1, 2. (1) Lub koom txoos Khaulauxi raug tshum li cas? (2) Povlauj ntuas cov kwvtij hauv Khaulauxi li cas?

NYOB thawj 100 xyoo, muaj ntau yam los tshum kom cov Khixatia hauv Khaulauxi tawg ua pab ua pawg. Cov kwvtij ib txhia ntseeg tias sawvdaws yuav tsum coj Mauxe Txoj Kevcai. Lwm cov ho ntseeg tias kev lomzem txhaum Vajtswv txoj kevcai. Povlauj thiaj ntuas lawv li no: “Cia li ceev faj tsis txhob cia leejtwg tej lus txawj ntse thiab tej lus dag do do ntes tau nej mus ua qhev. Tej lus ntawd yog raws li neeg tej qub kevcai thiab raws li tej hwjchim uas kav lub qab ntuj, tsis yog raws li Khetos.”—Khaulauxi 2:8.

² Yog cov Khixatia uas raug xaiv tseg ntseeg tej tswvyim ntawd, ces lawv yuav ua tsis tau Vajtswv cov menyuam lawm. (Khaulauxi 2:20-23) Povlauj xav kom lawv tuav rawv txojkev sib raug zoo nrog Yehauvas, nws thiaj hais li no rau lawv: “Cia li xib rau tej uas nyob saum ntuj, tsis txhob xib rau tej uas nyob hauv ntiajteb.” (Khaulauxi 3:2) Cov Khixatia yuav tsum nco ntsoov tias Vajtswv twb xaiv lawv mus nyob saum ntuj lawm.—Khaulauxi 1:4, 5.

3. (1) Cov xaiv tseg muaj kev cia siab li cas? (2) Hauv zaj no, peb yuav teb cov lus nug twg?

 ³ Cov Khixatia uas xaiv tseg niaj hnub no, yuav tsum muaj lub siab xib rau Vajtswv lub Nceeg Vaj. Lawv yuav tsum nco ntsoov tias lawv yuav tau nrog Yexus Khetos ‘saws tej qub txeeg qub teg’ saum ntuj. (Loos 8:14-17) Ua li Povlauj cov lus ntuas ho pab tau cov uas nyob hauv ntiajteb no li cas? Lawv yuav xib rau tej uas nyob saum ntuj li cas? (Yauhas 10:16) Txawm tias Aplahas thiab Mauxe raug ntau yam kev nyuaj siab los, nkawd yeej muaj lub siab xib rau tej uas nyob saum ntuj. Peb yuav xyaum nkawd li cas?

4. Cov Khixatia yuav xib rau tej uas nyob saum ntuj li cas?

⁴ Cov uas yuav nyob mus ib txhis hauv lub ntiajteb no los yuav tsum xib rau tej uas nyob saum ntuj thiab. Qhov ntawd yog li cas tiag? Lawv yuav tsum muab Yehauvas thiab nws lub Nceeg Vaj tso ua ntej hauv lawv lub neej. (Luka 10:25-27) Yexus Khetos muab lub Nceeg Vaj tso ua ntej, peb yuav tsum ua ib yam li ntawd. (1 Petus 2:21) Nyob thawj 100 xyoo, tus yuav ntseeg thiab coj li cas los muaj. Ntau lub tswvyim dag ntxias cov Khixatia thiab feem coob tibneeg caum nyiaj txiag xwb. Xatas lub qab ntuj niaj hnub no zoo ib yam li ntawd thiab. (Nyeem 2 Khaulee 10:5.) Peb yuav tau xyaum coj li Yexus es tiv thaiv peb txojkev sib raug zoo nrog Yehauvas.

5. Peb yuav tsum ua tib zoo xav txog cov lus nug twg?

⁵ Puas yog peb pib ntshaw tej nyiaj txiag qhov txhia chaw, ib yam li lub qab ntuj no lawd? Tej yam uas peb ua thiab xav txog, qhia tseeb tias peb ntshaw dabtsi tiag. Yexus thiaj hais li no: “Koj tej nyiaj txiag nyob qhovtwg, koj lub siab yeej nyob qhov ntawd.” (Mathai 6:21) Peb yuav tsum ua tib zoo xav txog cov lus nug no: Yam twg tseem ceeb tshaj hauv kuv lub neej? Puas yog kuv tas zog txhawj txog tej nyiaj txiag thiab kev khwv noj khwv haus xwb? Puas yog kuv niaj hnub nrhiav kev tau zoo xwb? Ua li kuv puas xyaum coj lub neej yoojyim? Kuv puas xav txog kuv txojkev sib raug zoo nrog Yehauvas? (Mathai 6:22) Yexus hais tias yog peb “khaws nyiaj txiag cia hauv ntiajteb” no xwb, ces peb yuav plam kev sib raug zoo nrog Yehauvas.—Mathai 6:19, 20, 24.

6. Peb yuav kov yeej peb lub siab uas ntshaw ua txhaum li cas?

⁶ Peb yog neeg txhaum thiaj yoojyim heev rau peb ua yuam kev. (Nyeem Loos 7:21-25.) Yog tias peb tsis cia Vajtswv lub hwj huam dawb huv pab peb, ces peb yuav qaug rau tej kev lomzem uas qw ua nqaj ua nqug, “qaug dej qaug cawv . . . ua dev ua npua ua phem ua qias,” saib tsis taus Vajtswv txoj kevcai. (Loos 13:12, 13) Peb lub siab yeej ntxhi tshuav kom peb mus ua phem. Cuag li peb yuav tsum nrog peb lub cev sib qhau. Yog peb xav kov yeej peb lub siab, peb yuav tsum xib rau tej uas nyob saum ntuj. Yeej tsis yoojyim kiag li. Povlauj thiaj hais li no: “Kuv ntaus kuv lub cev thiab tswj cia.” (1 Khaulee 9:27) Peb yuav tsum tswj peb lub cev ib yam li ntawd. Cia peb kawm seb Aplahas thiab Mauxe nkawd tseg tus qauv zoo li cas rau peb.—Henplais 11:6.

7, 8. (1) Aplahas thiab Xala ntsib teeb meem dabtsi? (2) Aplahas xav ntsoov txog dabtsi?

⁷ Thaum Yehauvas hais kom Aplahas coj nws tsev neeg mus nyob tebchaws Khana-as, Aplahas zoo siab hlo ua raws nraim li Yehauvas tau hais. Vim Aplahas muaj kev ntseeg thiab mloog Yehauvas lus, Nws thiaj cog lus li no rau Aplahas: “Kuv yuav tsa koj ua ib haiv neeg loj thiab kuv yuav foom koob hmoov rau koj.” (Chiv Keeb 12:2) Tiamsis ib xyoos tas ib xyoos tuaj, Aplahas thiab Xala nkawd tsis muaj ib tug menyuam  li. Aplahas puas txhawj tsam Vajtswv tsis nco qab Nws lo lus cog tseg lawd? Lub caij ntawd, Aplahas lawv ntsib ntau yam teeb meem. Aplahas tso tej vaj tse zoo zoo tseg hauv lub moos Aw lawm, los nyob tsev ntaub xwb. Lawv khiav li 1,000 mais (miles) lossis 1,600 kilumev (km) kev mus rau tebchaws Khana-as lawm. Lawv kuj ntsib kev tshaib kev nqhis, tub sab tug nyiag. (Chiv Keeb 12: 5, 10; 13:18; 14:10-16) Txawm tias lawv raug tej no los, Aplahas thiab nws tsev neeg yeej tsis xav txog qhov uas yuav thim rov qab mus nyob lub moos Aw.—Nyeem Henplais 11:8-12, 15.

⁸ Aplahas “ntseeg [Yehauvas]” nws thiaj tsis “xib rau tej yam hauv ntiajteb” no. (Chiv Keeb 15:6) Nws xav ntsoov txog Yehauvas lo lus cog tseg. Yehauvas pom Aplahas txojkev ntseeg nws thiaj hais tias: “‘Cia li saib saum ntuj, yog koj suav txheeb tej hnub qub cia li suav mus.’ Mas [Yehauvas] hais rau nws tias, ‘Koj caj ces yuav coob ib yam nkaus li ntawd.’” (Chiv Keeb 15:5) Thaum Aplahas hnov Yehauvas hais li ntawd, nws paub tseeb tias Yehauvas tseem nco ntsoov nws. Tom qab Yehauvas hais cov lus ntawd tas, txhua zaus Aplahas ntsia pom cov hnub qub saum nruab ntug, nws yeej xav txog Yehauvas lo lus cog tseg. Puas muaj li Yehauvas cog tseg? Thaum txog lub sijhawm uas Yehauvas teem cia, Xala txawm xeeb tub raws li Yehauvas cog lus tiag.—Chiv Keeb 21:1, 2.

9. Peb yuav xyaum Aplahas li cas?

⁹ Ib yam li Aplahas, peb niaj hnub tos lub sijhawm uas Yehauvas tej lus cog tseg muaj tiav. (2 Petus 3:13) Yog tias peb tsis xib rau tej yam saum ntuj, ces peb yuav xav tias ua cas Yehauvas yuav sej sijhawm ntev ua luaj li. Tej zaum peb tsis kub siab ua Yehauvas tes haujlwm li qub lawm. Puas yog yav tas los koj tso ntau yam tseg los teev tiam Yehauvas? Tej zaum koj twb ua ib tug tho kev, lossis tuav ib teg haujlwm zoo rau Yehauvas lawm. Ua li nimno koj puas tseem kub siab li qub? Koj puas xyaum li Aplahas? Aplahas ua siab ntev tos lub sijhawm uas Yehauvas teem cia. (Henplais 11:10) Aplahas “ntseeg [Yehauvas],” nws thiaj tau ua Vajtswv tus phoojywg.—Loos 4:3.

10. Mauxe loj hlob qhovtwg?

¹⁰ Mauxe kuj muaj lub siab xib rau tej uas nyob saum ntuj thiab. Nws nyob hauv tebchaws Iyi, uas yog lub tebchaws vam meej tshaj plaws rau lub caij ntawd. Falau tus ntxhais tu nws hlob. Phau Vajlugkub hais tias Mauxe “kawm cov Iyi txhua yam kev txawj ntse, nws thiaj muaj zoo ncauj lus thiab txawj ua haujlwm.” (Tubtxib Tes Haujlwm 7:22) Mauxe loj hlob hauv Falau tsev. Yog nws ntshaw meej mom siab nws yeej nrhiav tau xwb. Tiamsis Mauxe xam  pom tias muaj ib yam zoo tshaj qhov ntawd. Nws xav ua raws li Vajtswv lub siab nyiam.

11, 12. (1) Mauxe saib txojkev kawm ntawv twg rau nqe tshaj? (2) Ua cas peb thiaj paub li ntawd?

¹¹ Thaum Mauxe tseem yau, Yaukhenpe uas yog Mauxe niam, twb qhia nws txog cov Henplais tus Vajtswv Yehauvas lawm. Mauxe suav tias tsis muaj ib yam tseem ceeb npaum li qhov uas nws paub Yehauvas. Nws thiaj tso nyiaj txiag thiab lub meej mom siab tseg los ua raws li Vajtswv lub siab nyiam. (Nyeem Henplais 11:24-27.) Muaj Yaukhenpe cob Mauxe thaum nws tseem me, nws thiaj muaj kev ntseeg rau Yehauvas thiab muaj lub siab xib rau tej uas nyob saum ntuj.

¹² Mauxe kawm ntawv siab heev. Tsis muaj ib txojkev kawm nto moo tshaj rau tiam ntawd. Txawm li ntawd los, nws tsis nrhiav hwjchim, meej mom ,thiab nyiaj txiag hauv tebchaws Iyi. Tiamsis phau Vajlugkub qhia tias Mauxe “xaiv qhov uas nrog Vajtswv cov neeg raug txom nyem zoo dua li qhov uas nyob ua lomzem ib vuag dua hauv txojkev txhaum.” Tom qab no, dabtsi pab kom Mauxe paub coj Vajtswv haiv neeg Yixayee? Tsis yog qhov uas nws kawm ntawv siab, tiamsis yog qhov uas nws tau kawm txog Yehauvas.

13, 14. (1) Ua ntej Vajtswv txib Mauxe mus tso Yehauvas haiv neeg dim, Mauxe yuav tsum xyaum li cas? (2) Peb yuav tsum xyaum coj li cas thiab?

¹³ Mauxe yeej hlub Yehauvas thiab Nws haiv neeg Yixayee uas ua qhev hauv Iyi teb. Thaum Mauxe muaj 40 xyoo nws xav tias nws yuav tso tau lawv dim. (Tubtxib Tes Haujlwm 7:23-25) Tiamsis Yehauvas paub tias tsis tau txog sijhawm txib Mauxe mus cawm cov Yixayee rau qhov Mauxe yuav tsum xyaum txo hwjchim, tswj nws lub siab, muaj lub siab mos siab muag thiab ua siab ntev. (Paj Lug 15:33) Nws yuav tsum xyaum li no nws thiaj paub tu tej teeb meem uas yuav muaj tom hauv ntej. Mauxe yug yaj tau 40 xyoo, nws thiaj xyaum tau lub siab mos siab muag.

¹⁴ Qhov uas Yehauvas ncua sijhawm rau Mauxe xyaum li no pab puas tau nws? Yeej pab tau kawg. Phau Vajlugkub hais tias tom qab no, Mauxe yog “ib tug uas tsis muab hlob kiag li, nws txo hwjchim qes dhau tej neeg hauv qab ntuj huvsi.” (Xwm Txheej Taug Kev 12:3) Mauxe xyaum li no nws thiaj ua taus siab ntev rau coob leej ntau tus, thiab ua siab mos muag tu lawv tej plaub ntug. (Khiav Dim 18:26) Peb los kuj yuav tsum xyaum tus cwj pwm uas Vajtswv pom zoo, peb thiaj dim thaum txog lub sijhawm muaj kev ceeb laj txom nyem loj kawg, thiab dim tau mus nyob hauv lub ntiajteb tshiab. (Qhia Tshwm 7:14) Xav seb koj puas muaj kev sib raug zoo nrog luag lwm tus? Ua li thaum koj nrog cov neeg uas muaj muaj tu siab lossis chim chim taus, koj puas ua taus siab ntev rau lawv? Cia peb xyaum li Povlauj cov lus no: “Cia li hwm txhua tus, hlub cov kwvtij.”—1 Petus 2:17.

15, 16. (1) Vim li cas peb yuav tsum muaj lub siab xib rau tej yam nyob saum ntuj? (2) Vim li cas cov Khixatia yuav tsum coj zoo?

¹⁵ Peb nyob rau lub “sijhawm txom nyem nyuaj siab kawg.” (2 Timaute 3:1) Yog li ntawd, tseem ceeb heev rau peb muaj lub siab xib rau tej yam nyob saum ntuj, peb thiaj tuav kev ntseeg ruaj khov rau Yehauvas. (1 Thexalaunika 5:6-9) Cia peb kawm seb peb yuav tsum ua li cas.

¹⁶ Coj zoo: Petus sau tias tseem ceeb heev rau peb “ua zoo kawg nkaus rau hauv lwm haiv neeg.” Vim li cas? Rau qhov thaum cov uas tsis ntseeg Yehauvas pom peb tes haujlwm zoo, lawv “yuav qhuas Vajtswv.” (1 Petus 2:12) Yog li ntawd, cia peb ua txhua yam los qhuas Yehauvas, tsis hais hauv vaj hauv tsev, tom haujlwm, tom tsev kawm ntawv, thaum mus ua si, thiab mus  tshaj tawm txoj xov zoo. Peb puavleej yog neeg txhaum, yog li ntawd muaj tej lub caij peb yuav ua tau yuam kev. (Loos 3:23) Tiamsis thaum koj ua yuam kev, txhob qaug zog. Phau Vajlugkub qhia tias Yehauvas yuav pab koj “tawm tsam kawg nkaus rau hauv txojkev ntseeg.”—1 Timaute 6:12.

17. Peb yuav xyaum Yexus tus cwj pwm li cas? (Saib daim duab ntawm sab no.)

¹⁷ Xyaum Yexus tus cwj pwm: Yog peb xav coj zoo, peb yuav tsum xub muaj tus cwj pwm zoo. Povlauj qhia kom cov ntseeg ‘cia li muaj lub siab ib yam li Yexus Khetos.’ (Filipi 2:5) Yexus muaj tus cwj pwm zoo li cas? Nws txo hwjchim nws thiaj siv zog ua haujlwm rau Yehauvas kawg siab kawg ntsws. Yexus xav txog tes haujlwm tshaj tawm Vajtswv lub Nceeg Vaj tas zog xwb. (Malakau 1:38; 13:10) Yog tias peb txo hwjchim thiab kub siab lug mus tshaj tawm txoj xov zoo, ces twb yog peb xyaum coj Yexus tus cwj pwm.

18. Peb yuav txhawb Yehauvas tes haujlwm li cas?

¹⁸ Txhawb Yehauvas tes haujlwm: Vajtswv lub ntsiab yog kom txhua leej txhua tus “saum ntuj thiab hauv ntiajteb” no zwm rau Yexus. (Filipi 2:9-11) Txawm tias Yexus tau lub meej mom siab li no los nws tseem zwm rau nws Txiv. Peb yuav tsum ua ib yam li ntawd thiab. (1 Khaulee 15:28) Peb yuav txhawb Yehauvas tes haujlwm li cas? Peb yuav tsum “mus coj txhua haiv neeg los ua [Yexus] li thwjtim.” (Mathai 28:19) Tsis tas li ntawd xwb, peb yuav tsum nrhiav kev los “ua zoo rau txhua tus,” tsis hais peb cov kwvtij nkauj muam los yog tej neeg zej zos.—Kalatia 6:10.

19. Peb yuav tsum txiav txim siab ua dabtsi?

¹⁹ Peb zoo siab heev uas Yehauvas cob qhia kom peb muaj lub siab xib rau tej yam nyob saum ntuj. Cia peb “ua siab ntev thev sib tw dhia hauv txojkev uas nyob tom peb hauv ntej.” (Henplais 12:1) Txawm peb yuav ua dabtsi los xij, thov kom peb txhua tus “rau siab ua ib yam li ua rau tus Tswv [Yehauvas].” Peb tso siab tias thaum kawg peb Txiv Yehauvas yuav foom koob hmoov nplua mias rau peb.—Khaulauxi 3:23, 24.