Nej Yuav Tau Ua “Pov Thawj”
“Nej yuav ua . . . pov thawj rau kuv thiab ua haiv neeg dawb huv.”
1, 2. (1) Vim li cas Vajtswv yuav tsum tiv thaiv tus pojniam tus xeeb ntxwv? (2) Vajtswv npaj dabtsi los tiv thaiv tus xeeb ntxwv?
YUAV kom peb to taub Vajtswv lub ntsiab, peb yuav tsum kawm thawj lo lus faj lem hauv phau Vajlugkub. Thaum Vajtswv hais cov lus cog tseg hauv Edee, nws hais tias: “Kuv yuav ua rau koj [Xatas] thiab tus pojniam no ua yeeb ncuab, koj caj ces [lossis xeeb ntxwv] thiab tus pojniam caj ces [lossis xeeb ntxwv] yuav ua yeeb ncuab mus li.” Nkawd yuav sib ntxub npaum li cas? Yehauvas hais tias: “Tus pojniam caj ces [lossis xeeb ntxwv] yuav tsoo koj [Xatas] taubhau kom ntsoog, thiab koj yuav tom nws luj taws.” (Chiv Keeb 3:15) Yog li ntawd, Xatas thiab tus pojniam sib ntxub heev. Xatas yeej yuav nrhiav nrhw kev los rhuav tshem tus pojniam ntawd tus xeeb ntxwv.
2 Twb yog vim li ntawd tus sau nkauj thiaj thov Vajtswv pab Nws haiv neeg li no: “Saib maj, koj cov yeeb ncuab twb ua zom zaws, cov uas ntxub koj los kuj tsa taubhau nplawg ntia. Lawv xav tswvyim ntse kawg li yuav tawm tsam koj haiv neeg, lawv ntaus tswvyim yuav tiv cov uas koj tsom kwm. Lawv hais tias, ‘Cia li los, peb muab haiv neeg ntawd ntxuav kom tu noob nrho.’” (Ntawv Nkauj 83:2-4) Xatas yeej tsi ntsees los rhuav tshem tus caj ces uas yuav yug tus xeeb ntxwv ntawd. Yehauvas yuav tiv thaiv tus xeeb ntxwv no li cas? Yuav ua li cas Vajtswv lub ntsiab thiaj muaj tiav? Yuav kom muaj tau li no, Yehauvas npaj ib co lus cog tseg ntxiv.
LUS COG TSEG TIV THAIV TUS XEEB NTXWV
3, 4. (1) Cov Yixayee cog lus coj Mauxe Txoj Kevcai rau xyoo twg, thiab haiv neeg Yixayee cog lus tias lawv yuav ua dabtsi? (2) Mauxe Txoj Kevcai tiv thaiv tus xeeb ntxwv li cas?
3 Thaum Aplahas, Yiha, thiab Yakhauj cov xeeb ntxwv huam vam coob tuaj lawm, Yehauvas xaiv lawv los ua nws haiv neeg Yixayee. Thaum ntawd Yehauvas muab ib txoj kevcai rau lawv coj thiab haiv neeg Yixayee cog lus tias lawv yuav coj raws nraim li txoj kevcai ntawd. Vajtswv xaiv Mauxe ua tus tsoob zeej cev lus rau Nws thiab haiv neeg Yixayee. Phau Vajlugkub hais tias Mauxe “muab phau ntawv uas sau [Yehauvas] tej lus cog tseg nyeem rau cov pejxeem mloog. Cov pejxeem hais tias, ‘Txhua lo lus uas [Yehauvas] hais ntawd peb yuav ua raws nraim, peb yuav mloog nws lus.’ Mauxe muab cov ntshav nyuj nchos rau cov pejxeem thiab hais tias, ‘Cov ntshav no yog lub hom thawj uas nias rau tej lus cog tseg uas [Yehauvas] ua rau nej raws li tej lus uas hais tag no huvsi.’”
Mauxe Txoj Kevcai tiv thaiv Aplahas caj ces kom dawb huv, tus xeeb ntxwv thiaj yug los rau ib haiv neeg uas teev tiam Yehauvas
4 Nyob rau xyoo 1513 U.Nt.Y., haiv neeg Yixayee tau nrog Vajtswv sib cog lus tias lawv yuav coj Mauxe Txoj Kevcai. Lo lus cog tseg ntawd qhia rau sawvdaws tias Yehauvas tau xaiv cov Yixayee los ua nws haiv neeg. Lawv muaj ib lub hom phiaj tseem ceeb heev. Cov lus cog tseg ntawd qhia tias Yehauvas yog tus tu plaub rau lawv, tus muab kevcai rau lawv coj, thiab yog lawv tus Vajntxwv. (Yaxaya 33:22) Haiv neeg Yixayee tej keeb kwm ua pov thawj tias thaum mloog Vajtswv lus thiab tsis mloog, zoo li cas. Vajtswv txoj kevcai qhia tias tsis pub cov Yixayee mus yuav lwm haiv neeg uas coj lwm yam kevcai dab qhuas, los ua poj ua sev. Yog li ntawd, Mauxe Txoj Kevcai tiv thaiv Aplahas caj ces kom dawb huv, tus xeeb ntxwv thiaj yug los rau ib haiv neej uas teev tiam Yehauvas.
5. (1) Yog tias cov Yixayee coj raws li Mauxe Txoj Kevcai lawv yuav tau txais koob hmoov dabtsi? (2) Vim li cas Vajtswv tsis lees yuav cov Yixayee lawm?
5 Mauxe Txoj Kevcai pab tsa muaj pov thawj rau haiv neeg Yixayee. Cov pov thawj no ua qauv txog cov pov thawj uas zoo dua yav tom hauv ntej. (Henplais 7:11; 10:1) Yuav muaj ib co “pov thawj” hauv lub Nceeg Vaj uas hajyam pab tau noob neej. Thaum Vajtswv muab Mauxe Txoj Kevcai rau cov Yixayee coj, Nws cog lus tias yog lawv mloog lus ces lawv yuav yog cov “pov thawj” ntawd ntag. (Nyeem Khiav Dim 19:5, 6.) Tiamsis vim lawv tsis mloog Vajtswv lus thiab tsis kam txais yuav tus Mexiyas, uas yog Aplahas tus xeeb ntxwv, Vajtswv thiaj tsis lees yuav lawv ua nws haiv neeg lawm.
Haiv neeg Yixayee tsis mloog Vajtswv lus, tiamsis Mauxe Txoj Kevcai muaj tiav raws li Vajtswv npaj tseg (Saib nqe 3-6)
6. Mauxe Txoj Kevcai pab tau tus xeeb ntxwv li cas?
6 Thaum kawg haiv neeg Yixayee tsis muab siab npuab Vajtswv lawv thiaj tsis tau los ua pov thawj hauv lub Nceeg Vaj. Puas yog Mauxe Txoj Kevcai pab tsis tau lawv es lawv thiaj yuam kev li ntawd? Tsis yog. Raws li Vajtswv npaj tseg, Mauxe Txoj Kevcai pab tiv thaiv Aplahas caj ces los txog ntua Yexus Khetos, thiab pab kom cov Yixayee taug tau qab tias Yexus yog tus Mexiyas tiag. Phau Vajlugkub thiaj qhia tias: “Khetos yog qhov uas kawg nkaus ntawm txoj kevcai.” (Loos 10:4) Ua li, yog cov Yixayee tsis ua pov thawj lawm, leejtwg yuav los ua pov thawj hauv lub Nceeg Vaj? Vajtswv kuj cog lus ntxiv tias nws yuav xaiv ib haiv neeg tshiab. Cia peb kawm txog qhov no.
LUS COG TSEG TXOG IB HAIV NEEG TSHIAB
7. Yehauvas qhia li cas rau Yelemi?
7 Ntau xyoo ua ntej Yehauvas rhuav Mauxe Txoj Kevcai, Yehauvas twb qhia rau Yelemi lawm tias nws yuav “cog dua lus tshiab” rau haiv neeg Yixayee. (Nyeem Yelemi 31:31-33.) Lo lus cog tseg tshiab ntawd txawv ntawm lo lus cog tseg coj Mauxe Txoj Kevcai, rau qhov lawv tsis tas tua tsiaj theej txhoj kom tau kev zam txim. Ua cas thiaj muaj tau li ntawd?
8, 9. (1) Yexus cov ntshav qheb kev rau dabtsi? (2) Cov uas nrog Vajtswv sib cog lus tshiab no yuav tau ua tes haujlwm twg? (Saib daim duab ntawm sab 16.)
8 Puag tom qab no thaum txog Nixa 14, xyoo 33, Yexus tsa ib txoj kevcai tshiab hu ua tus Tswv Pluas Hmo. Hmo ntawd Yexus hais li no rau nws 11 tus tubtxib: “Lub khob uas raug muab nchuav rau nej no yog lo lus cog tseg tshiab hauv kuv cov ntshav.” (Luka 22:20) Hauv phau ntawv Vajlugkub Mathai, Yexus hais tias: “No yog kuv cov ntshav uas nias hom thawj rau tej lus cog tseg, uas raug muab nchuav daws neeg coob coob lub txim.”
9 Yexus tsis muaj txim, yog li ntawd lo lus cog tseg tshiab tsis yog hais rau Yexus. Tiamsis yuav tsum muaj Yexus cov ntshav los ua hom thawj nias rau lo lus cog tseg ntawd. Yexus pub nws cov ntshav tib zaug xwb, noob neej thiaj tau kev zam txim los ntawm Vajtswv mus ib txhis. Vim muaj tus nqe txhiv uas Yexus pub no, Vajtswv thiaj foom koob hmoov rau neeg. Vajtswv kuj pub nws lub hwj huam dawb huv xaiv ib txhia los ua Nws cov “menyuam.” (Nyeem Loos 8:14-17.) Yehauvas suav tias cov xaiv tseg tsis muaj txim ib yam li nws tus Tub Yexus lawm. Lawv thiaj muaj feem “koom nrog Khetos saws” tej qub txeeg qub teg. Lawv kuj txais tej koob hmoov uas cov Yixayee muab ua poob lawm, uas yog ua pov thawj hauv lub Nceeg Vaj. Tus tubtxib Petus tau hais li no txog lawv: “Nej yog haiv neeg uas xaiv cia lawm, yog Vajntxwv cov pov thawj thiab ua neeg dawb huv, yog cov neeg uas ua Vajtswv tug, kom nej thiaj qhia nws tes haujlwm tseem ceeb, yog tus uas hu nej tawm hauv qhov tsaus ntuj los nyob rau hauv nws qhov kaj.” (1 Petus 2:9) Yog li ntawd, lo lus cog tseg tshiab no tseem ceeb heev, puas yog? Vim muaj lo lus no, Yexus cov thwjtim thiaj muaj feem los ua Aplahas tus xeeb ntxwv.
COV LUS COG TSEG TSHIAB PIB MUAJ TIAV
10. (1) Lo lus cog tseg tshiab pib muaj tiav thaum twg? (2) Vim li cas pib muaj tiav hnub ntawd los?
10 Puas yog lo lus cog tseg tshiab no pib rau thaum Yexus nrog nws cov thwjtim noj tus Tswv Pluas Hmo? Tsis yog. Lo lus cog tseg tshiab pib muaj tiav thaum Yexus rov mus saum ntuj thiab nws muab tus nqe txhiv them rau Yehauvas. Tsis tas li ntawd xwb, cov uas “koom nrog Khetos” yuav tsum tau txais Vajtswv lub hwj huam dawb huv. Yog li ntawd, lo lus cog tseg tshiab no pib muaj tiav txij hnub Pheethekhoxate xyoo 33. Hnub ntawd Yexus cov thwjtim tau txais Vajtswv lub hwj huam dawb huv.
Lo lus cog tseg tshiab no pib muaj tiav txij hnub Pheethekhoxate xyoo 33. Hnub ntawd Yexus cov thwjtim tau txais Vajtswv lub hwj huam dawb huv
11. (1) Vim muaj lo lus cog tseg tshiab no, cov Yudai thiab lwm haiv neeg tau txais koob hmoov dabtsi? (2) Lo lus cog tseg tshiab no muaj pes tsawg leej nrog Vajtswv sib cog lus?
11 Thaum Yehauvas qhia Yelemi tias nws yuav cog dua lus tshiab rau cov neeg Yixayee, tej no qhia tias muaj ib hnub Mauxe Txoj Kevcai yuav dua mus. Mauxe Txoj Kevcai xaus rau thaum twg? Xaus rau tib hnub uas cov lus cog tseg tshiab pib muaj tiav. (Henplais 8:13) Vim muaj cov lus cog tseg tshiab no, cov neeg Yudai thiab lwm haiv neeg uas tsis tau ua kevcai txiav, thiaj muaj feem txais Vajtswv lub Nceeg Vaj los ua qub txeeg qub teg. Phau Vajlugkub qhia tias nimno, “qhov uas ua kevcai txiav tiag yog qhov uas ua hauv lub siab, raws li [lub hwj huam dawb huv] tsis yog raws li txoj kevcai uas sau cia.” (Loos 2:29) Vajtswv muab nws txoj kevcai sau rau hauv lawv nruab siab lawm. (Henplais 8:10) Cov uas nrog Vajtswv sib cog lus tshiab no yog cov 144,000 leej uas Vajtswv xaiv tseg. Lawv thiaj yog Vajtswv haiv neeg tshiab, uas phau Vajlugkub hu ua “Vajtswv cov tseem Yixayee,” lossis cov Yixayee ntawm sab kev ntseeg.
12. Mauxe Txoj Kevcai thiab cov lus cog tseg tshiab txawv li cas?
12 Lo lus cog tseg coj Mauxe Txoj Kevcai thiab lo lus cog tseg tshiab txawv li cas? Thaum haiv neeg Yixayee cog lus coj Mauxe Txoj Kevcai, Yehauvas yog tus nrog lawv sib cog lus. Yehauvas xaiv Mauxe ua tus tsoob zeej cev lus rau Nws thiab cov Yixayee, thiab Mauxe yog tus pab coj lawv. Yuav tsum muab ntshav tsiaj nias hom thawj rau lo lus cog tseg ntawd. Tiamsis lo lus cog tseg tshiab txawv ntawd. Yehauvas xaiv ib haiv neeg Yixayee ntawm sab kev ntseeg los nrog Nws sib cog lus. Yexus cov ntshav nias hom thawj rau lo lus cog tseg ntawd. Yehauvas xaiv Yexus ua tus Tsoob Zeej cev lus rau Vajtswv thiab cov xaiv tseg. Thiab Yexus yog lub Taubhau coj lawv.
13, 14. (1) Lo lus cog tseg tshiab txhawb lub Nceeg Vaj li cas? (2) Ua cas cov xaiv tseg thiaj muaj hwjchim nrog Yexus ua vajntxwv thiab ua pov thawj kav saum ntuj?
13 Lo lus cog tseg tshiab txhawb lub Nceeg Vaj li cas? Lo lus cog tseg no qheb kev rau Vajtswv xaiv dua ib haiv neeg tshiab uas dawb huv los ua vajntxwv thiab ua pov thawj kav lub Nceeg Vaj. Haiv neeg tshiab no muaj feem los ua Aplahas tus xeeb ntxwv. (Kalatia 3:29) Yog li ntawd, lo lus cog tseg tshiab no txhawb kom cov lus cog tseg rau Aplahas muaj tiav tiag tiag.
14 Lo lus cog tseg tshiab qheb kev rau Vajtswv hu ib haiv neeg Yixayee ntawm sab kev ntseeg, thiab cog ruaj khov tias lawv yuav “nrog Khetos” saws tej qub txeeg qub teg. Tiamsis leejtwg muab hwjchim rau cov xaiv tseg nrog Yexus ua vajntxwv thiab ua pov thawj kav saum ntuj? Yuav tsum muaj dua lwm lo lus cog tseg ntxiv uas muab hwjchim rau lawv kav li no.
LUS COG TSEG CIA LWM TUS NROG KHETOS KAV
15. Yexus cog lus li cas rau nws cov tubtxib ncaj ncees?
15 Tom qab Yexus nrog nws cov thwjtim uas ncaj ncees noj tus Tswv Pluas Hmo, nws cog lus tias lawv yuav tau nrog nws kav lub Nceeg Vaj. (Nyeem Luka 22:28-30. *) Lo lus cog tseg no txawv ntawm cov uas peb twb kawm tas lawd, rau qhov cov lus no yog Yexus ua tus hais rau cov xaiv tseg. Yehauvas tsis muaj feem nrog cov lus cog tseg no. Yexus hais tias nws yuav pub hwjchim rau lawv ib yam li nws Txiv pub hwjchim rau nws. Yehauvas twb cog lus tias Yexus yuav tau “ua pov thawj mus ib txhis ib yam li Mekhixede.” (Henplais 5:5, 6) Yog li ntawd, cov xaiv tseg yuav txais lub hwjchim ntawd thiab.
16. Lo lus cog tseg kav lub Nceeg Vaj qheb kev rau cov xaiv tseg ua dabtsi?
16 Thaum Yexus raug txom nyem, nws 11 tug tubtxib yeej nrog nraim nws. Lo lus cog tseg kav lub Nceeg Vaj qhia meej tias lawv yuav tau nrog Yexus kav ua vajntxwv thiab ua pov thawj saum ntuj ceeb tsheej. Tsis yog lawv 11 leeg thiaj tau qhov koob hmoov no xwb. Yexus qhia rau tus tubtxib Yauhas tias: “Tus uas kov yeej kuv yuav pub nws nrog kuv zaum saum kuv lub zwm txwv, ib yam li uas kuv kov yeej lawm thiab nrog kuv leej Txiv zaum saum nws lub zwm txwv.” (Qhia Tshwm 3:21) Yexus tau cog lus li no rau cov xaiv tseg uas muaj 144,000 leej. (Qhia Tshwm 5:9, 10; 7:4) Lo lus cog tseg no qheb kev rau cov xaiv tseg mus nrog Yexus ua vajntxwv kav. Cov lus no zoo ib yam li thaum ib tug vajntxwv xaiv tau nyab. Thaum nkawd ua tshoob tas lawd, tus nkauj nyab kuj tau ua poj vaj nrog vajntxwv kav. Phau Vajlugkub thiaj muab cov xaiv tseg hu ua Khetos “tus nkauj nyab.” Nws yog ib tug “nkauj xwb dawb huv” uas yuav muab cog rau Yexus Khetos.
MUAJ KEV NTSEEG RUAJ NREEG RAU LUB NCEEG VAJ
17, 18. (1) Rau lo lus cog tseg uas txhawb lub Nceeg Vaj yog dabtsi? (2) Vim li cas tsim nyog peb tso siab rau Vajtswv lub Nceeg Vaj?
17 Hauv 2 zaj no peb twb kawm txog cov lus cog tseg uas txhawb tej yam tseem ceeb ntawm lub Nceeg Vaj. (Saib lub ntsiab hu ua “Vajtswv Lub Ntsiab Yuav Muaj Tiav” ntawm sab 15.) Raws li cov lus cog tseg no, peb yeej tso siab tau tias Vajtswv yuav siv lub Nceeg Vaj uas tus Mexiyas kav los mus kho kom nws lub ntsiab rau lub ntiajteb thiab noob neej muaj tiav.
Lo lus cog tseg kav lub Nceeg Vaj yuav kho kom Vajtswv lub ntsiab rau ntiajteb muaj tiav (Saib nqe 15-18)
18 Yeej tsis muaj dua lwm lub tseem fwv uas yuav kho tau noob neej tej teeb meem. Peb yeej paub tseeb tias Vajtswv lub Nceeg Vaj yuav foom koob hmoov nplua mias rau noob neej mus ib txhis. Cia peb sawvdaws kub siab lug mus tshaj tawm kom lwm tus thiaj los paub qhov tseeb txog Vajtswv lub Nceeg Vaj!
^ nqe 15 Lukas [Luka] 22:28, 30 (TMZ): “Txhua lub sijhawm uas kuv raug kev txomnyem, nej tsis tau tso kuv tseg; kuv Txiv tsa kuv ua tus muaj hwjchim kav lub ntiajteb li cas, kuv yuav tsa nej kom muaj hwjchim ib yam li ntawd. Nej yuav tau nrog kuv noj thiab haus nyob ntawm kuv lub rooj hauv kuv lub Tebchaws, thiab nej yuav tau zaum saum lub zwmtxwv txiav txim rau kaum ob xeem Yixalayees.”
