Sau Rau Cov Filipis 4:1-23
4 Cov kwv tij uas kuv hlub thiab tshua, nej ua rau kuv zoo siab thiab tau ntsej muag* heev. Kuv txhawb kom nej cia li ntseeg tus Tswv ruaj nreeg.
2 Kuv thov ntuas kom Yu-audias thiab Xitikhes nkawd koom ib lub siab ua tus Tswv tes hauj lwm.
3 Koj yog ib tug uas nrog kuv ua tus Tswv tes hauj lwm, thov koj pab ob tug poj niam no. Nkawd niaj hnub nrog kuv khwv ua tus Tswv tes hauj lwm tshaj tawm txoj xov zoo, ib yam li Khemes thiab lwm cov. Lawv tej npe puav leej nyob hauv phau ntawv uas tau txoj sia.
4 Niaj hnub zoo siab rau tus Tswv. Kuv rov hais dua, cia li zoo siab!
5 Cia li ua siab mos siab muag rau txhua tus, tsis txhob cam thawj. Nco ntsoov tias tus Tswv twb los yuav txog.
6 Tsis txhob txhawj txog ib yam dab tsi li. Txawm zoo li cas los cia li thov Vajtswv, taij thov Nws, thiab ua Nws tsaug. Qhia txhua yam uas nej xav tau rau Vajtswv paub.
7 Mas Vajtswv yuav pub nej muaj lub siab tus. Qhov ntawd yuav tsom kwm nej lub siab thiab nej txoj kev xav vim nej raws Yexus Khetos* qab. Neeg yeej tsis nkag siab txog Vajtswv txoj kev siab tus no.
8 Cov kwv tij, kuv thov xaus lus li no, yam uas tseeb, yam uas tsim nyog hwm, yam uas ncaj ncees, yam uas dawb huv, yam uas ntxim hlub, yam uas txhawb zog, yam uas zoo kawg nkaus, thiab yam uas tsim nyog qhuas, cia li xav ntsoov txog tej no.
9 Cia li xyaum raws li tej uas nej twb kawm thiab khaws tau lawd thiab tej uas nej hnov thiab pom kuv ua. Yog nej ua li no ces tus Vajtswv uas pub peb muaj lub siab tus yuav nrog nraim nej.
10 Kuv zoo siab kawg li thiab ua tus Tswv tsaug uas nej tseem txhawj txog kuv. Nej yeej ib txwm mob siab kuv, tiam sis nej pab tsis cuag xwb.
11 Kuv hais li no, tsis yog kuv tu ncua ib yam dab tsi, rau qhov txawm zoo li cas los kuv yeej txaus siab rau tej uas kuv muaj.
12 Txawm kuv muaj ntau muaj tsawg los kuv yeej nyob taus. Kuv paub txog thaum tshaib thaum tsau, thaum muaj nplua mias thaum tu ncua.
13 Kuv thev taus tej no tib si vim Vajtswv pub dag pub zog rau kuv.
14 Txawm li cas los nej tseem zoo siab nrog kuv tiv kev txom nyem.
15 Nej cov uas nyob hauv Filipis yeej paub lawm tias txij thaum nej hnov txoj xov zoo los txog rau thaum kuv ncaim lub xeev Maxedaunias mus, tsuas yog nej lub koom txoos thiaj pab kuv xwb.
16 Thaum kuv tseem nyob hauv Thexalaunikas, nej kuj xa qho yam tuaj pab kuv, tsis yog ib zaug xwb tiam sis yog ob zaug.
17 Tsis yog kuv vam qhov uas nej pub rau kuv, tiam sis kuv xav kom Vajtswv tsav ntxiv rau nej vim nej muaj lub siab dawb pub.
18 Nim no kuv muaj txaus lawm siv tsis tas li. Tos kuv muaj txhij los twb yog tej uas nej muab rau Epafauditas coj tuaj rau kuv. Tej uas nej pub ntawd zoo ib yam li tej khoom fij tsw qab uas haum Vajtswv siab.
19 Kuv tus Vajtswv uas muaj ib puas tsav yam nplua mias yuav siv Yexus Khetos* los pub txhua yam rau nej raws li nej cheem tsum.
20 Tsim nyog qhuas peb tus Vajtswv uas yog peb Leej Txiv mus ib txhiab ib txhis tsis kawg. Amees.
21 Thov xa lus noj qab nyob zoo rau txhua tus dawb huv uas nrog Yexus Khetos* koom ib lub siab. Cov kwv tij uas nrog kuv kuj xa lus tuaj rau nej thiab.
22 Tag nrho cov dawb huv xa lus tuaj rau nej, tshwj xeeb yog cov uas nyob hauv Xixas tsev.
23 Thov tus Tswv Yexus Khetos foom koob hmoov nplua mias rau nej kom nej haj yam txawj sib hlub sib pab.
Cov taw ntawv
^ Lus Kilis yog “nej yog kuv lub mom kub.”
^ Lus Kilis txhais tias “Khetos Yexus.” Lawv hais “Khetos” ua ntej kom sawv daws xam pom Yexus lub meej mom ua tus xaiv tseg.
^ Lus Kilis txhais tias “Khetos Yexus.” Lawv hais “Khetos” ua ntej kom sawv daws xam pom Yexus lub meej mom ua tus xaiv tseg.
^ Lus Kilis txhais tias “Khetos Yexus.” Lawv hais “Khetos” ua ntej kom sawv daws xam pom Yexus lub meej mom ua tus xaiv tseg.
