Alona nyob ib lub tebchaws uas muaj kev kub ntxhov ntau yam. Nws hais tias: “Thaum hnov tswb nrov, kuv lub plawv dhia pig poog. Kuv cuj loo mus hauv lub tsev nkaum hoob pob. Txawm kuv twb nrhiav tau chaw nkaum lawm los kuv tseem tshee na. Yog nyob nraum zoov mas hajyam ntshai tshaj ntawd vim tsis muaj chaw nkaum li. Muaj ib zaug kuv tabtom taug kev thaum lub tswb nrov, ua rau kuv quaj txog siav tas. Ob peb txoos teev tom qab los kuv tseem tshee.”

Peb txhua tus nyias muaj nyias kev txhawj ntshai. Ib txhia ntshai vim muaj kev tsov kev rog. Lwm cov txhawj vim muaj kev mob kev nkeeg. Muaj dua lwm cov txhawj txog lub neej yav tom hauv ntej. Lawv tsis paub xyov lawv tej xeeb ntxwv yuav ua neej li cas hauv lub qab ntuj no. Puas yuav muaj kev tsov kev rog, kev tub sab tub nyiag, kev mob kev nkeeg ntxiv zuj zus xwb? Lub ntiajteb daim av thiab tej huab cua puas yuav hloov li cas ntxiv? Thaum peb txhawj txog tej yam zoo li no, peb yuav ua li cas?

Phau Vajlugkub qhia tias: “Tus uas paub tab pom xwm txheej phem ces nws tsiv nraim lawm, tiamsis tus tsis thoob tsib tseem phoom qas qees mus thiaj raug ceeblaj.” (Paj Lug 27:12) Peb twb paub saib xyuas peb tus kheej kom txhob raug mob, peb yuav tsum saib xyuas peb lub siab ib yam li ntawd. Peb yuav saib xyuas peb lub siab li cas? Tej zaum peb yuav tau zam tej duab, tej xov xwm lossis tej yeeb yaj kiab uas tso tawm kev sib ntaus sib tua, peb thiaj tsis ntxhov siab txog tej ntawd. Thaum peb ua li no, tsis yog peb tais caus tiamsis twb yog peb tiv thaiv peb lub siab. Nco  ntsoov tias tsis yog Vajtswv tsim peb los saib tej kev phem zoo li ntawd. Tiamsis phau Vajlugkub qhia kom peb xav txog tej “yam uas tseeb, . . . yam uas ncaj ncees, yam uas dawb huv, yam uas ntxim hlub.” Yog peb ua li ntawd ces Vajtswv yuav “pub txojkev siab tus” rau peb.—Filipi 4:8, 9.

Yog peb muaj kev ntseeg rau Vajtswv tiag tiag, yuav pab tau peb tiv dhau tej kev ntxhov siab. Phau Vajlugkub txhawb peb li no: “Nej cia li feeb meej thiab tswj nej lub siab kom thiaj zoo thov Vajtswv.” (1 Petus 4:7) Tseem ceeb rau peb thov kom Vajtswv pub tswvyim thiab kom peb muaj lub siab tawv qhawv uv taus txhua yam kev nyuaj siab. Peb yuav tsum ntseeg tias Vajtswv yeej mloog peb tej lus thov.—1 Yauhas 5:15.

Phau Vajlugkub qhia tias Xatas yog tus “kav lub ntiajteb” thiab “lub ntiajteb huvsi nyob hauv tus uas Phem qab hwjchim.” (Yauhas 12:31; 1 Yauhas 5:19) Yeej muaj Xatas tiag, yog li ntawd peb yuav tsum tso siab rau Yehauvas txojkev cawm dim. Yexus thiaj qhia kom peb thov Vajtswv li no: “Thov koj pab kom peb dim ntawm dab Ntxwgnyoog txhais tes.” (Mathais [Mathai] 6:13, VTL) Alona hais tias: “Thaum kuv hnov tswb nrov kuv thov kom Yehauvas pab kuv tswj kuv lub siab. Kuv tus txiv kuj hu xov tooj rau kuv thiab nrog kuv thov Vajtswv ua ke. Kev thov Vajtswv pab tau wb tiag tiag li.” Muaj tseeb raws li phau Vajlugkub tau hais: “[Yehauvas] nyob ze txhua tus uas thov hu nws, yog txhua tus uas muaj siab thov tiag.”—Ntawv Nkauj 145:18.

Thaum Yexus cev zaj lus qhuab qhia saum roob, nws qhia kom nws cov thwjtim thov Vajtswv li no: “Thov cia koj lub [Nceeg Vaj] los.” (Mathai 6:10) Vajtswv lub Nceeg Vaj yuav muab txhua yam kev ntxhov siab tshem tawm. Yuav tsis muaj kev nyuaj siab ntxiv lawm. Yexus yog “vajntxwv leej tub uas coj kev thaj yeeb.” Vajtswv yuav txib Yexus los “ua rau kev ua rog tiaj tus mus thoob qab ntuj kawg.” (Yaxaya 9:6; Ntawv Nkauj 46:9) “Nws yuav phua cai rau ntau haiv neeg . . . Ib lub tebchaws yuav tsis rho ntaj ua tsov ua rog rau ib lub tebchaws, lawv yuav tsis kawm txujci ua tsov ua rog dua li lawm . . . Tsis muaj leejtwg yuav ua rau lawv ntshai.” (Mikha 4:3, 4) Txhua yim neeg yuav muaj kev zoo siab thiab “lawv yuav ua vaj tse thiab tau nyob rau hauv, lawv yuav cog vaj txiv hmab thiab tau noj tej txiv ntawd.” (Yaxaya 65:21) “Tsis muaj ib tug uas nyob hauv lub tebchaws yuav hais tias, ‘Kuv mob lawm.’ ”—Yaxaya 33:24.

Niaj hnub no, txawm peb yuav xyuam xim npaum li cas los peb yeej “tsis paub yuav muaj xwm dabtsi rau tagkis.” Tej zaum peb kuj mus tom thawj tej xwm phem thiab. (Yakaunpau 4:13, 14) Kev tsov kev rog, kev sib ntaus sib tua thiab kev mob kev nkeeg ua rau coob leej ntau tus tas sim neej lawm. Ua li cov uas tuag lawd muaj kev cia siab li cas xwb?

Muaj ib hnub cov tibneeg coob coob uas tau tag sim neej lawd yuav sawv rov qab los muaj txojsia dua. Vajtswv saib zoo li lawv pw tsaug zog lawm xwb, thiab nws nco ntsoov lawv txhua tus. Phau Vajlugkub qhia tias “txhua tus uas nyob hauv qhov ntxa yuav hnov leej Tub lub suab” thiab lawv yuav sawv rov qab los. (Yauhas 5:28, 29) Phau Vajlugkub kuj txhawb peb li no: “Txojkev vam uas peb muaj zoo ib yam li tog hlau nres nkoj uas ruaj thiab tso siab tau uas tuav tau peb lub siab.” (Henplais 6:19) Ua cas peb thiaj paub tias yuav muaj raws li Vajtswv cog tseg? Rau qhov Vajtswv “twb tsa [Yexus] ciaj sawv hauv qhov tuag rov los lawm.”—Tubtxib Tes Haujlwm 17:31.

Lub caij no cov uas xav ua raws li Vajtswv lub siab nyiam tseem raug ntau yam kev nyuaj siab. Tiamsis yog peb thov Vajtswv, txav ze rau Nws, thiab muaj kev ntseeg ruaj nreeg rau phau Vajlugkub tej lus cog tseg, ces peb yuav tiv dhau txhua yam kev nyuaj siab ib yam li Povlauj, Janet thiab Alona. Yog li ntawd, cia li tso siab plhuav rau Vajtswv Yehauvas, nws yuav pab kom “nej xyiv fab thiab nyob kaj siab lug.”—Loos 15:13.