Cov Niam Txiv—Saib Xyuas Nej Cov Menyuam
“Koj yuav tsum paub koj . . . pab yaj nyob zoo li cas.”—PAJ LUG 27:23.
1, 2. (1) Cov tswv yug yaj tes haujlwm zoo li cas? (2) Cov niam txiv thiab tus tswv yug yaj tes haujlwm zoo sib xws li cas?
COV tswv yug yaj uas nyob tebchaws Yixayee thaum ub ua haujlwm tiv tshav tiv nag los tu lawv pab yaj. Lawv tiv thaiv pab yaj tsam muaj tsiaj qus tom los yog tub sab nyiag. Lawv ua tib zoo soj ntshis seb puas muaj ib tug muaj mob lossis raug mob qhovtwg. Lawv kuj ua tib zoo tu cov menyuam yaj, rau qhov cov menyuam tsis muaj zog npaum li cov laus.—Chiv Keeb 33:13.
2 Cov Khixatia yuav tsum tu lawv tej menyuam ib yam li tus tswv yug yaj tu nws pab yaj. Lawv yuav tsum cob qhia lawv cov menyuam raws li Yehauvas tau sam hwm tseg. (Efexau 6:4) Tes haujlwm no yeej tsis yoojyim kiag li! Xatas niaj hnub nrhiav tswvyim los haub ntxias peb cov menyuam. Tsis tas li ntawd xwb, peb cov menyuam yog neeg txhaum ib yam li peb, yog li ntawd lawv kuj tu ncua ntau yam thiab. (2 Timaute 2:22; 1 Yauhas 2:16) Koj yuav ua li cas pab tau lawv? Cia peb kawm txog 3 yam uas yuav pab tau koj cov menyuam: (1) Koj yuav tsum paub lawv zoo; (2) Tsav kev ntseeg rau lawv; thiab (3) Cob qhia lawv ua neej.
PAUB KOJ COV MENYUAM
3. Cov niam txiv yuav tsum ua li cas lawv thiaj paub zoo txog lawv cov menyuam?
3 Tus tswv yug yaj uas zoo ua tib zoo tshuaj nws cov yaj ib tug zuj zus, seb lawv puas nyob zoo. Phau Vajlugkub hais tias: “Koj yuav tsum paub koj . . . pab yaj nyob zoo li cas.” (Paj Lug 27:23) Cov ua niam ua txiv, koj yuav tsum paub zoo txog koj cov menyuam thiab. Ua tib zoo ntsuas seb koj tus menyuam coj li cas, thiab paub nws lub siab. Yuav ua li cas koj thiaj paub koj tus menyuam lub siab? Koj yuav tau siv sijhawm nrog koj tus menyuam tham pem.
4, 5. (1) Cov niam txiv yuav tau ua li cas menyuam thiaj qhia siab? (Saib daim duab ntawm sab 17.) (2) Nej cov ua niam ua txiv, tau ua li cas nej cov menyuam thiaj qhia siab rau nej?
4 Thaum menyuam tseem yau tej zaum lawv qhia txhua yam rau lawv niam lawv txiv. Tiamsis thaum tiav hluas lawd, ib txhia menyuam tsis qhia siab li qub. Yog tias koj tus menyuam zais siab li no, koj yuav ua li cas? Puas yog koj yuav yuam kom nws nrog koj zaum tham pem ntev loo? Puas yog neb yuav tsum tham tej yam tseem ceeb xwb? Tsis yog. Koj yuav tsum siv sijhawm nrog nws ua ke, taug kev ua si, lossis txib kom nws nrog koj ua ub ua no. Thaum neb tabtom ua tej ntawd, koj mam li nrog nws tham pem. Yog tias ua li no, koj tus menyuam thiaj xav qhia siab rau koj.—Kevcai 6:6, 7.
5 Yog tias koj twb xyaum li no, tiamsis koj tus menyuam tseem tsis qhia siab rau koj thiab, koj yuav ua li cas? Siv tswvyim los nrhiav lwm txoj kev. Piv txwv li no, thaum koj tus menyuam kawm ntawv los txog tsev, zoo rau koj xub qhia nws txog tej yam uas koj tau ua rau hnub ntawd. Yog koj xub qhia ua ntej, tej zaum nws yuav qhia siab rau koj thiab. Ua li thaum koj xav paub seb koj tus menyuam xav li cas txog ib yam twg, koj ho yuav nug nws li cas? Tsis txhob nug tsi ntsees rau nws tsam nws txaj muag. Tiamsis nug ua ntej seb nws cov npoj xav li cas txog yam ntawd. Thaum nws cov npoj ho nug nws txog yam ntawd, nws yuav teb lawv li cas.
6. Koj yuav ua li cas ntxiv koj cov menyuam thiaj qhia siab rau koj?
6 Koj yuav ua li cas ntxiv koj cov menyuam thiaj qhia siab rau koj? Tseem ceeb rau koj lauj sijhawm nrog lawv ua ke. Yog tias koj ua ib tug tsis khoom li, thaum lawv muaj teeb meem lawv yuav tsis los cuag koj. Tsis tas li ntawd xwb, lawv puas pom tias koj yog ib tug neeg uas yoojyim hais lus? Thaum lawv nrog koj tham, txhob chim sai, ua tib zoo mloog lawv hais. Txhob saib lawv tej teeb meem zoo li tej yam me me uas tsis muaj qabhau dabtsi. Ib tug hluas muaj 19 xyoos hu ua Kayla hais tias: “Kuv qhia txhua yam rau kuv txiv. Nws tsis txiav kuv lus, nws ua tib zoo mloog thiab tsis maj txiav txim rau kuv. Tom qab kuv hais tas nws mam qhia tswvyim rau kuv, pab tau kuv heev.”
7. (1) Cov niam txiv yuav qhia menyuam txog kev nrhiav txij nkawm li cas? (2) Yog tias niam txiv tsis ua tib zoo hais lus, yuav xeeb txob menyuam li cas?
7 Koj yuav tau qhia koj cov menyuam txog tej yam xws li kev nrhiav txij nkawm. Yeej tsis yoojyim, tiamsis thaum koj qhia lawv nco ntsoov tsis txhob hem kom lawv ntshai xwb. Piv txwv li no, yog tias koj mus yuav zaub tom khw tiamsis koj tsuas pom rhais ntawv pawg lug kom ceev faj tej qub zaub uas noj mob plab, koj puas kam yuav cov zaub ntawd? Koj yeej yuav tawm mus yuav lwm qhov xwb. Thaum koj nrog koj cov menyuam tham, yog tias koj tsuas hem lawv xwb, ces yuav xeeb txob lawv thiab lawv yuav tsis kam los cuag koj ntxiv lawm. (Nyeem Khaulauxi 3:21.) Tseem ceeb rau cov niam txiv paub luj seb yuav qhia li cas. Muaj ib tug ntxhais hluas hu ua Emily tau hais tias: “Thaum kuv niam kuv txiv qhia kuv txog kev nrhiav txij nkawm, nkawd tsis hais rau seem phem. Nkawd qhia tias lub caij nrhiav txij nkawm zoo siab kawg li. Twb yog vim li ntawd, kuv thiaj tsis txaj muag nrog nkawd tham. Yog kuv lam nrhiav tau phoojywg, kuv yuav qhia rau kuv niam kuv txiv paub thiab. Kuv yuav tsis zais siab.”
8, 9. (1) Vim li cas zoo rau cov niam txiv ua siab ntev mloog tsis txhob txiav menyuam cov lus? (2) Thaum koj mloog koj cov menyuam hais, pab tau neb li cas?
8 Koj tus menyuam yuav pom tias koj yog ib tug neeg yoojyim hais lus yog tias koj ua siab ntev mloog nws hais. (Nyeem Yakaunpau 1:19.) Katia yog ib txhais yim neeg xwb. Nws tau hais li no: “Yav tas los, kuv siab tsis ntev kiag li rau kuv tus ntxhais. Kuv txiav nws lus tas zog. Kuv ceeb ceeb laj mloog nws hais tas thiab tsis xav kom nws tab kaum kuv lub sijhawm. Tiamsis nimno kuv hloov kuv tus cwj pwm lawm, kuv tus ntxhais thiaj hloov lawm thiab. Nws mloog lus dua yav tas los lawm.”
Mloog koj thiaj paub menyuam (Saib nqe 3-9)
9 Muaj ib leej txiv npe hu ua Ronald tau hais li no txog nws tus ntxhais: “Thaum kuv tus ntxhais qhia rau kuv tias nws nyiam ib tug tub hluas tom tsev kawm ntawv, ua rau kuv npau taws heev. Tiamsis kuv muab xav rau Yehauvas, tias nws yog ib tug Vajtswv uas ua siab ntev rau nws cov tub qhe. Kuv mam li xav tias kuv yuav tsum txhob maj ntuas kuv tus ntxhais, cia nws hais tas tso. Kuv zoo siab kawg li uas kuv cia nws hais ua ntej. Nov yog thawj zaug uas kuv to taub kuv tus ntxhais. Thaum kuv mloog nws hais tas, kuv thiaj ua taus siab ntev teb nws. Kuv tus ntxhais cav mloog kuv hais thiab, ua rau kuv xav tsis thoob li. Nws kuj hais tias nws yuav hloov nws tus cwj pwm tiag tiag.” Yog li ntawd, zoo rau nej cov ua niam ua txiv siv sijhawm los nrog nej cov menyuam tham pem, nej thiaj paub nej cov menyuam lub siab. Thaum lawv txiav txim siab ua ib yam dabtsi lawv yuav los cuag nej. *—Saib cov lus hauv qab taw qhia.
TSAV KEV NTSEEG RAU LAWV
10, 11. Koj yuav ua li cas thiaj pab tau koj cov menyuam tuav rawv qhov tseeb?
10 Thaum ib tug tswv yug yaj coj nws pab yaj mus nog zaub, tej zaum muaj ib tug yaj yuav pla zuj zus ntawm pab yaj mus. Yog tsis ua zoo saib, tib pliag xwb tus yaj ntawd twb poob zoo lawm. Tej menyuam los zoo tib yam li ntawd. Tej zaum lawv mus zeem tau tej phoojywg tsis zoo lossis lawv lub siab ntshaw tej kev lomzem uas tsis zoo. Yog tsis ceev faj ces ntev mus lawv kuj tso tau qhov tseeb tseg thiab. (Paj Lug 13:20) Yog li ntawd, koj yuav tiv thaiv koj cov menyuam li cas?
11 Thaum koj qhia koj cov menyuam, zoo rau koj tsom tej yam zoo uas lawv txawj ua. Cia li txhawb kom lawv hajyam ua tau zoo dua qhov qub ntxiv. Tiamsis yog koj ho pom tej yam uas lawv tu ncua, qhia lawv tamsim ntawd lawv thiaj hloov tau. (2 Petus 1:5-8) Qhia koj cov menyuam rau lub caij uas koj tsev neeg pe hawm Vajtswv ua ke. Daim Tes Num Askiv lub 10 Hli xyoo 2008 qhia tias: “Zoo rau cov txiv tsev tuav tes haujlwm uas Yehauvas muab cob rau lawv ua. Lawv yuav tsum coj tsev neeg kawm Vajlugkub ua ke tsis tu ncua.” Koj puas siv lub sijhawm no los mus saib xyuas koj cov menyuam? Yog tias koj mob siab koj cov menyuam, lawv yeej yuav nco koj txiaj ntsig.—Mathai 5:3; Filipi 1:10.
Tsav kev ntseeg rau lawv (Saib nqe 10-12)
12. (1) Thaum tsev neeg pe hawm Vajtswv ua ke, pab tau cov hluas li cas? (Mus saib lub ntsiab me “ Lawv Nco Txiaj Ntsig.”) (2) Thaum koj tsev neeg pe hawm Vajtswv ua ke, pab tau koj li cas?
12 Ib tug ntxhais hluas hu ua Carissa thiab nws tsev neeg pe hawm Vajtswv ua ke tsis tu ncua. Nws hais tias: “Kuv nyiam thaum peb tsev neeg los zaum ua ke tham pem, kuv yuav nco lub sijhawm no mus li. Kuv txiv npaj sijhawm rau peb tsev neeg pe hawm Vajtswv ua ke tsis tu ncua. Twb yog kuv txiv saib txojkev kawm no tseem ceeb heev, kuv thiaj pom qhov ntawd tseem ceeb thiab. Qhov no kuj pab kom kuv hajyam saib taus kuv txiv ua peb lub taubhau, thiab ua tus coj peb ntawm sab kev ntseeg.” Muaj dua ib tug ntxhais hu ua Brittney hais tias: “Twb yog peb tsev neeg pe hawm Vajtswv ua ke, kuv niam thiab kuv txiv peb thiaj sib raug zoo heev. Kuv pom tias thaum kuv ntsib teeb meem, nkawd yeej xav pab kuv tiag. Txojkev kawm no ua rau peb tsev neeg nyob ruaj khov, koom tau ib lub siab.” Yog li ntawd, cov ua niam ua txiv yuav tsum muaj lub hom phiaj los pab kom lawv cov menyuam hlub Yehauvas. Yuav ua li cas cov niam txiv thiaj ua tau raws li lub hom phiaj ntawd? Tsev neeg yuav tsum pe hawm Vajtswv ua ke. *—Saib cov lus hauv qab taw qhia.
COJ LAWV TXOJ HAU KEV
13. Yuav ua li cas menyuam thiaj xav teev tiam Yehauvas?
13 Tus tswv yug yaj siv ib tug pas nrig los coj thiab tiv thaiv nws pab yaj. Nws yeej nrhiav lub “tshav zaub” mos mos rau nws pab yaj noj xwb. (Exekhee 34:13, 14) Koj tus ua niam ua txiv yeej xav cob qhia kom koj cov menyuam tau lub neej zoo thiab teev tiam Yehauvas. Koj xav kom lawv kub siab ib yam li tus sau nkauj tau hais: “Au kuv tus Vajtswv, kuv nyiam ua raws li koj lub siab nyiam, koj txoj kevcai nyob hauv kuv lub siab.” (Ntawv Nkauj 40:8) Thaum koj cov menyuam nco Yehauvas txiaj ntsig li ntawd lawm, lawv yuav muab lawv tus kheej cob rau Yehauvas thiab ua kevcai raus dej. Thaum lawv ua kevcai raus dej, lawv yuav tsum paub tab txaus thiab xav teev tiam Yehauvas tiag tiag.
14, 15. (1) Cov niam txiv yuav tsum muaj lub hom phiaj twg? (2) Vim li cas cov hluas ib txhia tsis ntseeg tias Yehauvas Cov Timkhawv muaj qhov tseeb?
14 Yog tias koj tus menyuam pheej tsis loj hlob ntawm sab kev ntseeg, lossis nws pib xav tias Yehauvas Cov Timkhawv tsis muaj qhov tseeb, koj yuav ua li cas? Siv tswvyim los qhia koj tus menyuam thiaj rub tau nws lub siab los hlub Yehauvas. Qhia kom nws pom txog tej yam zoo kawg nkaus uas Vajtswv tau pub rau nws, nws thiaj nco Yehauvas txiaj ntsig. (Qhia Tshwm 4:11) Thaum nws hlob txaus lawd, nws mam li txiav txim seb nws puas yuav los pe hawm Yehauvas.
15 Yog koj tus menyuam tsis ntseeg tias Yehauvas Cov Timkhawv muaj qhov tseeb, ua siab ntev qhia nws. Pab kom nws pom tias Yehauvas tib leeg xwb thiaj qhia kom peb tau lub neej zoo. Zoo rau koj nug seb yog vim li cas nws ho xav li ntawd. Piv txwv li no, cov hluas ib txhia coj zoo li lawv tsis ntseeg phau Vajlugkub, tiamsis qhov tseeb yog lawv txaj muag qhia Vajlugkub tab meeg lawv cov npoj xwb. Lwm cov coj zoo li Vajtswv tej kevcai pab tsis tau tibneeg, tiamsis qhov tseeb yog lawv nyuaj siab vim lawv tsis muaj phoojywg xwb. Yog li ntawd, tseem ceeb rau cov niam txiv paub menyuam lub siab.
Coj lawv txoj hau kev (Saib nqe 13-18)
16, 17. Cov ua niam ua txiv yuav ua li cas thiaj pab tau menyuam nrog Yehauvas sib raug zoo?
16 Koj yuav pab koj tus menyuam li cas nws thiaj txais yuav qhov tseeb? Coob leej ntau tus pab tau lawv cov menyuam thaum lawv nug li no: “Puas nyuaj rau koj ntseeg Yehauvas? Peb yuav tau tso dabtsi tseg los teev tiam Yehauvas? Raws li koj xav, thaum peb teev tiam Yehauvas peb yuav tau koob hmoov dabtsi tamsim no thiab yav tom hauv ntej? Thaum muab tej koob hmoov ntawd piv rau tej uas peb tau tso tseg, puas tsim nyog peb teev tiam Yehauvas?” Thaum koj nug nws txog tej no, txhob hais twm nws. Koj tus cwj pwm thiab tus nru lus yuav tsum qhia tias koj xav pab nws tiag tiag. Zoo rau neb nyeem thiab kawm Malakau 10:29, 30 ua ke. Muab ib daim ntawv rau nws sau seb cov Khixatia yuav tau txais tej koob hmoov twg. Tom qab ntawd, hais kom nws sau seb cov Khixatia yuav tsum tso dabtsi tseg los teev tiam Yehauvas. Yog tias neb muab sib piv li no, koj yuav paub tias nws nyuaj siab txog dabtsi, koj thiaj pab tau nws. Peb niaj hnub mus qhia phau ntawv Vajlugkub Qhia thiab phau ntawv “Vajtswv Txojkev Hlub” rau tibneeg. Tsim nyog peb qhia 2 phau ntawv no rau peb cov menyuam thiab, puas yog? Koj puas tau ua li ntawd?
17 Koj tus menyuam yuav tau txiav txim rau nws tus kheej tias nws puas yuav teev tiam Yehauvas. Nej cov ua niam ua txiv, txhob xav tias menyuam nrog nej mus kev sib txoos xwb ces nws yuav cia li ntseeg Yehauvas. Tseem ceeb rau nws nrog Yehauvas sib raug zoo. (Paj Lug 3:1, 2) Yog tias nyuaj heev rau koj tus menyuam los teev tiam Yehauvas, koj yuav ua li cas? Rov qab kawm tom hauv paus tuaj. Qhia kom nws xav txog cov lus nug no: “Puas muaj Vajtswv tiag? Vim li cas kuv ho ntseeg tias muaj Vajtswv? Ua cas kuv thiaj paub tias Yehauvas mob siab kuv tiag? Vajtswv tej kevcai puas yuav pab tau kuv lub neej tiag?” Nej cov ua niam ua txiv, ua siab ntev cob qhia nej cov menyuam. Pab kom lawv pom tias yog lawv xav tau lub neej zoo tiag tiag, lawv yuav tsum teev tiam Yehauvas. * (Saib cov lus hauv qab taw qhia.)—Loos 12:2.
18. Cov niam txiv yuav xyaum Yehauvas li cas?
18 Vajtswv Yehauvas yog tus tswv yug yaj zoo tshaj plaws. Tsim nyog txhua tus tseem Khixatia xyaum coj ib yam li nws. (Efexau 5:1; 1 Petus 2:25) Hajyam tseem ceeb rau cov ua niam ua txiv xyaum nws tus qauv. Lawv yuav tsum paub lawv cov menyuam ib yam li tus tswv yug yaj paub nws pab yaj. Cov niam txiv yuav tau cob qhia thiab coj lawv txoj hau kev, lawv thiaj li yuav pom Vajtswv tej lus cog tseg muaj tiav. Yog li ntawd, cia li tu koj cov menyuam kom lawv hlub thiab teev tiam Yehauvas mus li!
^ nqe 9 Mus saib Phau Tsom Faj Askiv lub 8 Hli tim 1, 2008, sab 10-12.
^ nqe 12 Yog xav paub ntxiv mus saib lub ntsiab “Family Worship—Vital for Survival!” hauv Phau Tsom Faj Askiv lub 10 Hli tim 15, 2009, sab 29-31.
^ nqe 17 Yog xav paub ntxiv mus saib Phau Tsom Faj Askiv lub 2 Hlis tim 1, 2012, sab 18-21.