IB TUG pojniam hu ua Panayiota [pa·na·yau·tha] nyob ib koog povtxwv hauv Hiavtxwv Meditelene. Thaum nws tseem hluas, nws nyiam txojkev sib tw ua nom ua tswv heev. Nws kub siab lug mus ib lub tsev rau ib lub tsev, mus thov nyiaj los txhawb nws tog nom tswv. Tiamsis ntev mus ntev tuaj, nws pom tias kev nom kev tswv tsis zoo li nws xav. Tej nom tswv tsuas xam pom lawv tsev neeg xwb, lawv ntshaw meej mom siab, thiab tsis nrog leejtwg sib haum xeeb. Lawv ua txuj tuav npe ua npoj ua luag, tiamsis hauv nruab siab lawv sib ntxub sib khib heev.

Daniyee yog ib tug yawg nyob tebchaws Ireland [ai·ya·lees]. Nws tsev neeg ntseeg Vajtswv heev. Tiamsis nws pom tias cov xibhwb yog neeg quav dej quav cawv, twv nyiaj twv txiaj. Lawv tseem nyiag ntawm cov tswv cuab thiab. Txawm lawv twb phem npaum li ntawd los, lawv tseem ua txuj foom tias cov neeg phem yuav raug hlawv hauv ntuj tawg.

Jeffery [ntsev·fa·lim] ua lag ua luam rau ib lub koom haum xa khoom rau txawv tebchaws. Lawv cov tsev haujlwm muaj nyob hauv tebchaws Askiv thiab U.S.A. tibsi. Nws pom tias thaum lawv twv kev lag kev luam sawvdaws puavleej nrhiav kev los dag ntxias nom tswv. Tus yuav dag li cas los muaj, tsuas yog lawv ntxias tau haujlwm ntau ua xwb.

Coob leej ntau tus dag noj dag haus raws li cov qauv no, tsis hais tej nom tej tswv, tej thawj coj kev ntseeg, thiab tej neeg ua lag ua luam. Phau Vajlugkub tau muab cov neeg dag ntxias lwm tus hu ua “cov neeg ncauj lus zoo siab phem.” Lawv coj ib yam li tej laus ib txwm hais: “Ncauj qab zib nplaig qab ntse ntxias noj ntxias qhe.”

Yog yus niaj hnub pom tibneeg coj li ntawd, yeej ua rau yus npau taws thiab khib siab heev. Ib txhia thiaj nug tias: “Thaum twg tibneeg mam li coj ncaj?” Vajtswv Txojlus qhia peb tias muaj ib hnub Vajtswv yuav tshem tawm cov neeg ncauj lus zoo siab phem.

Phau Vajlugkub qhia tias thawj tug uas ncauj lus zoo siab phem tsis yog ib tug tibneeg, tiamsis yog ib tug plig uas peb qhov muag pom tsis tau. Tus ntawd yog Xatas Ntxwg Nyoog. Thaum chiv keeb nws tau siv ib tug nab los ntxias tus pojniam Eva. Nws ua txuj dag tias nws xav pab nkawd. (Chiv Keeb 3:1-5) Txij thaum ntawd los, coob tus tau ua txuj dag tias lawv yog neeg zoo, tiamsis lawv lub siab phem heev.

Thaum ub haiv neeg Yixayee qaug rau kev teev dab teev mlom. Tiamsis lawv ua txuj hais tias lawv pe hawm Vajtswv. Vajtswv Yehauvas thiaj ceeb toom  lawv tias: “Cov neeg no lam tuaj ze kuv ntawm lub ncauj, thiab hwm kuv ntawm daim tawv ncauj tiamsis lawv lub siab nyob deb kuv.” (Yaxaya 29:13) Vim haiv neeg Yixayee tsis kam ntxeev dua siab tshiab, Vajtswv cia lwm haiv neeg tuaj rhuav lawv lub nroog. Xyoo 607 U.Nt.Y. cov Npanpiloo thiaj tuaj ntaus yeej lub nroog Yeluxalees. Thaum txog xyoo 70 T.Q.Y. cov Loos kuj muab lub nroog Yeluxalees thiab lub tuam tsev rhuav tshem huv tibsi. Tej no qhia tseeb tias Vajtswv tsis txaus siab rau cov neeg ncauj lus zoo siab phem.

Vajtswv thiab nws tus tub Yexus, tsuas txaus siab rau cov neeg uas muaj lub siab dawb paug xwb. Thaum Yexus pib nws tes haujlwm hauv ntiajteb no, nws ntsib tus txivneej Nathana-ee. Yexus hais tias: “Saib maj, nws yog ib tug Yixayee tiag, nws tsis muaj kev dag ntxias kiag li.” (Yauhas 1:47) Tom qab no Nathana-ee kuj tau los ua Yexus ib tug tubtxib. Nathana-ee muaj dua ib lub npe hu ua Npathaulaumai.​—Luka 6:13-16.

Thaum Yexus nrog nws cov thwjtim ua ke, nws qhia kom lawv paub ua haum Vajtswv siab. Vajtswv yeej tsis txaus siab rau cov neeg ncauj lus zoo siab phem. Tiamsis lub caij ntawd cov thawj coj coob tus coj li ntawd, Yexus thiaj ntuas lawv hnyav heev. Cia peb kawm seb lawv tau coj li cas.

Lawv lam ua txuj coj ncaj kom neeg qhuas lawv xwb. Yexus hais rau cov tibneeg tias: “Nej yuav tsum ceev faj tsis txhob ua nej tej haujlwm uas ncaj ncees tab meeg rau neeg pom . . . li cov neeg ncauj lus zoo siab phem ua.” Yexus kuj hais ntxiv tias thaum lawv pub rau luag, lawv yuav tsum ua twjywm pub. Nws ntuas lawv kom txhob ua txuj thov Vajtswv tab meeg rau luag qhuas xwb. Yog lawv pe hawm Vajtswv tawm hauv lub siab dawb paug tuaj ces Vajtswv yuav txaus siab rau lawv.​—Mathai 6:1-6.

Lawv maj thuam lwm tus heev. Yexus hais tias: “Tus neeg ncauj lus zoo siab phem, cia li rho tog niag ntoo hauv koj lub qhov muag ua ntej tso, koj thiaj pom meej thiaj so tau qhov nyuag hmoov ntoo tawm hauv koj tus kwvtij lub qhov muag.” (Mathai 7:5) Tus uas txhob txwm thws lwm tus lub qe, xav kom luag qhuas nws xwb. Tiamsis nws twb muaj txhaum loj dua tus uas nws thuam ntawd. Tsim nyog peb sawvdaws nco ntsoov tias txhua tus “muaj txim thiab poob ntawm Vajtswv lub hwjchim ci ntsa iab lawm.”​—Loos 3:23.

Lawv tsuas xav qhov phem xwb. Muaj ib zaug cov Falixai cov thwjtim thiab Helauj cov neeg tuaj thom Yexus txog tej nyiaj them se. Lawv ua txuj qhuas Yexus li no: “Xibhwb, peb paub tias koj yog ib tug ncaj ncees thiab koj qhia Vajtswv txoj kev raws li muaj tseeb.” Tom qab ntawd lawv mam li nug Yexus tias: “Tsim nyog them se rau Xixa los tsis them?” Yexus teb lawv tias: “Cov niag neeg ncauj lus zoo siab phem, nej tuaj sim kuv ua dabtsi?” Tsim nyog Yexus cem lawv li no rau qhov lawv xav “nyas Yexus tej lus” xwb, tsis yog lawv xav paub qhov tseeb tiag.​—Mathai 22:15-22.

Thaum tsa tau lub koom txoos Khixatia hnub Pheethekhoxate xyoo 33 T.Q.Y., qhov tseeb thiab kev ncaj ncees huam vam tuaj. Cov tseem Khixatia nrhiav kev los kho lawv lub siab, kom coj txawv ntawm cov neeg ncauj lus zoo siab phem. Xav txog tus tubtxib Petus. Nws txhawb kom cov Khixatia ‘ua raws li txojkev tseeb thiaj ntxuav tau lawv lub siab kom dawb huv.’ (1 Petus 1:22) Tus tubtxib Povlauj kuj txhawb kom cov Khixatia “muaj kev sib hlub uas los ntawm lub siab dawb paug thiab lub siab uas paub qhov zoo thiab ntawm txojkev ntseeg tuaj nruab siab los.”​—1 Timaute 1:5.

Nyob thawj 100 xyoo, Yexus thiab nws cov tubtxib tau cev tej lus qhuab qhia uas pab tau coob leej ntau tus. Tseem pab tau peb los txog niaj hnub nimno thiab. Tus tubtxib Povlauj sau tias: “Vajtswv txojlus muaj txojsia thiab pheej ua haujlwm. Txojlus ntawd ntse dua rab ntaj uas ob sab ntse, nkaug mus thoob plaws nruab siab . . . thiab tej pob qej txha thiab tej hlwb txha, thiab txawj tshuaj saib tej uas neeg xav thiab tej uas nyob hauv neeg lub siab.” (Henplais  4:12) Coob leej ntau tus kawm tej lus qhuab qhia hauv phau Vajlugkub, lawv thiaj tso tau lub neej dag noj dag haus tseg. Vajtswv Txojlus pab lawv xyaum ua neeg ncaj ncees. Xav txog 3 tug qauv uas peb twb kawm tas los lawm.

Muaj ib hnub Yehauvas Cov Timkhawv caw Panayiota mus kev sib txoos. Nws pom tias cov tibneeg uas tuaj koom txoos coj zoo heev. Lawv tsis zoo li cov neeg uas ua txuj coj ncaj kom luag qhuas xwb. Nws hais tias: “Kuv pom tias lawv txawj sib hlub tiag, lawv muaj lub siab dawb paug sib pab. Tau ntau xyoo, kuv nrog luag txhawb kev nom kev tswv, kuv tsis tau pom ib co neeg uas coj zoo npaum li no ib zaug li.”

Panayiota thiaj pib kawm Vajlugkub ces tom qab no nws tau ua kevcai raus dej. Nws twb teev tiam Yehauvas tau 30 xyoo lawm. Nws hais tias: “Nimno kuv nrhiav tau lub neej muaj hauv paus hauv ntsis tiag tiag li lawm. Yav tas los, kuv khob ib lub qhov rooj rau ib lub, mus qhia kom tibneeg xaiv nom xaiv tswv; tiamsis nimno kuv khob ib lub qhov rooj rau ib lub, mus tshaj tawm Vajtswv lub Nceeg Vaj. Tsuas yog Vajtswv lub Nceeg Vaj xwb thiaj kho kom lub qab ntuj no koom tau ib lub siab.”

Daniyee tau ua haujlwm zoo heev hauv lub koom txoos Khixatia. Cov kwvtij thiaj muab haujlwm ntxiv rau nws tuav. Tiamsis ob peb xyoos tom qab ntawd, nws ntxhov siab heev rau qhov nws ua txhaum loj rau Yehauvas. Nws hais tias: “Kuv nco txog cov tibneeg ncauj lus zoo siab phem uas nrog kuv mus tshawj (church) yav tas los. Kuv tsis xav coj li lawv. Kuv thiaj txiav txim siab tso kuv tes haujlwm hauv lub koom txoos tseg. Kuv tsis xav dag cov kwvtij nkauj muam Khixatia kom lawv qhuas kuv xwb.”

Ib ntus tom qab ntawd, Daniyee mam li rov kaj siab tuav haujlwm hauv lub koom txoos dua. Cov uas muaj lub siab dawb paug teev tiam Yehauvas coj ncaj ncees raws li tus qauv no. Lawv pom tias lawv yuav tsum muab “tog niag ntoo” uas nyob hauv lawv lub qhov muag tshem tawm ua ntej tso, lawv mam li so “qhov nyuag hmoov ntoo” tawm hauv lawv tus kwvtij lub qhov muag.

Jeffery yog ib tug neeg ua lag ua luam. Nws hais tias: “Thaum kuv kawm Vajlugkub zoo zuj zus, kuv pom tias kuv yuav tsum tsis txhob ua ib tug neeg ncauj qab zib nplaig qab ntse, kom kuv tau haujlwm ua xwb. Tej nqe Vajlugkub zoo li Paj Lug 11:1 ntob nkaus kuv taubhau. Nqe ntawd qhia tias ‘rab teev uas ntxo luag [Yehauvas] ntxub kawg li.’” Yog li ntawd, Jeffery tsis coj zoo li cov neeg phem uas tuaj thom Yexus. Jeffery pom tias nws yuav tsum coj ncaj rau txhua leej txhua tus, cov ntseeg thiab cov tsis ntseeg tibsi.

Yehauvas Cov Timkhawv muaj plhom plhom leej thoob ntiajteb xyaum lawv lub neej raws li phau Vajlugkub. Lawv xyaum “muab tus neeg tshiab los hnav, yog tus neeg uas raug muab tsim kom ncaj ncees thiab dawb huv tseeb tiag ib yam li Vajtswv.” (Efexau 4:24) Cia li siv sijhawm los kawm ntxiv txog Yehauvas Cov Timkhawv. Lawv yuav qhia koj txog Vajtswv tej lus cog tseg tias yuav muaj ib lub qab ntuj tshiab. Lub qab ntuj tshiab ntawd, tsuas muaj “txojkev ncaj ncees nyob hauv” xwb. Yuav tsis muaj cov neeg ncauj lus zoo siab phem ib zaug ntxiv li lawm.​—2 Petus 3:13.