Lawv piv txog cov tub rog saum ntuj ceeb tsheej uas nrog muab lub nroog Yeluxalees txheej thaum ub rhuav tshem. Lawv kuj yuav nrog muab Xatas lub qab ntuj no rhuav tshem thaum txog Amakedoo thiab. Yav tas los, peb tau muab Exekhee zaj yog toog txhais txawv qhov no. Ua cas peb ho muab hloov?

Yehauvas ua rau Exekhee ua yog toog pom tej uas yuav muaj tshwm sim ua ntej lub nroog Yeluxalees raug rhuav tshem xyoo 607 U.Nt.Y. Hauv zaj yog toog ntawd muaj tej kev phem puv ntia lub nroog. Nws pom muaj 6 tus txivneej nqa “cuab yeej tua neeg” ntawm tes. Kuj muaj ib tug txivneej hnav ntaub mag nqa tus “twj siv sau ntawv” nrog lawv. (Exekhee 8:6-12; 9:2, 3) Muaj lus sam hwm kom tus txivneej ntawd mus thoob plaws lub nroog Yeluxalees, mus “ntaus cim rau tej neeg lub hauv pliaj, yog cov uas quaj ncia dhawv tu siab rau tej kev qias vuab tsuab” hauv lub nroog. Tom qab ntawd 6 tus txivneej uas nqa cuab yeej tua neeg mam li los tua tag nrho cov neeg uas tsis muaj lub cim ntawd. (Exekhee 9:4-7) Zaj yog toog no qhia peb li cas? Tus txivneej uas nqa tus twj siv sau ntawv yog leejtwg?

Exekhee ua zaj yog toog no rau xyoo 612 U.Nt.Y. Tsib lub xyoos tom qab ntawd xwb tau muaj raws nkaus li Exekhee tau pom. Thaum ntawd Yehauvas cia cov neeg Npanpiloo tuaj rhuav lub nroog Yeluxalees, los rau txim rau nws haiv neeg tawv ncauj. (Yelemi 25:9, 15-18) Tiamsis Yehauvas cawm cov Yudai uas mloog lus.

 Hauv zaj yog toog no, Exekhee tsis yog tus mus ntaus cim rau tibneeg. Nws kuj tsis nqes tes rhuav tshem lub nroog. Tiamsis Yehauvas yog tus sam hwm kom cov tubtxib saum ntuj saib xyuas tes haujlwm rhuav tshem lub nroog Yeluxalees. Nws kuj sam hwm kom lawv tiv thaiv cov ncaj ncees, xwv lawv thiaj tsis raug puam tsuaj. * Zaj lus faj lem no pab peb pom tej uas tau muaj tshwm sim saum ntuj.

Zaj lus faj lem no tseem yuav muaj tiav rau yav tom hauv ntej. Yav tas los peb qhia tias tus txivneej uas nqa tus twj siv sau ntawv piv txog cov xaiv tseg uas tseem muaj sia nyob hauv ntiajteb. Peb xav tias thaum cov xaiv tseg mus tshaj tawm es muaj neeg los ntseeg, ces twb yog lawv ntaus cim rau cov neeg ntawd ntag. Tiamsis peb ho tshawb pom tias yuav tau muab zaj no txhais dua tshiab. Mathai 25:31-33 qhia tias Yexus thiaj yog tus uas txiav txim rau tibneeg. Thaum txog lub caij muaj kev ceeblaj txom nyem loj kawg li, nws mam li txiav txim. Thaum ntawd cov uas Yexus suav ua nws pab yaj yuav dim, tiamsis cov uas yog tshis yuav raug rhuav tshem.

Yog li ntawd, Exekhee zaj yog toog qhia peb txog 5 lub ntsiab no:

1.  Exekhee, Yelemi, thiab Yaxaya zoo li cov neeg faj xwm. Lawv tau ceeb toom sawvdaws ua ntej Yeluxalees raug rhuav tshem. Niaj hnub no, Yehauvas kuj xaiv ib pawg kwvtij tsawg tsawg ntawm cov xaiv tseg los qhia nws cov tibneeg thiab ceeb toom sawvdaws ua ntej lub caij muaj kev ceeblaj txom nyem loj kawg li pib. Lawv tsis yog cov uas ua tes haujlwm no xwb, tiamsis Vajtswv cov tibneeg txhua tus uas yog Khetos “cov tub qhe” yuav tsum mus ceeb toom tibneeg thiab.​—Mathai 24:45-47.

2.  Exekhee tsis yog tus ntaus cim rau cov uas yuav dim. Ib yam li ntawd, Vajtswv cov tibneeg tsis yog cov uas ntaus cim rau tibneeg. Lawv tsuas tshaj tawm txoj xov zoo thiab ceeb toom txog tej yam uas yuav los yav tom hauv ntej xwb. Twb yog muaj cov tub txib saum ntuj pab, tes haujlwm tshaj tawm txoj xov zoo thiaj tiav.—Qhia Tshwm 14:6.

3.  Nyob rau Exekhee tiam cov uas Vajtswv cawm dim tsis muaj ib lub cim tiag tiag ntaus saum lawv hauv pliaj. Ib yam li ntawd, cov uas Yehauvas cawm dim yuav tsis muaj ib lub cim tiag tiag thiab. Yog tibneeg xav kom Vajtswv cawm lawv dim, lawv yuav tsum ua raws li tej lus ceeb toom uas lawv hnov. Lawv yuav tau yoog Khetos, muab lawv tus kheej cob rau Vajtswv, thiab txhawb Khetos cov kwvtij mus tshaj tawm txoj xov zoo. (Mathai 25:35-40) Nyob rau lub caij muaj kev ceeblaj txom nyem loj kawg li, lawv mam tau lub cim uas qhia tias Vajtswv yuav cawm lawv dim.

4.  Tus txivneej uas nqa tus twj siv sau ntawv piv txog Yexus. Thaum Yexus txiav txim nyob rau lub caij muaj kev ceeblaj txom nyem loj kawg li, nws mam ntaus cim rau cov neeg coob coob uas nws suav ua nws cov yaj. Lawv yuav tau nyob mus ib txhis hauv lub ntiajteb no.​—Mathai 25:34, 46. *

5.  Niaj hnub no, 6 tug txivneej uas nqa cuab yeej tua neeg piv txog cov tub rog saum ntuj uas Yexus coj. Tshuav tsis ntev lawm xwb, lawv yuav los rhuav tshem tej tseem fwv thiab tej kev limhiam hauv lub qab ntuj no.​—Exekhee 10:2, 6, 7; Qhia Tshwm 19:11-21.

Zaj yog toog no pab kom peb tso siab tias Yehauvas yuav tsis tua cov neeg ncaj ncees nrog cov limhiam. (2 Petus 2:9; 3:9) Kuj pab kom peb nco ntsoov tias tes haujlwm tshaj tawm txoj xov zoo nyob rau peb tiam no tseem ceeb npaum li cas. Peb yuav tau ceeb toom txhua leej txhua tus ua ntej hnub kawg los txog!​—Mathai 24:14.