1, 2. (1) Yaxaya 60:22 tabtom muaj tiav li cas? (2) Yehauvas lub koom haum feem hauv ntiajteb no cheem tsum dabtsi?

“TUS uas yau kawg yuav tau ua ib xeem, tus uas me dhau yuav tau ua ib haiv neeg uas muaj hwjchim.” (Yaxaya 60:22) Cov lus ntawd tabtom muaj tiav tamsim no. Xyoo 2015, Yehauvas Cov Timkhawv muaj 8,220,105 leeg tshaj tawm txog lub Nceeg Vaj thoob lub qab ntuj khwb! Leejtwg yog tus txhawb nqa tes haujlwm no? Vajtswv hais tias: “Kuv yog [Yehauvas], thaum txog sijhawm kuv yuav maj nroos ua.” Yog li ntawd, Yehauvas yog tus pub tes haujlwm no rau peb. Nws tseem yuav muab haujlwm ntau tshaj no rau peb ua thiab. Ua li peb puas phwb tes tsog ua haujlwm? Peb puas kub siab tshaj tawm txoj xov zoo? Muaj coob leej ntau tus twb rau npe tho kev thiab rau npe pab tho kev lawm. Ib txhia tseem mus pab tshaj tawm rau lwm qhov thiab mus pab ua tej Tsev Nceeg Vaj.

² Txhua txhua xyoo cov kwvtij tsa txog li 2,000 lub koom txoos tshiab diam. Yuav kom saib xyuas tau cov koom txoos ntawd, ib xyoos twg yuav tsum muaj txhiab txhiab tus kwvtij nqes tes los tuav haujlwm ua txwj laus thiab ua tub leg num. Vim li no phau Vajlugkub thiaj nqua hu kom sawvdaws “cia li  ua tus Tswv tes haujlwm puv npo.” Tsis yog cov kwvtij thiaj muaj haujlwm ua xwb, cov muam kuj muaj haujlwm ntau kawg li thiab.​—1 Khaulee 15:58.

3, 4. Yog peb xav ua haujlwm ntau ntxiv rau Yehauvas, peb yuav tsum ua li cas?

³ Nyeem 1 Timaute 3:1. Tus tubtxib Povlauj qhuas cov kwvtij uas “xav ua tes haujlwm uas saib xyuas pawg ntseeg.” Muab ua piv txwv tias koj pom ib lub txiv ntxim qab kawg li dai siab heev saum ntoo, koj thiaj nrhiav kev los de kom tau lub txiv ntawd. Tej zaum koj nrhiav rooj tiag taw lossis nrhiav pas tshum kom poob los. Ib yam li ntawd, yog ib tug kwvtij xav tuav haujlwm ua ib tug tub leg num, nws yuav tsum coj li cas? Nws yuav tsum rau siab ntso nrhiav kev los kawm kom nws muaj tus cwj pwm uas tsim nyog ua ib tug tub leg num. Thaum nws ua ib tug tub leg num lawd, nws yuav tsum tau hau ntsoov nws tes haujlwm, nws thiaj tau los ua ib tug saib xyuas lub koom txoos.

⁴ Muaj kwvtij nkauj muam coob tus uas tau hloov lawv lub neej los ua Yehauvas tes haujlwm kom ntau ntxiv. Ib txhia rau npe ua ib tug tho kev, mus ua haujlwm hauv Npe-ee, lossis mus ua tej Tsev Nceeg Vaj. Cia peb kawm seb phau Vajlugkub pab tau peb li cas kom peb thiaj ua tau haujlwm ntau ntxiv rau Yehauvas.

5. Cov hluas siv lawv lub dag lub zog ua tej haujlwm twg hauv Yehauvas lub koom haum?

⁵ Cov hluas muaj lub dag lub zog ua ntau yam haujlwm hauv Yehauvas lub koom haum. (Nyeem Paj Lug 20:29.) Muaj ib co tau mus nyob hauv Npe-ee, mus pab luam ntaub luam ntawv Vajlugkub rau sawvdaws nyeem. Kuj muaj ib txhia pab kho thiab ua tej Tsev Nceeg Vaj rau sawvdaws siv. Muaj dua ib co ho mus pab cov kwvtij nkauj muam uas raug huab cua phem. Muaj ib co uas yog cov tho kev tau mus kawm lwm yam lus kom tau qhia lwm haiv neeg.

6-8. (1) Piav txog ib tug tub hluas seb nws xav li cas txog Vajtswv tes haujlwm thiab thaum kawg nws tau txais tej koob hmoov twg. (2) Peb yuav ua li cas saj thiab ‘pom tias Yehauvas zoo kawg li’?

⁶ Peb sawvdaws yeej hlub Yehauvas thiab xav ua nws tes haujlwm. Txawm li ntawd los, tej zaum peb ib txhia kuj xav li tus kwvtij Aaron [a·loos] thiab. Aaron ib txwm mus kev sib txoos thiab mus tshaj tawm txoj xov zoo txij thaum nws me los, tiamsis tsis lomzem rau nws li. Nws yeej xav ua Vajtswv tes haujlwm tiamsis ua cas nws pheej tsis muaj kev zoo siab. Aaron thiaj ua li cas?

⁷ Aaron rau siab ntso nyeem phau Vajlugkub tsis tu ncua. Nws kuj npaj rau cov kev sib txoos thiab tsa tes teb. Nws lauj sijhawm ntxiv los thov Vajtswv thiab. Tej no pab tau nws txojkev ntseeg loj hlob. Thaum nws yimhuab paub Yehauvas zoo zuj zus, ua rau nws yimhuab hlub Yehauvas xwb. Tej no ua rau Aaron zoo siab dua yav nram ntej. Nws thiaj rau npe ua ib tug tho kev. Nws tseem mus pab cov kwvtij uas raug cua daj cua dub. Nws kuj tau mus qhia Vajlugkub rau lwm tebchaws thiab. Nimno nws yog ib tug txwj laus thiab ua haujlwm hauv Npe-ee lawm. Aaron puas txaus siab rau nws lub neej? Nws hais tias: “Kuv tau saj thiab ‘pom tias Yehauvas zoo kawg li’ tiag. Vajtswv tau foom koob hmoov nplua mias rau kuv, kuv yeej yuav  pauj tsis tau nws li. Tej no ua rau kuv hajyam muaj siab ua Yehauvas tes haujlwm ntxiv. Kuv paub tias yog kuv yimhuab ua Yehauvas tes haujlwm, ces nws yimhuab foom koob hmoov rau kuv xwb.”

⁸ Tus sau nkauj hais tias: “Cia li sim saib thiab pom tias [Yehauvas] zoo kawg li.” Nws hais ntxiv tias: “Cov uas nrhiav [Yehauvas] tsis tu ncua ib yam zoo kiag li.” (Nyeem Ntawv Nkauj 34:8-10.) Yog li ntawd, thaum peb muab yam zoo tshaj pub rau Yehauvas, ua rau peb zoo siab kawg li rau qhov peb ua haum nws siab. Tsis tas li ntawd xwb, Yehauvas yeej yuav tsom kwm peb ib yam li nws tau cog tseg.

9, 10. Ua cas tseem ceeb rau peb ua siab ntev tos?

⁹ Tej zaum ib txhia xav ua haujlwm ntxiv rau Yehauvas, tiamsis twb tau ntev heev lawm lawv tsis tau raws li lawv siab xav. Muaj dua ib txhia ho muaj ntau yam los tab kaum, lawv thiaj ua tsis tau Yehauvas tes haujlwm ntxiv. Yog li ntawd, peb yuav tsum rub peb siab ntev tos. (Mikha 7:7) Txawm peb tsis tau tej uas peb lub siab ntshaw los, peb yeej tso siab tias Yehauvas yuav tsom kwm peb txoj hau kev. Aplahas tseg tau tus qauv zoo heev rau peb xyaum. Yehauvas cog lus tias Aplahas yuav muaj ib tug tub, tiamsis Aplahas thiab nws tus pojniam nkawd tos ntau xyoo tom qab ntawd nkawd mam li muaj Yiha. Lub sijhawm ntawd Aplahas ua siab ntev heev. Nws ntseeg ruaj nreeg tias Yehauvas yeej yuav ua raws li Nws tau cog tseg.​—Chiv Keeb 15:3, 4; 21:5; Henplais 6:12-15.

¹⁰ Yus ua tsis taus siab ntev li thaum yus tos ib yam uas yus lub siab ntshaw. (Paj Lug 13:12) Txawm li ntawd los, tsis txhob tag kev cia siab. Yog yus pheej xav tas zog txog tej yam uas yus tsis muaj, ces tsuas yuav ua rau yus qaug zog xwb. Zoo dua rau yus siv lub sijhawm ntawd los kho yus lub siab. Yeej meem xyaum coj tus cwj pwm zoo, thaum yus tau raws li yus siab xav lawd, yus thiaj txawj tuav haujlwm.

11. (1) Phau Vajlugkub tsav tau tswvyim rau peb li cas? (2) Qhov no pab tau peb li cas?

¹¹ Cia phau Vajlugkub tsav tswvyim rau peb, xwv peb thiaj paub tuav haujlwm. Thaum peb nyeem Vajlugkub thiab ua zoo xav txog tej ntawd, yuav tsav tswvyim rau peb kom peb xyuam xim. Peb yuav txawj muab tej uas peb txiav txim siab ua los luj seb puas tsim nyog ua. Cov uas tuav haujlwm saib xyuas lub koom txoos yuav tsum paub siv tswvyim li ntawd. (Paj Lug 1:1-4; Titau 1:7-9) Vim li no thiaj tseem ceeb heev rau peb siv sijhawm los kawm Vajlugkub kom peb paub txiav txim raws li Yehauvas lub tswvyim ua ntej peb tuav ib tes haujlwm twg. Tej uas peb kawm yuav pab peb ua haum Yehauvas siab. Peb yuav txawj xav txog luag lwm tus, txawj siv nyiaj txiag, txawj xaiv tej tsoos zoo, thiab txawj xaiv tej kev lomzem ua si.

12. Peb yuav coj li cas luag thiaj tso siab rau peb?

¹² Tau hau ntsoov ua tes haujlwm uas koj tau txais. Thaum Vajtswv cov tibneeg kho lub tuam tsev, Nehemi muab haujlwm rau cov txivneej ua, nyias ua nyias ib yam. Nehemi txib cov txivneej zoo li cas xwb? Nehemi tsuas txib cov uas nws tso siab tau xwb. Nws paub tias lawv hlub Vajtswv heev thiab lawv yuav rau siab ntso ua lawv tes haujlwm. (Nehemi 7:2; 13:12, 13) Niaj hnub no los kuj zoo ib yam li ntawd thiab. Yehauvas xav txib cov neeg nquag uas tau hau ntsoov ua lawv tes haujlwm. (1 Khaulee 4:2) Peb sawvdaws tsis hais  pojniam txivneej, yuav tsum rau siab ntso ua tes haujlwm uas luag muab rau peb ua.​—Nyeem 1 Timaute 5:25.

13. Yog lwm tus ua tsis ncaj rau peb, peb yuav xyaum Yauxej tus qauv li cas?

¹³ Tso siab plhuav rau Yehauvas. Yog lwm tus ua tsis ncaj rau koj, koj yuav ua li cas? Tej zaum koj yuav nrog tus neeg ntawd tham kom sib haum. Tiamsis yog koj pheej cav koj zaj ces tsuas yuav tsim teeb meem ntxiv xwb. Yauxej tso tau ib tug qauv zoo heev rau peb xyaum. Nws cov tijlaug ua tsis ncaj kiag li rau nws los nws tsis muab khaws chim. Tom qab no luag kuj hais lus dag kom nws, nws thiaj raug kaw hauv tsev loj cuj. Txawm li ntawd los Yauxej tso siab plhuav rau Yehauvas. Nws nco ntsoov Yehauvas tej lus cog tseg thiab nws tuav kev ntseeg ruaj nreeg. (Ntawv Nkauj 105:19) Tej kev nyuaj siab ntawd tsav tswvyim rau Yauxej thiab pab kom nws hajyam rub tau lub siab ntev. Tom qab no, Yauxej thiaj muaj tswvyim tuav ib tes haujlwm tseem ceeb heev hauv lub tebchaws. (Chiv Keeb 41:37-44; 45:4-8) Yog luag ua tsis ncaj rau peb, cia peb xyaum Yauxej es tso siab plhuav rau Yehauvas thiab thov kom Nws tsav tswvyim rau peb. Thaum peb mus nrog tus ua tsis ncaj rau peb tham, Yehauvas yuav pab peb muaj lub siab tus yees.​—Nyeem 1 Petus 5:10.

14, 15. (1) Ua cas peb yuav tsum rau siab ntso xyaum kom txawj qhia Vajlugkub ntxiv? (2) Koj yuav xyaum qhia Vajlugkub rau txojke twg? (Saib daim duab ntawm sab 15 thiab lub ntsiab me “ Koj Puas Xav Xyaum Lwm Txojkev Qhia Vajlugkub Thiab?”)

¹⁴ Povlauj hais kom Timaute rau siab ntso kawm nws thiaj txawj qhia txoj xov zoo. Povlauj hais tias: “Cia li ua tib zoo saib koj tus kheej thiab tej uas koj qhia.” (1 Timaute 4:13, 16) Thaum Povlauj hais cov lus no, Timaute twb tshaj tawm tau ntau xyoo lawm. Timaute tseem yuav xyaum qhia li cas ntxiv? Timaute paub tias tibneeg lub neej hloov tas zog. Yog li ntawd, nws yuav tsum xyaum tiag nws thiaj paub yoog lawv thiab txawj qhia kom raug lawv siab. Peb yuav tsum xyaum tiag peb thiaj paub yoog cov tibneeg uas peb mus qhia.

¹⁵ Thaum peb mus tshaj tawm, muaj tej koog tsev tsis muaj neeg nyob tsev li. Hos muaj tej koog tibneeg nyob tsev, tiamsis xauv laj kab zoo heev peb ho mus tsis tau. Yog tias koog uas koj nyob zoo li ntawd, yuav ua li cas koj thiaj qhia tau?

16. Peb yuav qhia Vajlugkub li cas ntawm tej thaj tsam uas neeg dua kev?

¹⁶ Cov kwvtij nkauj muam coob tus nyiam tshaj tawm txoj xov zoo ntawm tej tsheb nqaj, tej chaw tos npav, hauv tej kiab khw, thiab tom tej chaw uas neeg dhia taug kev ua si. Thaum peb pom tibneeg dua kev zoo rau peb hu lawv. Yog lawv muaj sijhawm ces zoo rau peb nrog lawv sib zeem. Yog lawv coj menyuam tuaj taug kev ua si, zoo rau peb qhuas txog lawv cov menyuam thiab. Yog zoo nug ces nug seb lawv ua haujlwm dabtsi lossis tham txog tej xov xwm tshiab. Yog lawv zoo siab nrog peb tham pem ces ua zoo xav seb yuav muab lub ntsiab twg hauv phau Vajlugkub los qhia rau lawv. Nug seb lawv puas nyiam lub ntsiab ntawd thiab. Ntau zaus tibneeg kuj xav paub ntxiv txog phau Vajlugkub.

17, 18. (1) Peb yuav ua li cas peb thiaj muaj lub siab tawv tshaj tawm ntawm tej kev? (2) Davi cov lus txhawb tau koj li cas thaum koj mus tshaj tawm?

¹⁷ Tej zaum tsis yoojyim rau ib txhia nrog tibneeg tham pem ntawm tej kev. Muaj ib tug kwvtij hu ua Eddie [e·dim] uas hais tias nyuaj heev rau nws. Nws yog ib tug tho kev uas nyob hauv lub nroog loj New York City [nws yauj xi·ti]. Ua cas Eddie thiaj ua taus siab tawv mus tshaj tawm rau tibneeg lawd? Nws hais tias: “Hmo uas kuv pojniam wb pe hawm Vajtswv ua ke, wb siv sijhawm los tshawb nrhiav seb tibneeg kheev nug txog tej yam zoo li cas, ces wb mam li tshawb fawb seb yuav teb lawv li cas. Wb kuj nug seb lwm cov Timkhawv ho teb tibneeg li cas.” Nimno Eddie nyiam qhia Vajlugkub hauv tej thaj chaw uas tibneeg dua kev lawm.

¹⁸ Thaum peb nyiam mus tshaj tawm txoj xov zoo thiab xyaum kom peb hajyam txawj qhia Vajlugkub, lwm tus yuav pom tias peb tes haujlwm zoo zuj zus ntxiv lawm tiag. (Nyeem 1 Timaute 4:15.) Tej zaum peb kuj pab tau lwm tus los teev tiam Yehauvas thiab. Davi hais tias: “Kuv . . . khav txog [Yehauvas]. Cia cov uas raug kev txom nyem tau hnov thiab zoo siab.”​—Ntawv Nkauj 34:1, 2.

19. Txawm cov Timkhawv ib txhia muaj lub neej nyuaj heev los, ua cas lawv tseem muaj kev zoo siab?

¹⁹ Davi kuj hais tias: “Au [Yehauvas], txhua yam uas koj tsim los yuav ua koj  tsaug, thiab koj cov neeg dawb huv sawvdaws yuav qhuas koj. Lawv yuav hais txog koj lub meej mom uas koj ua vajntxwv kav, thiab piav txog koj lub hwjchim, kom neeg tej tub thiaj paub txog koj tej haujlwm uas muaj hwjchim thiab koj lub meej mom uas ua vajntxwv kav.” (Ntawv Nkauj 145:10-12) Cov uas hlub Yehauvas thiab muab siab npuab nws yeej xav qhia Nws rau lwm tus. Tiamsis yog koj muaj mob muaj nkeeg lossis koj laus heev lawd, tej zaum koj yuav mus qhia tsis tau raws li koj lub siab nyiam. Txawm li cas los nco ntsoov tias txhua zaus uas koj nrog ib tug neeg ua haujlwm hauv tsev kho mob tham txog Yehauvas ces twb yog koj qhuas txog Vajtswv Yehauvas ntag. Yog koj raug kaw hauv tsev loj cuj los, koj kuj qhia tau cov neeg uas raug kaw nrog koj thiab. Qhov uas koj qhia Vajlugkub li no twb ua rau Yehauvas zoo siab heev lawm. (Paj Lug 27:11) Tsis tas li ntawd xwb, yog koj ib leeg los teev tiam Yehauvas hauv koj tsev neeg xwb, Yehauvas kuj txaus siab heev rau koj. (1 Petus 3:1-4) Txawm nyuaj heev los, peb sawvdaws yeej qhuas tau Yehauvas. Peb yeej muaj cuab kav txav ze rau Yehauvas thiab ua haujlwm ntxiv rau nws.

20, 21. Yog lub koom haum muab haujlwm ntxiv rau koj, koj pab tau lwm tus li cas?

²⁰ Yehauvas yeej yuav foom koob hmoov rau koj yog koj txav ze rau nws thiab siv tag nrho koj lub dag lub zog los teev tiam nws. Tej zaum koj yuav tau luj koj lub sijhawm zoo zoo. Yog koj ua li ntawd, koj yuav muaj sijhawm ntau ntxiv mus qhia Vajtswv tej lus cog tseg rau lwm tus. Koj tseem yuav muaj sijhawm mus pab koj cov kwvtij nkauj muam thiab. Xav seb koj cov kwvtij yuav zoo siab npaum li cas thaum lawv pom koj siv zog ua haujlwm hauv lub koom txoos.

²¹ Txawm peb twb teev tiam Yehauvas tau ntau xyoo lawm los, peb txhua tus yuav tsum txav ze zuj zus rau Yehauvas. Peb nrhiav kev los ua haujlwm ntau ntxiv rau Yehauvas. Nyob rau lwm zaj peb yuav kawm seb peb yuav pab lwm tus tuav haujlwm ntxiv rau Yehauvas li cas.