Lukas Sau 5:1-39
5 Muaj ib zaug thaum Yexus sawv ntawm lub Pas Dej Kenexales, muaj ib pab neeg coob coob txawm sib txiv qev los rau ntawm nws, los mloog Vajtswv Txoj Lus.
2 Nws txawm pom ob lub nkoj nres ntawm ntug pas dej. Tiam sis cov neeg nuv ntses tawm mus tsaug lawv cov vas tas lawm.
3 Nws thiaj nce mus rau hauv Ximoos lub nkoj thiab hais kom Ximoos muab lub nkoj nquam deb zog ntawm ntug. Ces Yexus txawm zaum hauv lub nkoj qhia cov neeg coob coob rau qhov ntawd.
4 Thaum Yexus qhia tas, nws hais rau Ximoos tias, “Nquam nkoj mus rau tom qhov uas tob tob es muab nej lub vas cuam rau hauv.”
5 Tiam sis Ximoos teb tias, “Xib Hwb peb twb ntaus ib hmos tsis tau ib tug li. Tiam sis kuv mam ua raws li koj hais.”
6 Thaum lawv ua li ntawd, lawv ntaus tau ntses ntau heev, ua rau lub vas ntuag rhe.
7 Lawv thiaj yoj teg rau cov phooj ywg uas nyob lwm lub nkoj kom los pab lawv. Thaum lawv los, lawv muab cov ntses ntim puv nkaus ob lub nkoj ua rau ob lub nkoj yuav luag tog.
8 Thaum Ximoos Petus pom li ntawd, nws txawm txhos caug ntua ntawm Yexus xub ntiag thiab hais tias, “Tus Tswv kuv yog neeg txhaum xwb, thov txhob los ze kuv.”
9 Tos Ximoos hais li ntawd los, lawv xav tsis thoob tias ua cas yuav ntaus tau ntses ntau ua luaj li.
10 Xenpedis ob tug tub Yakaunpaus thiab Yauhas los kuj xav tib yam li ntawd thiab. Nkawd yog Ximoos ob tug phooj ywg ntaus ntses. Tiam sis Yexus hais rau Ximoos tias, “Tsis txhob ntshai, txij no mus koj yuav mus nrhiav neeg ib yam li koj mus ntaus ntses.”
11 Lawv thiaj nquam nkoj rov los rau tim ntug. Lawv txawm tso txhua yam tseg thiab nrog Yexus mus lawm.
12 Muaj dua ib zaug thaum Yexus nyob hauv ib lub nroog, kuj muaj ib tug yawg mob ruas thoob ib ce nyob ntawd thiab. Thaum nws pom dheev Yexus, nws txawm khwb nkaus thov Yexus tias, “Tus Tswv, yog koj xav kho, koj yeej kho tau kuv zoo!”
13 Yexus cev loo tes mus tuav nkaus nws thiab hais tias, “Kuv xav los mas, cia li zoo hlo.” Tam sim ntawd nws tej ruas cia li zoo du lug lawm.
14 Yexus thiaj txwv tsis pub nws qhia rau leej twg thiab hais tias, “Cia li mus cuag cov pov thawj kom lawv tshuaj koj tus mob thiab muab khoom fij ua kev cai ntxuav raws li Mauxes tau hais lawd. Lawv thiaj pom tias koj zoo lawm tiag.”
15 Txawm li ntawd los, Yexus lub moo yim huab nrov ncha, thiaj muaj tib neeg coob coob tuaj mloog Yexus qhia thiab tuaj kom Yexus kho lawv tej mob tej nkeeg.
16 Tiam sis Yexus kheev mus thov Vajtswv rau tej qho chaw uas tsis muaj neeg.
17 Muaj ib hnub thaum Yexus tab tom qhuab qhia, cov Falixais thiab cov xib hwb qhia Kev Cai tuaj hauv tej zej zog hauv Kalilais, thiab hauv Yudias, thiab hauv Yeluxalees tuaj zaum ntawd mloog thiab. Thiab Vajtswv Yehauvas* muab hwj chim rau Yexus kho cov uas muaj mob.
18 Txawm muaj tib neeg kwv ib tug yawg tuag tes tuag taw saum txaj* tuaj txog ntawd. Lawv yuav kwv nws mus hauv tsev rau ntawm Yexus.
19 Vim muaj tib neeg coob heev, lawv txim tsis tau mus rau sab hauv. Lawv thiaj nce mus rau saum ru tsev. Lawv txawm muab ib co vuas tshem tawm. Lawv mam li muab tus yawg tuag tes tuag taw dauv hauv lub txaj los rau hauv nruab nrab cov neeg uas sawv ntawm Yexus xub ntiag.
20 Thaum Yexus pom tias lawv muaj kev ntseeg heev, nws thiaj hais rau tus yawg tuag tes tuag taw tias, “Kuv twb zam koj lub txim lawm.”
21 Ces cov xib hwb* thiab cov Falixais thiaj sib ntxhi tias, “Tus no yog leej twg es nws thiaj hais lus tuam mom Vajtswv? Tsuas yog Vajtswv thiaj zam tau neeg lub txim xwb los sad?”
22 Yexus twb paub tej uas lawv xav, nws thiaj teb lawv tias, “Ua cas nej thiaj xav li ko?
23 Leej twg los yeej hais tau tias, ‘Kuv zam koj lub txim lawm.’ Tiam sis leej twg yuav hais tau tias, ‘Cia li sawv tsees mus,’ es nws yuav sawv taus?
24 Kuv yuav ua kom nej paub tias neeg Leej Tub muaj hwj chim zam tau neeg lub txim hauv ntiaj teb no.” Yexus txawm hais rau tus yawg tuag tes tuag taw tias, “Cia li sawv tsees, kwv kiag koj lub txaj mus tsev.”
25 Nws txawm sawv tsees tab meeg sawv daws, nqa hlo nws lub txaj mus tsev thiab qhuas Vajtswv.
26 Txhua tus uas nyob ntawd xav tsis thoob li. Lawv thiaj pib qhuas Vajtswv thiab hais tshee hnyo tias, “Hnub no peb pom tej uas zoo tshaj plaws li!”
27 Tom qab ntawd Yexus txawm mus pom ib tug neeg sau se hu ua Levis, zaum ntawm lub rooj sau se. Yexus thiaj hais rau nws tias, “Cia li nrog kuv mus.”
28 Ces Levis txawm tso plhuav txhua yam tseg, sawv tsees nrog Yexus mus lawm.
29 Ces Levis txawm ua ib rooj noj loj heev rau Yexus hauv nws tsev. Muaj ib pab neeg sau se coob coob thiab lwm cov kuj tuaj nrog lawv noj thiab.
30 Vim li no cov Falixais thiab cov xib hwb thiaj pib yws Yexus cov thwj tim tias, “Ua cas nej tseem nrog cov neeg sau se thiab cov neeg muaj txim noj haus ua ke thiab?”
31 Yexus thiaj teb lawv tias, “Cov neeg tsis muaj mob yeej tsis mus cuag kws kho mob. Tsuas yog cov neeg muaj mob thiaj mus xwb.
32 Kuv tsis yog los nrhiav cov neeg ncaj ncees tiam sis kuv los nrhiav cov neeg muaj txim kom lawv hloov dua siab tshiab.”
33 Muaj ib txhia hais rau Yexus tias, “Yauhas cov thwj tim kheev yoo mov thiab taij thov Vajtswv. Cov Falixais cov thwj tim los kuj ua ib yam li ntawd thiab. Tiam sis koj cov thwj tim ho noj thiab haus tsis ua li lawv.”
34 Yexus thiaj hais rau lawv tias, “Thaum tus nraug vauv tseem nrog nws cov kwv luag nyob, tsis muaj leej twg yuav hais tau kom lawv yoo mov.
35 Tiam sis muaj ib hnub luag yuav coj tus nraug vauv mus, thaum ntawd lawv mam yoo mov.”
36 Yexus thiaj ua piv txwv qhia lawv tias, “Tsis muaj leej twg yuav muab daim ntaub tshiab los ntxiv lub tsho qub. Yog nws ua li ntawd ces daim tshiab yuav rub lub tsho ntuag, thiab daim tshiab yuav tsis phim lub tsho lawm.
37 Thiab tsis muaj leej twg yuav muab cov cawv txiv hmab tshiab tsau hauv lub hnab tawv qub. Yog nws ua li ntawd ces lub hnab tawv qub yuav tawg ces cov cawv txiv hmab yuav paim tag. Lub hnab tawv kuj puas tsuaj lawm thiab.
38 Tiam sis yuav tsum muab cov cawv txiv hmab tshiab tsau hauv lub hnab tawv tshiab xwb.
39 Yog leej twg twb tau haus cov cawv txiv hmab laus* lawd ces nws yeej tsis xav haus cov cawv txiv hmab tshiab, rau qhov nws hais tias, ‘Cov cawv txiv hmab laus qab dua.’”
Cov taw ntawv
^ Mus saib Cov Lus Txhais.
^ Lub txaj no yog ib daim ntaub uas khi rau ob tug tab kwv neeg mob.
^ Los sis “xib hwb qhia Vajtswv kev cai.” Mus saib Cov Lus Txhais.
^ Los sis “qub.”
