Sau Rau Cov Loos 10:1-21
10 Cov kwv tij, kuv niaj hnub thov Vajtswv pab kom kuv haiv neeg dim, qhov ntawd yog qhov uas kuv lub siab ntshaw.
2 Kuv pom tias lawv kub siab lug ua Vajtswv tes hauj lwm tiam sis lawv tsis paub qhov tseeb xwb.
3 Lawv tsis paub coj ncaj raws li Vajtswv lub siab nyiam, lawv tsuas ua raws li lawv pom tias ncaj xwb. Vim li no, Vajtswv thiaj tsis suav tias lawv ncaj ncees.
4 Mauxes Txoj Kev Cai twb xaus rau Khetos lawm. Nim no Vajtswv suav tias txhua tus uas ntseeg Khetos yog neeg ncaj ncees.
5 Mauxes sau tias tus uas coj ncaj ncees raws li txoj Kev Cai thiaj yuav muaj txoj sia nyob.
6 Tiam sis Vajtswv Txoj Lus kuj hais tias tus muaj kev ntseeg yog tus uas Vajtswv suav tias ncaj ncees. Vajtswv Txoj Lus twb hais tias, “Tsis txhob hais tuj taws rau nruab siab tias, ‘Leej twg yuav mus saum ntuj?’ uas yog mus coj Khetos nqes los.
7 Tsis txhob hais tias, ‘Leej twg yuav nqes mus rau hauv nruab a?’* uas yog mus tsa Khetos sawv hauv qhov tuag rov los.”
8 Yog li Vajtswv Txoj Lus hais li cas? Hais tias, “Txoj xov twb nrov ncha tuaj txog nej lawm, nyob kiag hauv nej lub qhov ncauj thiab hauv nej lub siab.” Nov yog txoj xov uas peb tshaj tawm ntag, tsuas yog cov muaj kev ntseeg thiaj ua tib zoo mloog xwb.
9 Yog nej coj txoj xov uas nyob hauv nej lub qhov ncauj mus tshaj tawm tab meeg sawv daws tias Yexus yog tus Tswv, thiab hauv nej lub siab, yog nej ntseeg tias Vajtswv twb tsa Yexus sawv rov los lawd ces nej yuav dim.
10 Yog nej lub siab ntseeg ces Vajtswv suav tias nej ncaj ncees, thiab yog nej lub ncauj lees tab meeg sawv daws ces nej yuav dim.
11 Vajtswv Txoj Lus twb hais txog Khetos tias, “Cov uas cog kev ntseeg ruaj nreeg rau nws yuav tsis xav txog lig.”
12 Tos hais li no los tus neeg Yudais yeej tsis txawv tus neeg Kilis, vim tib tug Tswv tsom kwm sawv daws thiab foom koob hmoov nplua mias rau cov uas thov nws.
13 Yog li, “txhua tus uas tuav Vajtswv Yehauvas* lub npe thov yuav dim.”
14 Tiam sis lawv yuav ua li cas thov tus uas lawv tsis tau ntseeg? Thiab lawv yuav ua li cas ntseeg tus uas lawv tsis tau hnov? Thiab lawv yuav ua li cas hnov yog tsis muaj tus mus tshaj tawm?
15 Thiab lawv yuav ua li cas mus tshaj tawm yog tsis muaj tus txib? Vajtswv Txoj Lus twb hais lawm tias, “Cas zoo ua luaj thaum pom tib neeg* mus tshaj tawm txoj xov zoo!”
16 Txawm li ntawd los tsis yog txhua tus yuav mloog txoj xov zoo. Yaxayas twb hais lawm tias, “Vajtswv Yehauvas,* leej twg thiaj ntseeg tej uas peb hais?”
17 Yog li ntawd, tsuas yog tus uas hnov thiaj paub ntseeg. Yuav tsum muaj tus tshaj tawm txoj xov txog Khetos neeg thiaj hnov.
18 Ua li puas yog cov Ixayees tsis tau hnov txoj xov ntawd? Tsis yog, rau qhov “tib neeg thoob ntiaj teb twb hnov txog lawm, txawm cov uas nyob plaub ceg kaum ntuj los kuj hnov huv si.”
19 Ua li, puas yog cov Ixayees tsis to taub txoj xov? Tsis yog. Lawv yeej to taub rau qhov Mauxes twb hais tias, “Kuv yuav ua kom nej khib lwm haiv neeg. Kuv yuav zes kom nej chim rau haiv neeg uas tsis paub qab hau.”
20 Thiab Yaxayas ua lub siab tawv qhawv hais hlo tias, “Cov uas tsis nrhiav kuv ho ntsib kuv, thiab cov uas tsis thov kuv, ho paub kuv.”
21 Tiam sis nws hais li no txog cov Ixayees tias, “Kuv niaj hnub cev tes pab cov neeg tawv ncauj tsis mloog lus no.”
Cov taw ntawv
^ Los sis “hauv lub qhov tob tob.” Mus saib Cov Lus Txhais.
^ Mus saib Cov Lus Txhais.
^ Lus Kilis yog “cov tshaj tawm tej ko taw.”
^ Mus saib Cov Lus Txhais.
