Lukas Sau 18:1-43
18 Yexus txawm qhia ib zaj lus piv txwv ntxiv rau nws cov thwj tim kom lawv yuav tsum thov Vajtswv tsis tseg es txhob qaug zog.
2 Nws qhia tias, “Nyob hauv ib lub nroog, muaj ib tug yawg txiav txim uas tsis paub ntshai Vajtswv thiab tsis hwm leej twg li.
3 Kuj muaj ib tug poj ntsuam nyob hauv lub nroog ntawd thiab. Nws niaj hnub mus thov tus txiav txim tias, ‘Thov pab hais kuv tshaj plaub uas luag kom kuv thiab txiav txim ncaj rau kuv.’
4 Tau ib ntus tus txiav txim tsis quav ntsej li. Tiam sis tom qab no nws xav twj ywm tias, ‘Txawm kuv tsis paub ntshai Vajtswv thiab tsis hwm leej twg li los,
5 tus poj ntsuam no tuaj ua rau kuv meem txom dhau lawm. Kuv mam li tu nws tshaj plaub kom ncaj ncees, nws thiaj tseg tsis tuaj txob kuv, ua rau kuv ntxhov siab hwv.’”
6 Ces tus Tswv hais tias, “Sim saib, txawm tus yawg txiav txim no phem los nws kuj txawj xav li ntawd thiab!
7 Yog li, thaum Vajtswv tseem ua siab ntev, nws yeej yuav ua ncaj rau cov uas nws xaiv tseg uas niaj hnub niaj hmo quaj thov hu nws thiab.
8 Kuv qhia nej tias, Vajtswv yeej yuav txiav txim ncaj ncees rau lawv sai sai. Thaum neeg Leej Tub los txog, xyov nws puas yuav pom cov uas tso siab plhuav* rau Vajtswv li no hauv ntiaj teb?”
9 Yexus kuj qhia ib zaj lus piv txwv rau cov uas xav tias lawv coj ncaj heev thiab saib lwm tus tsis rau nqi. Nws qhia tias,
10 “Muaj ib tug Falixais thiab ib tug neeg sau se thov Vajtswv ntawm lub tuam tsev.
11 Tus Falixais sawv ntsug thiab thov Vajtswv twj ywm tias, ‘Aub Vajtswv, ua koj tsaug uas kuv tsis thooj li lwm leej lwm tus, xws li cov neeg ntxo luag tug, cov uas tsis ncaj tsis ncees, thiab tej neeg deev luag poj luag txiv.* Kuv kuj tsis zoo li tus neeg sau se ntawd thiab.
12 Xya hnub twg kuv ua kev cai yoo mov ob zaug. Txhua yam uas kuv khwv tau kuv muab ib feem kaum rau koj.’
13 Tiam sis tus neeg sau se sawv ib cag, nws twb tsis kav tsa qhov muag ntsia saum ntuj li. Tiam sis nws ntxhov siab heev, nws thiaj ntaus hauv siab thiab thov tias, ‘Aub Vajtswv, kuv yog neeg txhaum xwb, thov hlub* kuv.’
14 Kuv qhia nej tias, thaum tus neeg sau se no mus tsev, Vajtswv yeej suav tias nws ua ncaj dua tus Falixais. Rau qhov txhua tus uas tsab hwj chim yuav muab txo kom qis. Thiab tus uas txo hwj chim yuav muab tsa kom siab.”
15 Tib neeg txawm coj lawv tej me nyuam yaus tuaj cuag Yexus kom nws foom koob hmoov* rau cov me nyuam ntawd. Thaum cov thwj tim pom li no, lawv cem cov tib neeg.
16 Tiam sis Yexus hu cov me nyuam yaus los rau ntawm nws thiab hais tias, “Txhob cheem lawv, tso cov me nyuam los rau kuv. Vajtswv yuav pub nws lub Nceeg Vaj* rau cov uas zoo li tej me nyuam no ntag.
17 Kuv hais ncaj qha rau nej tias, tus uas lees yuav Vajtswv txoj kev kav* ib yam li tus me nyuam yaus thiaj mus tau rau hauv lub Nceeg Vaj* ntawd.”
18 Muaj ib tug nom txawm nug Yexus tias, “Tus Xib Hwb uas zoo, kuv yuav ua li cas kuv thiaj tau txoj sia mus ib txhis?”
19 Yexus teb nws tias, “Ua cas koj ho hais tias kuv zoo? Tsis muaj leej twg zoo, tsuas yog Vajtswv tib leeg thiaj zoo xwb.
20 Koj twb paub tej kev cai no lawm tias, ‘Txhob deev luag poj luag txiv,* txhob tua neeg, txhob ua tub sab, txhob ua cuav tim khawv, hwm koj niam koj txiv.’”
21 Tus nom teb tias, “Kuv yeej ib txwm coj tej kev cai no thaum yau los lawm.”
22 Thaum Yexus hnov li ntawd, nws hais rau tus nom tias, “Tseem tshuav ib yam koj tsis tau ua. Cia li muab tag nrho koj tej cuab txhiaj cuab tam muag es muab cov nyiaj pub rau cov pluag, koj thiaj khaws tau yam uas muaj nqis rau saum ntuj ceeb tsheej thiab los ua kuv ib tug thwj tim.”
23 Thaum tus nom hnov li no, nws nyuaj siab heev rau qhov nws nplua nuj kawg li.
24 Yexus tsa muag ntsia nws thiab hais tias, “Yeej tsis yooj yim rau cov muaj txiag nplua nuj nrhiav kev mus rau hauv Vajtswv lub Nceeg Vaj!*
25 Ib tug nees us* nkag lub qhov koob tseem yooj yim dua ib tug neeg nplua nuj nkag rau hauv Vajtswv lub Nceeg Vaj.”*
26 Cov uas hnov Yexus hais li no thiaj hais tias, “Yog li ntawd es leej twg thiaj yuav dim tau?”
27 Yexus teb tias, “Tej uas neeg ua tsis tau, Vajtswv yeej ua tau. Vajtswv ua tau txhua yam.”
28 Tiam sis Petus hais tias, “Peb twb tso peb tej qhov txhia chaw tseg los raws koj xwb.”
29 Yexus thiaj hais rau lawv tias, “Kuv hais ncaj qha rau nej li no, txhua tus uas tso poj niam me nyuam, tso niam tso txiv, tso kwv tso tij, tso vaj tso tsev tseg vim yog saib rau Vajtswv txoj kev kav*
30 yuav tau ntau npaug rau tiam no, thiab tiam* tom ntej nws yuav tau txoj sia ib txhis tsis kawg.”
31 Ces Yexus txawm coj 12 tug tub txib mus rau ib cag thiab hais rau lawv tias, “Peb tab tom yuav mus rau Yeluxalees mas txhua yam uas cov cev Vajtswv lus sau tseg txog neeg Leej Tub yuav muaj tiav.
32 Luag yuav muab nws cob rau lwm haiv neeg txhais tes. Lawv yuav thuam luag nws, ua saib tsis taus nws, thiab nto qaub ncaug rau nws.
33 Thaum lawv muab nws nplawm tas, lawv yuav muab nws tua pov tseg. Tiam sis peb hnub tom qab ntawd nws yuav ciaj sawv rov los.”
34 Thaum Yexus hais li ntawd tas, lawv tsis nkag siab rau qhov lub ntsiab tseem muab npog cia.
35 Thaum Yexus mus yuav txog Yelikaus, muaj ib tug yawg dig muag zaum ntawm ntug kev thov khawv.
36 Thaum nws hnov tib neeg coob coob dua kev, nws txawm nug tias, “Nej ua dab tsi?”
37 Lawv thiaj hais rau nws tias, “Yexus uas yog neeg Naxales tab tom dua kev mus.”
38 Nws thiaj tsa suab hlo hu tias, “Yexus! Daviv tus Xeeb Ntxwv’e! Thov hlub* kuv thiab lauj!”
39 Cov uas nyob tom hauv ntej cem kom nws ua twj ywm, tiam sis nws haj yam qw nrov tias, “Daviv tus Xeeb Ntxwv’e! Thov hlub* kuv thiab lauj!”
40 Yexus txawm nres kiag thiab kom luag coj tus yawg dig muag los rau ntawm nws. Yexus thiaj nug nws tias,
41 “Koj xav kom kuv ua dab tsi?” Nws teb tias, “Tus Tswv, thov kho kom kuv rov pom kev.”
42 Yexus thiaj hais rau nws tias, “Cia li pom kev. Twb yog koj ntseeg, koj thiaj zoo lawm.”
43 Nws txawm pom kev tam sim ntawd. Nws thiaj qhuas Vajtswv thiab nrog lawv raws Yexus qab mus. Thaum cov tib neeg pom li ntawd, lawv sawv daws kuj qhuas Vajtswv thiab.
Cov taw ntawv
^ Los sis “muaj kev ntseeg.”
^ Lo lus Kilis hais txog tus uas muaj txij nkawm tiam sis mus deev lwm tus. Mus saib Cov Lus Txhais.
^ Los sis “khuv leej.”
^ Lus Kilis yog “kov.”
^ Vajtswv lub Nceeg Vaj yog Vajtswv txoj kev kav los sis lub tseem fwv. Mus saib Cov Lus Txhais.
^ Lus Kilis yog “lub Nceeg Vaj.” Mus saib Cov Lus Txhais.
^ Vajtswv lub Nceeg Vaj yog Vajtswv txoj kev kav los sis lub tseem fwv. Mus saib Cov Lus Txhais.
^ Lo lus Kilis hais txog tus uas muaj txij nkawm tiam sis mus deev lwm tus. Mus saib Cov Lus Txhais.
^ Vajtswv lub Nceeg Vaj yog Vajtswv txoj kev kav los sis lub tseem fwv. Mus saib Cov Lus Txhais.
^ Yog ib tug tsiaj khoov pob uas tib neeg siv los thauj nra. Tej phau Vajlugkub muab tus tsiaj no hu ua ntxhuav. Mus saib lo lus “Nees us” hauv Cov Lus Txhais.
^ Vajtswv lub Nceeg Vaj yog Vajtswv txoj kev kav los sis lub tseem fwv. Mus saib lo lus “Vajtswv lub Nceeg Vaj” hauv Cov Lus Txhais.
^ Lus Kilis yog “lub Nceeg Vaj.” Mus saib Cov Lus Txhais.
^ Los sis “sim ceeb.” Mus saib Cov Lus Txhais.
^ Los sis “khuv leej.”
^ Los sis “khuv leej.”
