Lukas Sau 9:1-62
-
Yexus qhia nws 12 tug tub txib mus tshaj tawm (1-6)
-
Yexus ua rau Helauj tsis pom qab xav (7-9)
-
Yexus pub mov rau 5,000 leej noj (10-17)
-
Petus paub tus Khetos (18-20)
-
Yexus qhia tias nws yuav raug tua (21-22)
-
Tus tseem thwj tim (23-27)
-
Yexus hloov kiag ci ntsa iab (28-36)
-
Yexus kho tus tub raug dab (37-43)
-
Yexus rov qhia tias nws yuav raug tua (43-45)
-
Cov thwj tim sib cav tias leej twg loj dua (46-48)
-
Tus uas tsis thuam koj, yeej tuaj koj tog (49-50)
-
Ib lub zos Xamalis tsis kam tos txais Yexus (51-56)
-
Yuav caum Yexus li cas (57-62)
9 Ces Yexus hu nws 12 tug tub txib los. Yexus pub hwj chim rau lawv ntiab tau dab tawm thiab kho tau mob zoo.
2 Nws thiaj txib lawv mus tshaj tawm txog Vajtswv txoj kev kav* thiab kho tib neeg tej mob zoo.
3 Yexus hais rau lawv tias, “Txhob nqa dab tsi mus, txhob nqa pas nrig, txhob khuam hnab thoob puab, txhob ntim mov, txhob nqa nyiaj, thiab txhob nqa khaub ncaws hloov.
4 Thaum nej mus hauv ib lub nroog twg, yim twg hu nej mus so hauv lawv tsev, cia li nyob hauv mus txog thaum nej qhia thoob lub nroog ntawd.
5 Thiab yog cov neeg hauv ib lub nroog twg tsis kam tos txais nej ces thaum nej mus lwm qhov cia li nchos tej hmoov av uas lo nej ko taw tseg kom ua tim khawv tias twb muaj neeg ceeb toom lawv lawm.”
6 Ces lawv txawm sawv kev mus thoob tej zej zos txhua qhov, mus tshaj tawm txoj xov zoo thiab kho tib neeg tej mob.
7 Lub sij hawm no Helauj* yog tus kav cheeb tsam Kalilais. Thaum nws hnov txog tej no, nws tsis pom qab xav vim ib txhia hais tias ntshe yog Yauhas sawv hauv qhov tuag rov los lawm,
8 ib txhia ho hais tias yog Eliyas ntag, lwm cov ho hais tias yog ib tug cev Vajtswv lus txheej thaum ub sawv rov los.
9 Helauj hais tias, “Kuv twb muab Yauhas txiav caj dab lawm, tus uas ua tej no ho yog leej twg?” Helauj thiaj xav pom tus ntawd heev.
10 Thaum cov tub txib rov los txog, lawv qhia txhua yam uas lawv tau ua rau Yexus. Yexus thiaj coj lawv twj ywm mus rau ib lub nroog hu ua Npexedas.
11 Thaum cov neeg coob coob pom li ntawd lawv thiaj caum Yexus qab. Yexus zoo siab hlo tos txais lawv thiab nws pib qhia lawv txog Vajtswv txoj kev kav.* Nws kuj kho cov neeg muaj mob zoo.
12 Thaum yuav tsaus ntuj, nws 12 tug tub txib txawm los hais rau nws tias, “Tso lawv mus, lawv thiaj mus nrhiav tau noj thiab chaw so hauv tej zej zog, rau qhov peb nyob deb zos lawm.”
13 Tiam sis Yexus hais rau lawv tias, “Nej kuj muab mov rau lawv noj.” Lawv teb tias, “Peb twb tsis muaj dab tsi li, tsuas tshuav tsib lub ncuav thiab ob tug ntses xwb. Tsis li ces peb mam li mus yuav mov rau cov tib neeg no noj.”
14 Cov txiv neej xwb, muaj li 5,000 leej. Yexus hais rau nws cov thwj tim tias, “Hais kom lawv zaum ua tej pab tej pawg, ib pab 50 leej.”
15 Cov thwj tim thiaj ua li ntawd ces sawv daws txawm zaum li nws hais.
16 Yexus muab tsib lub ncuav thiab ob tug ntses los ces nws tsa muag ntsia saum ntuj ua Vajtswv tsaug. Nws txawm muab ntais thiab muab rau nws cov thwj tim coj mus faib rau sawv daws.
17 Lawv txhua tus noj tsau npo. Cov thwj tim khaws cov uas seem, tau 12 tawb puv nkaus.
18 Tom qab ntawd, thaum Yexus nyob ib leeg thov Vajtswv, nws cov thwj tim txawm los cuag nws. Ces Yexus nug lawv tias, “Luag tej hais tias kuv yog leej twg?”
19 Lawv teb li no, “Ib txhia hais tias koj yog Yauhas tus muab neeg ua kev cai raus dej. Lwm cov hais tias koj yog Eliyas. Tseem muaj dua lwm cov hais tias koj yog ib tug cev Vajtswv lus txheej thaum ub sawv rov los.”
20 Ces Yexus txawm nug lawv tias, “Es nej ne, nej ho hais tias kuv yog leej twg?” Petus teb tias, “Koj yog tus Khetos uas Vajtswv txib los.”
21 Yexus txwv kom tsis txhob qhia tej no rau leej twg paub.
22 Nws qhia lawv tias, “Neeg Leej Tub yuav tsum raug kev txom nyem ntau yam. Cov txwj laus, cov pov thawj hlob, thiab cov xib hwb* yuav tsis lees nws thiab luag yuav muab nws tua pov tseg. Tiam sis peb hnub tom qab nws yuav ciaj sawv rov los.”
23 Yexus thiaj hais rau sawv daws tias, “Yog leej twg xav nrog kuv mus, tus ntawd yuav tsum tsis txhob ua raws li nws lub siab nyiam. Nws yuav tsum niaj hnub kwv nws tus ncej ntoo* raws kuv qab mus li.
24 Tus uas khuv xim nws txoj sia yuav tsis tau txoj sia, tiam sis tus uas yeem tso nws txoj sia tseg rau kuv, tus ntawd yog tus uas yuav cawm tau nws txoj sia.
25 Yog leej twg tau txhua yam hauv lub qab ntuj no tiam sis tsis tau txoj sia, los sis nws ua rau nws lub neej puas tsuaj tas lawd ces yuav muaj qab hau dab tsi?
26 Yog leej twg tseem txaj muag lees kuv thiab kuv tej lus ces thaum Leej Txiv pub hwj chim rau neeg Leej Tub nrog cov tub txib saum ntuj uas dawb huv los ces neeg Leej Tub kuj yuav txaj muag lees tus neeg ntawd thiab.
27 Tiam sis kuv hais ncaj rau nej tias, qee tus ntawm no yuav pom Vajtswv txoj kev kav* ua ntej lawv lub neej dua mus.”
28 Ua cas yim hnub tom qab Yexus hais cov lus ntawd xwb nws txawm coj Petus, Yauhas, thiab Yakaunpaus nrog nws mus thov Vajtswv saum roob.
29 Thaum Yexus tab tom thov Vajtswv, nws lub ntsej muag hloov kiag thiab nws cev tsoos tsho dawb paug ci ntsa iab.
30 Ua ciav txawm muaj ob tug txiv neej nrog nws tham, ib tug yog Mauxes hos ib tug yog Eliyas.
31 Nkawd tshwm los muaj hwj chim ci ntsa iab. Nkawd tham txog lub caij uas Yexus yuav ncaim mus. Tej no tseem yuav muaj tiav rau hauv Yeluxalees.
32 Lub sij hawm no Petus lawv tsaug zog heev. Tiam sis thaum lawv tsim los, lawv pom Yexus lub hwj chim ci ntsa iab thiab ob tug txiv neej nrog nws sawv ntawd.
33 Thaum nkawd yuav ncaim Yexus mus, Petus txawm hais rau Yexus tias, “Xib Hwb, zoo siab kawg li uas peb tuaj rau ntawm no. Cia peb tsa peb lub tsev pheeb suab rau nej, ib lub rau koj, ib lub rau Mauxes, ib lub rau Eliyas.” Tiam sis Petus twb tsis ras txog tej uas nws hais ntawd.
34 Thaum nws tab tom hais li ntawd, ua ciav txawm muaj ib tauv huab los roos nkaus lawv. Thaum cov huab los laum kiag lawv, ua rau lawv ntshai kawg li.
35 Ces muaj ib lub suab hais hauv tauv huab tuaj tias, “Tus no yog kuv tus Tub, tus uas kuv xaiv tseg. Cia li mloog nws lus.”
36 Thaum lub suab tab tom hais li ntawd ua ciav pom Yexus tib leeg lawm xwb. Tiam sis lawv ua twj ywm rau ncua sij hawm ntawd, tsis qhia tej uas lawv pom no rau leej twg li.
37 Hnub tom qab thaum Yexus lawv nqes saud los, ib pab neeg coob coob tuaj cuag Yexus.
38 Ua ciav txawm muaj ib tug yawg hu hauv pab neeg coob coob tuaj tias, “Xib Hwb, thov koj los pab kuv tus tub, vim kuv muaj tib tug tub xwb.
39 Thaum tus dab tswj nws, ua rau nws qw nrov nrov thiab ua rau nws vau hlo rau hauv pem teb huam ib tshaj ib tshaj npuas ncauj nto plaws, nws ua rau tus me nyuam doog ntsuab tas nws mam li tawm mus xwb.
40 Kuv thov koj cov thwj tim ntiab tus dab tawm tiam sis lawv ntiab tsis tau.”
41 Yexus thiaj teb tias, “Tiam neeg siab phem tsis muaj kev ntseeg, kuv yuav nrog nej nyob mus txog tav twg thiab ua siab ntev rau nej mus txog thaum twg? Coj koj tus tub los tom no.”
42 Thaum tus me tub tab tom los, tus dab ua rau nws vau kiag rau hauv pem teb huam kiag ib tshaj. Yexus thiaj ua tawv tawv rau niag dab* ces Yexus mam kho tus me tub zoo thiab coj nws rov mus rau nws txiv.
43 Thaum lawv pom Vajtswv lub hwj chim loj kawg nkaus, lawv xav tsis thoob li.
Thaum lawv tseem xav tsis thoob txog tej uas Yexus ua ntawd, Yexus hais rau nws cov thwj tim tias,
44 “Ua tib zoo mloog, nej thiaj nco ntsoov tej lus no. Luag yuav ntxeev siab rau neeg Leej Tub thiab yuav muab nws cob rau nws cov yeeb ncuab txhais tes.”
45 Tiam sis cov thwj tim tsis nkag siab tej uas nws hais no, rau qhov tau muab lub ntsiab npog cia lawm. Txawm li ntawd los, lawv tsis muaj cuab kav nug ib los li.
46 Ces cov thwj tim txawm sib cav tias leej twg yog tus loj dua.
47 Yexus paub tej uas lawv xav hauv nruab siab, nws thiaj coj ib tug me nyuam yaus los sawv ntawm nws ib sab
48 thiab hais rau lawv tias, “Tus uas tos txais tus me nyuam yaus no vim yog hwm kuv lub npe, twb yog nws tos txais kuv. Thiab tus uas tos txais kuv yog nws tos txais tus uas txib kuv los thiab. Rau qhov tus uas yau dua ntais hauv nej, thiaj li yog tus uas loj.”
49 Ces Yauhas hais tias, “Xib Hwb, peb pom ib tug yawg tuav koj lub npe ntiab dab, tiam sis peb cheem nws rau qhov nws tsis yog peb pab.”
50 Tiam sis Yexus hais rau nws tias, “Txhob cheem nws. Tus uas tsis thuam koj, nws yeej tuaj koj tog.”
51 Thaum ze zuj zus lub caij uas Vajtswv yuav coj Yexus mus saum ntuj, Yexus yeej tsis cia ib yam dab tsi tav nws txoj hau kev mus rau hauv Yeluxalees.
52 Ces Yexus thiaj txib neeg ua nws ntej mus. Lawv thiaj mus npaj tos nws rau hauv cov Xamalis ib lub zos.
53 Tiam sis cov neeg hauv lub zos tsis kam tos txais Yexus rau qhov lawv paub tias nws npaj siab yuav mus rau Yeluxalees.
54 Thaum Yexus ob tug thwj tim Yakaunpaus thiab Yauhas nkawd pom li no nkawd hais tias, “Tus Tswv, koj puas kam wb hu hluav taws poob saum ntuj los kub lawv huv tib si?”
55 Tiam sis Yexus tig hlo los txwv nkawd.
56 Lawv thiaj mus rau lwm lub zos lawm.
57 Thaum lawv tab tom taug kev mus, txawm muaj ib tug hais rau Yexus tias, “Koj mus qhov twg los kuv yuav nrog koj mus.”
58 Tiam sis Yexus teb nws tias, “Tej hma muaj qhov nkaum thiab tej noog saum nruab ntug los muaj zes tiam sis neeg Leej Tub tsis muaj lub chaw so li.”
59 Ces Yexus hais rau ib tug yawg tias, “Cia li nrog kuv mus.” Tiam sis nws teb tias, “Tus Tswv, tos kuv txiv dua tso,* kuv mam nrog koj mus.”
60 Yexus hais rau nws tias, “Cia cov tuag mam faus cov tuag. Tiam sis koj cia li mus tshaj tawm txog Vajtswv txoj kev kav* rau txhua qhov.”
61 Muaj dua ib tug ho hais tias, “Tus Tswv, kuv yuav nrog koj mus tiam sis thov cia kuv mus hais kuv tsev neeg paub tso.”
62 Yexus hais rau nws tias, “Yog leej twg tab tom tuav tus khais laij teb es pheej tig saib qab, yeej tsis tsim nyog tus ntawd tau Vajtswv lub Nceeg Vaj.”*
Cov taw ntawv
^ Lus Kilis yog “lub Nceeg Vaj.” Mus saib Cov Lus Txhais.
^ Uas yog Helauj Atipas. Mus saib Cov Lus Txhais.
^ Lus Kilis yog “lub Nceeg Vaj.” Mus saib Cov Lus Txhais.
^ Los sis “xib hwb qhia Vajtswv kev cai.” Mus saib Cov Lus Txhais.
^ Tus ncej ntoo piv txog tej kev tsim txom uas Yexus cov thwj tim yuav raug. Mus saib Cov Lus Txhais.
^ Lus Kilis yog “lub Nceeg Vaj.” Mus saib Cov Lus Txhais.
^ Lus Kilis yog “plig tsis huv.” Mus saib lo lus “Dab” hauv Cov Lus Txhais.
^ Lus Kilis yog “tos kuv log kuv txiv tso.”
^ Lus Kilis yog “lub Nceeg Vaj.” Mus saib Cov Lus Txhais.
^ Vajtswv lub Nceeg Vaj yog Vajtswv txoj kev kav los sis lub tseem fwv. Mus saib Cov Lus Txhais.
