1. (1) Vim li cas tseem ceeb rau peb tawm tsam Xatas tamsim no? (2) Peb puas yuav tawm tsam yeej Xatas tiag?

XATAS niaj hnub tawm tsam cov xaiv tseg uas tseem nyob hauv ntiajteb. Nws kuj tawm tsam lwm pab yaj thiab. (Yauhas 10:16) Ntxwg Nyoog paub tias nws lub sijhawm tshuav tsis ntev lawm. Yog li ntawd, nws xav haub ntxias kom Yehauvas cov tibneeg coob tus tso kev ntseeg tseg. (Nyeem Qhia Tshwm 12:9, 12.) Tiamsis peb muaj peevxwm tawm tsam yeej Xatas. Phau Vajlugkub qhia tias: “Cia li tawm tsam Ntxwg Nyoog, Ntxwg Nyoog thiaj li khiav ntawm nej mus.”​—Yakaunpau 4:7.

2, 3. (1) Vim li cas Xatas tsis xav kom tibneeg ntseeg tias muaj nws tiag? (2) Ua cas koj thiaj paub tias muaj Xatas tiag?

² Coob leej thuam tias tsis muaj Xatas. Lawv xav tias tej dab neeg, tej yeeb yaj kiab, thiab tej nkees (video games/jeux vidéo) uas menyuam tua thiaj qhia txog Xatas xwb. Lawv thuam tias cov neeg txawj ntse yeej tsis ntseeg tias muaj dab. Qhov ntawd puas khib Xatas? Yeej tsis khib nws li. Tseem yoojyim dua rau nws haub ntxias lawv xwb. (2 Khaulee 4:4) Xatas txhawb kom tibneeg ntseeg tias tsis muaj dab, nws thiaj tau zoo dag ntxias lawv yuam kev.

³ Yehauvas cov tub qhe yeej tsis qaug rau tej kev haub ntxias no. Peb yeej paub tias muaj Ntxwg Nyoog tiag. Ua cas peb thiaj paub  li ntawd? Rau qhov phau Vajlugkub qhia tias Xatas siv ib tug nab los nrog Eva tham. (Chiv Keeb 3:1-5) Nws kuj nrog tau Yehauvas tham lus thiab. Nws liam tias Yauj tsis hlub Vajtswv tiag. (Yauj 1:9-12) Xatas kuj nrhiav kev los ntxias Yexus. (Mathai 4:1-10) Tom qab Yexus sawv ua Vajntxwv xyoo 1914, Xatas txawm “ua rog” tawm tsam cov xaiv tseg uas tseem nyob hauv ntiajteb no. (Qhia Tshwm 12:17) Niaj hnub no, Ntxwg Nyoog tseem ua rog qees los tawm tsam cov xaiv tseg thiab lwm pab yaj. Yuav kom peb yeej ntsuj rog no, peb yuav tsum tsav peb txojkev ntseeg kom ruaj khov thiab tawm tsam Xatas. Cia peb kawm seb yuav tawm tsam Xatas rau 3 txojke twg.

4. Xatas khav theeb li cas?

⁴ Xatas khav theeb heev. Nws cav muaj cai tawm tsam Vajtswv txojkev kav thiab ntxias kom tibneeg pe hawm nws. Nws khav theeb thiab tsab loj heev. Yuav kom peb tawm tsam yeej Xatas peb yuav tsum ceev faj tus cwj pwm khav theeb es xyaum ua neeg txo hwjchim. (Nyeem 1 Petus 5:5.) Kev khav theeb yog li cas? Puas yog tsis zoo rau peb qhuas lwm tus?

5, 6. (1) Puas txhaum rau peb qhuas lwm tus? (2) Peb yuav tsum ceev faj txhob khav theeb li cas? (3) Piav seb hauv phau Vajlugkub muaj ib txhia tau khav theeb li cas.

⁵ Thaum peb pom lwm tus ua tau ib yam haujlwm zoo, lossis peb ua tau ib qho haujlwm tseem ceeb tiav, tej zaum ua rau peb zoo siab heev. Qhov uas peb zoo siab rau peb tus kheej lossis qhuas lwm tus tes haujlwm, yeej tsis txhaum. Povlauj twb qhuas cov kwvtij hauv Thexalaunika ib yam li ntawd. Nws hais tias: “Yog li no peb thiaj khav rau Vajtswv cov pawg ntseeg txog qhov uas nej ua siab ntev thev thiab khav txog nej txojkev ntseeg rau thaum nej raug txhua yam kev tsim txom thiab raug ceeblaj txom nyem.” (2 Thexalaunika 1:4) Yog li, kuj zoo rau peb qhuas txog lwm tus lossis zoo siab rau peb tes haujlwm. Peb tsis tas txaj muag rau peb tsev neeg, peb haiv tibneeg, lossis peb lub teb lub chaw.​—Tubtxib Tes Haujlwm 21:39.

⁶ Tus neeg khav theeb yuav rhuav nws txojkev sib raug zoo nrog Yehauvas thiab nrog lwm leej lwm tus. Nws tsis kam txo hwjchim mloog lwm tus tej lus ntuas, tej zaum nws tseem tu siab thiab. (Ntawv Nkauj 141:5) Twb tsis tsim nyog tsab loj li ntawd los, nws tseem xav tias nws zoo dua lwm tus. Yehauvas ntxub tus uas coj li ntawd. (Exekhee 33:28; Amau 6:8) Tiamsis Xatas zoo siab heev thaum tibneeg khav theeb ib yam li nws. Xav seb thaum Nilauj, Falau thiab Axaloo lawv tsab ua loj, ntshe Xatas zoo siab heev, puas yog? (Chiv Keeb 10:8, 9; Khiav Dim 5:1, 2; 2 Xamuyee 15:4-6) Twb yog Khayee khav theeb nws thiaj plam nws txojkev sib raug zoo nrog Yehauvas. Vajtswv twb ntuas Khayee tiamsis nws tseem tsis kam txo hwjchim mloog thiab. Vim nws tawv nyom Vajtswv tej lus ceeb toom nws thiaj tau hau ntsoov mus ua txhaum.​—Chiv Keeb 4:6-8.

7, 8. (1) Niaj hnub no vim li cas tibneeg khav theeb ua luaj? (2) Piav seb tus cwj pwm khav theeb rhuav tau lub koom txoos li cas.

⁷ Niaj hnub no tibneeg khav theeb heev. Ib txhia khav theeb vim lawv tsab loj dua lwm haiv neeg. Lawv pom ib haiv neeg txawv ntawm ib haiv, lawv thiaj ntseeg tias muaj tej haiv neeg yeej xeeb los muaj tsim dua, thiab muaj tej haiv xeeb los poob qes dua. Vim lawv xav yuam kev li ntawd thiaj muaj kev sib ntxub sib ntxaug sib ntaus sib tua. Ib txhia tseem nrhiav kev los txov lwm haiv neeg kom tu noob nrho.

⁸ Hauv lub koom txoos Khixatia tsis tsim nyog peb xaiv ntsej xaiv muag li ntawd. Yog ib tug kwvtij nkauj muam twg pib muaj lub siab khav theeb, ces yuav tsis sib haum xeeb. Tej zaum kuj tsim teeb meem loj rau lub koom txoos thiab. Nyob thawj 100 xyoo cov  Khixatia tau ntsib qhov teeb meem no thiab. Yakaunpau thiaj nug lawv tias: “Dabtsi ua kom muaj kev ua rog thiab muaj kev sib cav sib ceg rau hauv nej?” (Yakaunpau 4:1) Yog tias peb lam ntxub ntxaug lwm tus thiab tsab loj dua lawv, peb yuav ua rau lawv tu siab. (Paj Lug 12:18) Yog li ntawd, tus cwj pwm khav theeb no yuav rhuav tau txojkev thaj yeeb hauv lub koom txoos.

9. Phau Vajlugkub yuav pab kom peb txhob xaiv ntsej muag thiab txhob khav theeb li cas? (Saib daim duab ntawm sab 14.)

⁹ Yog peb muaj ib nplooj siab xav tias peb zoo dua luag lwm tus, ces peb yuav tsum nco ntsoov tias Yehauvas ntxub “tus uas khav theeb.” (Paj Lug 16:5) Peb yuav tsum ua tib zoo tshuaj peb lub siab thiab xav txog cov lus nug no, ‘Kuv puas xav tias kuv zoo dua lwm haiv neeg? Kuv puas xav tias kuv tej kev coj noj coj ua zoo dua lwm cov?’ Yog peb xav tias peb zoo dua luag ces twb yog peb tsis nco qab tias Vajtswv “tsim txhua haiv neeg los ntawm tib tug los xwb.” (Tubtxib Tes Haujlwm 17:26) Peb yog ib haiv neeg vim peb puavleej yog Adas cov xeeb ntxwv xwb. Cov uas xav tias Vajtswv tsim ib haiv neeg zoo dua ib haiv, kuj yog lawv ruam heev. Yog peb xaiv ntsej muag li ntawd ces twb yog peb cia Xatas rhuav txojkev hlub thiab kev sib haum xeeb hauv lub koom txoos Khixatia. (Yauhas 13:35) Yog li ntawd, tsis txhob khav theeb peb thiaj tawm tsam yeej Xatas.​—Paj Lug 16:18.

10, 11. (1) Vim li cas yoojyim qaug rau lub qab ntuj no heev? (2) Vim Dema ntshaw lub qab ntuj no nws plam dabtsi?

¹⁰ Tsis yog txhua yam hauv lub qab ntuj no yuav phem huvsi. Tiamsis phau Vajlugkub qhia tias Xatas yog tus uas “kav lub ntiajteb.” (Yauhas 12:31; 1 Yauhas 5:19) Lub qab ntuj no thiaj txhawb kom peb hla phau Vajlugkub tej kevcai. Xatas siv lub qab ntuj no los ntxias kom peb ua txhaum raws li peb lub siab ntshaw. Nws xav kom peb lub siab xib rau lub qab ntuj no peb thiaj tsis nco txhawj txog peb txojkev ntseeg.​—Nyeem 1 Yauhas 2:15, 16.

¹¹ Nyob thawj 100 xyoo, cov Khixatia ib txhia kuj nyiam lub qab ntuj heev. Povlauj thiaj sau tias: “Dema mus nyiam kev ntiajteb thiab tso kuv tseg.” (2 Timaute 4:10) Phau Vajlugkub tsis qhia tias Dema nyiam lub ntiajteb li cas. Tej zaum Dema ntshaw tej khoom ntiajteb tshaj li nws tes haujlwm rau Yehauvas. Thaum kawg Dema tso Povlauj tseg thiab plam ib txog haujlwm zoo heev rau Vajtswv. Yog Dema txhob ua li ntawd, ces nws tau ua tus pab Povlauj li qub. Yeej tsis muaj ib txoj haujlwm zoo tshaj ntawd!​—Paj Lug 10:22.

12. Xatas siv “nyiaj txiag” los ntxias peb li cas?

¹² Niaj hnub no yoojyim rau peb qaug rau lub ntiajteb thiab. Peb cov Khixatia yuav tsum khwv los yug peb tsev neeg. (1 Timaute 5:8) Yehauvas yeej xav kom peb tau lub neej zoo. Peb paub li ntawd rau qhov nws muab Adas thiab Eva tso hauv ib lub vaj zoo nkauj heev. (Chiv Keeb 2:9) Tiamsis thaum peb khwv noj khwv haus peb yuav tsum ceev faj rau qhov Xatas xav muab “nyiaj txiag” los ntxias peb. (Mathai 13:22) Coob leej xav tias nyiaj txiag thiab tej qhov txhia chaw yuav ua rau lawv zoo siab. Yog peb xav li ntawd ces peb yuav plam txojkev sib raug zoo nrog Yehauvas. Yexus ceeb toom tias: “Tsis muaj leejtwg yuav ua qhev tau rau ob tug lospav, rau qhov nws yeej yuav ntxub ib tug nyiam ib tug, lossis yuav npuab ib tug saib tsis taus ib tug. Nej yuav ua Vajtswv li qhev thiab ua nyiaj txiag li qhev ua ke tsis tau.” (Mathai 6:24) Yog peb tas zog khwv noj khwv haus xwb, ces peb twb tso Yehauvas tseg lawm. Xatas xav kom peb ua li ntawd ntag. Thov cia peb tsis txhob muab nyiaj txiag thiab tej qhov txhia chaw saib hlob dua Yehauvas. Peb yuav tsum pom tias nyiaj txiag, nws muaj nws chaw, peb thiaj tawm tsam yeej Xatas.​—Nyeem 1 Timaute 6:6-10.

13. Lub qab ntuj no xav li cas txog kev txij nkawm thiab kev sib daj sib dee?

¹³ Xatas xav ntxias kom tibneeg qaug rau kev plees kev yi. Coob leej xav tias tiam no yus tsis tas npuab siab rau yus tus txij nkawm. Ib txhia kuj xav tias tsis tas ua ntawv sib yuav li. Lawv hais tias tej ntawd tsuas muab yus zoj cia xwb. Ib tug pojniam nto moo heev hais tias, “Kuv yeej tsis paub ib tug neeg twg uas yuav npuab siab rau nws tus txij nkawm tuag nthi. Thiab tsis muaj leejtwg yuav xav ua ncaj npaum li ntawd.” Muaj ib tug txivneej nto moo heev kuj hais tias, “Xyov puas yog tibneeg yug los keev nraim ib tug neeg mus tas lawv lub neej.” Xatas zoo siab heev thaum cov neeg nto moo thuam li ntawd. Yehauvas yog tus rhawv tsim txojkev txij nkawm, Ntxwg Nyoog thiaj xav kom cov txij nkawm lub neej tawg. Peb yuav tsum saib txojkev txij nkawm rau nqe ib yam li Vajtswv saib, peb thiaj tawm tsam yeej Ntxwg Nyoog.

14, 15. Yog tias yus muaj lub siab ntshaw ua plees ua yi, yus yuav tsum ua li cas?

¹⁴ Txawm peb muaj txij nkawm los tsis muaj, peb txhua tus yuav tsum ceev faj txhob qaug rau kev plees kev yi. Puas yoojyim ua li ntawd? Yeej tsis yoojyim li. Yog koj tseem hluas, tej zaum koj yuav hnov cov hluas tom tsev kawm ntawv khav tias lawv nrog leejtwg pw los tau. Tej zaum lawv muab xov tooj yees lawv tus kheej liab qab, xa mus rau lwm tus. Hauv tej lub tebchaws, yog leejtwg ua li ntawd txhaum loj npaum li tus uas yees tej duab menyuam yaus liab qab ntag. Tej zaum lawv kuj ntaus tej lus dev hauv xov tooj mus rau lwm tus thiab. Phau Vajlugkub qhia tias: “Tus uas ua nkauj nraug kuj ua txhaum rau nws lub cev ntag.” (1 Khaulee 6:18) Twb yog tibneeg ua nkauj ua nraug heev ua luaj thiaj muaj kab mob kis ib tug dhau ib tug. Tsis tas li ntawd xwb, cov hluas tsis muaj txij nkawm uas nrog lwm tus pw, feem coob lees tias lawv xav txog lig. Lub qab ntuj no tej yeeb yaj kiab, tej nkauj qhia tias yog yus hla Vajtswv txojcai mus ua plees ua yi los yeej tsis ua rau yus nyuaj siab. Yog tias peb lam ntseeg cov lus dag ntawd ces twb yog “lub txim dag ntxias” tau peb lawm.​—Henplais 3:13.

¹⁵ Yog tias yus muaj lub siab ntshaw kev plees kev yi, yus yuav tsum ua li cas? Yus yuav tsum pom tias qhov uas yus ntshaw ntawd yuav ntxias tau yus yuam kev. (Loos 7:22, 23) Cia li thov kom Vajtswv pub dag zog rau yus. (Filipi 4:6, 7, 13) Yog yus twb paub lawm tias ib tug neeg twg, los yog ib qhov chaw twg yuav rub tau yus mus ua txhaum ces yus yuav tsum zos kev. (Paj Lug 22:3) Yog tias yus lam mus tom thawj tej yam uas yuav ntxias tau yus, txhob saib ib muag li thiab khiav mus rau lwm qhov tamsid.​—Chiv Keeb 39:12.

16. (1) Thaum Xatas sim Yexus, Yexus teb li cas xwb? (2) Peb kawm tau li cas los ntawm Yexus tus qauv?

¹⁶ Yexus tseg tus qauv zoo heev rau peb xyaum. Xatas hais ntau yam los ntxias Yexus tiamsis nws yeej tsis qaug rau Xatas tej lus dag. Nws yeej tsis muab tej lus ntawd coj los xav ib pliag li. Tiamsis nws muab Vajtswv Txojlus teb kiag Xatas xwb. (Nyeem Mathai 4:4-10.) Twb yog Yexus paub Vajtswv Txojlus  zoo, nws thiaj teb tau li ntawd. Yog li ntawd, tsis txhob cia ib yam dabtsi ntxias tau koj lub siab mus ntshaw kev plees kev yi, koj thiaj tawm tsam yeej Xatas.​—1 Khaulee 6:9, 10.

17, 18. (1) Xatas siv tej ntxiab zoo li cas, thiab ua cas peb thiaj paub li ntawd? (2) Thaum kawg yuav ua li cas rau Xatas thiab qhov ntawd txhawb kom peb ua siab ntev thev li cas?

¹⁷ Txojkev khav theeb, kev ntshaw tej qhov txhia chaw, thiab kev plees kev yi tsuas yog 3 yam uas Xatas muab los ua ntxiab cuab peb kev. Xatas tseem muaj lwm yam ntxiab thiab. Cov Khixatia ib txhia raug lawv tsev neeg tawm tsam. Cov hluas kuj raug thuam hauv tsev kawm ntawv tas zog. Ib co nyob rau tej tebchaws uas txwv txoj xov zoo. Tus yuav raug li cas los muaj, tiamsis peb yeej paub tias peb yuav raug tsim txom li ntawd. Yexus twb ceeb toom tias: ‘Ib tsoom tebchaws yuav ntxub nej vim yog tim kuv lub npe. Tiamsis leejtwg thev taus mus txog thaum kawg tus ntawd yuav dim.’​—Mathai 10:22.

¹⁸ Yuav ua li cas peb thiaj tawm tsam yeej Xatas? Yexus hais tias: “Nej yuav tau txojsia vim nej ua siab ntev thev.” (Luka 21:19) Txawm luag yuav tsim txom peb los Vajtswv yeej kho tau kom peb zoo. Tsis muaj leejtwg yuav rhuav tau peb txojkev sib raug zoo nrog Yehauvas, tsuas yog peb thiaj rhuav tau xwb. (Loos 8:38, 39) Txawm tias Yehauvas ib tug tub qhe ncaj ncees tuag lawm los, tsis yog Xatas yeej lawm. Yehauvas tseem yuav tsa nws sawv rov qab los. (Yauhas 5:28, 29) Tiamsis Xatas lub neej tom hauv ntej yuav xaus li cas? Nws tsis muaj chaw vam li lawm. Tom qab lub qab ntuj limhiam no raug rhuav tshem lawd, nws yuav raug pov rau hauv lub qhov tob tob 1,000 xyoo. (Qhia Tshwm 20:1-3) Thaum lub sijhawm Khetos Kav 1,000 Xyoo yuav xaus, ces Xatas yuav “tawm hauv nkuaj los.” Thaum ntawd noob neej yuav zoo kawg nkaus tsis muaj txhaum lawm, tiamsis Xatas yuav sim ntxias lawv ib zaug ntxiv. Tom qab ntawd, nws mam li raug rhuav tshem. (Qhia Tshwm 20:7-10) Ntxwg Nyoog tsis muaj kev cia siab lawm, tiamsis nco ntsoov tias koj tseem muaj kev cia siab! Cia li tawm tsam Xatas thiab txhawb koj txojkev ntseeg kom nyob ruaj khov. Koj yuav tawm tsam yeej Xatas tiag!