Sau Rau Cov Filipis 1:1-30
1 Ntawm no yog Povlauj thiab Timautes. Wb yog Yexus Khetos* li tub qhe. Tsab ntawv no yog sau rau cov dawb huv* hauv Filipis uas nrog Yexus Khetos* koom ib lub siab, tsis hais cov txwj laus thiab cov tub leg num tib si.
2 Thov kom Vajtswv uas yog peb Leej Txiv thiab tus Tswv Yexus Khetos foom koob hmoov nplua mias rau nej thiab pub nej nyob kaj siab lug.
3 Txhua zaus uas kuv xav txog nej, kuv yeej ua Vajtswv tsaug.
4 Kuv niaj hnub thov Vajtswv pab nej txhua tus mas kuv zoo siab kawg li.
5 Tos kuv thov li ntawd los, txij hnub uas nej hnov txoj xov zoo, nej yeej kub siab lug txhawb tes hauj lwm no.
6 Kuv tso siab tias Vajtswv twb pab nej paub tab lawm kom nej yim huab coj tau zoo. Vajtswv yeej yuav pab nej ua li no kom tiav rau Yexus Khetos* hnub.
7 Yeej tsim nyog kuv qhuas nej li no rau qhov twb yog Vajtswv muaj kev hlub nplua mias* rau kuv, thaum kuv raug kaw thiaj muaj nej tu kuv. Thaum hais plaub ntug los nej yog cov uas pab kuv txheem txoj xov zoo. Twb yog li no, nej thiaj sawv nraim hauv kuv lub siab.
8 Vajtswv yeej paub tias kuv lub siab dai dhuam rau nej. Kuv hlub tshua nej ib yam li Yexus Khetos* hlub.
9 Kuv niaj hnub thov Vajtswv kom nej paub qhov tseeb thiab ua neeg thoob tsib, nej thiaj yim huab txawj sib hlub.
10 Kuv thov Vajtswv pab kom nej paub tias yam twg yog yam uas tseem ceeb dua ntais, kom nej thiaj tsis muaj chaw thuam thiab kom nej thiaj tsis txo lwm tus txoj kev ntseeg, mus txog Khetos hnub.
11 Kuv thov Vajtswv kom Yexus Khetos pab nej ua lub neej ncaj ncees, Vajtswv thiaj tau koob meej.
12 Kuv cov kwv tij, kuv xav kom nej paub tias tej uas kuv raug no haj yam ua rau txoj xov zoo ncha mus deb xwb.
13 Cov tub rog uas zov huab tais tsev thiab coob leej ntau tus yeej paub lawm tias kuv ntseeg Khetos kuv thiaj raug kaw.
14 Qhov uas kuv raug kaw li no txhawb tau cov kwv tij nkauj muam coob tus uas ua tus Tswv tes hauj lwm, thiab ua rau lawv yim huab muaj lub siab tawv tshaj tawm Vajtswv txoj xov zoo tsis ntshai li.
15 Muaj ib txhia tshaj tawm txog Khetos vim lawv khib kuv thiab xav cov nyom kuv, tiam sis ib txhia yeej muaj lub siab dawb paug tshaj tawm tiag tiag.
16 Lawv tshaj tawm txog Khetos vim lawv muaj kev hlub. Lawv yeej paub tias Vajtswv muab kuv tso ntawm no rau qhov kuv yog tus yuav txheem txoj xov zoo.
17 Tiam sis cov uas khib thiab cov nyom kuv tsis muaj lub siab dawb paug qhia. Txawm kuv raug kaw los, lawv tseem xav tsim teeb meem rau kuv qees.
18 Txawm ib txhia qhia hauv lub siab dawb paug tuaj hos ib txhia ua txuj qhia xwb los xij, tsuav yog txoj xov zoo txog tus Khetos nrov ncha mus rau txhua qhov lawm xwb ces kuv yeej zoo siab. Kuv yeej yuav zoo siab mus li.
19 Kuv paub tias luag yeej yuav tso kuv dim vim muaj nej kub siab lug taij thov Vajtswv pab thiab muaj lub hwj huam dawb huv uas Yexus Khetos pub.
20 Kuv vam thiab cia siab tias tsis muaj ib yam dab tsi yuav ua rau kuv txaj muag. Vim kuv muaj lub siab tawv tshaj tawm tsis ntshai li, kuv yuav qhuas Khetos ib yam li kuv twb ua los lawd. Txawm yuav ciaj thiab yuav tuag los, kuv* yeej yuav qhuas nws.
21 Yog kuv tseem muaj txoj sia nyob, kuv yuav ua Khetos tes hauj lwm mus ntxiv. Tiam sis yog kuv tuag los kuv yeej tau tshaj thawj.
22 Yog kuv tseem muaj txoj sia nyob, tseem muaj lub cev nqaij daim tawv no ces kuv yuav ua tau ntau yam ntxiv rau Yexus Khetos. Tiam sis kuv yuav tsis qhia leej twg tias kuv xaiv qhov twg, txoj sia los kev tuag.
23 Kuv pheej ua ob lub siab vim kuv tos ntsoov lub sij hawm uas kuv tso plhuav lub cev nqaij daim tawv no tseg mus nrog Khetos nyob. Qhov ntawd yog qhov zoo dua.
24 Tiam sis qhov uas kuv tseem muaj txoj sia nrog nej nyob li no yuav pab tau nej dua.
25 Kuv yeej paub tias yog kuv nrog nej nyob li no ces kuv yuav pom nej ua ntau yam hauj lwm zoo rau Vajtswv ntxiv thiab yuav pom nej muaj kev zoo siab xyiv fab vim nej ntseeg Vajtswv.
26 Thaum kuv rov tuaj xyuas nej, kuv yuav txhawb kom nej yim huab tso siab rau Yexus Khetos* ntxiv.
27 Kuv tsuas thov nej ua lub neej kom phim txoj xov zoo uas Khetos qhia xwb. Txawm kuv yuav tuaj saib nej thiab tsis tuaj los, kuv thiaj hnov tias nej yeej sawv ruaj khov, koom tau ib lub siab ua tib txog hauj lwm, ib leeg txhawb ib leeg ntseeg txoj xov zoo.
28 Txawm lawv tawm tsam nej los tsis txhob ntshai. Tej no ua pov thawj tias lawv yuav raug puas tsuaj tiam sis nej yuav dim. Vajtswv yog tus qhia meej li no ntag.
29 Qhov uas Vajtswv hu nej los ntseeg Khetos thiab raug kev txom nyem rau nws, yeej yog ib txoj koob hmoov zoo kawg li.
30 Nej pom kuv thev kev tsim txom li cas, nej kuj thev ib yam li ntawd. Thiab nej yeej hnov tias kuv tseem thev qees los txog tav no.
Cov taw ntawv
^ Lus Kilis txhais tias “Khetos Yexus.” Lawv hais “Khetos” ua ntej kom sawv daws xam pom Yexus lub meej mom ua tus xaiv tseg.
^ Mus saib Cov Lus Txhais.
^ Lus Kilis txhais tias “Khetos Yexus.” Lawv hais “Khetos” ua ntej kom sawv daws xam pom Yexus lub meej mom ua tus xaiv tseg.
^ Lus Kilis txhais tias “Khetos Yexus.” Lawv hais “Khetos” ua ntej kom sawv daws xam pom Yexus lub meej mom ua tus xaiv tseg.
^ Mus saib “Txoj kev hlub uas pub dawb” hauv Cov Lus Txhais.
^ Lus Kilis txhais tias “Khetos Yexus.” Lawv hais “Khetos” ua ntej kom sawv daws xam pom Yexus lub meej mom ua tus xaiv tseg.
^ Lus Kilis yog “kuv lub cev.”
^ Lus Kilis txhais tias “Khetos Yexus.” Lawv hais “Khetos” ua ntej kom sawv daws xam pom Yexus lub meej mom ua tus xaiv tseg.
