1, 2. (1) Vim li cas 24,000 tus Yixayee thiaj tsis pom lub tebchaws uas Vajtswv cog tseg rau lawv? (2) Vim li cas tseem ceeb rau peb kawm txog zaj no?

THAUM cov Yixayee twb mus yuav txog lub tebchaws uas Vajtswv cog tseg rau lawv, muaj txhiab txhiab tus txivneej Yixayee tau mus “deev Mau-a tej ntxhais.” Vim lawv ua txhaum loj li ntawd, muaj 24,000 tus raug tua pov tseg. Lawv twb mus yuav txog lub tebchaws uas Vajtswv cog tseg tiamsis lawv plam tej koob hmoov ntawd, vim lawv qaug rau kev nkauj kev nraug.​—Xwm Txheej Taug Kev 25:1-5, 9.

² Tau muab zaj no sau cia ua qauv “ntuas peb cov uas nyob ze lub sijhawm kawg.” (1 Khaulee 10:6-11) “Lub sijhawm kawg” twb yuav xaus sai sai no. Tshuav tsis ntev lawm xwb, Vajtswv yuav muab lub ntiajteb no kho dua tshiab. (2 Timaute 3:1; 2 Petus 3:13) Tu siab kawg li uas Yehauvas cov tibneeg ib txhia tsis coj raws li Nws tej kevcai dawb huv, lawv thiaj qaug rau kev nkauj kev nraug lawm. Lawv raug kev nyuaj siab ntau yam. Yog tias lawv tsis ntxeev dua siab tshiab, lawv yuav tsis tau nyob lub Vaj Kaj Siab hauv ntiajteb no.

3. Vim li cas tseem ceeb ua luaj rau cov txij nkawm cia Yehauvas cob qhia thiab tsom kwm lawv? (Saib daim duab ntawm sab no.)

³ Yehauvas yuav tau cob qhia thiab tiv thaiv cov txij nkawm rau  qhov lub qab ntuj no tsuas txhawb kev nkauj kev nraug, kev sib daj sib dee xwb. (Nyeem Ntawv Nkauj 127:1.) Hauv zaj no peb yuav kawm tias cov txij nkawm yuav tsum tiv thaiv lawv lub siab thiab nrog Vajtswv sib raug zoo. Lawv yuav tsum coj tus cwj pwm tshiab uas Vajtswv pom zoo, muaj kev sib txuas lus, thiab tsis txhob cais chaw pw.

4. Vim li cas cov Khixatia ib txhia qaug rau kev nkauj kev nraug?

⁴ Cov Khixatia yuav tsum ua li cas lawv thiaj tsis qaug rau kev nkauj kev nraug? Peb yuav tsum tiv thaiv peb ob lub qhov muag. Yexus hais li no: “Txhua tus uas saib ib tug pojniam twg thiab xav ntxias nws mas twb deev tus pojniam ntawd hauv lub siab lawm.” (Mathai 5:27, 28; 2 Petus 2:14) Ua cas coob leej ntau tus ho qaug rau kev nkauj kev nraug? Ntau zaus twb yog lawv xub saib tej duab liab qab, nyeem tej ntaub ntawv ntsig txog kev nkauj kev nraug, lossis saib tej yam tsis tsim nyog hauv Is Taws Nej. Ib txhia saib tej yeeb yaj kiab uas muaj kev nkauj kev nraug ntau heev nyob rau hauv. Muaj dua lwm cov mus tsham tej chaw uas tibneeg ua si tej niag tag hmo. Tej zaum lawv txhob txwm mus saib tej pojniam txivneej hle khaubncaws liab qab rau sawvdaws saib. Ib txhia kuj qaug rau kev nkauj kev nraug vim lawv mus rau tej chaw uas ua txuj zuaj ib ce tiamsis yog chaw ua vuab tsuab xwb.

5. Vim li cas peb yuav tsum tiv thaiv peb lub siab?

⁵ Ib txhia qaug rau kev nkauj kev nraug rau qhov lawv xav kom lwm tus nyiam lossis tawb lawv. Lub qab ntuj no feem coob tswj tsis tau lawv tus kheej. Lawv ntshaw txhua yam kev nkauj kev nraug. Tsis tas li ntawd xwb, vim muaj kev txhaum neeg lub siab yeej dag ntxias lawv tas zaj tas zog. Tej zaum lawv lub siab yuav cia li nyiag nyiam luag poj luag txiv. (Nyeem Yelemi 17:9, 10.) Yexus thiaj hais tias: “Qhov uas xav phem, tua neeg, deev luag poj luag txiv, ua nkauj ua nraug, . . . puavleej yog tawm hauv lub siab los.”​—Mathai 15:19.

6, 7. (1) Yog tias peb lub siab ntshaw tej yam tsis tsim nyog, thaum kawg peb yuav ua txhaum li cas? (2) Peb yuav tsum ceev faj li cas peb thiaj tsis ua txhaum rau Yehauvas?

⁶ Muab ua piv txwv li no: Muaj 2 tug neeg uas nyias twb muaj nyias txij nkawm lawm, cia li sib nyiam. Thaum ntej nkawd ib leeg pib qhia siab rau ib leeg yam li tej niam txiv. Ntev mus ces nkawd tham txog tej yam uas tsim nyog nkawd qhia rau nkawd ob tug txij nkawm xwb. Nkawd yuav nrhiav nrhw kev kom tau sib cuag, thiab zais ntshis tsis pub leejtwg paub. Tiamsis thaum nkawd tseg tsis taus lawm, nkawd yuav tsis xav ua raws li Yehauvas hais lawm. Txawm tias txhaum los, yeej nyuaj heev rau nkawd tso tseg.​—Paj Lug 7:21, 22.

⁷ Ntev mus ntev tuaj, tsis yog nkawd tham pem xwb. Nkawd yuav pib sib tuav tes, sib nwj sib hnia, sib khawm, sib puag, sib xuas, thiab ua tej yam uas Vajtswv tsuas tso cai rau cov txij nkawm xwb. Tiamsis nkawd tsis quav ntsej Yehauvas tej kevcai ncaj ncees li lawm. Muaj raws li phau Vajlugkub tau hais: “Txhua tus raug ntxias rau thaum nws txojkev ntshaw yaum nws thiab coj nws mus ua txhaum.” Thaum txojkev ntshaw muaj zog heev lawm, nkawd yuav tsum sib daj sib dee xwb. (Yakaunpau 1:14, 15) Thaum cov txij nkawm ua txhaum li no, yeej yog ib yam tu siab kawg li. Yog lawv ntxov cia Yehauvas pab lawv, Yehauvas yeej yuav pab kom lawv saib txojkev txij nkawm rau nqe. Cia peb kawm seb yuav ua li cas tus txiv thiab tus pojniam thiaj saib taus txojkev txij nkawm.

8. Peb txojkev sib raug zoo nrog Yehauvas yuav tiv thaiv peb ntawm kev nkauj kev nraug li cas?

⁸ Nyeem Ntawv Nkauj 97:10. Yog tias peb nrog Vajtswv Yehauvas sib raug zoo, yuav tiv thaiv tau peb ntawm kev nkauj kev nraug. Thaum peb kawm txog Yehauvas tes haujlwm zoo kawg nkaus, ua rau peb xav “yoog li Vajtswv vim [peb] yog cov menyuam uas nws hlub.” Yog peb xyaum li Yehauvas ces peb yuav ntxub txojkev “ua nkauj ua nraug, ua kev phem kev qias.” (Efexau 5:1-4) Cov txij nkawm uas  nco ntsoov hais tias Vajtswv yuav txiav txim rau cov uas ua nkauj ua nraug thiab deev luag poj luag txiv, yeej yuav nrhiav kev los kho lub neej kom ib leeg npuab siab rau ib leeg.​—Henplais 13:4.

9. (1) Ua cas Yauxej thiaj tsis qaug rau Pautifa tus pojniam tej lus haub ntxias? (2) Peb kawm tau li cas los ntawm Yauxej tus qauv?

⁹ Cov Khixatia ib txhia tsis nco qab Yehauvas tej kevcai ncaj ncees lawm, vim lawv pheej poo cov neeg tsis ntseeg Yehauvas uas nrog lawv ua haujlwm ua ke. Tom qab lawb haujlwm los, lawv pheej siv sijhawm nrog cov ntawd mus ua si tas zog. Muaj dua ib co raug luag haub ntxias thaum tabtom ua haujlwm thiab. Phau Vajlugkub qhia tias Yauxej kuj ntsib qhov teeb meem no thaum nws ua haujlwm rau Pautifa. Pautifa tus pojniam nyiam Yauxej heev. Nws niaj hnub haub kom Yauxej nrog nws pw. Muaj ib hnub nws txawm “ntsiab nkaus Yauxej lub tsho thiab hais tias, ‘Los nrog kuv pw.’ ” Tiamsis Yauxej txawm khiav tawm plaws tamsim ntawd. Ua cas Yauxej ho tsis qaug rau Pautifa tus pojniam tej lus haub ntxias? Twb yog Yauxej xav tiv thaiv nws txojkev sib raug zoo nrog Vajtswv. Tom qab ntawd, Yauxej poob haujlwm thiab nws raug kaw hauv tsev loj cuj. Tiamsis Yehauvas nco ntsoov Yauxej thiab foom koob hmoov rau nws. (Chiv Keeb 39:1-12; 41:38-43) Txawm peb nyob lub caij twg los xij, cia li khiav deb ntawm tej kev haub ntxias uas yuav coj tau peb yuam kev.

10. Thaum cov txij nkawm muab tus neeg tshiab los hnav, lawv yuav coj ncaj ncees li cas?

¹⁰ Phau Vajlugkub qhia tias peb yuav tsum hloov peb lub neej, ib yam li peb hloov dua ib ce tsoos tsho tshiab. Tus uas muab tus neeg tshiab los hnav yuav tsum coj “ncaj ncees thiab dawb huv” ib yam li Vajtswv. Thaum cov txij nkawm muab tus neeg tshiab los hnav, lawv yuav sawv ruaj khov thiab zam dhau kev nkauj kev nraug. (Efexau 4:24) Cov uas muab tus neeg tshiab los hnav yuav tsum muab lub neej uas nyiam “kev ua nkauj nraug, kev ua phem ua qias, kev ntshaw, xav tej uas phem thiab xav yuav luag tug” tua pov tseg tibsi. (Nyeem Khaulauxi 3:5, 6.) Cov lus “tua pov tseg” txhais li cas? Txhais tias yus yuav tsum ua txhua yam los tawm tsam lub siab uas ntshaw kev nkauj kev nraug. Yus yuav tsum ceev faj txhua yam uas ua rau yus lub siab xib rau lwm tus uas tsis yog yus tus txij nkawm. (Yauj 31:1) Thaum yus coj raws li Vajtswv tej kevcai lawm, yus yuav xyaum “ntxub yam uas phem thiab tuav rawv yam uas zoo.”​—Loos 12:2, 9.

11. Thaum cov txij nkawm muab tus neeg tshiab los hnav, lawv yuav nyob ruaj khov li cas?

¹¹ Yehauvas yog tus qhia kom peb muab tus neeg tshiab los hnav. Yog li ntawd, tus uas hnav tus neeg tshiab yuav tau xyaum raws li Yehauvas tus yam ntxwv. (Khaulauxi 3:10) Ob niam txiv yuav tsum muaj “lub siab khuvleej, siab txo hwjchim, siab mos siab muag thiab thev taus,” nkawd txojkev txij nkawm thiaj nyob ruaj khov, thiab Yehauvas yuav foom koob hmoov nplua mias rau nkawd. (Khaulauxi 3:12) Yog tias nkawd “cia txojkev siab tus uas Khetos pub” los coj nkawd lub siab, nkawd yuav hajyam koom tau ib lub siab dua. (Khaulauxi 3:15) Thaum cov txij nkawm “sib hlub” raws li phau Vajlugkub hais, ces lawv yuav muab lawv tus txij nkawm “saib hlob.”​—Loos 12:10.

12. Raws li koj xav, dabtsi pab tau txojkev txij nkawm muaj kev zoo siab?

¹² Muaj ob niam txiv hu ua Sid thiab Sonja uas sib hlub heev. Dabtsi pab tau nkawd? Sid hais tias: “Wb pom tias tseem ceeb tshaj plaws rau yus muaj kev hlub, wb thiaj xyaum sib hlub li ntawd. Wb kuj pom tias tseem ceeb heev rau yus ua siab mos siab muag thiab.” Sonja hais tias: “Tseem ceeb heev rau ib leeg xyaum ua zoo rau ib leeg. Thiab txawm tias tsis yoojyim los, ib leeg yuav tsum txo hwjchim rau ib leeg.”

13. Yuav kom txojkev txij nkawm nyob ruaj khov ob niam txiv yuav tsum hais lus li cas, thiab yog vim li cas?

¹³ Yam zoo tshaj uas pab tau yus ob tug txij nkawm nyob ruaj khov yog ib tug ua tib zoo hais lus rau ib tug. Tu siab heev uas muaj ib  txhia txij nkawm tsis sib hwm, ib tug hais lus saib tsis taus ib tug kiag li. Lawv txawj hais lus zoo rau tej qhua kawg tiamsis hauv lub cuab lub yig mas lawv hais lus iab lus daw xwb. Thaum muaj “kev cib nyeej, kev chim, kev npau taws, kev sib cav sib ceg” ces yuav txo txojkev txij nkawm zuj zus. (Efexau 4:31) Tus cwj pwm uas hais lus ntsw thiab thuam luag tas zog, yuav rhuav tau yus txojkev txij nkawm. Yog li ntawd, thaum ob niam txiv sib txuas lus nkawd yuav tsum hais tej lus zoo, lus mos lus muag uas qhia tias nkawd muaj lub siab khuvleej nkawd tus txij nkawm.​—Efexau 4:32.

14. Thaum muaj teeb meem ob niam txiv yuav tsum zam txhob ua dabtsi?

¹⁴ Phau Vajlugkub hais tias “muaj caij nyob twjywm.” (Laj Lim Tswvyim 3:7) Puas yog nqe no qhia tias thaum yus chim ces yus tsis tas nrog yus tus txij nkawm sib txuas lus? Tsis yog. Kev sib txuas lus tseem ceeb heev rau ob tug txij nkawm lub neej. Muaj ib tug pojniam hauv tebchaws Ntsaws Mis Nis hais tias: “Thaum muaj teeb meem, yog ib tug cia li caiv kiag tsis hais lus rau nws tus txij nkawm li lawm, yuav ua rau nws tu siab.” Nws hais ntxiv tias: “Thaum yus npau taws heev yeej tsis yoojyim rau yus tswj yus lub siab. Txawm li ntawd los, tsis zoo rau yus qw tej niag zaj kom zoo yus siab. Yog yus lam tau lam cem kom siab nqeg yuav ua rau yus tus txij nkawm yimhuab tu siab, ces yus tsuas muaj chim ntxiv xwb.” Yog li ntawd, thaum muaj teeb meem, tsis zoo rau ob niam txiv sib cav sib ceg. Kuj tsis zoo rau nkawd tu ncua kev sib txuas lus thiab. Tiamsis thaum pib muaj teeb meem nkawd yuav tsum kho tamsid, txhob tos ua teeb meem loj mam kho.

15. Yuav sib txuas lus li cas thiaj txhawb tau kev txij nkawm?

¹⁵ Yog tias ob niam txiv siv sijhawm los sib txuas lus thiab sib qhia siab ces yuav txhawb tau nkawd txojkev txij nkawm nyob ruaj khov. Tiamsis nco ntsoov tias txawm yus cov lus tseem ceeb npaum li cas los, yog yus hais tej lus iab lus daw ces yus tus txij nkawm yuav tsis xav mloog. Yog li ntawd, txawm nyuaj npaum li cas los yus yuav tsum xaiv tej lus mos lus muag los hais, thiab yus lub suab yuav tsum qhia tias yus ua siab mos siab muag tiag. (Nyeem Khaulauxi 4:6.) Ob niam txiv yuav nyob ruaj khov yog tias nkawd xyaum hais tej lus zoo uas “tsim tsa lub neej” thiab muaj nuj nqes xwb.​—Efexau 4:29.

16, 17. Vim li cas tseem ceeb ua luaj rau ob tug txij nkawm ib leeg paub tej uas ib leeg cheem tsum?

¹⁶ Thaum ob niam txiv ib tug xam pom ib tug ua ntej, nkawd lub neej yuav nyob ruaj khov. (Filipi 2:3, 4) Ob niam txiv ib leeg yuav tsum paub ib leeg lub siab, thiab paub tias lub caij twg yus tus txij nkawm xav nrog yus pw.​—Nyeem 1 Khaulee 7:3, 4.

¹⁷ Tu siab tias muaj ib txhia txij nkawm ib tug tsis nyiam txav ti ib tug. Muaj ib txhia txivneej txawm xav tias yog nws yoog raws li nws tus pojniam, kuj yog nws ua tsis taus txiv. Tiamsis phau Vajlugkub qhia tias cov txiv yuav tsum “paub” pojniam lub siab. (1 Petus 3:7, NW) Tus txiv yuav tsum to taub hais tias kev txij nkawm tsis yog qhov uas yus tau nrog pojniam pw ua niam txiv xwb. Tus txiv yuav tsum hlub tshua nws tus pojniam txhua lub sijhawm. Tus pojniam thiaj li qab siab nrog nws ua neej los yog pw ua ke. Thaum nkawd ob leeg sib hlub sib tshua li no, yuav yoojyim rau nkawd ib leeg paub tej uas ib leeg cheem tsum.

18. Ob niam txiv yuav tsum ua li cas txojkev txij nkawm thiaj nyob ruaj khov?

¹⁸ Thaum ib tug txij nkawm mus deev lwm tus yog ib qho txhaum loj heev. Muaj tej lub sijhawm cov niam txiv raug teeb meem li ntawd vim nkawd tsis sib hlub sib tshua thiab pheej cais chaw pw. (Paj Lug 5:18; Laj Lim Tswvyim 9:9) Phau Vajlugkub thiaj qhia tias kom ob niam txiv tsis txhob “cais chaw pw” tsuas yog hais haum tso mam cais hmo puav xwb. Vim li cas? Ua li ntawd xwv “Xatas thiaj ntxias tsis tau [nkawd] ua txhaum vim [nkawd] tswj tsis tau [nkawd] lub siab.” (1 Khaulee 7:5) Thaum ob tug txij nkawm cia Xatas ua rau nkawd “tswj tsis tau nkawd lub siab” es ib tug mus ua txhaum deev luag poj luag txiv lawm, yuav yog ib qho kev puas ntsoog loj heev. Tseem ceeb rau cov txij nkawm txhob cais chaw pw, thiaj qhia tias nkawd ib leeg xav txog ib leeg ua ntej. Qhov uas ob leeg pw ua ke ntawd yog nkawd txojkev sib hlub, tsis yog ib leeg yuam ib leeg. Yog tias nkawd sib hlub li no ces nkawd txojkev txij nkawm yuav nyob ruaj khov.​—1 Khaulee 10:24.

19. Peb yuav tsum txiav txim siab ua dabtsi, thiab yog vim li cas?

¹⁹ Peb twb nyob ze heev rau lub qab ntuj tshiab lawm! Yuav yog ib qhov kev puas ntsoog loj heev yog peb lam qaug siab rau kev txhaum, ib yam li 24,000 leej Yixayee uas los txog ntawm lub tiaj nrag Mau-a. Phau Vajlugkub ceeb toom tias: “Tus uas xav tias nws nyob ruaj khov lawm yuav tsum ceev faj tsam nws ntog.” (1 Khaulee 10:12) Yog li ntawd, peb yuav tsum ua ncaj ncees rau Yehauvas thiab rau peb tus txij nkawm, thiaj txhawb tau peb txojkev txij nkawm nyob ruaj khov. (Mathai 19:5, 6) Tamsim no yog lub caij uas peb yuav tsum “ua [peb] lub neej rau Vajtswv pom tias [peb] tsis muaj ib qho phem, tsis muaj ib qho chaw thuam thiab . . . nyob siab tus yees.”​—2 Petus 3:13, 14.