Muaj Kev Ntseeg Ruaj Nreeg Rau Lub Nceeg Vaj
“Kev ntseeg yog qhov uas ruaj siab rau tej uas vam ntsoov.”
1, 2. (1) Yehauvas thiab Yexus tau npaj dabtsi kom peb thiaj muaj kev ntseeg rau lub Nceeg Vaj? (2) Raws li Efexau 2:12, Vajtswv cov lus cog tseg pab kom peb muaj dabtsi? (Saib daim duab ntawm sab no.)
YEHAUVAS COV TIMKHAWV yeej kub siab lug tshaj tawm tias tsuas yog Vajtswv lub Nceeg Vaj thiaj yuav kho tau tibneeg tej teeb meem xwb. Ua li peb puas ntseeg tias lub Nceeg Vaj ntawd yog ib lub tseem fwv tiag tiag? Peb puas ntseeg tias lub Nceeg Vaj ntawd yuav kho kom Vajtswv lub ntsiab muaj tiav? Puas tsim nyog peb muaj kev ntseeg ruaj nreeg rau lub Nceeg Vaj ntawd?
2 Yehauvas yuav siv lub Nceeg Vaj uas tus Mexiyas kav los kho kom nws lub ntsiab rau noob neej muaj tiav. Vajtswv yeej muaj cai tsa lub Nceeg Vaj no rau qhov nws yog tus muaj hwjchim kav ib puas tsav yam. Peb thiaj paub tseeb tias lub Nceeg Vaj yuav sawv ruaj khov. Leejtwg yuav ua tus kav lub Nceeg Vaj no? Puas muaj lwm tus nrog nws kav? Lawv yuav muaj hwjchim kav dabtsi xwb? Yehauvas thiab Yexus twb npaj ib co lus cog tseg ruaj khov txog tej no lawm. Yog tias peb kawm txog cov lus cog tseg ntawd, peb yuav hajyam muaj kev ntseeg tias Yehauvas lub ntsiab yuav muaj tiav tiag, thiab lub Nceeg Vaj yuav kav mus ib txhis.
3. Peb yuav kawm txog dabtsi hauv zaj no thiab zaj tom ntej?
3 Hauv phau Vajlugkub, muaj 6 nqe lus cog tseg uas qhia txog lub Nceeg Vaj uas Yexus Khetos kav. Cov lus cog tseg ntawd muaj li no: (1) lus cog tseg rau Aplahas, (2) lus cog tseg coj Mauxe Txoj Kevcai, (3) lus cog tseg rau Davi, (4) lus cog tseg ua pov thawj zoo li Mekhixede, (5) lus cog tseg tshiab, thiab (6) lus cog tseg kav lub Nceeg Vaj. Cia peb kawm seb cov lus cog tseg no qhia li cas txog lub Nceeg Vaj, thiab kawm seb Vajtswv lub ntsiab rau lub ntiajteb thiab noob neej yuav muaj tiav li cas.
LUS COG TSEG TXOG VAJTSWV LUB NTSIAB
4. Raws li phau ntawv Chiv Keeb, Vajtswv lub ntsiab rau noob neej thiab lub ntiajteb yog dabtsi?
4 Yehauvas tsim lub ntiajteb no kom yug tau tibneeg txojsia. Tom qab ntawd nws nkaw lus li no: (1) Vajtswv tsim neeg muaj yam ntxwv zoo li nws. (2) Nws sam hwm kom cov neeg ncaj ncees muaj tub ki puv ntiajteb thiab muab lub ntiajteb tu ua ib lub vaj kaj siab. (3) Nws txwv tsis pub neeg noj tsob ntoo uas pub kom paub qhov zoo qhov phem. (Chiv Keeb 1:26, 28; 2:16, 17) Peb lo lus nkaw saum no yog Vajtswv lub ntsiab rau noob neej thiab lub ntiajteb. Tiamsis ua li cas tom qab no, Vajtswv ho npaj ib co lus cog tseg ntxiv thiab?
5, 6. (1) Xatas tawm tsam Vajtswv lub ntsiab li cas? (2) Yehauvas tu qhov teeb meem hauv lub vaj Edee li cas?
5 Xatas tau sawv tawm tsam Vajtswv thiab nws lub ntsiab. Xatas xav kom neeg tawm tsam Vajtswv thiab. Nws thiaj ntxias Eva noj tsob txiv uas paub qhov zoo qhov phem. (Chiv Keeb 3:1-5; Qhia Tshwm 12:9) Thaum Xatas ua li ntawd twb yog nws twv tias Vajtswv tsis muaj cai kav ib puas tsav yam. Tom qab no, Xatas kuj liam tias tibneeg tsis hlub Vajtswv tiag, lawv lam teev tiam Vajtswv kom lawv tau zoo xwb.
6 Yehauvas yuav txiav txim li cas rau cov uas fav xeeb rau nws? Yog tias nws cia li muab lawv rhuav tshem tam sim ntawd, nws lub ntsiab kom Adas thiab Eva cov xeeb ntxwv huam vam puv ntiajteb yuav tas rau hnub ntawd. Yog li ntawd, Yehauvas thiaj ncua sijhawm rau cov uas fav xeeb. Thaum ntawd Yehauvas hais tawm ib lo lus cog tseg hauv Edee. Lo lus cog tseg ntawd qhia meej tias Vajtswv lub ntsiab rau lub ntiajteb thiab noob neej yuav muaj tiav xwb xwb li.
7. Lo lus cog tseg hauv Edee qhia li cas txog tus nab thiab nab tus xeeb ntxwv?
7 Lo lus cog tseg hauv Edee kuj teem txim tuag rau tus nab, thiab nab tus xeeb ntxwv. Tus nab yog Xatas Ntxwg Nyoog, thiab nab tus xeeb ntxwv yog cov neeg uas nrog Xatas sawv tawm tsam Vajtswv lub hwjchim kav. Vajtswv pub hwjchim rau tus pojniam tus xeeb ntxwv los muab lawv rhuav tshem tibsi. Yog li ntawd, lo lus cog tseg hauv Edee qhia tias Xatas thiab txhua yam kev kub ntxhov yuav raug rhuav tshem li cas.
8. Puas muaj leejtwg paub txog tus pojniam thiab nws tus xeeb ntxwv?
8 Tus pojniam tus xeeb ntxwv puas yog ib tug neeg uas muaj roj ntsha? Tsis yog. Tus xeeb ntxwv ntawd yuav tsum yog ib tug plig, nws thiaj “rhuav” tshem tau Xatas. Xatas yog ib tug plig uas peb qhov muag pom tsis tau. (Henplais 2:14) Yog li ntawd, tus pojniam uas yug tus xeeb ntxwv, peb qhov muag kuj pom tsis tau thiab. Tau 4,000 xyoo tom qab noob neej poob kev txhaum hauv Edee, tus nab thiab nab tus xeeb ntxwv huam vam coob zuj zus hauv ntiajteb. Tiamsis tsis muaj neeg paub tias tus pojniam thiab nws tus xeeb ntxwv yog leejtwg. Ib tiam dhau ib tiam, Yehauvas thiaj npaj ib co lus cog tseg uas qhia txog tus pojniam ntawd tus xeeb ntxwv. Vim muaj cov lus cog tseg ntawd, Vajtswv cov tub qhe thiaj paub tias tus xeeb ntxwv ntawd yog leejtwg, thiab Vajtswv yuav ua li cas kho tau tej kev kub ntxhov uas Xatas tau tsim muaj.
LUS COG TSEG TXOG TUS XEEB NTXWV
9. Vajtswv cog lus li cas rau Aplahas, thiab pib muaj raws li cov lus cog tseg ntawd thaum twg los lawm?
9 Tau 2,000 xyoo tom qab Yehauvas hais tawm lo lus cog tseg hauv Edee, Yehauvas txib Aplahas tawm hauv lub moos Aw mus nyob lub tebchaws Khana-as. (Tubtxib Tes Haujlwm 7:2, 3) Vajtswv hais li no rau nws: “Koj cia li tawm hauv koj lub tebchaws thiab tawm hauv koj cov kwvtij thiab koj txiv lub tsev mus rau lub tebchaws uas kuv yuav qhia rau koj. Kuv yuav tsa koj ua ib haiv neeg loj thiab kuv yuav foom koob hmoov rau koj thiab ua rau koj lub npe nrov nto moo lug mus, mas koj yuav ua rau lwm tus tau koob hmoov. Kuv yuav foom koob hmoov rau cov uas foom koob hmoov rau koj. Kuv yuav tsawm foom cov uas foom koj tsis zoo. Ib tsoom neeg hauv lub ntiajteb yuav tau koob hmoov ntawm koj los.” (Chiv Keeb 12:1-3) Peb tsis paub tseeb tias thawj zaug uas Yehauvas hais cov lus no rau Aplahas yog thaum twg. Tiamsis peb paub tias Vajtswv pib ua raws li nws lo lus cog tseg rau Aplahas txij xyoo 1943 ua ntej Yexus, thaum Aplahas tawm hauv Halas mus hla tus dej Yufeti. Lub sijhawm ntawd Aplahas muaj 75 xyoos.
10. (1) Aplahas muaj kev ntseeg npaum li cas rau Vajtswv tej lus cog tseg? (2) Yehauvas qhia ntxiv li cas txog tus pojniam ntawd tus xeeb ntxwv?
10 Yehauvas hais nws cov lus cog tseg rau Aplahas ob peb lwm. Txhua zaus uas Yehauvas hais Aplahas, Yehauvas txhab ntxiv rau cov lus ntawd. (Chiv Keeb 13:15-17; 17:1-8, 16) Aplahas muaj kev ntseeg ruaj nreeg tias Yehauvas yuav ua raws li nws cog tseg, Aplahas thiaj zoo siab hlo muab nws tib leeg tub fij rau Vajtswv. Tom qab Aplahas ua li ntawd, Yehauvas thiaj ‘tuav nws lub npe cog lus ruaj tias . . . nws yeej yuav foom koob hmoov rau Aplahas tiag tiag li.’ Tej uas Yehauvas hais no hajyam ua rau Aplahas tso siab tias Vajtswv cov lus cog tseg yuav muaj tiav. (Nyeem Chiv Keeb 22:15-18; Henplais 11:17, 18.) Tom qab xyoo 1943 U.Nt.Y., Yehauvas mam li ua ntu zus qhia tias tus xeeb ntxwv ntawd yuav los ntawm Aplahas caj ces los. Tus xeeb ntxwv ntawd tsis yog ib tug xwb, tiamsis piv txog coob leej. Lawv yuav ua vajntxwv kav, yuav muab Vajtswv cov yeeb ncuab rhuav tshem, thiab yuav foom koob hmoov rau noob neej.
Aplahas muaj kev ntseeg rau Vajtswv cov lus cog tseg tiag (Saib nqe 10)
11, 12. (1) Tus tubtxib Povlauj qhia tias tus xeeb ntxwv piv txog leejtwg? (2) Tus xeeb ntxwv ntawd yuav pab peb li cas?
11 Vajtswv lo lus cog tseg rau Aplahas xub muaj tiav rau thaum Aplahas cov xeeb ntxwv tau txais lub tebchaws Khana-as. Puas yog cov lus cog tseg muaj tiav li ntawd lawm xwb? Tsis yog. (Kalatia 4:22-25) Tus tubtxib Povlauj qhia tias Aplahas tus xeeb ntxwv uas tseem ceeb tshaj yog Yexus Khetos. Povlauj kuj qhia ntxiv li no: “Yog nej ua Khetos li lawm, nej kuj yog Aplahas caj ces [xeeb ntxwv] thiab nej yuav saws qub txeeg qub teg raws li cog lus tseg.” Cov xaiv tseg uas muaj 144,000 leej yog “Khetos li,” yog li ntawd lawv kuj yog tus xeeb ntxwv ntawd thiab. (Kalatia 3:16, 29; Qhia Tshwm 5:9, 10; 14:1, 4) Koj puas nco qab lo lus cog tseg hauv Edee qhia txog tus pojniam uas yuav yug tus xeeb ntxwv no? Tus pojniam ntawd piv txog Vajtswv lub koom haum, feem nyob saum ntuj ceeb tsheej, uas yog nws cuab tubtxib ncaj ncees saum ntuj. Phau Vajlugkub muab tus pojniam no hu ua “lub nroog Yeluxalees uas nyob saud.” (Kalatia 4:26, 31) Lo lus cog tseg rau Aplahas qhia tias tus pojniam no tus xeeb ntxwv yuav foom koob hmoov rau noob neej mus ib txhis.
12 Lo lus cog tseg rau Aplahas zoo ib yam li daim ntawv nias hom thawj tias Vajtswv lub Nceeg Vaj yeej yuav kav tiag. Vim muaj lo lus cog tseg ntawd, Yexus Khetos thiab cov xaiv tseg thiaj tau txais lub Nceeg Vaj. (Henplais 6:13-18) Chiv Keeb 17:7 qhia tias cov lus cog tseg no yuav cog ruaj khov “mus ib txhis.” Yog li ntawd, tej koob hmoov uas los ntawm lo lus cog tseg no yuav nyob mus ib txhis. Thaum lub Nceeg Vaj rhuav tshem Vajtswv cov yeeb ncuab tas, thiab txhua yim neeg hauv ntiajteb no tau txais tej koob hmoov uas Vajtswv cog tseg lawm, ces lo lus cog tseg no mam li xaus. (1 Khaulee 15:23-26) Cov lus no ua pov thawj tias cov neeg ncaj ncees yuav ‘huam vam puv nkaus ntiajteb’ raws li Vajtswv lub ntsiab tiag.
LUS COG TSEG TIAS LUB NCEEG VAJ YUAV KAV MUS IB TXHIS
13, 14. Lo lus cog tseg rau Davi pab peb tso siab li cas?
13 Lo lus cog tseg hauv Edee thiab lo lus cog tseg rau Aplahas qhia tias Yehauvas txojkev kav cog ruaj khov rau nws tej kevcai ncaj ncees. Yog li ntawd, lub Nceeg Vaj uas tus Mexiyas kav kuj cog ruaj rau tib co kevcai ncaj ncees thiab. (Ntawv Nkauj 89:14) Cov uas kav lub Nceeg Vaj puas yuav kav ncaj ncees mus li? Puas yuav muaj dua lwm lub tseem fwv los hloov lub no? Vajtswv tau hais dua ib lo lus cog tseg tias lub Nceeg Vaj no yuav kav ncaj ncees mus ib txhis.
14 Yehauvas tau hais ib lo lus cog tseg rau Vajntxwv Davi. (Nyeem 2 Xamuyee 7:12, 16.) Lo lus cog tseg no qhia tseeb rau sawvdaws paub tias tus Mexiyas yuav los ntawm Davi caj ces los. (Luka 1:30-33) Yehauvas hais tias Davi tus xeeb ntxwv yuav yog tus uas “muaj feem” lossis muaj cai los ua Vajntxwv kav lub Nceeg Vaj. (Exekhee 21:25-27) Davi caj ces yuav kav mus ib txhis rau qhov nws tus xeeb ntxwv Yexus Khetos “yuav nyob mus ib txhis, nws lub zwm txwv yuav nyob ntev li lub hnub.” (Ntawv Nkauj 89:34-37) Yog li ntawd, peb tso siab tias Yexus Khetos yuav kav ncaj ncees mus ib txhis thiab tej koob hmoov uas peb txais los ntawm nws txojkev kav yuav nyob mus ib txhis!
LUS COG TSEG TIAS NWS YUAV UA IB TUG POV THAWJ
15-17. Tus pojniam tus xeeb ntxwv yuav tuav 2 txoj haujlwm twg thiab yog vim li cas?
15 Cov lus cog tseg rau Aplahas thiab Davi cog ruaj tias tus pojniam tus xeeb ntxwv yuav tau ua vajntxwv. Tiamsis tus xeeb ntxwv ntawd yuav ua li cas foom koob hmoov rau noob neej? Nws yuav tsum ua ib tug pov thawj thiab. Yav thaum ub Vajtswv haiv neeg muaj ib tug pov thawj tua tsiaj theej txhoj. Ib yam li ntawd, tus xeeb ntxwv yuav tsum ua pov thawj rau noob neej, peb thiaj dim ntawm kev txhaum thiab tau los koom Vajtswv cuab kwvtij ncaj ncees. Vajtswv thiaj cog lus tias tus xeeb ntxwv yuav ua pov thawj ib yam li Mekhixede.
16 Vajtswv qhia rau Vajntxwv Davi tias Nws yuav cog lus rau Yexus. Vajtswv cog lus li no: 1) Yexus yuav tau “zaum ntawm [Vajtswv] sab xis” thiab Yexus yuav txais hwjchim los rhuav tshem tag nrho Vajtswv cov yeeb ncuab. 2) Nws kuj cog lus tias Yexus yuav “ua pov thawj mus ib txhis ib yam li Mekhixede.” (Nyeem Ntawv Nkauj 110:1, 2, 4.) Ua li Mekhixede yog leejtwg? Ua ntej Aplahas cov xeeb ntxwv mus txeeb tau tebchaws Khana-as, Mekhixede yog tus vajntxwv uas kav lub moos Xalee. Mekhixede kuj “yog Vajtswv uas loj dua ntais tus pov thawj” thiab. (Henplais 7:1-3) Yehauvas yog tus tsa Mekhixede ua vajntxwv thiab ua pov thawj. Ua ntej Yexus, tsuas yog Mekhixede tib leeg xwb thiaj tau tuav 2 txog haujlwm no ua ke. Ua cas thiaj hais tau tias Mekhixede “ua pov thawj mus ib txhis”? Rau qhov tsis tau muaj dua lwm tus ua pov thawj ua ntej Mekhixede lossis los hloov nws chaw li.
17 Vim muaj lo lus cog tseg no, Vajtswv thiaj tsa Yexus ua pov thawj. Yexus yuav “ua pov thawj mus ib txhis ib yam li Mekhixede.” (Henplais 5:4-6) Lo lus cog tseg no qhia tseeb tias Yehauvas yeej yuav siv lub Nceeg Vaj los kho kom nws lub ntsiab rau noob neej thiab lub ntiajteb no, muaj tiav tiag tiag li.
LUB NCEEG VAJ UAS COG RUAJ KHOV
18, 19. (1) Peb lo lus cog tseg no txhawb lub Nceeg Vaj li cas? (2) Peb yuav kawm txog dabtsi rau zaj txuas ntxiv no?
18 Peb twb kawm txog 3 lo lus cog tseg lawm. Peb kawm tau tias cov lus cog tseg no pab txhawb lub Nceeg Vaj uas tus Mexiyas kav. Lo lus cog tseg hauv Edee qhia meej tias Yehauvas yuav siv tus pojniam tus xeeb ntxwv los kho kom nws lub ntsiab muaj tiav rau lub ntiajteb thiab noob neej. Lo lus cog tseg rau Aplahas qhia tias tus xeeb ntxwv ntawd piv txog Yexus Khetos thiab cov xaiv tseg uas yuav tau txais lub Nceeg Vaj.
19 Lo lus cog tseg rau Davi qhia meej tias tus Mexiyas yuav los ntawm Davi caj ces. Lo lus cog tseg ntawd kuj tsav hwjchim rau Yexus ua tus kav lub ntiajteb mus ib txhis. Lo lus cog tseg ua pov thawj ib yam li Mekhixede qhia meej tias tus xeeb ntxwv yuav tuav haujlwm ua pov thawj thiab. Tsis yog Yexus tib leeg xwb yuav tau ua pov thawj kho noob neej kom rov qab zoo tiav li thaum chiv keeb. Tiamsis Vajtswv kuj xaiv ib co los nrog Yexus ua pov thawj thiab ua vajntxwv. Lawv los qhovtwg los? Peb tseem yuav kawm txuas ntxiv zaj no.