phooj ywg uas tuaj ntau lub teb chaws tuaj.”

 3. Nyiaj Txiag

Muaj coob tus siv zog khwv kom lawv muaj txiag nplua nuj lawv thiaj li tau lub neej zoo.

TUS NRU LUS: Muaj tseeb tias peb yuav tsum muaj nyiaj siv, tiam sis nyiaj txiag yuav muab tsis tau ib lub neej nyob kaj siab lug mus li. (Pajlug 18:11; 23:4, 5) Yuav kom muaj kev zoo siab thiab tau ib lub neej zoo tiag, yuav tsum yog peb coj raws li Vajtswv tej lus uas hais nyob hauv phau Vajlugkub.​—1 Timautes 6:17-19.

PAB TAU LEEJ TWG: Ib tug txiv neej hu ua Khodaus (Cardo) nyob teb chaws Idaunixias (Indonesia) siv zog khwv heev kom nws muaj txiag nplua nuj. Nws hais tias, “Kuv mus ncig ntau lub teb chaws, yuav tej khoom kim kim, yuav ntau lub tsheb thiab yuav ntau lub tsev. Tiam sis muaj ib tug neeg dag ntxias kuv thiab txeeb kuv tej nyiaj uas kuv siv zog khwv tag nrho mus lawm. Kuv twb khwv ciaj khwv tuag tau ntau xyoo kom muaj txiag nplua nuj los, thaum kawg kuv tseem plam txhua yam tag, ua rau kuv saib kuv tus kheej tsis muaj nqis thiab ua lub neej qhuav qhawv xwb.”

Khodaus kawm Vajlugkub thiab coj raws li tej uas nws kawm. Nws thiaj li tsis xav txog kev muaj txiag nplua nuj lawm, tsuav yog nws muaj txaus noj txaus haus xwb. Nws hais tias, “Nim no kuv muaj ib txoj kev sib raug zoo nrog Vajtswv mas yog ib lub neej uas zoo tshaj plaws. Kuv tsis muaj kev txhawj xeeb thiab kuv pw taus tsaug zog lawm.”

 4. Kev Ua Nkauj Ua Nraug

Thaum hais txog kev ua nkauj ua nraug, nyias xav lawm nyias ib yam tias qhov twg yog qhov zoo thiab qhov twg yog qhov tsis zoo.

TUS NRU LUS: Phau Vajlugkub qhia tias peb yuav tsum paub tswj peb lub siab. Thaum phau Vajlugkub hais txog “ua kev nkauj kev nraug,” kuj yog hais txog deev luag poj luag txiv, muag cev, sib daj sib dee ua ntej sib yuav, poj niam deev poj niam, txiv neej deev txiv neej, thiab tib neeg deev tsiaj. (1 Kauleethaus 6:9, 10) Txoj kev pw ua niam txiv, Vajtswv tsuas yog pub rau tus txiv neej thiab tus poj niam uas sib sau los ua ib cuab ib yig lawm xwb.​—Pajlug 5:18, 19.

PAB TAU LEEJ TWG: Muaj ib tug poj niam hu ua Khailis (Kylie) nyob teb chaws Auxitalia (Australia). Nws hais tias, “Thaum kuv tseem ua hluas nkauj, kuv xav tias yog kuv nrog ib tug txiv neej pw ces nws yuav hlub kuv thiab kuv yuav muaj kev sov siab. Tiam sis tsis muaj li ntawd. Ua rau kuv puas siab puas ntsws thiab ua rau kuv nyuaj siab xwb.”

Thaum Khailis kawm Vajlugkub thiab paub tias Vajtswv Txoj Lus qhia li cas txog kev ua nkauj ua nraug, nws hais tias, “Vajtswv tej kev cai yog los tiv thaiv kuv kom kuv thiaj tsis mob siab thiab pab tau kuv hloov kuv lub neej. Vim kuv ua haum Vajtswv Yehauvas siab, kuv nrhiav tau ib tug txiv uas hlub thiab saib taus kuv.”