1. Ua cas tseem ceeb ua luaj rau peb tuav kev ntseeg ruaj khov? (Saib daim duab ntawm sab no.)

KOJ puas tau xav li no ib zaug li: ‘Thaum txog lub caij muaj kev ceeblaj txom nyem loj kawg li, Yehauvas puas yuav cawm ib tug neeg zoo li kuv?’ Tus tubtxib Povlauj qhia tias yog peb xav dim lub caij ntawd, peb yuav tsum muaj kev ntseeg ruaj nreeg. Nws hais tias: “Yog tsis muaj kev ntseeg yeej ua tsis tau [haum] Vajtswv siab li.” (Henplais 11:6) Povlauj cov lus ntawd saib yam li yoojyim heev, tiamsis tsis yog sawvdaws yuav muaj kev ntseeg tibsi. (2 Thexalaunika 3:2) Ob nqes Vajlugkub no qhia tias tseem ceeb heev rau peb txhawb peb txojkev ntseeg kom ruaj khov.

2, 3. (1) Peb txojkev ntseeg tseem ceeb npaum li cas? (2) Peb yuav teb cov lus nug twg?

² Tus tubtxib Petus qhia txog txojkev ntseeg uas twb raug “sim” lawd. (Nyeem 1 Petus 1:7.) Lub caij muaj kev ceeblaj txom nyem loj kawg li los ze lawm. Peb xav ua “cov uas ntseeg thiaj tuav tau peb txojsia.” (Henplais 10:39) Yog li ntawd, peb yuav tsum mob siab txhawb peb txojkev ntseeg kom ruaj khov. Peb xav ua cov uas tau txais nqe zog thaum peb tus Vajntxwv Yexus Khetos rov qab los. Cia peb thov ib yam li tus txivneej uas hais rau Yexus tias: “Qhov uas kuv tseem tsis tau ntseeg thov pab kom kuv ntseeg.” (Malakau 9:24) Thiab cia peb xyaum thov Vajtswv li Yexus cov tubtxib hais no: “Thov koj tsav kev ntseeg rau peb ntau zuj zus.”​—Luka 17:5.

 ³ Hauv zaj no peb yuav kawm txog cov ntsiab lus no: (1) Peb yuav txhawb peb txojkev ntseeg li cas? (2) Peb qhia li cas tias peb muaj kev ntseeg ruaj khov tiag? Thiab (3) ua li cas peb thiaj paub tseeb tias Vajtswv yuav tsav kev ntseeg rau peb raws li peb thov?

4. Cov qauv twg txhawb tau peb txojkev ntseeg?

⁴ Tseem ceeb heev rau peb muaj kev ntseeg, Yehauvas thiaj muab cov qauv hauv phau Vajlugkub los “qhuab qhia peb.” (Loos 15:4) Thaum peb kawm txog Aplahas, Xala, Yiha, Yakhauj, Mauxe, Lahaj, Kide-oo, Npala, lawv cov qauv puavleej txhawb tau peb txojkev ntseeg. (Henplais 11:32-35) Niaj hnub nimno tseem muaj ib co qauv uas txhawb tau peb lub zog thiab. * (Saib cov lus hauv qab taw qhia.)

5. (1) Eliya muaj kev ntseeg li cas rau Yehauvas? (2) Peb yuav tsum ua tib zoo xav li cas?

⁵ Eliya yog ib tug cev Vajtswv lus uas ua qauv zoo heev rau peb xyaum. Muaj 5 zaug uas nws tso siab plhuav rau Yehauvas. (1) Eliya ua siab tawv qhia Vajntxwv Ahaj tias Yehauvas yuav ua rau lub tebchaws qhuav nkig nkuav. Nws hais hlo tias: “Ob peb xyoos tom ntej no yeej yuav tsis muaj lwg tsis muaj nag los li tsuas yog kuv hais kom muaj ces thiaj muaj xwb.” (1 Vajntxwv 17:1) (2) Eliya tso siab tias txawm muaj ntuj qhua teb nkig los, Yehauvas yuav pub txhua yam uas lawv cheem tsum rau lawv. (1 Vajntxwv 17:4, 5, 13, 14) (3) Eliya paub tseeb tias Yehauvas muaj hwjchim tsa tau tus poj ntsuam tus tub ciaj sawv rov los. (1 Vajntxwv 17:21) (4) Nws paub tseeb tias Yehauvas yuav tso hluavtaws poob saum ntuj los hlawv tus tsiaj xyeem saum lub roob Khamee. (1 Vajntxwv 18:24, 37) (5) Thaum nag tseem tsis tau los, Eliya txawm siv hais rau Ahaj tias: “Koj cia li mus noj mus haus rau qhov muaj suab tuam tsam nag los lawm.” (1 Vajntxwv 18:41) Zoo rau peb txhua tus xav seb peb txojkev ntseeg puas ruaj khov npaum li Eliya txoj?

6. Yehauvas muab dabtsi txhawb peb txojkev ntseeg?

⁶ Peb yeej tsav tsis tau kev ntseeg rau peb tus kheej li. Tiamsis Vajtswv lub hwj huam dawb huv yuav pab kom peb muaj kev ntseeg. (Kalatia 5:22) Yog li ntawd, peb yuav tsum thov Vajtswv pub nws lub hwj huam dawb huv pab peb. Tus uas thov li no thiaj yog tus uas muaj tswvyim. Yexus cog lus tias Yehauvas “yuav muab [lub hwj huam] uas dawb huv rau cov uas thov nws.”​—Luka 11:13.

7. Piav seb peb yuav tsum ua li cas peb txojkev ntseeg thiaj ruaj khov.

⁷ Thaum peb muaj kev ntseeg rau Vajtswv lawd, peb yuav tsum txhawb txojkev ntseeg ntawd kom ruaj khov. Kev ntseeg zoo ib yam li lub cub hluavtaws. Thaum lub cub tawg ciaj lawm cov nplaim taws yeej cig hlob heev. Tiamsis yog yus tsis txhab taws ntxiv ces lub cub tawg yuav tuag zuj zus. Kev ntseeg zoo ib yam li ntawd thiab. Peb yuav tsum nyeem thiab kawm Vajtswv Txojlus txhua txhua hnub, peb thiaj muaj lub siab hlub Vajtswv thiab nyiam phau Vajlugkub. Yog peb ua li ntawd, peb txojkev ntseeg yuav ruaj khov.

8. Dabtsi yuav txhawb koj txojkev ntseeg kom ruaj khov?

⁸ Ua ntej koj ua kevcai raus dej koj twb kawm tau ntau yam lawm. Tiamsis tsis yog koj kawm tas li ntawd xwb. Koj yuav tsum kawm ntxiv mus. (Henplais 6:1, 2) Rau siab ntso kawm seb tej lus faj lem hauv phau Vajlugkub tau muaj tiav li cas lawm. Qhov  ntawd yuav txhawb kom koj txojkev ntseeg yimhuab loj hlob ntxiv. Tsis tas li ntawd xwb, muab Vajtswv Txojlus los ntsuas seb koj txojkev ntseeg ruaj khov npaum li cas lawm.​—Nyeem Yakaunpau 1:25; 2:17, 24.

9, 10. (1) Tej phoojywg kwvluag uas coj zoo yuav txhawb peb txojkev ntseeg li cas? (2) Cov kev sib txoos yuav txhawb peb txojkev ntseeg li cas? (3) Kev tshaj tawm txoj xov zoo yuav tsav kev ntseeg li cas rau peb?

⁹ Tus tubtxib Povlauj hais li no rau cov Khixatia: “Kuv kev ntseeg yuav pab nej thiab nej kev ntseeg yuav pab kuv.” (Loos 1:12, TMZ) Nws cov lus txhais li cas? Txhais tias yog peb siv sijhawm nrog peb cov kwvtij nkauj muam ua ke, peb ib leeg yuav txhawb tau ib leeg txojkev ntseeg. Yog peb nrog cov uas lawv txojkev ntseeg twb raug “sim” lawd, ces yuav hajyam txhawb tau peb xwb. (Yakaunpau 1:3) Cov phoojywg zoo yuav txhawb tau peb. Tiamsis yog peb poo cov neeg phem, yuav txo tau peb txojkev ntseeg. (1 Khaulee 15:33) Phau Vajlugkub thiaj txhawb kom peb sib txoos tsis tu ncua, peb ib leeg thiaj “txhawb tau ib leeg lub zog.” (Nyeem Henplais 10:24, 25.) Tsis tas li ntawd xwb, tej uas peb kawm hauv kev sib txoos yuav txhawb tau peb txojkev ntseeg loj hlob. Phau Vajlugkub qhia tias “muaj neeg ntseeg twb yog vim lawv hnov” txoj xov zoo. (Loo [Loos] 10:17, VTL) Yog li ntawd, cia peb xav seb peb puas mus kev sib txoos tsis tu ncua?

¹⁰ Thaum peb tshaj tawm thiab qhia Vajlugkub rau lwm tus, kuj txhawb tau peb txojkev ntseeg thiab. Peb yuav tso siab zuj zus rau Yehauvas thiab ua siab tawv qhawv tshaj tawm rau txhua lub sijhawm, ib yam li cov Khixatia thawj 100 xyoo.​—Tubtxib Tes Haujlwm 4:17-20; 13:46.

11. Vim li cas Khalej thiab Yausua muaj kev ntseeg ruaj khov, thiab peb yuav xyaum nkawd li cas?

¹¹ Thaum peb pom Yehauvas txojkev pab thiab paub tias nws mloog peb tej lus thov, peb txojkev ntseeg yuav hajyam loj hlob. Tau muaj li no rau Khalej thiab Yausua nkawd. Thaum lawv mus tshuaj lub tebchaws uas Vajtswv cog tseg, nkawd tso siab plhuav rau Yehauvas. Txhua zaus uas Yehauvas tau pab nkawd, nkawd yimhuab muaj kev ntseeg ntxiv xwb. Yausua thiaj hais rau cov Yixayee tias: “Txhua yam zoo uas nej tus Vajtswv [Yehauvas] cog lus rau nej tsis poob ib los li. . . . Nimno nej cia li paub ntshai thiab hwm [Yehauvas] thiab ua koom tu nws tuaj nruab siab tiag tiag mus li.” Nws hais ntxiv tias: “Kuv thiab kuv tsev neeg, peb yuav ua koom tu [Yehauvas].” (Yausua 23:14; 24:14, 15) Yog li ntawd, thaum peb tso siab rau Yehauvas thiab pom nws txojkev pab, peb txojkev ntseeg yuav hajyam ruaj khov ntxiv.​—Ntawv Nkauj 34:8.

12. Yuav ua li cas thiaj qhia tias peb muaj kev ntseeg ruaj khov?

¹² Yuav ua li cas thiaj qhia tias peb muaj kev ntseeg ruaj khov? Tus thwjtim Yakaunpau hais tias: “Kuv yuav qhia rau koj pom kuv txojkev ntseeg ntawm qhov uas kuv xyaum.” (Yakaunpau 2:18) Yog li, peb tes haujlwm  qhia tias peb muaj kev ntseeg ruaj khov. Cia peb kawm ntxiv txog qhov no.

13. Kev tshaj tawm txoj xov zoo qhia tias peb muaj kev ntseeg li cas?

¹³ Kev tshaj tawm yog ib yam uas qhia tias peb muaj kev ntseeg. Vim li cas? Vim tias cov uas tshaj tawm yeej ntseeg tias lub sijhawm kawg twb los ze lawm, “yuav tsis sej cia ntev.” (Hanpaku 2:3) Peb puas muaj kev ntseeg tiag? Peb yuav tsum xav txog cov lus nug no: ‘Kev tshaj tawm tseem ceeb npaum li cas rau kuv? Kuv puas ua npaum li kuv ua tau los qhia lwm tus txog Vajtswv? Kuv puas nrhiav kev los ua Yehauvas tes dej num ntxiv?’ (2 Khaulee 13:5) Cia peb “lub ncauj lees” es mus tshaj tawm txoj xov zoo, thiaj qhia tias peb muaj kev ntseeg ruaj khov.​—Nyeem Loos 10:10.

14, 15. (1) Txhua txhua hnub peb qhia tau li cas tias peb muaj kev ntseeg? (2) Piav seb ib tse neeg muaj kev ntseeg ruaj khov li cas.

¹⁴ Thaum peb tiv kev txom nyem kuj qhia tias peb tso siab rau Yehauvas. Txawm peb muaj mob muaj nkeeg muaj kev nyuaj siab li cas los xij, peb yuav tsum tso siab plhuav rau Yehauvas thiab Yexus. Nkawd yuav pab peb “thaum peb cheem tsum.” (Henplais 4:16) Yog peb thov Yehauvas ces qhia tias peb tso siab plhuav rau nws tiag. Yexus hais tias Yehauvas yuav “pub tej zaub mov uas peb niaj hnub noj rau peb.” (Luka 11:3) Phau Vajlugkub muaj tej pov thawj qhia tias Yehauvas pab tau txhua yam txhua tsav rau peb. Zoo ib yam li thaum muaj ntuj qhua teb nkig hauv Yixayee tebchaws, Yehauvas tau pub mov pub dej rau Eliya. Phau Vajlugkub hais tias: “Uab lag txawm kwv ncuav thiab nqaij tuaj rau nws noj, thiab nws haus tus dej ntawd.” (1 Vajntxwv 17:3-6) Yog li ntawd, peb tso siab plhuav tias Yehauvas yuav pub ib yam li ntawd rau peb thiab.

¹⁵ Peb tso siab tias yog peb xyaum li phau Vajlugkub tej hauv paus ntsiab lus ces peb tsev neeg yuav muaj txaus noj txaus siv. Ib tug muam nyob sab Axia hu ua Lenpekha tau tso siab li ntawd. Nws hais tias lawv tsev neeg tau xyaum raws li Mathai 6:33 thiab Paj Lug 10:4. Tus txiv pom tias nws txoj haujlwm ua nyuaj heev rau nws saib xyuas lawv tsev neeg txojkev sib raug zoo nrog Yehauvas. Nws thiaj ua ib siab tawm haujlwm. Tiamsis nkawd muaj 4 tug menyuam, yuav ua li cas  yug tau nkawd tsev neeg. Lawv thiaj pib ua tej khoom txom ncauj mus muag. Vim lawv rau siab ntso ua haujlwm, lawv kuj muaj txaus noj txaus siv thiab. Tus muam hais tias: “Peb tsis tu pluas li, peb pom tias Yehauvas yeej tsis tso peb tseg.” Koj puas tau ntsib li no ib zaug li? Yeej txhawb zog kawg li, puas yog?

16. Yog peb tso siab rau Vajtswv, nws yuav pab peb li cas?

¹⁶ Peb yuav tsum tso siab plhuav tias yog peb mloog Yehauvas lus, nws yuav pab peb. Povlauj hais raws li Hanpaku hais no: “Tus uas ncaj ncees yuav muaj txojsia nyob vim qhov uas nws ntseeg.” (Kalatia 3:11; Hanpaku 2:4) Peb yuav tsum muaj kev ntseeg rau Yehauvas, nws ib leeg xwb thiaj pab tau peb. Povlauj xav kom peb nco ntsoov tias Yehauvas yog tus “uas ua tau txhua yam ntau dua li tej uas peb thov thiab peb xav txog.” (Efexau 3:20) Yehauvas cov tub qhe yeej mob siab heev ua raws li Nws siab nyiam. Tiamsis lawv paub tias lawv tu ncua ntau yam. Yuav tsum muaj Vajtswv pab mas lawv thiaj mus taus xwb. Peb ua Vajtswv tsaug vim nws nrog nraim peb thiab foom koob hmoov rau peb ua nws tes dej num.

17. (1) Yexus teb cov tubtxib li cas? (2) Vim li cas peb ho paub tias Yehauvas yuav teb peb tej lus thov?

¹⁷ Tej zaum peb kuj xav li Yexus cov tubtxib thiab. Lawv nug kom Yexus “tsav kev ntseeg rau [lawv] ntau zuj zus.” (Luka 17:5) Yexus teb lawv li cas? Thaum txog hnub Pheethekhoxate xyoo 33 lawv tau txais lub hwj huam dawb huv. Lawv thiaj nkag siab Vajtswv lub ntsiab zuj zus thiab lawv txojkev ntseeg hajyam ruaj khov ntxiv. Thaum kawg ua rau lawv kub siab lug tshaj tawm mus rau txhua qhov. (Khaulauxi 1:23) Yog peb thov kom Vajtswv tsav kev ntseeg rau peb, nws puas yuav teb peb tej lus thov? Yehauvas cog lus tias “yog peb thov yam twg raws li Vajtswv lub siab nyiam, nws kuj mloog.”​—1 Yauhas 5:14.

18. Yog peb txhawb peb txojkev ntseeg, Yehauvas yuav foom koob hmoov li cas rau peb?

¹⁸ Yog peb tso siab plhuav rau Yehauvas, ces nws yuav txaus siab rau peb. Thaum peb thov kom nws tsav kev ntseeg rau peb, nws yuav txhawb peb txojkev ntseeg kom ruaj khov, peb thiaj “tsim nyog nyob Vajtswv lub [Nceeg Vaj].”​—2 Thexalaunika 1:3, 5.