1. Tus tubtxib Yauhas hais kom peb xav txog dabtsi thiab yog vim li cas?

HAUV 1 Yauhas 3:1 tus tubtxib Yauhas hais kom peb ua tib zoo xav txog Yehauvas txojkev hlub. Yauhas hais tias: “Xav saib leej Txiv hlub peb npaum li cas diam.” Vim li cas? Yog peb ua tib zoo xav seb Yehauvas hlub peb npaum li cas, ces peb yuav hajyam nrog nws sib raug zoo thiab peb txojkev hlub rau nws yuav loj hlob.

2. Vim li cas nyuaj rau ib txhia ntseeg tias Vajtswv muaj kev hlub tiag?

² Tu siab kawg li uas ib txhia tsis xam pom Vajtswv txojkev hlub. Lawv xav tias Vajtswv tsis quav ntsej txog noob neej. Ib txhia ntseeg tias Vajtswv tsuas tsa kevcai los tswj tibneeg thiab nrhiav kev rau txim rau cov uas tsis mloog lus xwb. Vim tibneeg dag ntau yam txog Vajtswv, ib txhia thiaj xav yuam kev tias tsis muaj leejtwg yuav hlub ib tug Vajtswv uas phem npaum li ntawd. Muaj dua ib co ntseeg tias txawm tibneeg yuav ua phem ua qias npaum li cas los, Vajtswv tseem hlub thiab pom zoo rau lawv. Tiamsis vim koj kawm phau Vajlugkub, koj paub qhov tseeb txog Yehauvas lawm. Koj yeej paub tias Yehauvas yog tus muaj kev hlub tshaj plaws. Nws yog tus uas pub nws leej Tub los tuag txhiv noob neej. (Yauhas 3:16; 1 Yauhas 4:8) Tiamsis yog peb raug ntau yam kev nyuaj siab, tej zaum peb yuav xav tias xyov Yehauvas puas hlub peb tiag.

3. Ua cas peb thiaj paub tias Yehauvas hlub peb?

³ Yehauvas hlub peb npaum li cas? Nws hlub peb ib yam li leej txiv hlub nws tej tub ki. Peb paub li ntawd rau qhov Yehauvas yog tus pub txojsia rau peb. (Nyeem Ntawv Nkauj 100:3-5.) Phau  Vajlugkub muab thawj tug txiv neej hu ua “Vajtswv tus tub.” (Luka 3:38) Yexus thiaj qhia kom peb muab Yehauvas hu li no: “Peb leej Txiv uas nyob saum ntuj.”​—Mathai 6:9.

4. (1) Yehauvas yog ib Leej Txiv zoo li cas? (2) Hauv zaj no thiab zaj tom ntej, peb yuav kawm txog dabtsi?

⁴ Muaj ib txhia tsis tso siab rau Yehauvas tam li ib leej txiv. Yog vim li cas? Tej zaum ib txwm lawv txiv yeej tsis hlub lawv, thiab lawv ua lub neej txom nyem heev. Tiamsis Yehauvas yeej tsis ua limhiam rau nws cov menyuam ib zaug li. Nws yog Leej Txiv uas zoo tshaj plaws. (Ntawv Nkauj 27:10) Nws hlub peb heev thiab yog tus saib xyuas peb. Yog peb paub tias Yehauvas hlub peb npaum li cas tiag, ces yuav ua rau peb yimhuab hlub Nws xwb. (Yakaunpau 4:8) Cia peb kawm txog 4 yam uas Yehauvas tau ua, vim nws hlub peb. Zaj tom ntej peb mam li kawm txog 4 yam uas peb yuav tsum ua los qhia tias peb hlub Yehauvas thiab.

5. Vajtswv pub dabtsi rau tibneeg?

⁵ Thaum tus tubtxib Povlauj nyob hauv lub nroog Athee, tebchaws Kili, nws pom tias cov tibneeg teev mlom loj heev. Cov tibneeg ntseeg tias tej vajtswv ntawd pub txojsia rau lawv. Povlauj thiaj qhia lawv txog “tus Vajtswv uas tsim lub ntiajteb thiab txhua yam uas nyob hauv.” Nws hais tias Vajtswv yog tus “pub txojsia thiab pa thiab txhua yam rau tej neeg sawvdaws.” Twb yog muaj Vajtswv peb thiaj “muaj txojsia, mus tau kev thiab muaj nyob.” (Tubtxib Tes Haujlwm 17:24, 25, 28) Yehauvas hlub peb heev nws thiaj pub peb ua neej nyob kaj siab lug. Cia peb kawm txog tej yam uas Yehauvas tau pub rau peb.

6. Yehauvas tsim lub ntiajteb zoo li cas rau peb nyob? (Saib daim duab ntawm sab 23.)

⁶ Yehauvas tsim ib lub ntiajteb zoo nkauj heev rau peb nyob. (Ntawv Nkauj 115:15, 16) Yog peb kawm txog tag nrho tej hnub qub thiab cov ntiajteb uas Yehauvas tau tsim, tsis muaj ib lub zoo npaum li lub ntiajteb no. Cov neeg tshawb txujci nrhiav ib lub dhau ib lub, tiamsis tsis muaj ib lub ntiajteb nyob lwm qhov uas yuav yug tau tibneeg txojsia. Tsis yog Yehauvas npaj lub ntiajteb no kom yug tau peb txojsia xwb, tiamsis nws kuj tsim lub ntiajteb no zoo nkauj thiab xis nyob heev, peb thiaj ua neej nyob kaj siab lug. (Yaxaya 45:18) Yog peb ua tib zoo xav txog tej no, peb yuav pom tias Yehauvas yog ib Leej Txiv uas hlub peb kawg nkaus li.​—Nyeem Yauj 38:4, 7; Ntawv Nkauj 8:3-5.

7. Yehauvas tsim peb zoo li cas, peb thiaj paub tias nws hlub peb?

⁷ Peb kuj paub tias Yehauvas hlub peb rau qhov nws tsim peb raws li nws tus yam ntxwv. (Chiv Keeb 1:27) Peb muaj yam ntxwv zoo li Yehauvas peb thiaj paub tias nws hlub peb, thiab peb txawj hlub nws. Yehauvas paub tias peb yuav tsum nrog nws sib raug zoo peb thiaj txaus siab ua neej. Peb zoo li cov menyuam uas muaj kev xyiv fab vim lawv paub tias lawv niam lawv txiv hlub lawv heev. Yexus thiaj qhia tias peb yuav tsum nrog Yehauvas sib raug zoo peb thiaj muaj kev kaj siab. (Luka 11:28) Yehauvas yog tus muaj lub siab dawb siab zoo pub ib puas tsav yam rau peb, xwv peb thiaj muaj kev “xyiv fab” ua neej. Nws yeej hlub peb kawg li tiag!​—1 Timaute 6:17; Ntawv Nkauj 145:16.

8. Ua li cas peb xav kom Yehauvas cob qhia peb?

⁸ Ib leej txiv uas hlub nws cov menyuam yeej cob qhia lawv, kom lawv thiaj tsis raug kev dag ntxias. Tiamsis niaj hnub no tej niam txiv coob tus tsis xav ua neej raws li Vajtswv tej kevcai ncaj ncees. Thaum kawg, tej niam txiv thiaj tsis paub cob qhia lawv tej metub menyuam. Lub cuab lub yig thiaj ua neej ntxhov siab hnyo tsis muaj kev kaj siab. (Paj Lug 14:12) Yehauvas tsis coj li ntawd. Nws yog  “tus Vajtswv tseeb uas tso siab tau.” (Ntawv Nkauj 31:5) Nws thiaj qhia kom nws cov menyuam paub qhov tseeb txog nws, thiab paub teev tiam nws. Nws kuj cob qhia kom lawv paub ua lub neej zoo tshaj. (Nyeem Ntawv Nkauj 43:3.) Yehauvas tej lus cob qhia, pab kom peb pom txog nws txojkev hlub li cas? Cia peb kawm txog qhov no.

9, 10. (1) Vim li cas Yehauvas ho qhia kom peb paub txog nws? (2) Vajtswv qhia li cas txog nws lub ntsiab?

⁹ Yehauvas xub qhia rau peb txog nws tus kheej. Nws xav kom peb paub nws zoo. (Yakaunpau 4:8) Hauv phau Vajlugkub, nws qhia nws lub npe rau peb. Tsis muaj ib lub npe tshwm ntau npaum li lub npe Yehauvas. Nws kuj xav kom peb paub tias nws yog ib tug Vajtswv zoo li cas. Thaum peb saib txhua yam uas nws tau tsim los lawd, peb yeej pom tias nws muaj hwjchim loj heev thiab muaj tswvyim kawg li. (Loos 1:20) Yog peb nyeem phau Vajlugkub, peb yuav pom tias Yehauvas txiav txim ncaj ncees thiab nws hlub peb kawg nkaus li. Thaum peb kawm ntxiv txog Yehauvas peb kuj pom tias nws yog ib tug Vajtswv uas txawj xav tshaj plaws. Tej uas peb kawm no yuav pab peb hajyam nrog nws sib raug zoo xwb.

¹⁰ Yehauvas kuj qhia kom peb paub txog nws lub ntsiab. Nws xav kom peb paub tias peb muaj feem nrog nws lub cuab lub yig. Nws qhia kom peb paub coj peb lub neej raws li nws lub siab nyiam, xwv peb thiaj koom tau ib lub siab nrog txhua leej txhua tus hauv nws tsev neeg. Phau Vajlugkub qhia meej tias Vajtswv tsis yog tsim kom peb muaj cai txiav txim seb yam twg zoo, yam twg phem. (Yelemi 10:23) Yehauvas ib leeg xwb thiaj paub tias yam twg yuav pab tau peb tiag. Nws xav kom peb pom tias yog peb zwm rau nws txojkev kav thiab mloog nws lus, ces peb yuav ua neej kaj siab lug thiab txaus siab rau peb lub neej. Yehauvas qhia tej no rau peb vim nws hlub peb heev.

11. Peb Leej Txiv Yehauvas qhia li cas txog lub neej yav tom hauv ntej?

 ¹¹ Ib leej txiv yeej txhawj txog nws cov menyuam lub neej. Nws xav kom lawv tau lub neej zoo uas kaj siab lug. Pom tias coob leej ntau tus txhawj txog lub neej yav tom hauv ntej heev. Lawv niaj hnub ua lub neej caum cua uas yog nrhiav tej yam nyob ib vuag xwb. (Ntawv Nkauj 90:10) Peb zoo siab kawg li uas nimno Yehauvas qhia kom peb txaus siab rau peb lub neej. Nws tseem cog lus tias peb lub neej yav tom hauv ntej yuav zoo tshaj plaws li!

12. Yehauvas nrhiav kev pab Khayee thiab Npalu nkawd li cas?

¹² Thaum Yehauvas pom Khayee yuav mus ua phem, Nws hais rau Khayee tias: “Ua cas koj chim? Ua cas koj ntsej muag o wv? Yog koj ua zoo, kuv yuav txais koj los tsis yog?” (Chiv Keeb 4:6, 7) Tiamsis Khayee tsis mloog Yehauvas lus, nws thiaj raug teeb meem loj heev. (Chiv Keeb 4:11-13) Tsis tas li ntawd xwb, muaj ib zaug Yehauvas pom Npalu qaug zog thiab nyuaj siab heev. Npalu nyuaj siab vim nws coj tus cwj pwm tsis zoo, Yehauvas thiaj ntuas tias nws yuav tsum hloov. Vim Npalu mloog Yehauvas lus, thaum kawg thiaj cawm tau nws txojsia.​—Yelemi 45:2-5.

13. Thaum kawg, tej uas Vajtswv cov tub qhe tau raug pab tau lawv li cas?

¹³ Povlauj sau tias: “[Yehauvas] qhuab ntuas tus uas nws hlub, thiab nws nplawm txhua tus tub uas nws txais yuav.” (Henplais 12:6) Thaum Yehauvas qhuab ntuas peb, tsis yog nws rau txim rau peb. Tiamsis yog nws cob qhia kom peb ua neeg xyuam xim. Xav txog tej qauv hauv phau Vajlugkub. Yehauvas twb cob qhia coob tus lawm. Lawv yog nws cov tub qhe uas muaj kev ntseeg heev. Yauxej, Mauxe, thiab Davi puavleej raug ntau yam kev nyuaj siab. Txawm lawv raug li ntawd los, Yehauvas tseem nrog nraim lawv. Thaum kawg, tej uas lawv raug hajyam tsav tswvyim rau lawv ua Yehauvas tes num ntxiv xwb. Thaum peb kawm txog tej no hauv phau Vajlugkub, peb pom tias Yehauvas yeej pab cob qhia nws haiv neeg. Nws yeej hlub peb tiag tiag li.​—Nyeem Paj Lug 3:11, 12.

14. Yog peb ua txhaum, Yehauvas tseem hlub peb li cas?

¹⁴ Txawm peb ua txhaum los, Yehauvas tseem hlub peb. Yog peb mloog nws tej lus qhuab ntuas thiab ntxeev dua siab tshiab, ces nws yuav “zam txim huvsi” rau peb. (Yaxaya 55:7) Nws yuav zam txim li cas? Vajntxwv Davi paub meej tias Yehauvas yog ib leej txiv uas muaj lub siab khuvleej heev. Nws sau tias: “Nws yog tus uas zam koj tej kev txhaum huvsi, thiab kho koj tej mob kom zoo huvsi. Nws txhiv koj txojsia dim hauv qhov tuag, thiab muab txojkev hlub uas ruaj khov thiab txojkev khuvleej rau koj ntoo. Hnub tuaj nyob deb hnub poob npaum li cas, nws daws peb tej kev fav xeeb pov tseg deb npaum li ntawd.” (Ntawv Nkauj 103:3, 4, 12) Yog li ntawd, Yehauvas txawj qhuab ntuas nws cov menyuam txhua tus raws li lawv cheem tsum. Thaum koj raug nws ntuas, koj puas khaws nws tej lus los siv tamsid? Nco ntsoov tias Yehauvas qhuab ntuas peb vim nws hlub peb xwb.​—Ntawv Nkauj 30:5.

15. Vim Yehauvas hlub peb, nws tau pab peb li cas thiab?

¹⁵ Ib leej txiv uas zoo, yeej tiv thaiv nws tsev neeg kom txhob raug kev piam sij. Peb Leej Txiv Yehauvas yeej tiv thaiv peb ib yam li ntawd thiab. Tus sau nkauj hais tias: “[Yehauvas] tsom kwm nws cov neeg dawb huv txojsia, nws cawm lawv dim hauv cov neeg limhiam txhais tes.” (Ntawv Nkauj 97:10) Muab xav li no: Yog ib yam dabtsi yuav los tshum koj lub qhov muag, koj yeej thaiv nkaus. Yehauvas tiv thaiv nws haiv neeg ib yam li ntawd, vim lawv tseem ceeb heev rau nws.​—Nyeem Xekhaliya 2:8.

16, 17. (1) Yav thaum ub, Yehauvas tiv thaiv nws cov tibneeg li cas? (2) Niaj hnub nimno, Yehauvas tiv thaiv nws cov tibneeg li cas?

 ¹⁶ Yehauvas kuj siv nws cov tubtxib saum ntuj los tiv thaiv nws haiv tibneeg thiab. (Ntawv Nkauj 91:11) Muaj ib zaug ib tug tubtxib saum ntuj xwb, tua Axilia cov tub rog tuag 185,000 leej. (2 Vajntxwv 19:35) Nyob thawj 100 xyoo, Yehauvas cov tubtxib saum ntuj tso Petus, Povlauj, thiab lwm cov tawm hauv tej tsev lojfaj los. (Tubtxib Tes Haujlwm 5:18-20; 12:6-11) Niaj hnub no, Yehauvas tseem tiv thaiv nws cov tibneeg thiab. Tiv thaiv li cas? Ib lub tebchaws nyob sab Afika tau muaj kev tsov kev rog loj heev. Cov pej xeem nyob ntxhov hnyos vim muaj kev sib ntaus sib tua, kev tub sab tub nyiag. Tibneeg txhom tej pojniam menyuam los, tsis muaj leejtwg pab li. Cov kwvtij nyob rau lub tebchaws ntawd poob txhua tsav txhua yam, tiamsis tsis muaj ib tug poob nws txojsia. Lawv pom tias Yehauvas hlub lawv thiab tsom kwm lawv sawvdaws. Txawm cov kwvtij raug ntau yam kev txom nyem los, lawv tseem muaj kev zoo siab heev. Muaj ib tug kwvtij tuaj pem hauv paus loj tuaj txog, lawv thiaj hais rau nws tias: “Twb yog muaj Yehauvas tsom kwm, peb sawvdaws thiaj tsis raug li cas.”

¹⁷ Peb paub tias tsis yog Yehauvas yuav cawm txhua leej txhua tus txojsia tamsim no. Muaj tej tug zoo li tus thwjtim Xatefanau uas tau raug luag tua vim lawv muab siab npuab Yehauvas. Txawm li ntawd los, Yehauvas yeej tsom kwm nws haiv neeg, tsis pub lawv tu noob ib zaug li. Nws thiaj ceeb toom lawv txhua tus txog Xatas tej kev haub ntxias. (Efexau 6:10-12) Yog peb nyeem phau Vajlugkub, thiab nyeem tej ntaub ntawv uas nws lub koom haum luam tawm, ces peb yuav pom tej lus ceeb toom ntawd. Peb yuav paub ceev faj thaum peb siv Is Taws Nej, khwv nyiaj txiag, saib tej yeeb yaj kiab, nyeem tej ntaub ntawv lossis tua nkees (video games/jeux vidéo). Twb yog Yehauvas hlub peb thiab xav tiv thaiv peb, nws thiaj li ceeb toom peb.

18. Koj xav li cas txog Yehauvas txojkev hlub rau koj?

¹⁸ Thaum Mauxe xav txog nws lub neej, nws yeej pom tseeb tias Yehauvas hlub nws. Nws thiaj hais tias: “Thov pub kom thaum tagkis peb tsau npo koj txojkev hlub uas ruaj khov, kom peb thiaj zoo siab thiab xyiv fab tag peb sim neej.” (Ntawv Nkauj 90:14) Peb zoo siab kawg nkaus li uas peb pom Yehauvas txojkev hlub. Yog ib txoj koob hmoov zoo kawg li tiag! Peb xav ib yam li tus tubtxib Yauhas tau hais no: “Sim xav saib leej Txiv hlub peb npaum li cas diam.”​—1 Yauhas 3:1.