1, 2. (1) Yexus qhia nws cov phoojywg txog dabtsi? (Saib daim duab ntawm sab no.) (2) Vim li cas tseem ceeb rau peb kawm lub ntsiab txog cov yaj thiab cov tshis?

YEXUS qhia tej yam tseem ceeb kawg li rau Petus, Anru, Yakaunpau, thiab Yauhas lawv. Nws qhia lawv txog tus qhev ncaj thiab ntse, 10 tus hluas nkauj, thiab cov nyiaj tala. Tom qab ntawd Yexus qhia ib zaj kwv huam ntxiv rau lawv. Nws hais txog lub sijhawm uas “Neeg leej Tub” yuav los txiav txim rau “ib tsoom tebchaws.” “Neeg leej Tub” yuav muab tibneeg cais ua 2 pab, ib pab yog pab yaj thiab ib pab yog pab tshis. Nws kuj qhia txog ib pab neeg tseem ceeb uas yog Vajntxwv cov “kwvtij.”—Nyeem Mathai 25:31-46.

² Niaj hnub nimno Yehauvas cov tibneeg xav paub txog zaj kwv huam ntawd. Zaj kwv huam ntawd qhia tias ib pab yuav tau txojsia ntev mus ib txhis, tiamsis lwm pab yuav raug kev puam tsuaj. Peb yuav tsum kawm lub ntsiab hauv zaj kwv huam no, peb thiaj muaj feem nrog pab uas yuav tau txojsia mus ib txhis. Zaj kawm no yuav teb tau cov lus nug no: Yehauvas pab peb to taub zaj kwv huam txog cov yaj thiab cov tshis li cas? Ua cas peb thiaj paub tias zaj kwv huam no txhawb kom peb tshaj tawm txoj xov zoo? Leejtwg yuav tsum tshaj tawm txoj xov zoo? Vim li cas tseem ceeb rau  peb muab siab npuab tus “Vajntxwv” thiab nws cov “kwvtij”?

3, 4. (1) Yuav kom peb to taub zaj kwv huam txog cov yaj thiab cov tshis, peb yuav tsum teb cov lus nug twg? (2) Xyoo 1881, Phau Tsom Faj Askiv txhais zaj kwv huam ntawd li cas?

³ Yuav kom peb to taub zaj kwv huam txog cov yaj thiab cov tshis, peb yuav tsum teb cov lus nug no: (1) “Neeg leej Tub” lossis tus “Vajntxwv” yog leejtwg? Cov yaj thiab cov tshis yog leejtwg? Thiab tus Vajntxwv cov “kwvtij” piv txog leejtwg? (2) Thaum twg “Neeg leej Tub” mam li cais cov yaj ntawm cov tshis? (3) Vim li cas Yexus muab ib txhia hu ua yaj, ib txhia hu ua tshis?

⁴ Xyoo 1881 Phau Tsom Faj Askiv hais tias “Neeg leej Tub” lossis tus “Vajntxwv” piv txog Yexus. Phau Tsom Faj piav tias Vajntxwv cov “kwvtij” piv txog cov uas yuav nrog Yexus kav saum ntuj thiab cov uas yuav nyob hauv ntiajteb no thaum lawv zoo tiav lawm. Lawv ntseeg tias Yexus yuav cais cov yaj ntawm cov tshis rau lub sijhawm uas Khetos Kav 1,000 Xyoo. Lawv kuj ntseeg tias cov uas muaj kev hlub li Vajtswv thiaj yog cov uas Yexus muab hu ua nws cov yaj.

5. Xyoo 1923, Yehauvas pab kom nws cov tibneeg to taub li cas ntxiv txog zaj kwv huam?

⁵ Tom qab no Yehauvas pab kom nws cov tibneeg to taub zaj kwv huam ntawd zoo dua. Xyoo 1923, Phau Tsom Faj Askiv lub 10 Hli tim 15 piav tias Neeg Leej Tub yeej yog Yexus. Tiamsis Phau Tsom Faj siv phau Vajlugkub los piav tias, tus Vajntxwv cov “kwvtij” tsuas piv txog cov uas nrog Yexus kav saum ntuj xwb, tsis yog cov nyob hauv ntiajteb thiab. Thaum Khetos Kav 1,000 Xyoo, ces nws cov kwvtij puavleej nyob saum ntuj lawm. Cov yaj yog cov uas nyob hauv ntiajteb no thaum Khetos Kav 1,000 Xyoo. Thaum twg mam li cais cov yaj thiab cov tshis? Zaj kwv huam hais tias cov yaj yog cov uas pab Vajntxwv cov kwvtij. Yog li, Yexus yuav tsum cais cov yaj thiab cov tshis thaum nws cov kwvtij tseem nyob hauv ntiajteb no, ua ntej lub caij Khetos Kav 1,000 Xyoo. Phau Tsom Faj qhia ntxiv tias cov yaj yog cov uas lees yuav Yexus ua lawv tus Tswv thiab ntseeg tias lub Nceeg Vaj yuav kho ib puas tsav yam.

6. Xyoo 1995, peb to taub zaj kwv huam txog cov yaj thiab cov tshis li cas?

⁶ Tau ntau xyoo peb xav tias thaum peb tshaj tawm txoj xov zoo rau tiam kawg no, cov uas mloog yog cov yaj tiamsis cov uas tsis mloog yog cov tshis. Tiamsis xyoo 1995, peb mam li to taub tias zaj kwv huam no tsis yog txhais li ntawd. Phau Tsom Faj Askiv muab nqe Vajlugkub ntawm Mathai 24:29-31 (nyeem) piv rau Mathai 25:31, 32 (nyeem). Phau Tsom Faj piav tias Yexus yuav los txiav txim rau cov yaj thiab cov tshis rau lub sijhawm muaj kev ceeb laj txom nyem loj kawg li. Thaum ntawd Neeg Leej Tub nrog “nws lub hwjchim ci ntsa iab” nqes los. *—Saib cov lus hauv qab taw qhia.

7. Zaj kwv huam txog cov yaj thiab cov tshis txhais li cas?

⁷ Niaj hnub no peb to taub zaj kwv huam txog cov yaj thiab cov tshis zoo heev lawm. Peb paub tias “Neeg leej Tub” lossis tus “Vajntxwv” piv txog Yexus. Tus Vajntxwv cov “kwvtij” piv txog cov kwvtij nkauj muam uas lub hwj huam dawb huv xaiv tseg uas yuav nrog Yexus kav saum ntuj. (Loos 8:16, 17) Cov “yaj” thiab cov “tshis” piv txog txhua haiv neeg hauv lub qab ntuj. Yexus yuav txiav txim rau lawv thaum yuav xaus lub caij muaj ceeb laj txom nyem loj kawg li. Yexus yuav tshuaj saib lawv tau pab cov xaiv tseg uas tseem nyob hauv ntiajteb no li cas. Peb  zoo siab kawg li uas Yehauvas ua siab ntev qhia ib qho zuj zus rau peb, kom peb nkag siab lub ntsiab ntawm tej kwv huam hauv Mathai tshooj 24 thiab 25!

8, 9. Vim li cas Yexus thiaj suav tias cov yaj yog cov uas “ncaj ncees”?

⁸ Thaum Yexus piav zaj kwv huam txog cov yaj thiab cov tshis, nws tsis siv lo lus “tshaj tawm.” Ua cas peb ho hais tias zaj kwv huam ntawd txhawb kom peb mus tshaj tawm?

⁹ Nco ntsoov tias thaum Yexus hais txog cov yaj thiab cov tshis, nws tsuas hais lus piv txwv xwb, tsis yog nws hais txog ib co tsiaj tiag tiag. Ib yam li ntawd, thaum Yexus hais tias cov yaj yuav tsum pab nws cov kwvtij kom muaj noj muaj hnav, saib xyuas lawv thaum lawv muaj mob muaj nkeeg, thiab mus xyuas lawv hauv tsev lojfaj, yog lus piv txwv thiab xwb. Tsis yog txhua tus yuav tsum nqes tes pab cov xaiv tseg li ntawd, Yexus mam li suav tias lawv yog nws cov yaj. Tiamsis Yexus tus nru lus yog kom lawv pom tias cov xaiv tseg yog Yexus cov kwvtij, thiab lawv yuav tsum muab siab npuab cov xaiv tseg rau tiam kawg. Thaum lawv ua li ntawd ces Yexus suav tias lawv yog cov yaj “ncaj ncees.”—Mathai 10:40-42; 25:40, 46; 2 Timaute 3:1-5.

10. Cov yaj pab Khetos cov kwvtij li cas?

¹⁰ Thaum Yexus hais zaj kwv huam txog cov yaj thiab cov tshis, nws hais txog tej uas yuav tshwm sim rau tiam kawg. (Mathai 24:3) Yexus hais tias: “Txoj xov zoo uas hais txog Vajtswv lub [Nceeg Vaj] yuav raug muab tshaj tawm thoob plaws lub ntiajteb.” (Mathai 24:14) Ua ntej Yexus tham txog cov yaj thiab cov tshis, Yexus hais zaj kwv huam txog cov nyiaj tala. Yexus qhia txog cov tala kom cov xaiv tseg to taub tias lawv yuav tsum rau siab ntso mus tshaj tawm txoj xov zoo. Tiamsis cov xaiv tseg tamsim no tsis muaj coob hauv ntiajteb no lawm. Yog li ntawd, muaj haujlwm ntau heev rau lawv ua. Yexus sam hwm kom cov xaiv tseg tshaj tawm rau “txhua haiv neeg” ua ntej hnub kawg yuav los txog. Hauv Yexus zaj kwv huam txog cov yaj thiab cov tshis, cov “yaj” yog cov uas pab Yexus cov kwvtij. Yog li ntawd, tseem ceeb heev rau peb nqes tes pab Yexus cov kwvtij tshaj tawm txoj xov zoo. Puas yog peb pab nyiaj txiag thiab hais lus txhawb cov xaiv tseg xwb ces tau lawm?

11. Ib txhia xav li cas thiab vim li cas lawv thiaj nug li ntawd?

¹¹ Niaj hnub no Yexus cov thwjtim muaj 8 plhom leej thoob ntiajteb lawm. Feem coob yog cov uas muaj kev cia siab nyob hauv ntiajteb no mus ib txhis. Yexus puas muab cov nyiaj tala rau lawv coj mus ua luam? Tsis muab. Nws tsuas muab rau cov xaiv tseg xwb. (Mathai 25:14-18) Yog li ntawd, tej zaum ib txhia xav tias, ‘Yog Yexus tsuas muab cov tala rau cov xaiv tseg xwb, puas tsim nyog cov nyob hauv ntiajteb no ua tes haujlwm tshaj tawm thiab?’ Yeej tsim nyog! Cia peb kawm seb yog vim li cas.

12. Peb kawm tau li cas los ntawm Yexus cov lus hauv Mathai 28:19, 20?

¹² Yexus sam hwm kom tag nrho nws cov thwjtim mus tshaj tawm txoj xov zoo. Tom qab Yexus sawv hauv qhov tuag rov los, nws kom cov thwjtim mus “coj txhua haiv neeg los ua [nws] li thwjtim.” Lawv yuav tsum qhia lwm tus txog “txhua yam” uas Yexus tau qhia rau lawv lawd. Yog li, cov thwjtim yuav tsum tshaj tawm txoj xov zoo thiab. (Nyeem Mathai 28:19, 20.) Txawm peb yog cov xaiv tseg los tsis yog, peb txhua tus muaj feem mus tshaj tawm txoj xov zoo tibsi.—Tubtxib Tes Haujlwm 10:42.

13. Peb kawm tau li cas los ntawm Yauhas zaj yog toog?

 ¹³ Phau ntawv Qhia Tshwm qhia tias cov xaiv tseg thiab lwm cov yuav tsum tshaj tawm txoj xov zoo. Yexus ua rau Yauhas ua yog toog pom tus “Nkauj Nyab” uas nqua hu tibneeg los haus cov dej cawm siav. Tus nkauj nyab ntawd piv txog cov 144,000 leej uas raug xaiv mus nrog Yexus kav saum ntuj ceeb tsheej. (Qhia Tshwm 14:1, 3; 22:17) Cov dej piv txog tus nqe uas Yexus them los txhiv peb dim ntawm kev txhaum thiab kev tuag. (Mathai 20:28; Yauhas 3:16; 1 Yauhas 4:9, 10) Cov xaiv tseg kub siab lug qhia tibneeg txog tus nqe txhiv, kom sawvdaws paub tias tus nqe txhiv pab tau noob neej li cas. (1 Khaulee 1:23) Tiamsis zaj yog toog kuj muaj lus sam hwm kom cov uas yuav nyob hauv ntiajteb no nqua hu tibneeg tias, “Cia li los”! Lawv yuav tau mus tshaj tawm txoj xov zoo rau ib tsoom neeg sawvdaws. Yog li ntawd, Yauhas zaj yog toog qhia meej tias txhua tus uas tau hnov txoj xov zoo lawd, yuav tsum tshaj tawm rau lwm tus.

14. Peb yuav mloog “Khetos txoj kevcai” li cas?

¹⁴ Txhua tus uas mloog “Khetos txoj kevcai” yuav tsum tshaj tawm. (Kalatia 6:2) Yehauvas xav kom txhua leej txhua tus uas teev tiam nws mloog tib co kev lig kevcai. Yav tas los, nws xav kom cov Yixayee thiab lwm haiv neeg uas los koom lawv, coj tib txoj kevcai. (Khiav Dim 12:49; Levi Tej Kevcai 24:22) Niaj hnub no peb tsis coj Mauxe Txoj Kevcai lawm. Tiamsis peb txhua tus yuav tsum coj “Khetos txoj kevcai,” txawm peb yog ib tug xaiv tseg los tsis yog. Tseem ceeb heev rau peb txawj sib hlub ib yam li Yexus tau qhia. (Yauhas 13:35; Yakaunpau 2:8) Peb yuav tsum hlub Yehauvas, hlub Yexus thiab hlub tibneeg. Txojkev hlub yuav tsum tshoov kom peb tshaj tawm txog lub Nceeg Vaj rau txhua tus tau hnov.—Yauhas 15:10; Tubtxib Tes Haujlwm 1:8.

15. Vim li cas Yexus sam hwm kom nws cov thwjtim tshaj tawm?

¹⁵ Yexus cov lus sam hwm yog hais rau cov thwjtim tibsi. Thaum Yexus nrog nws 11 tug thwjtim sib cog lus tias lawv yuav nrog  nws kav lub Nceeg Vaj, puas yog nws cog lus rau lawv 11 leeg xwb? Tsis yog. Cov lus cog tseg ntawd yog hais rau cov 144,000 leej huvsi. (Luka 22:29, 30; Qhia Tshwm 5:10; 7:4-8) Thaum Yexus sawv rov qab los, nws sam hwm kom nws cov thwjtim mus tshaj tawm txoj xov zoo. Tsuas muaj ib txhia hnov Yexus sam hwm li ntawd xwb. (Tubtxib Tes Haujlwm 10:40-42; 1 Khaulee 15:6) Tiamsis tag nrho cov thwjtim uas nyob thawj 100 xyoo, puavleej mus tshaj tawm raws li Yexus tau sam hwm. (Tubtxib Tes Haujlwm 8:4; 1 Petus 1:8) Txawm tias Yexus tsis tau nkaw lus rau peb tim ntsej tim muag los, niaj hnub no peb yuav tsum tshaj tawm txoj xov zoo thiab. Muaj tshaj li 8 plhom tus Timkhawv tshaj tawm txoj xov zoo lawm. Thaum peb mob siab ua tes haujlwm ntawd, qhia tias peb muaj kev ntseeg rau Yexus tiag.—Yakaunpau 2:18.

16-18. (1) Peb yuav muab siab npuab Khetos cov kwvtij li cas? (2) Vim li cas peb yuav tsum muab siab npuab lawv tamsim no?

¹⁶ Xatas nrhiav nrhw kev los tawm tsam Khetos cov kwvtij uas tseem nyob hauv ntiajteb no. Nws paub tias “nws lub sijhawm tshuav tsis ntev lawm.” (Qhia Tshwm 12:9, 12, 17) Txawm tias Xatas tawm tsam cov xaiv tseg tas zog los, lawv tseem ntaus thawj tshaj tawm txoj xov zoo tsis tseg. Muaj coob leej ntau tus xav los kawm txog txoj xov zoo. Tej no ua pov thawj tias Yexus nrog nraim cov xaiv tseg thiab tsom kwm lawv txoj hauv kev.—Mathai 28:20.

¹⁷ Yog ib txoj koob hmoov zoo heev uas peb tau pab cov xaiv tseg tshaj tawm txoj xov zoo. Peb kuj pab lawv rau lwm txoj hauv kev thiab. Peb pab nyiaj txiag los tsa tej Tsev Nceeg Vaj, tsa tej Tsev Rooj Sib Txoos, thiab tsa tej ceg Npe-ee. Peb kuj pab Khetos cov kwvtij thaum peb mloog cov txwj laus lus, thiab mloog cov kwvtij uas tus “qhev ncaj thiab ntse” tsa los saib xyuas peb.—Mathai 24:45-47; Henplais 13:17.

¹⁸ Tshuav tsis ntev lawm xwb, Vajtswv yuav nias lub cim kawg nkaus rau cov xaiv tseg. Cov tubtxib saum ntuj mam li tso “plaub fab cua hauv ntiajteb” los. Thaum ntawd ces txog lub caij muaj kev ceeblaj txom nyem loj kawg li lawm tiag. (Qhia Tshwm 7:1-3) Ua ntej Amakedoo pib, Yexus yuav coj cov xaiv tseg mus saum ntuj ceeb tsheej. (Mathai 13:41-43) Cia peb muab siab npuab thiab pab Yexus cov kwvtij tamsim no, xwv Yexus thiaj suav tias peb yog nws ib tug yaj.